Bas tahun berikutna lit pengumumen man keluarga Betel. Perban lit mesin cetak si mbaru i kantor cabang Afrika Selatan, iperluken relawan si nggit ngelayani i je. Kudaftarken gelarku janah ipilih aku. Meriah kel ukurku. Selain si e, lit telu senina arah Betel Kanada si ipilih eme Dennis Leech, Bill McLellan, ras Ken Nordin. Ipebetehken man kami maka ndekah pagi kami ngelayani i Afrika Selatan.

Mis kutelpon mamakku janah kukataken maka pindah ateku ku Afrika Selatan. Mamakku kalakna persinik. Emaka sanga kutelpon ia labo ia mbue ngerana. Tapi kuteh maka paguh kinitekenna janah tek aku pasti dukungna aku. Memang sedih bapak ras mamakku perban arus aku lawes ku ingan si ndauh, tapi labo ilarang kalak e aku lawes.

Sope berkat ku Afrika Selatan, ku Betel Brooklyn lebe kami empatna. Bas ingan e, ilatih kami telu bulan dekahna kerna cara nggunaken mesin cetak si galang. Kenca si e, berkat kami naik kapal kargo ku Cape Town, Afrika Selatan. Paksa si e umurku 20 tahun denga. Kenca seh kami i Cape Town, karabenna naik kereta api kami ku Johannesburg. Perdalanen e ndauh, janah sanga nandangi terang sempat kami ngadi i sada kota si kitik bas gurun pasir Karoo. Melas kel bas ingan e ras mbue abu. Sanga tatap kami ku darat arah jendela, mamang ate kami perban lenga pernah idah kami ingan si bage. Dungna kuatir kami kerna tugas kami si mbaru. Bas pudi wari sanga dahi kami ka kota e teh kami maka kota e meriah janah mekacar kalakna.

Piga-piga tahun dekahna, dahinku eme nggunaken mesin Linotype. Mesin e luar biasa tapi rumit janah mesin e me si ipake guna ncetak majalah Sora Ermomo ras Perdiatekenlah! Kantor cabang i Afrika Selatan ncetak majalah man negara-negara bas Afrika. Meriah kel ukur kami perban mesin cetak e erguna man enterem kalak.

Bas pudi wari aku ngelayani i Kantor Percetaken. I je aku nampati bas dahin si lit hubungenna ras percetaken, penerjemahen, ras ngirimken publikasi. Amin pe aku sibuk, tapi puas kuakap.

Bas tahun 1968 erjabu aku ras Laura Bowen, sekalak perintis si tading i deher Betel. Nampati ka ia jadi tukang ketik bas Departemen Penerjemahen. Sanga si e, pasangen si mbaru erjabu biasana lanai ngelayani i Betel. Emaka, kami itugasken jadi perintis istimewa. Lit kang sitik perbiarku, perban sedekah sepuluh tahun aku ngelayani i Betel, pangan ras ingan tading lalap isikapken. Tapi gundari pergantian ongkos si dat kami 25 rand (kira-kira 500 ribu) ngenca tiap bulan. Banci dat kami pergantian ongkos e adi seh jumlah jam dinas, ndahi mulihi, ras buku-buku si itetapken. Sen e arus bias guna nggalari sewa rumah, nukur pangan, biaya ku jah ku je, bage pe biaya kesehaten ras si debanna.

Kami itugasken ku kelompok si kitik i deher kota Durban. Melala kel kalak India bas kota e, perban kira-kira tahun 1800-en melala kalak India si reh ku Afrika Selatan guna erdahin i kebun tebu. Tapi gundari enggo erbage-bage dahin kalak e. Kalak India si tading i Afrika Selatan tetap denga ipertahankenna budayana ras makanan khasna, misalna erbage-bage jenis kari si ntabeh. Selain si e, perban kalak e beluh bahasa Inggris la perlu pelajari kami bahasa si mbaru guna erberita man kalak e.

Paksa si e, sekalak perintis istimewa iarapken gelah erberita silang-langna 150 jam tiap bulan. Emaka iban kami rencana guna erberita enem jam tiap wari. Cuaca bas ingan e melas janah udarana lembap. Lenga lit kalak si banci idahi kami mulihi ntah pe si erlajar Pustaka ras kami, emaka arus kami erberita arah rumah ku rumah enem jam dekahna. Kenca piga-piga waktu erberita, kunen jamku, kepeken 40 menit denga kami erberita. Emaka rukur aku, ‘Banci nge dat kami jumlah jam dinas si itetapken?’

