1. Kai si mis ilakoken Jahwe kenca Adam ras Hawa erdosa? (Kejadin 3:15)

 KENCA Adam ras Hawa erdosa, mis bereken Jahwe sada nubuat si luar biasa si mereken arapen man keturunen kalak e. Nubuat e icatat bas Kejadin 3:15.​—Baca.

2. Engkai maka penting kel nubuat bas Kejadin 3:15?

² Nubuat bas buku si pertama bas Pustaka e penting kel. Engkai? Perban kerina buku si lit bas Pustaka lit hubungenna ras nubuat e. Bali bagi nali si ngiket ranting jadi sada, bage me kata-kata bas Kejadin 3:15 ngiket kerina buku bas Pustaka jadi sada berita. Berita e eme kerna uga pagi Dibata ngutus Penyelamat guna engkernepken Setan ras kerina pengikutna si jahat. * Sanga si e terjadi, meriah kel pagi ukur kalak si engkelengi Jahwe!

3. Kai kari sibahas bas artikel enda?

³ Bas artikel enda, sidat kari jawapen arah penungkunen-penungkunen kerna nubuat bas Kejadin 3:15: Ise saja nge maksudna si lit bas ayat e? Uga nubuat e terjadi? Kai gunana man banta?

4. Ise kin “nipe” bas nubuat e, janah ja nari siteh?

⁴ Bas Kejadin 3:14, 15 lit ituriken kerna (1) nipe, (2) keturunen nipe, (3) diberu, ras (4) keturunen diberu. Banci sampati Pustaka kita nandai ise kin situhuna  kalak e. * Mari sibahas lebe kerna “nipe.” Nipe e labo nipe tuhu-tuhu perban nipe labo banci angkaina kai si ikataken Jahwe bas Taman Eden. Emaka nipe si isumpahi Jahwe e pasti mahluk si banci rukur. Ise ia? Bas Ketangkasen 12:9 jelas ituriken kerna ise kin nipe e. Ikataken i je maka “nipe si pertama” e eme Setan si igelari ka Iblis. Nce, ise nge keturunen nipe e?

5. Ise nge maksudna keturunen nipe e?

⁵ Mon-mon bas Pustaka, istilah “keturunen” banci maksudna kalak si cara rukurna ras perbahanenna mirip kel ras sekalak jelma. Perban miripna, ikataken me ia anakna. Emaka, keturunen nipe e maksudna malekat-malekat ras manusia si nentang Dibata Jahwe bage pe umatNa, bali bagi Setan. Contohna eme malekat-malekat si nadingken surga janah nusur ku doni bas jaman Nuah bage pe kalak jahat si perbahanenna ngusih bapakna eme Iblis.​—Kej. 6:1, 2; Joh. 8:44; 1 Joh. 5:19; Jud. 6.

6. Engkai maka “diberu e” labo maksudna Hawa?

⁶ Mari sibahas kerna ise kin “diberu e.” Diberu e labo maksudna Hawa. Engkai? Cuba ukuri salah sada alasenna. Bas nubuat e ikataken maka ‘iperperken’ keturunen diberu e pagi takal nipe e. Bagi si enggo sibahas ndai, nipe e eme malekat si jahat ntah pe Setan. Emaka labo lit keturunen Hawa si ngasup ngancurken Setan perban kalak e la sempurna.

7. Bagi si itulis bas Ketangkasen 12:1, 2, 5, 10, ise nge maksudna diberu bas Kejadin 3:15?

⁷ Arah buku si terakhir bas Pustaka,  banci siteh ise kin maksudna diberu si ikataken bas Kejadin 3:15. (Baca Ketangkasen 12:1, 2, 5, 10.) Ia labo bagi diberu si biasana! Lit bulan i teruh nahena, janah bas mahkotana lit 12 bintang. Melahirken ia janah lahirkenna anak si seh kel istimewana, eme Kerajan Dibata. Kerajan e bas surga, emaka diberu e pe pasti bas surga ka. Diberu e nggambarken bagin arah organisasi Dibata si lit i surga. Si lit i je eme malekat-malekat si setia.​—Gal. 4:26.

