Ate Jahwe gelah kalak si erjabu ermeriah ukur janah hubungen kalak e si rembak tahan min rasa lalap. (Mat. 19:4-6) Adi erjabu atendu, uga carana ndatken teman geluh si mehuli? Selaku Pencipta, banci sampati Jahwe pasangen si sangana ngerondong bage pe si enggo erjabu. Emaka adi pakendu prinsip-prinsip arah Jahwe, banci kam tuhu-tuhu ermeriah ukur. Perdiatekenlah piga-piga prinsip enda.

Si pertama, perlu siteh maka “pusuh manusia liciken asangken kai pe janah nekat.” (Jer. 17:9) Sanga dua kalak si atena erjabu jumpa janah mulai kalak e ngerondong, banci nukah kalak e terbawa perasan. Adi e si terjadi, pasti mesera akap kalak e erban keputusen si mehuli. Selain si e, adi alasen utama kalak e erjabu perban perasan, banci kari kalak e sakit hati ntah pe kecewa. (Kua. 28:26) E me sebapna maka dua kalak si sangana ngerondong perlu lebe tuhu-tuhu sitandan sope ndauhsa cidahkenna perasanna ntah pe banna janji si serius.

Nina Kuan-kuanen 22:3, “Kalak cerdik cebuni adi idahna bahaya,tapi kalak si la erpengalamen teruskenna erdalan dungna datna akibatna.” Jadi, kai nge bahayana adi sigunaken situs ndarami jodoh? Piga-piga kalak sitandan arah Internet, jenari mulai kalak e ngerondong. Tapi bas pudi wari, kecewa kalak e perban ibuali. Selain si e, lit ka kalak si la jujur si la katakenna uga ia situhuna guna nipu kalak gelah banci datna mbue sen. Mon-mon kalak si bage ngaku ka ia sekalak Saksi Jahwe.

Cuba ukuri bahaya si debanna. Piga-piga situs guna ndarami jodoh make program komputer guna mpersada dua kalak si teridah cocok. Tapi la lit buktina maka program komputer e banci terteki. Arusna la kita tek man program komputer si iban manusia guna nampati kita erban keputusen si penting, misalna ndarami teman geluh. Pedah-pedah arah Pustaka ndauh ulin asangken program komputer si bage.​—Kua. 1:7; 3:5-7.

 Pedah bas Kuan-kuanen 14:15 ngataken, “Kalak si la erpengalamen, tek man kerina ranan, tapi kalak si cerdik, ukurina tiap langkahna.” Sope banndu keputusen maka sekalak jelma cocok jadi teman geluh si mehuli, perlu lebe tuhu-tuhu tandaindu ia. Tapi mesera ngelakoken si e adi arah Internet. Amin pe banci siteh informasi kerna kalak si deban janah ngerana-ngerana kita ras ia arah Internet, e labo mbuktiken maka enggo tuhu-tuhu sitandai ia. Lit kalak si akapna enggo jumpa ia ras kalak si atena ngena, tapi sengget ia sanga langsung kalak e jumpa.

Nina Pustaka, “La aku erteman ras penipu, la aku nggit ndeher ras kalak si bunikenna ise ia situhuna.” (Ms. 26:4) Melala kalak si erpengakap maka labo salah namaken informasi si la tuhu bas Internet, si penting menarik kap kalak. Banci jadi la banna teridah sipat aslina ntah pe sipat e la banna teridah sanga ia chatting ras kalak si deban. Lit ka piga-piga kalak si banci saja ngaku ia Saksi Jahwe. Tapi tuhu nge ia Saksi Jahwe si enggo iperidiken? Paguh nge kinitekenna? Ndeher nge ia ras Jahwe? Mehuli nge gelarna bas runggun? Jadi usihen nge ia ntah teman “si la mehuli”? (1 Kor. 15:33; 2 Tim. 2:20, 21) Selain si e, menurut Pustaka bebas nge ia erjabu? Perlu pastikenndu kerina e. Nukah ngelakoken si e adi datndu informasi arah turang senina si tuhu-tuhu nandai ia. (Kua. 15:22) Situhuna, umat Jahwe si setia labo pernah nggit erjabu ras kalak si la sada kiniteken.​—2 Kor. 6:14; 1 Kor. 7:39.

Perban nggunaken situs ndarami jodoh e bahaya, pangen sigunaken cara si terulin bas ndarami ras nandai kalak si banci jadi teman geluhta. Misalna, sanga kita pulung ras turang seninata. Banci kita sitandan ras turang seninata bas acara perpulungen, pertemuan wilayah, pertemuan regional, ras acara si debanna.

Tapi perban la kita banci pulung ras-ras sedekah pandemi virus corona enda, kita pulung nggunaken video-conference. I je lit kesempatenndu nandai turang senina si lajang denga. Banci idahndu uga ia bas perpulungen janah tehndu uga kinitekenna arah komentar si pesehna. (1 Tim. 6:11, 12) Banci ka kam ngerana-ngerana ras ia bas breakout room kenca perpulungen. Selain si e, sanga lit acara ramah tamah secara online, banci ka tehndu uga situhuna sipat kalak si ngena atendu e alu ngenen carana erurusen ras kalak si deban. (1 Pet. 3:4) Perlu tandaindu lebe ia. Alu bage, tehndu seri ntah lang cita-cita kena, cocok ntah lang sipat-sipat kena.

Adi kalak si lenga erjabu make pedah-pedah arah Pustaka guna nampati ia ndarami teman geluh, mbelin kemungkinenna ermeriah ukur pagi perjabunna. Enda sesuai ras kata-kata Pustaka si ngataken, “Kalak si ndatken ndehara [ntah perbulangen] si mehuli, ndatken keriahen ukur, janah jadi ate Jahwe ngidah ia.”​—Kua. 18:22.