1. Sanga sinen keadan doni enda, kerna kai nge kita tek, ras engkai?

 SANGA sinen kerina masalah bas doni enda, banci denga nge kita tek maka reh ulina pagi situasina? Gundari, keluarga-keluarga lanai sikeleng-kelengen. Enterem kalak reh jahatna, mentingken bana, ras nukah merawa. Enterem ka si mesera kapna tek man kalak si lit kuasana. Tapi, si e kerina mbuktiken maka ntisik nari reh ulina me situasina. Engkai? Perban perbahanen kalak gundari pas kel bagi nubuat bas Pustaka kerna “wari-wari pendungi.” (2 Tim. 3:1-5) Kalak si bujur pasti tek maka nubuat e enggo terjadi. Penggenapen nubuat e pe mbuktiken maka Kristus Jesus enggo jadi Raja bas Kerajan Dibata. Tapi, labo e ngenca nubuat si nuriken kerna Kerajan Dibata, mbue denga nubuat-nubuat si deban. Banci reh paguhna kinitekenta alu mbahas piga-piga nubuat si enggo terjadi bas wari-wari pendungi enda.

2. Kai kari sibahas bas artikel enda, ras engkai maka perlu sibahas? (Komentari gambar sampul.)

² Bas artikel enda sibahas kari, (1) nubuat si nampati kita meteh ndigan Kerajan Dibata e mulai merentah, (2) nubuat-nubuat si nampati kita meteh maka Jesus enggo jadi Raja bas Kerajan Dibata, ras (3) nubuat-nubuat  kerna uga pagi musuh-musuh Kerajan Dibata ikernepken. Siidah me kari maka kerina nubuat e lit hubungenna sada ras si debanna, bali bagi potongen-potongen gambar si ipersada jadi sada gambar. Alu bage, siteh enggo seh ja kita bas jadwal si iban Dibata.

3. Arah nubuat si lit bas Daniel 7:13, 14, kerna kai nge kita tek?

³ Nubuat bas Daniel 7:13, 14 erban kita tek maka cocok kel Kristus Jesus jadi Raja bas Kerajan Dibata. Kalak arah erbage bangsa “ngelayani ia” pagi alu ermeriah ukur, janah la pagi lit si nggantiken ia jadi Raja. Nubuat si deban ngataken maka merentah pagi Jesus bas Kerajan Dibata bas pendungi pitu masa e. Banci nge tuhu-tuhu siteh ndigan tepatna si e terjadi?

4. Jelasken uga Daniel 4:10-17 nampati kita meteh ndigan Jesus jadi Raja. (Nen ka cataten i teruh.)

⁴ Baca Daniel 4:10-17. Waktu si igelari “pitu masa” e dekahna 2.520 tahun. Waktu e imulai bas tahun 607 SM, sanga taluken kalak Babilon raja si terakhir bas Jerusalem si jadi wakil pemerentahen Jahwe. Waktu e dung bas tahun 1914 M, sanga ilantik Jahwe Jesus eme “kalak si lit hakna si sah” jadi Raja bas Kerajan Dibata. *​—Esek. 21:25-27.

5. Kai gunana adi siangkai nubuat kerna “pitu masa”?

⁵ Kai gunana nubuat e man banta? Adi siangkai nubuat kerna “pitu masa,” reh tekna kita maka pasti tepati Jahwe kerina janjiNa bas waktu si tepat. Enggo itetapken Jahwe ndigan ilantikNa Jesus jadi Raja, janah lakokenNa si e sanga enggo seh waktuna. Emaka tek kita, kerina nubuat si deban pe pasti tepati Jahwe bas waktuna. Payo, kerehen wari Jahwe “labo terlambat!”​—Hab. 2:3.

6. (a) Kai saja si terjadi gundari si mbuktiken maka Jesus enggo merentah i surga? (b) Uga nubuat bas Ketangkasen 6:2-8 mbuktiken maka kejadin-kejadin e pasti pagi terjadi?

⁶ La ndekah sope dungi Jesus pelayanenna i doni, nubuatkenna piga-piga kejadin bas doni si nampati murid-muridna meteh maka ia enggo merentah i surga. Piga-piga kejadin e eme perang, kurang pangan, ras gempa bumi. Nubuatkenna ka maka “i japa pe” lit pagi wabah penakit ntah pe penakit. Salah sada contohna eme pandemi COVID-19 si terjadi mbaru-mbaru enda. Ikataken bas Pustaka maka kerina e eme “tanda” kerehen Kristus. (Mat. 24:3, 7; Luk. 21:7, 10, 11) Kenca lebih 60 tahun Jesus mate ras mulih ku surga, bere Jesus pengenehenen man Rasul Johanes guna mbuktiken maka kerina e pasti pagi terjadi. (Baca Ketangkasen 6:2-8.) Kerina kejadin e terjadi kenca Jesus mulai jadi Raja bas tahun 1914.

