Aku lahir tahun 1935 i Darlaston, bas daerah Inggris si igelari Black Country. Engkai maka daerah e igelari Black Country? Perban melala i je asap si mbiring si rehna arah pabrik-pabrik ras peleburen logam. Sanga umurku kira-kira 4 tahun, orang tuaku mulai erlajar Pustaka ras Saksi-Saksi Jahwe. Sanga aku remaja, enggo tek aku man kebenaren janah iperidiken aku tahun 1952, sanga umurku 16 tahun.

Paksa si e, mulai aku erdahin bas pabrik si galang. Pabrik e erban peralaten ras spare part kendaran bermotor. Ilatih aku ngelakoken tugas si penting bas perusahan e. Meriah kel kuakap erdahin i je.

Bas sada wari, pindo pertua keliling aku guna mandu Pelajaran Buku Sidang bas tengah pekan bas runggun i Willenhall. Tapi bingung aku. Mesera kuakap erban keputusen perban paksa si e aku pulung bas dua runggun. Sanga tengah pekan, pulung aku bas runggun si ndeher ku inganku erdahin, eme i Bromsgrove, kira-kira 32 kilometer arah rumahku nari. Tapi sanga akhir pekan, mulih aku ku rumah orang tuaku janah pulung aku bas runggun i Willenhall.

Perban merhat aku ndukung organisasi Jahwe, kualoken pemindon pertua keliling e, amin pe arus kutadingken pendahin si meriah kuakap ngelakokenca. Labo pernah aku menyesal perban enggo kupediat Jahwe si negu-negu aku. Keputusen e erban meriah kel geluhku.

Sanga pulung aku bas Runggun Bromsgrove, jumpa aku ras sekalak diberu si mejile ras fokus ngelayani Jahwe, gelarna Anne. Erjabu kami bas tahun 1957, janah ras-ras kami ngelayani Jahwe bas erbage-bage tugas. Ras-ras kami jadi perintis biasa, perintis istimewa, dahin keliling, bage pe bas Betel. Anne tuhu-tuhu jadi sumber keriahen ukurku.

Bas tahun 1966, meriah kel ukur kami banci ikut Sekolah Gilead kelas 42. Itugasken kami ku Malawi, daerah Afrika si kalakna mehuli janah nggit ngalo-ngalo. Tapi la isangka kami, la banci ndekah kami tading i je.

Kami seh i Malawi tanggal 1 Februari 1967. Kenca sada bulan kami erlajar bahasa, mulai kami ngelayani bas dahin pengawas distrik. Lit motor jip kami. Akap kalak motor e banci ngelewati dalan si mesera, termasuk ngelewati lau si galang. Kepeken la bage, ngelewati lau si kitik ngenca banci. Mon-mon, tading kami bas sapo si iban arah taneh liat janah atapna arah nggala nari. Sanga musim udan, arus tama kami terpal gelah ula masuk lau. Paksa si e me tangtangna gejapken kami kegeluhen jadi utusen injil. Mbue tentangenna tapi meriah kap kami.

Bas bulan April, kuteh maka kentisik nari pasti lit tentangen arah pemerentah. Arah radio, kubegi pidato Presiden Malawi, Dr. Hastings Banda. Katakenna maka Saksi-Saksi Jahwe la nggit nggalar pajak ras erban masalah man pemerentah. Kai si ikatakenna e labo tuhu. Teh kami maka masalah situhuna eme segat ate pemerentah man kami perban kami netral secara politik, khususna la kami nggit nukur kartu jadi anggota partai politik.

Bas bulan September, ibaca kami bas koran maka presiden enggo nuduh turang senina. Ikatakenna maka i japa pe turang senina e erban masalah. Iumumkenna bas sada pertemuan politik maka lanai ndekah ilarang pemerentah me Saksi-Saksi Jahwe. Pelarangen e mulai berlaku tanggal 20 Oktober 1967. La ndekah kenca si e, reh me polisi ras petugas imigrasi ku kantor cabang Malawi. Tutup kalak e kantor cabang ras ipelawesna utusen injil arah negri e nari.

Kenca telu wari kami ipenjaraken, ipelawes kami ku Mauritius, si paksa si e ikuasai Inggris. Tapi, pemerentah Mauritius la mereken kami  tading i je selaku utusen injil. Emaka, itugasken kami ku Rhodesia (gundari igelari Zimbabwe). I je lit petugas imigrasi si kasar janah la berena kami masuk ku negri e. Bagenda nina, “Kena enggo ipelawes arah Malawi nari. Bas Mauritius pe la kena ibere tading. Reh kena ku jenda perban lanai teh kena ingan si deban me?” Megi si e ngandung me Anne. Tempa-tempa la lit kalak si nggit ngalo-ngalo kami. Paksa si e, mis ateku mulih ku Inggris. Tapi dungna, ibereken bagin imigrasi kami tading sada berngi i kantor cabang, adi paginna nggit kami ngelapor ku kantor pusat kalak e. Latih kel akap kami, tapi tetap andalken kami Jahwe. Paginna sanga ciger, rempet dat kami ijin banci tading i Zimbabwe selaku pengunjung. Ndigan pe la banci aku lupa kerna kai si kugejapken paksa si e. Tek aku maka Jahwe me si negu-negu kami paksa si e.