Mis ban kami penyesuaien. Tiap wari baba kami pangan ras kopi sanga erberita. Sanga istrahat kami, parkirken kami motor kami i teruh batang kayu. Mon-mon lit anak-anak kalak India si reh ndeheri kami janah mamang atena perban idahna beda warna kulit kami. Kenca piga-piga wari, enggo mulai meriah akap kami erberita bas ingan e janah la gejap waktu erdalan.

Meriah akap kami ncakapken kebenaren si lit bas Pustaka man kalak bas daerah kami. Jumpa kami ras kalak si nggit ngergai, mekacar, ras keleng atena Dibata. Melala kalak Hindu si nggit megiken berita si meriah si peseh kami man kalak e. Meriah akap kalak e erlajar kerna Jahwe, Jesus, Pustaka, doni si mbaru, ras arapen man kalak mate. Kenca setahun kami ngelayani i je, lit 20 kalak si erlajar Pustaka ras kami. Ras-ras kami man radu ras keluarga si erlajar e janah ganti-ganti tiap wari.

Rempet itugasken aku jadi pertua keliling. Kami ngelayani bas erbage daerah i gedang-gedang pantai Samudra Hindia. Emaka tiap minggu, nginap kami i rumah salah sada turang senina, kerja sama ras perberita, janah mpegegehi turang senina si lit i je. Bagi keluargana iban kalak e kami. Meriah kap kami ras kalak e, ras anak-anakna, bage pe main-main ras asuh-asuhen kalak e. La gejap enggo dua tahun. Rempet ka pindo kantor cabang kami mulihi ngelayani i Betel. Situhuna meriah kel kap kami ngelayani bas ingan e. Tapi nggit kami ngelayani ku ja pe kami itugasken.

Sanga mulihken kami ku Betel, aku ngelayani bas Departemen Dinas. Meriah kuakap banci kerja sama ras turang senina si enggo mbue pengalamenna. Paksa si e, kenca enggo dung dahi pertua keliling sada runggun, kirimna laporen kerna runggun e ku kantor cabang. Kenca si e, kirim Departemen Dinas surat ku runggun e. Tujun surat e eme guna mpegegehi ras mereken petunjuk. Laporen arah pertua keliling biasana itulis bas bahasa Xhosa, Zulu, ntah pe bahasa si deban si lit i Afrika. Emaka sekertaris-sekertaris bas  Departemen Dinas arus kerja keras guna nerjemahken laporen e ku bahasa Inggris. Dung e, surat si nandangi ikirim Departemen Dinas ku sada runggun arus ka terjemahken kalak e arah bahasa Inggris ku bahasa si ipake runggun e. Kuergai kel kerja keras kalak e. Perban penampat kalak e banci kuangkai uga serana tentangen si arus iadapi turang seninata si mbiring kulitna si tading i Afrika.

Paksa si e, pemerentahen Afrika Selatan la berena kalak si beda suku tading ras-ras. Tiap suku arus tading bas daerahna masing-masing. Emaka, kalak si beda suku la banci rusur ras. Turang seninata si mbiring kulitna ngerana, erberita, janah pulung bas bahasana.

Paksa si e, la mbue kutandai turang senina si mbiring kulitna perban aku itugasken ku runggun bahasa Inggris. Tapi gundari enggo melala kutandai turang senina si mbiring kulitna janah banci kupelajari budaya ras kebiasan kalak e. Kalak e ipaksa ngikutken tradisi ras kiniteken si la cocok menurut Pustaka, termasuk si lit hubungenna ras ilmu gaib. Perban la kalak e nggit ngikutken si e kerina, kalak e itentang keluargana ras kalak si lit i sekelilingna. Tapi tetap kalak e pang ngadapisa. Selain si e, kalak si mbiring kulitna si tading i kuta biasana mesera pergeluhna. Mbue ka si la banci sekolah. Tapi ergai kalak e kel Pustaka.

Pernah aku itugasken ngurus piga-piga kasus hukum si lit hubungenna ras kenetralen secara politik ras kebebasen beragama. Melala anak-anak Saksi si ipedarat arah sekolah perban kalak e la nggit ertoto ras-ras bage pe ngendeken lagu kebangsan. Reh paguhna kinitekenku ngidah kesetian ras sipat kalak e si perpang.