7. Engkai maka reh parahna situasi bas doni enda kenca Jesus jadi Raja?

⁷ Engkai maka reh parahna situasi bas doni enda kenca Jesus jadi Raja i surga? Menurut Ketangkasen 6:2, si tangtangna ilakoken Jesus kenca ia jadi Raja eme erperang. Erperang ras ise? Erperang  ras Setan bage pe malekat-malekatna si jahat. Menurut Ketangkasen pasal 12, talu Setan bas perang e jenari ibenterken ia ras malekat-malekat si jahat ku doni. Merawa kel Setan janah “cilaka doni” perban sehkenna rawana e guna nyerang umat manusia.​—Ket. 12:7-12.

8. Kai gunana man banta sanga siidah nubuat-nubuat kerna Kerajan Dibata enggo terjadi?

⁸ Kai gunana nubuat-nubuat e man banta? Keadan doni enda ras sipat kalak si reh jahatna erban kita reh tekna maka Jesus enggo jadi Raja. Emaka labo kita kecewa sanga siidah kalak si mentingken bana ras kejam. Siinget maka e buktina nubuat bas Pustaka enggo terjadi. Kerajan Dibata enggo merentah! (Ms. 37:1) Siteh maka adi reh deherna kita ku Harmagedon, reh buena nge pagi masalah bas doni enda. (Mrk. 13:8; 2 Tim. 3:13) Ngata bujur kel kita man Bapakta si i surga, perban sampatiNa kita meteh engkai maka melala kel masalah bas doni enda.

9. Uga nubuat bas Daniel 2:28, 31-35 nggambarken kuasa doni si terakhir, ras ndigan kuasa doni e mulai lit?

⁹ Baca Daniel 2:28, 31-35. Banci ka siidah nubuat e terjadi gundari. Arah nipi Nebukadnesar banci siteh kai si nandangi terjadi “bas pendungi masa e,” eme kenca Kristus mulai merentah jadi Raja. Salah sada musuh Jesus si lit i doni eme kuasa doni si terakhir si inubuatken bas Pustaka. Kuasa doni e igambarken ‘bagin nahe si arah teruh, si iban arah besi ras taneh liat.’ Kuasa doni enda mulai lit bas  Perang Doni I sanga Inggris kerja sama ras Amerika Serikat, si dungna igelari Kuasa Doni Inggris-Amerika. Arah patung si lit bas nipi Nebukadnesar, banci siteh maka silang-langna lit dua bedana antara kuasa doni enda ras kuasa-kuasa doni si sebelumna.

10. (a) Nubuat kai arah buku Daniel si enggo siidah terjadi man kuasa doni Inggris-Amerika? (b) Kerna bahaya kai kita arus hati-hati? (Nen kotak “ Hati-hatilah man Pengaruh ‘Taneh Liat’!”)

¹⁰ Si pertama, kuasa doni Inggris-Amerika igambarken bagi besi si icampur ras taneh liat, la bagi kuasa doni si sebelumna si iban arah emas saja ntah pe pirak saja. Taneh liat e nggambarken “manusia biasa.” (Dan. 2:43, ctt.) Banci siidah gundari maka pengaruh rakyat biasa bas pemilihen umum, kampanye hak-hak sipil, demo, ras serikat buruh, erban mesera akap peminpin-peminpin bas kuasa doni e ngelakoken sura-surana.

11. Engkai maka kita tek kita enggo nggeluh bas wari-wari pendungi?

¹¹ Si peduaken, Inggris-Amerika me si igambarken bagin nahe si arah teruh patung ndai. Emaka ia me kuasa doni si terakhir si inubuatken bas Pustaka. Lanai pagi lit kuasa doni si deban kenca ia. Ikernepken Kerajan Dibata pagi ia bas Harmagedon radu ras kerina pemerentahen si iban jelma. *​—Ket. 16:13, 14, 16; 19:19, 20.

12. Engkai maka nubuat si ipeseh Daniel mereken pengapul ras arapen man banta?

¹² Kai gunana nubuat e man banta? Nubuat Daniel mereken bukti si deban maka kita nggeluh bas wari-wari pendungi. Lebih 2.500 tahun si lewat, inubuatken Daniel maka kenca Babilon, lit pagi empat kuasa doni si deban si mbelin kel pengaruhna man umat Dibata. Selain si e, nubuatkenna maka Kuasa Doni Inggris-Amerika me si terakhir arah empatna kuasa doni e. Enda mereken pengapul ras arapen man banta. Engkai? Perban kentisik nari ikernepken Kerajan Dibata me kerina pemerentahen si iban jelma janah Kerajan Dibata ngenca pagi si merentah i doni enda.​—Dan. 2:44.

13. Ise maksudna “raja si pewaluhken” ras “sepuluh raja” si ituriken bas Ketangkasen 17:9-12, janah uga nubuat e enggo terjadi?