8. Ise nge maksudna keturunen si pentingna arah diberu e, janah ndigan ia jadi keturunen si pentingna? (Kejadin 22:15-18)

⁸ Kata Dibata pe banci nampati kita meteh ise kin keturunen si pentingna arah diberu e. Menurut sada nubuat, keturunen e arus rehna arah keturunen Abraham. (Baca Kejadin 22:15-18.) Bali bagi nubuat e, Jesus lahir arah keturunen Abraham. (Luk. 3:23, 34) Tapi, gelah banci iperperkenna Setan, keturunen diberu e arus gegehen asangken manusia biasa. Emaka, sanga umur Jesus kira-kira 30 tahun, ilantik ia alu kesah si badia. Paksa si e me Jesus jadi bagin si pentingna arah keturunen diberu e. (Gal. 3:16) Kenca Jesus mate ras ipekeke, “mahkotai [Dibata] ia alu kemulian ras kehamaten” janah ibereken man bana “kerina kuasa i surga ras i doni,” termasuk kuasa guna “engkernepken pendahin Iblis.”​—Heb. 2:7; Mat. 28:18; 1 Joh. 3:8.

9-10. (a) Ise deba nari si jadi bagin arah keturunen diberu e, janah ndigan ia jadi keturunen diberu e? (b) Kai kari sibahas?

⁹ Tapi selain Jesus, lit si deban si jadi bagin arah keturunen diberu e. Sanga ngerana Rasul Paulus man kalak Kristen Jahudi ras si labo Jahudi si ipilih ku surga, ijelaskenna ise kin bagin arah keturunen diberu e. Nina, “Adi kena jadi pengikut Kristus, kena tuhu-tuhu keturunen Abraham janah banci aloken kena warisen si ijanjiken.” (Gal. 3:28, 29) Sanga ilantik Jahwe sekalak jelma alu kesah si badia, ia enggo jadi keturunen diberu e. Emaka, keturunen diberu e eme Jesus Kristus ras 144.000 kalak si merentah pagi ras ia. (Ket. 14:1) Kerina kalak e rusaha ngusih perukuren ras perbahanen Bapakna, Dibata Jahwe.

¹⁰ Gundari enggo siteh ise maksudna si ituriken bas Kejadin 3:15. Emaka mari sipelajari kai si enggo lakoken Jahwe gelah nubuat e terjadi janah kai gunana man banta.

11. Kai maksudna luka pagi ‘tumit’ keturunen diberu e?

¹¹ Bagi si inubuatken bas Kejadin 3:15, itagut ntah pe ilukai nipe e me ‘tumit’ keturunen diberu e. Nubuat e terjadi sanga gunaken Setan kalak Jahudi ras kalak Roma guna munuh Anak Dibata. (Luk. 23:13, 20-24) Biasana, sanga luka tumitta, piga-piga waktu dekahna mesera siakap erdalan. Bage ka pe, sanga mate Jesus ras ikuburken, piga-piga waktu dekahna la ia banci ngelakoken kai pe.​—Mat. 16:21.

12. Ndigan takal nipe e iperperken ras uga carana?

¹² Menurut nubuat bas Kejadin 3:15, iperperken keturunen diberu e pagi takal nipe e. E ertina pasti pagi malem luka tumit Jesus ntah pe ipekeke ia. Bage me si terjadi. Bas wari si peteluken  kenca Jesus mate, ipekeke ia jadi mahluk roh si la banci mate. Kenca si e, bas waktu si enggo tetapken Dibata, hancurken Jesus me pagi Setan. (Heb. 2:14) Dung e, kalak si merentah pagi ras Jesus ikut engkernepken musuh-musuh Dibata eme keturunen nipe e.​—Ket. 17:14; 20:4, 10. *

13. Kai gunana man banta penggenapen nubuat e?

¹³ Adi kam enggo jadi umat Dibata, penggenapen nubuat e pasti erguna man bandu. Contohna, Jesus enggo reh ku doni selaku manusia. Enggo usihna sipat-sipat Bapakna alu sempurna. (Joh. 14:9) Emaka alu mpelajari kerna Jesus, banci sitandai ras sikelengi Dibata Jahwe. Sidat ka manpaat arah pengajaren Jesus ras petunjuk si berekenna man runggun-runggun Kristen gundari. Enggo iajari Jesus kita uga carana gelah banci siban meriah ukur Jahwe. Selain si e, perban tumit Jesus enggo itagut ntah pe mate ia, kerina kita ndatken manpaat. Engkai? Sanga Jesus ipekeke, aloken Jahwe korban si sempurna arah AnakNa e gelah banci “kita ibersihken arah kerina dosa nari.”​—1 Joh. 1:7.

