1. Kai peraten Jahwe?

 ATE Jahwe berita si meriah kerna Kerajan Dibata iberitaken seh ku belang-belang doni. (Mrk. 13:10; 1 Tim. 2:3, 4) Enggo bereken Jahwe dahin e man banta. Penting kel dahin e. Emaka ipilihNa anakNa Jesus si minpin dahin e. Jesus kap peminpin si mehulina. Tek kita maka ope reh kedungen jaman enda, dahin e pasti pagi dung sesuai ras peraten Jahwe.​—Mat. 24:14.

2. Kai kari sibahas bas artikel enda?

² Bas artikel enda, sibahas kari kai si ilakoken Jesus arah “budak si setia ras pentar” guna nikapken pangan rohani, ras ngaturken pengikutna bas dahin erberita si luar biasana segedang sejarah. (Mat. 24:45) Sibahas ka kari uga kita banci ndukung Jesus ras budak si setia.

3. Kai nge kuasa si ibere man Jesus?

³ Jesus kap si minpin dahin erberita. Uga maka banci kita tek kerna si e? La ndekah sope Jesus nangkih ku surga, jumpaina deba muridna si setia bas sada gunung i Galilea. Bagenda nina man kalak e, “Kerina kuasa i surga ras i doni enggo ibereken man bangku.” Kenca si e nina ka, “Emaka, laweslah, banlah kalak arah kerina bangsa jadi murid-muridku.” (Mat. 28:18, 19) Jelas me, enggo ibereken kuasa man Jesus guna minpin dahin erberita.

4. Engkai maka tek kita dahin erberita ipinpin Jesus denga seh asa gundari?

 ⁴ Ikataken Jesus maka ilakoken pengikutna pagi dahin erberita ras njadiken murid bas “kerina bangsa” janah tetap nge ia ras pengikutna “seh ku kedungen jaman enda.” (Mat. 28:20) Arah je siteh maka Jesus kap si terus minpin dahin erberita seh ku jamanta.

5. Kai nge baginta guna erban nubuat bas Masmur 110:3 terjadi?

⁵ Tek Jesus maka pasti nge bias pagi sierdahin guna erberita bas pendungi jaman enda. Itehna maka kata-kata bas nubuat si itulis pemasmur enda pasti terjadi: “Bas wari pinpinndu pasuken guna erperang, meriah pagi ukur rakyatndu ikut nampatisa.” (Ms. 110:3) Adi ikut kam bas dahin erberita, enggo dukungndu Jesus ras budak si setia, janah kam pe ikut erban nubuat e terjadi. Dahin e sangana ilakoken gundari, tapi lit tentangenna.

6. Kai salah sada tentangen si iadapi perberita si meriah gundari?

⁶ Salah sada tentangen si iadapi perberita si meriah eme arah kalak si deban. Kalak si murtad, peminpin agama, ras peminpin politik mpeseh informasi si la tuhu kerna kita. Banci saja lit keluargata, kalak si enggo sitandai, ras temanta erdahin si tek man informasi e. Dungna, banci saja suruhna kita ngadi ngelayani Jahwe ras erberita. Bas piga-piga negara, turang seninata iancam, iserang, itangkap, janah lit ka si ipenjaraken. Labo kita sengget ngidah si e, perban pernah nubuatken Jesus bagenda: ‘Segat pagi ate kerina bangsa man kena perban gelarku.’ (Mat. 24:9) Tentangen si sangana siadapi mbuktiken maka siusih Jesus ras enggo siban meriah ukur Jahwe. (Mat. 5:11, 12) Iblis me sumber kerina tentangen e. Tapi Jesus ndauh gegehen asangken ia! Alu penampat Jesus, berita si meriah pasti seh ku kerina bangsa.

7. Kai buktina enggo terjadi nubuat bas Ketangkasen 14:6, 7?

⁷ Tentangen si deban si adapi perberita si meriah eme mbue kel bahasa. Bas pengenehenen si bere Jesus man Rasul Johanes, inubuatkenna maka bas jamanta, berita si meriah iberitaken pagi man kerina kalak la soal kai bahasana. (Baca Ketangkasen 14:6, 7.) Uga carana? Siusahaken asa ngasupta gelah reh buena kalak si banci megi berita si meriah. Gundari bas situs webta jw.org, enggo lit baca-bacan si erpalasken Pustaka bas lebih 1.000 bahasa. Emaka kalak si lit i sebelang doni enggo banci mbacasa. Badan pinpinen pe enggo setuju gelah buku Ermeriah Ukur Seh Rasa Lalap! iterjemahken ku lebih 700 bahasa. Enda me alat pengajaren si utama bas erban murid. Man kalak si bisu enggo lit pangan rohani bas bentuk video. Man kalak si pentang pe enggo lit baca-bacan bas hurup Braille. Enggo siidah nubuat enda terjadi: Kalak “arah kerina bangsa ras bahasa” erlajar ngerana “bahasa si murni” eme kebenaren arah Pustaka. (Sak. 8:23; Sep. 3:9) Kerina enda banci terjadi perban si minpin dahin enda eme Jesus Kristus.