Bas kantor cabang Zimbabwe, itugasken aku bas Departemen Dinas guna ngurus pendahinta i Malawi ras Mozambik. Salah sada tugasku eme nerjemahken laporen si ikirimken pertua keliling arah Malawi nari. Parah kel penganiayan si iadapi turang senina i Malawi. Bas sada berngi, ngandung aku sanga kubaca uga parahna penganiayan si iadapi turang senina. * Tapi, terpegegehi kel aku perban kalak e tetap setia, erkiniteken, ras megenggeng.​—2 Kor. 6:4, 5.

Lakoken kami asa ngasup kami guna nikapken pangan rohani man turang senina si tading denga i Malawi bage pe si enggo ngungsi ku Mozambik. Tim penerjemah bas bahasa Chichewa, eme bahasa si buena ipake bas Malawi, ipindahken ku juma sekalak turang seninata i Zimbabwe. Meriah ukurna mbangun piga-piga rumah man kalak e ras sada kantor. Emaka banci iterusken kalak e dahin si penting e eme nerjemahken publikasi si erpalasken Pustaka.

Aturken kami gelah pertua-pertua keliling si lit i Malawi banci ikut pertemuan distrik bahasa Chicewa tiap tahun i Zimbabwe. Sanga kalak e i je, dat kalak e rangka khotbah pertemuan e. Emaka, banci peseh kalak e khotbah e man turang senina i Malawi. Bas sada paksa, sanga pertua-pertua keliling e bas Zimbabwe, aturken kami gelah banci kalak e ikut Sekolah Pelayanen Kerajan guna mpegegehi pertua-pertua keliling si perpang enda.

Bas bulan Februari 1975, kudahi kamp pengungsin i Mozambik. I je lit turang senina si ngungsi arah Malawi nari. Terus ikutken turang senina e petunjuk-petunjuk terbaru arah organisasi Jahwe termasuk petunjuk guna erban badan pertua. Melala kegiaten rohani si enggo iaturken pertua-pertua si mbaru e, termasuk khotbah man jelma si enterem, mbahas buku Mereksa Pustaka si Badia Tiap Wari, Sora Ermomo, bage pe erban pertemuan wilayah. Bas kamp pengungsin pe iban ka departemen kebersihen, lit si mbagiken pangan, janah lit ka si ngaturken keamanen. Enda bali bagi sanga lit pertemuan distrik. Perban ipasu-pasu Jahwe, melala kel si berhasil ilakoken turang senina si setia enda. Kenca kudahi kalak e, terpegegehi kel aku.

Kira-kira tahun 1979, kantor cabang Zambia me si dungna ngurus pendahin i Malawi. Tapi, rusur denga kuinget turang senina i Malawi janah kutotoken kalak e. Pasti turang senina si deban pe bage. Perban aku salah sada anggota Panitia Cabang i Zimbabwe, ikut aku bas pertemuan ras wakil kantor pusat radu ras turang senina si ertanggung jawap arah Malawi, Afrika Selatan, ras Zambia. Bas pertemuan si bage, seri lalap penungkunen si bahas kami eme: “Kai deba nari si banci silakoken man turang senina i Malawi?”

Reh dekahna, reh urakna me penganiayan i Malawi. Turang senina si tading i je lanai ianiaya bagi si mbarenda, janah turang senina si sempat ngungsi, mulihken ka ku Malawi. Bas negri-negri i deher Malawi, Saksi-Saksi Jahwe enggo iakui pemerentah janah lanai ilarang.  Bas tahun 1991, pelarangen i Mozambik pe enggo icabut. Tapi tersungkun-sungkun kami, ‘Ndigan nge Saksi-Saksi Jahwe bas Malawi bebas nembah Jahwe?’

Dungna situasi bas Malawi berubah. Bas tahun 1993, icabut pemerentah me pelarangen man Saksi-Saksi Jahwe. La ndekah kenca si e, sungkun sekalak utusen injil aku. Nina, “Lit nge rencana kena mulih ku Malawi?” Paksa si e umurku enggo 59 tahun. Emaka ningku man bana, “La mungkin. Enggo metua aku!” Tapi bas wari e, aloken kami me surat arah Badan Pinpinen si ngundang kami mulihken ku Malawi.

Meriah akap kami ngelakoken tugas kami i Zimbabwe, janah mbue teman kompak kami i je. Emaka, mberat akap kami pindah je nari. Mehuli kel Badan Pinpinen man kami janah berena kami tetap tading i Zimbabwe adi memang bage kin sura-sura kami. Emaka banci nge pilih kami guna tetap tading i Zimbabwe. Tapi kuinget mulihi kerna Abraham ras Sara si nadingken rumahna sanga kalak e enggo metua guna ngikutken petunjuk Jahwe.​—Kej. 12:1-5.