Bas Eswatini eme negara si kitik i Afrika si mbarenda igelari Swaziland, pernah iadapi turang seninata tentangen si mberat. Sanga Raja Sobhuza II mate, kerina kalak si lit i je ipaksa ngikutken sada tradisi. Kerina dilaki arus cukurna bukna ngasa keri, janah kerina diberu ipaksa motong bukna gelah gendek. Melala turang senina si ianiaya perban la nggit ngikutken tradisi e, perban tradisi e iban guna nembah kalak si enggo mate.  Kesetian kalak e kena kel ku pusuh kami. Melala usihen kerna sipat megenggeng ras kesetian si dat kami arah turang senina i Afrika.

Bas tahun 1981, itugasken ka aku ku bagin percetaken. Paksa si e, bagin percetaken enggo reh majuna janah lebih modern. Itawarken sekalak sales man kantor cabang guna ncubaken mesin phototypesetter janah la perlu nggalar. Enda erban dahin bas percetaken reh terna. Dungna, iganti kami siwah mesin Linotype jadi lima mesin phototypesetter si mbaru. Dat kami ka mesin cetak si mbaru. Emaka reh buena buku-buku si banci cetak kami.

Perban teknologi si reh majuna banci pake kami Sistem Penerbitan Elektronik Multibahasa (MEPS) guna nyusun hurup-hurup bas buku si nandangi icetak. Cara e ndauh teren asangken mesin Linotype ras mesin cetak si kupake ras telu temanku sanga mbaru denga kami seh i Afrika Selatan. (Jes. 60:17) Sanga MEPS igunaken, kami empatna enggo erjabu ras perintis-perintis si paguh kinitekenna. Aku ras Bill ngelayani denga i Betel. Ken ras Dennis enggo lit anakna.

Paksa si e mbue dahin i kantor cabang. Buku-bukuta reh buena iterjemahken ras icetak bas erbage-bage bahasa. Arus ka kirim kami ku kantor-kantor cabang si deban. Emaka, perlu komplek Betel si mbaru si terbelangen. Dungna ibangun senina-senina komplek Betel si mbaru la ndauh arah Johannesburg nari. Bas tahun 1987 itahbisken me komplek Betel e. Meriah ukurku banci ikut bas kerina pendahin e bage pe ngelayani jadi Panitia Cabang i Afrika Selatan piga-piga tahun dekahna.

Bas tahun 2001, sengget aku sanga kualoken undangen guna ngelayani jadi Panitia Cabang i Amerika Serikat. Sedih kap kami perban arus sirang ras teman-teman bage pe nadingken tugas kami i Afrika Selatan. Tapi lanai kami sabar guna ngelayani ras keluarga Betel i Amerika Serikat.

Situhuna sempat kami kuatir, perban arus kami tading bas ingan si ndauh arah mamiku si enggo metua. Sanga kami tading i New York, la mbue si banci lakoken kami bas nampati ia. Tapi ngata bujur kel kami perban lit telu senina Laura si nggit ngurus mami. Nina kalak e, “Kami la banci ngelayani sepenuh waktu. Tapi adi kami si ngurus mamak, banci kena terus ngelayani sepenuh waktu.” Ngata bujur kel kami bas penampat kalak e.

Ngata bujur ka kami man abangku ras diberuna si tading i Toronto, Kanada. Kalak e si ngurus mamakku si enggo janda. Enggo lebih 20 tahun dekahna mamak tading ras kalak e janah mate ia la ndekah kenca kami pindah ku New York. Ngata bujur kami perban nggit keluarga kami erban penyesuaien guna ngurus orang tua kami, amin pe labo menukah!

Sanga bas kantor cabang Amerika Serikat, piga-piga tahun dekahna aku ngelayani i bagin percetaken janah gundari bas Departemen Pembelian. Meriah kel kuakap perban enggo lit 20 tahun aku ngelayani bas kantor cabang si seh galangna enda. I jenda lit kira-kira 5.000 anggota keluarga Betel janah lit kira-kira 2.000 si nampati Betel.

Adi kuinget-inget mulihi 60 tahun si lewat, la kusangka banci kudat kerina pasu-pasu e. Lalap dukung Laura aku alu bulat ukur. Puas kel kuakap geluhku. Meriah ukur kami banci ndahiken erbage-bage tugas bage pe kerja sama ras turang senina si paguh kinitekenna, termasuk si ngelayani bas kantor-kantor cabang si dahi kami. Perban umurku gundari enggo lebih 80 tahun, pendahinku ikurangi perban melala turang senina si nguda denga si banci nampatisa.

Nina Pustaka, “Ermeriah ukurlah bangsa si Jahwe Dibatana.” (Ms. 33:12) Enggo kugejapken maka kata-kata e tuhu. Ngata bujur kel aku perban banci ngelayani Jahwe radu ras umatNa si ermeriah ukur.