8. Kai si ihasilken dahin erberita si meriah?

⁸ Gundari, lit lebih 8.000.000 kalak arah 240 negri si jadi bagin organisasi Jahwe, janah tiap tahun lebih 100.000 kalak si iperidiken! Tapi si pentingen  asangken si e eme kalak e enggo makeken “sipat-sipat si mbaru” selaku kalak Kristen. (Kol. 3:8-10) Enterem arah kalak e mbarenda ngelakoken perbahanen seks si salah, kejahaten, la adil perbahanenna, janah negarana kapna si hebatna, tapi gundari enggo robah kalak e. Enggo terjadi nubuat si lit bas Jesaya 2:4, kalak e ‘lanai erlajar perang.’ Perban siusahaken kel makeken sipat-sipat si mbaru, merhat kalak ersada ras organisasi Dibata, janah e buktina siikutken petunjuk arah peminpinta Kristus Jesus. (Joh. 13:35; 1 Pet. 2:12) Engkai maka si e banci terjadi? Perban sampati Jesus kita.

9. Menurut Matius 24:45-47, kai nge si inubuatken Jesus kerna wari-wari pendungi?

⁹ Baca Matius 24:45-47. Inubuatken Jesus maka bas wari-wari pendungi, ilantikna pagi “budak si setia ras pentar” guna nikapken pangan rohani. Uga nubuat e enggo terjadi bas jamanta? Igunaken Jesus piga-piga kalak arah kalak si ipilih ku surga guna nikapken ‘pangan rohani bas waktu si tepat’ man umat Dibata ras kalak si nggit erlajar Pustaka. Kalak e pe kerja keras guna ndalanken tanggung jawap e. Labo anggap kalak e ia jadi tuan nandangi kiniteken kalak si deban. (2 Kor. 1:24) Tapi akui kalak e maka Jesus Kristus kap ‘peminpin ras penguasa’ nandangi umat Dibata.​—Jes. 55:4.

10. Buku si apai nge si nampati kam jadi umat Jahwe? (Nen gambar.)

¹⁰ Mulai tahun 1919 enggo isikapken budak si setia buku-buku man kalak si nggit erlajar Pustaka gelah banci pelajarina kebenaren. Bas tahun 1921 iterbitken  budak e buku The Harp of God (“Harpa Allah”) guna njelasken ajaren dasar Pustaka. Bas pudi wari, iban ka buku-buku si deban. Buku si apai nge si nampati kam nandai ras engkelengi Dibata? Buku ”Karena Allah Itu Benar Adanya,” Kebenaran yang Membimbing kepada Hidup yang Kekal, Saudara Dapat Hidup Kekal dalam Firdaus di Bumi, Pengetahuan yang Membimbing kepada Kehidupan Abadi, Apa yang Sebenarnya Alkitab Ajarkan?, Kai Nina Pustaka si Badia?, ntah Ermeriah Ukur Seh Rasa Lalap! si iterbitken mbaru-mbaru enda? Kerina buku e iterbitken bas waktu si beda-beda, janah tiap buku cocok ras keperlun kalak paksa si e.

11. Engkai maka kerina kita perlu ndatken pangan rohani?

¹¹ Labo kalak si erlajar Pustaka ngenca si perlu man “pangan si keras,” eme pemeteh si mbages kerna Jahwe ras Pustaka. Kerina kita perlu ngelakoken si e. Bagenda itulis Rasul Paulus, “Pangan si keras eme pangan man kalak si dewasa.” Ikataken Paulus ka maka adi sidalanken kai si enggo sipelajari, banci ‘sibedaken kai si benar ras kai si salah.’ (Heb. 5:14) Memang seh kel serana patuh man patoken Jahwe gundari, perban enterem kel kalak si enggo ceda kel lagu langkahna. Tapi enggo ipastiken Jesus tetap sidat pangan rohani si erban kinitekenta paguh. Sumber arah pangan rohani e eme Kata Dibata, Pustaka. Jesus me si minpin budak si setia bas nikapken ras mereken pangan rohani e man banta kerina.