Ikutken kami petunjuk arah organisasi Jahwe janah mulihken kami ku Malawi bas tanggal 1 Februari 1995, pas kel 28 tahun kenca kerehen kami si pertama ku ingan e. Kenca si e, Panitia Cabang Malawi ibentuk. Anggotana eme aku ras dua senina si deban. Mis kami sibuk ngaturken kegiaten Saksi-Saksi Jahwe i Malawi.

Luar biasa kel ngidah uga cara Jahwe erban umatNa reh buena! Meter kel tambah jumlah perberita i Malawi. Bas tahun 1993, lit kira-kira 30.000 perberita. Tapi bas tahun 1998 enggo lebih 42.000 perberita. * Isetujui Badan Pinpinen rencana guna erban kantor cabang si mbaru gelah banci ngurus keperlun bas lapangen. Tukur kami me sada lahan si belangna 12 hektar i Lilongwe, janah aku ilantik jadi salah sada anggota panitia pembangunen.

Bas bulan Mei 2001, Senina Guy Pierce arah Badan Pinpinen me si mpeseh khotbah penahbisen guna kantor cabang e. Lit lebih dua ribu Saksi-Saksi Jahwe si asalna arah daerah e si reh ku acara e. Buen arah kalak e enggo iperidiken lebih 40 tahun dekahna. Turang senina si setia e enggo megenggeng ertahun-tahun dekahna ngadapi penganiayan si kejam sanga  pelarangen. Memang mesera pergeluh kalak e, tapi paguh kel kiniteken kalak e janah rembak ia ras Jahwe. Meriah kel ukur kalak e banci tur ku Betel si mbaru. Ku japa pe kalak e lawes bas daerah Betel e, begi kalak e lagu Kerajan si iendeken alu gaya Afrika. Pengalamen e kena kel ku pusuhku, lenga pernah kuidah si bage. Enda mbuktiken mbue kel pasu-pasu Jahwe man kalak si setia ngadapi tentangen.

Kenca dung pembangunen kantor cabang e, meriah kuakap ngelakoken penugasen si mbaru eme mpeseh khotbah penahbisen guna Bale Kerajan. Runggun-runggun i Malawi banci meter lit Bale Kerajanna perban lit pengaturen pembangunen Bale Kerajan bas negri si terbatas sumber dayana. Mbarenda, piga-piga runggun pulung bas ingan si iban arah kayu eukaliptus. Iban kalak e dukut si enggo ibayu jadi atapna janah ibentuk kalak e taneh liat jadi ingan kundulna. Dungna, bangun kalak e ingan nutung batu bata. I je, tutung kalak e batu bata janah bangun kalak e me ingan pulung si mejile. Meriah kel ukur kalak e ngelakokenca. Tapi, tetap riahen akap kalak e make ingan kundul si iban arah taneh liat asangken kursi. Perban nina kalak e, ‘Adi la siat, tading geser saja!’

Luar biasa kel kuakap sanga ngidah uga Jahwe nampati kalak gelah paguh kinitekenna. Kena kel ku pusuhku sanga kuidah turang senina si nguda denga si semangat bas Afrika. Pelatihen arah organisasi ras tugas-tugas si ibereken man kalak e erban kalak e beluh ngelakoken tugasna. Hasilna, melala tanggung jawap kalak e bas Betel bage pe bas runggun. Runggun-runggun pe terpegegehi ka perban lit pertua keliling si ilantik arah daerah e. Teremen arah kalak e enggo erjabu. Tapi gelah banci bereken kalak e terbuen man Jahwe, sengaja lenga lit anak kalak e, amin pe lit tekanen arah keluarga ras kalak si deban.

Kenca 52 tahun i Afrika, sakit aku. Isaranken Panitia Cabang gelah kami ipindahken ku Inggris. Isetujui Badan Pinpinen me saran Panitia Cabang e. Situhuna sedih kel kap kami perban arus tadingken kami tugas si meriah kap kami ngelakokenca. Tapi sikap kel kami irawat keluarga Betel i Inggris.

Tek kel aku maka keputusenku guna mpediat Jahwe si negu-negu aku eme keputusen si mehulina bas geluhku. Bicara pemetehku saja min ndai si kuandalken, labo banci bagenda geluhku. Lalap iteh Jahwe kai si kuperluken gelah banci “berhasil.” (Kua. 3:5, 6) Sanga aku nguda denga, luar biasa kel kuakap cara kerja sada perusahan si galang. Tapi, organisasi Jahwe si pendahinna seh ku sebelang doni, mereken keriahen ukur si ndauh belinen. Banci kugejapken maka ngelayani Jahwe me si erban geluhku tuhu-tuhu ermeriah ukur!