¹³ Baca Ketangkasen 17:9-12. Kehancuren si terjadi akibat Perang Doni I, erban nubuat si deban kerna wari-wari pendungi terjadi. Peminpin-peminpin bas doni enda merhat kel erban dame. Emaka bas bulan Januari tahun 1920, ibentuk kalak e Liga Bangsa-Bangsa, janah bas bulan Oktober tahun 1945 iganti jadi Perserikatan Bangsa-Bangsa (PBB). Organisasi enda igelari “raja si pewaluhken.” Tapi ia labo kuasa doni. Lit kuasana perban lit pemerentahen si ndukung ia. Kerina pemerentahen si ndukung ia e igelari Pustaka “sepuluh raja.”

14-15. (a) Kai nge si ituriken bas Ketangkasen 17:3-5 kerna “Babilon si Mbelin”? (b) Kai pagi si terjadi man kalak si ndukung agama palsu?

¹⁴ Baca Ketangkasen 17:3-5. Bas sada pengenehenen, idah Rasul Johanes sekalak perlua-lua eme “Babilon si Mbelin,” si nggambarken kerina agama palsu. Uga nge pengenehenen e terjadi? Organisasi agama palsu enggo ndekah kel kerja sama ras pemerentahen  doni enda janah sampatina kalak e. Tapi kentisik nari tamaken Jahwe me bas pusuh pemerentahen doni enda “sura-sura guna ndalanken peraten Dibata.” Kai hasilna? Pemerentahen doni ntah pe “sepuluh raja” e nyerang organisasi agama palsu pagi janah kernepkenna.​—Ket. 17:1, 2, 16, 17.

¹⁵ Ja nari siteh maka kedungen Babilon si Mbelin enggo ndeher? Guna meteh jawapenna, perlu siinget maka kota Babilon si nai ilindungi lau si galang eme Lau Eprat. Bas buku Ketangkasen, jutan kalak si ndukung Babilon si Mbelin ipeseri ras “lau” si tempa-tempa ngelindungi ia. (Ket. 17:15) Tapi icidahken ka bas buku e maka “kerah” me pagi lau e. Si e ertina enterem pagi kalak si lanai ndukung kerina agama palsu. (Ket. 16:12) Nubuat e enggo terjadi gundari. Enterem kalak si nadingken agama palsu janah daramina ingan si deban bas ndungi masalahna.

16. Kai gunana adi siteh nubuat kerna PBB ras kehancuren Babilon si Mbelin?

¹⁶ Kai gunana nubuat-nubuat e man banta?  Perban PBB enggo ibentuk janah enterem kalak lanai ndukung agama palsu, e pe mbuktiken maka kita enggo nggeluh bas wari-wari pendungi. Amin pe enterem kalak lanai ndukung Babilon si Mbelin, labo e si erban organisasi agama palsu kernep pagi. Bagi si ituriken ndai, tamaken Jahwe pagi ku pusuh “sepuluh raja” ntah pe pemerentahen si ndukung PBB “sura-sura guna ndalanken peraten Dibata.” Rempet pagi serang kalak e agama palsu janah sengget pagi kalak ngidahsa. * (Ket. 18:8-10) Sanga ihancurken pagi Babilon si Mbelin, mbelin kel pengaruhna man kerina kalak janah banci saja erban kalak reh susahna. Tapi umat Dibata banci tetap ermeriah ukur, silang-langna lit dua alasenna. Si pertama, agama palsu si enggo ndekah kel jadi musuh Dibata Jahwe lanai pagi lit. Si peduaken, kentisik nari ibebasken me kita arah doni si jahat enda!​—Luk. 21:28.

17-18. (a) Uga carata terus mpegegehi kinitekenta? (b) Kai kari sibahas bas artikel seterusna?

¹⁷ Inubuatken Daniel maka “mbue kel pagi pemeteh si benar.” Nubuat e enggo terjadi gundari! Enggo siangka nubuat-nubuat kerna jamanta. (Dan. 12:4, 9, 10) Nubuat-nubuat e terjadi alu tepat, janah e erban reh bagesna pengerganta man Jahwe ras Pustaka. (Jes. 46:10; 55:11) Emaka teruslah sipegegehi kinitekenta alu rajin mpelajari Pustaka ras nampati kalak si deban gelah rembak ras Jahwe. Pasti lindungi Jahwe kalak si tek man baNa janah ‘lalap pagi bereNa kedamen’ man kalak e.​—Jes. 26:3.

¹⁸ Bas artikel seterusna, sipelajari pagi nubuat-nubuat kerna runggun Kristen bas wari-wari pendungi. Sipelajari ka pagi maka nubuat-nubuat e pe mbuktiken maka kita enggo nggeluh bas wari-wari pendungi. Selain si e, siidah me pagi bukti si deban maka Jesus gundari enggo jadi Rajata janah ia me si minpin pengikutna si setia.