14. Ja nari siteh maka nubuat si peseh Jahwe bas Taman Eden labo mis terjadi paksa si e? Jelasken.

¹⁴ Kata-kata Jahwe bas nubuat si lit i Taman Eden ncidahken maka perlu waktu gelah nubuat e banci terjadi. Perlu waktu man diberu e ngelahirken keturunen si ijanjiken. Perlu waktu man Setan guna mpepulung pengikutna. Perlu ka waktu gelah duana kelompok e ermusuhen (ntah pe sisegat-segaten). Arah nubuat e banci siteh maka doni si ikuasai Setan enda pasti pagi rate segat man umat Jahwe. Bas pudi wari, ingetken Jesus murid-muridna kerna si e. (Mrk. 13:13; Joh. 17:14) Enggo siidah maka nubuat e enggo terjadi, khususna bas 100 tahun enda. Kai saja nge si terjadi?   

15. Engkai maka reh segatna ate doni enda man banta, tapi engkai maka la perlu kita mbiar?

¹⁵ La ndekah kenca Jesus ilantik jadi Raja Kerajan Dibata bas tahun 1914, ibenterken me Setan arah surga nari. Gundari, bas doni nari ngenca ia banci tading, janah tehna ntisik nari ikernepken me ia. (Ket. 12:9, 12) Tapi, labo ia kem saja. Merawa kel ia janah serangna umat Dibata. (Ket. 12:13, 17) E me sebapna reh segatna ate doni enda man umat Jahwe. Tapi la perlu kita mbiar man Setan ras pengikutna. Tek kita man kata-kata si itulis Rasul Paulus, “Adi Dibata ras kita, ise kin si banci ngelawan kita?” (Rom. 8:31) Mbue kel nubuat bas Kejadin 3:15 si enggo terjadi. E erban kita tuhu-tuhu tek man Jahwe.

16-18. Kai manpaat si idat Edward, Ursula, ras Jessica arah nubuat bas Kejadin 3:15?

¹⁶ Janji Jahwe bas Kejadin 3:15 banci nampati kita megenggeng ngadapi tentangen kai pe. Edward, si ngelayani jadi utusen injil bas Guam, ngataken, “Mon-mon lit si terjadi bas geluhku si erban mesera kuakap setia man Jahwe. Tapi, kuukuri nubuat bas Kejadin 3:15, e nampati aku gelah tetap tek man Bapakku si i surga.” Tertima-tima kel Edward ngidah  kerina masalahta imasapken Jahwe pagi.

¹⁷ Sekalak turang seninata si gelarna Ursula, si tading i Bavaria ngataken maka nubuat bas Kejadin 3:15 erban ia reh tekna maka Pustaka e arah Dibata. Luar biasa kel kapna sanga tehna nubuat e lit hubungenna ras nubuat-nubuat si deban. Nina ka, “Kena kel ku pusuhku sanga kupelajari maka mis Jahwe ertindak guna mereken arapen man banta.”

¹⁸ Turang seninata si gelarna Jessica arah Mikronesia, ngataken, “Kuinget denga uga perasanku sanga tangtangna kuteh kebenaren. Nubuat bas Kejadin 3:15 sangana terjadi. Enda nampati aku gelah kuinget maka kiniseran si sangana siadapi labo peraten Jahwe. Nubuat enda pe erban aku reh tekna maka ngelayani Jahwe me kegeluhen si mehulina. Enda banci kugejapken gundari bage pe bas masa depan.”

19. Engkai maka banci kita tek bagin si terakhir arah nubuat e pasti pagi terjadi?

¹⁹ Bagi si enggo siidah, nubuat bas Kejadin 3:15 sangana terjadi gundari. Enggo sitandai alu jelas ise kin maksudna keturunen diberu ras keturunen nipe e. Jesus eme bagin si pentingna arah keturunen diberu e janah luka bas tumitna enggo malem. Gundari ia enggo jadi Raja si la banci mate. Selain si e, keturunen diberu e enggo menam kerinana ipilih. Perban bagin si pertama arah nubuat e enggo terjadi, reh tekna kita maka bagin si terakhir pe pasti pagi terjadi. Takal nipe e pasti pagi iperperken. Tuhu-tuhu meriah kel pagi ukur umat Dibata sanga Setan ikernepken! Janahta nimai si e, ula kita nyerah. Pasti tepati Dibatata kerina janjiNa. Erkelangken keturunen diberu e, berekenNa pagi melala kel pasu-pasu man “kerina bangsa i doni.”​—Kej. 22:18.