12. Uga carata ngusih Jesus bas mpebadia gelar Dibata?

¹² Gelar Dibata arus ipebadia. Emaka bali bagi Jesus, ikut kita mpebadia gelar Dibata. (Joh. 17:6, 26) Contohna, bas tahun 1931, kita igelari Saksi-Saksi  Jahwe, gelar si ibuat arah Pustaka. Alu ngelakoken si e, sibuktiken maka penting kel siakap gelar Dibata janah merhat kita itandai kalak alu gelar Bapakta si i surga. (Jes. 43:10-12) Mulai bulan Oktober bas tahun e, gelar Dibata enggo lit bas tiap sampul majalah Sora Ermomo. Selain si e, bas Pustaka si Badia Terjemahen Doni si Mbaru pe gelar Dibata enggo itamaken mulihi ku inganna. Beda kel ras kai si ilakoken gereja-gereja si ngaku Kristen. Hapus kalak e gelar Jahwe arah mbue terjemahen Pustaka si ibanna!

13. Kai nge si erban kam tek maka gundari igunaken Jesus “budak si setia ras pentar”? (Joh. 6:68)

¹³ Arah “budak si setia ras pentar,” iban Jesus sada organisasi si luar biasa i doni, si nampati kalak nembah Jahwe alu cara si benar. Uga nge perasanndu perban banci kam jadi bagin arah organisasi e? Banci saja bali perasanndu ras kata-kata Rasul Petrus man Jesus sanga nina, “Ku ise nari kami lawes? Kata-katandu kap si mereken kegeluhen si rasa lalap.” (Joh. 6:68) Adi la min ndai sitandai organisasi Jahwe, uga nge geluhta gundari? Arah organisasi e, sikapken Kristus mbue pangan rohani. Ilatihna ka kita guna ngelakoken pelayanenta alu cara si mehulina. Selain si e, sampatina ka kita makeken “sipat-sipat si mbaru” gelah banci siban meriah ukur Jahwe.​—Ep. 4:24.

14. Sedekah pandemi COVID-19, kai manpaat si idatndu perban ikut kam jadi bagin arah organisasi Jahwe?

¹⁴ Ibere Jesus petunjuk si tepat bas masa-masa si susah. Enggo sigejapken  manpaatna sedekah pandemi COVID-19 enda. Enterem kalak bas doni enda la tehna kai si arus lakokenna. Tapi kita umat Jahwe dat petunjuk si jelas arah Jesus gelah banci kita tetap aman. Contohna, iiahken kita gelah make masker sanga ndarat arah rumah nari janah tetap jaga jarak. Pertua-pertua pe iingetken gelah rusur hubungina turang senina bas runggun janah pastiken kalak e keadan turang seninata tetap sehat, aman, ras rembak ras Jahwe. (Jes. 32:1, 2) Sialoken ka petunjuk tambahen ras pergegeh arah laporen Badan Pinpinen.

15. Sedekah pandemi enda, petunjuk kai si enggo sialoken kerna perpulungen ras erberita, janah kai hasilna?

¹⁵ Sedekah pandemi enda sialoken ka petunjuk si jelas kerna uga carata perpulungen ras erberita. Kenca terjadi pandemi, mis kita banci perpulungen, pertemuan wilayah, ras pertemuan regional arah Internet. Silakoken dahin erberita menam kerina arah surat ras telepon. Ipasu-pasu Jahwe usahata. Melala kantor cabang si ngelaporken maka reh buena jumlah perberita bas daerah kalak e. Melala denga pengalamen si deban si mpegegehi sedekah pandemi enda.​—Nen kotak “ Ipasu-pasu Jahwe Dahin Erberita.”

16. Kerna kai nge kita tek?

¹⁶ Banci saja lit si erpengakap maka mbiarsa organisasita bas ngadapi pandemi. Tapi enggo lalap sigejapken maka tepat kel petunjuk arah organisasi. (Mat. 11:19) Adi siukuri kekelengen Jesus bas minpin pengikutna, tek kita maka kai pe pagi si terjadi, pasti kita sampati Jahwe ras AnakNa.​—Baca Heber 13:5, 6.

17. Uga nge perasanndu perban Jesus si minpin kam?

¹⁷ Meriah kel ukurta perban Jesus Peminpinta! Kita jadi bagin arah organisasi si tetap ersada amin pe beda budayata, bangsata, ras bahasata. Sialoken ka melala pangan rohani ras pelatihen guna ngelakoken dahin erberita. Kerina kita enggo iajari uga carana makeken sipat-sipat si mbaru ras carana sikeleng-kelengen. Bangga kel kita perban Jesus Peminpinta!