Ajari Jesus gelah kita erdame ras kalak si deban. Tapi pernah kataken Jesus man rasul-rasulna bagenda, “Ula akap kena aku reh ku doni enda maba dame. Aku reh labo maba dame, tapi maba pedang. Aku reh erban perpecahen: anak si dilaki ngelawan bapakna, anak si diberu ngelawan mamakna, permen ngelawan bibi simetuana.” (Mat. 10:34, 35) Kai maksud Jesus?

Labo ate Jesus erban keluarga lanai ersada, tapi itehna maka ajarenna banci erban perpecahen bas keluarga. Emaka, kalak si atena jadi murid Kristus ras iperidiken, perlu tehna maka banci saja segat ate keluargana kerna keputusenna e. Adi itentang teman geluhna ntah pe keluargana ia, banci mesera kapna ndalanken ajaren Kristus.

Iahken Pustaka gelah kalak Kristen “dame ras kerina kalak.” (Rom. 12:18) Tapi mon-mon, ajaren Jesus tempa-tempa bagi “pedang” bas keluarga. Enda terjadi sanga lit anggota keluarga si nulak ntah pe nentang ajaren Jesus. Adi bage si terjadi, ban anggota keluarga e dirina jadi “musuh” kalak si sangana erlajar kebenaren e.​—Mat. 10:36.

Mon-mon pengikut Kristus si keluargana la sada kiniteken arus erban pilihen. Arus pilihna ise atena isenangkenna, Jahwe ras Jesus ntah keluargana. Contohna, keluargana si la sada kiniteken banci saja maksa ia ngerayaken sada perayan. Adi bage si terjadi, ise nge si isenangkenna? Nina Jesus, “Ise pe si kelengen atena bapakna ntah mamakna asangken aku, la ia cocok ras aku.” (Mat. 10:37) Labo maksud Jesus maka kalak si jadi pengikutna la banci keleng kel atena orang tuana. Tapi si sangana ajarken Jesus man pengikutna eme uga carana erban keputusen kerna kai si pentingna. Amin pe keluargata si la sada kiniteken nentang kita perban sisembah Jahwe, tetap keleng ateta kalak e. Tapi, si pentingna siakap eme kekelengenta man Dibata.

Tentangen arah keluarga banci erban sedih kel kita. Tapi perban kita pengikut Jesus, siinget kata-katana enda, “Ise pe si la ngaloken tiang siksanna janah la ngikutken aku, la ia cocok ras aku.” (Mat. 10:38) Nggit kita ngadapi tentangen arah keluarga perban siteh pengikut Kristus memang arus ngadapi tentangen si bage. Selain si e, ngarap kita maka perbahanenta si mehuli banci ngubah perukuren keluargata si la sada kiniteken janah dungna nggit kalak e erlajar Pustaka.​—1 Pet. 3:1, 2.