BAS tahun 1970, igali piga-piga ahli sejarah me ingan pulung kalak Jahudi si nggo tertutung bas kuta Ein Gedi, Israel, i deher pantai bagin barat Laut Mati. Ingan pulung e tertutung sanga kuta e ikernepken kira-kira antara tahun 500 seh ku tahun 550 Masehi. Idat kalak e me i je sada gulungen si nggo meseng janah lanai terbaca isina. Adi ibuka, gulungen e pasti hancur. Tapi, perban nggo lit teknik scanning 3 dimensi, gulungen e banci “ibuka,” maksudna banci iteh kai isina amin gia gulungen e la ibuka. Janah perban nggo lit teknologi si mbaru, banci ibaca isina.

Kai nge isi gulungen e? Isina eme ayat-ayat Pustaka. Si tertulis i je eme piga-piga ayat arah pasal-pasal pertama buku Imamat. Bas ayat-ayat e pe lit ka gelar Dibata bas bahasa Heber, si nggunaken Tetragramaton. Banci saja gulungen e lit antara tahun 50 Masehi seh ku tahun 400 Masehi. Alu bage, gulungen e me si metuana arah Kitap-Kitap Heber si nggo idat. Sope si e, gulungen si metuana eme Gulungen Laut Mati (Qumran). Itulis Gil Zohar bas The Jerusalem Post, “Sope potongen buku Imamat arah Ein Gedi banci ibuka secara digital, lit kira-kira 1.000 tahun jarak antara Gulungen Laut Mati ras Kodeks Aleppo. Gulungen Laut Mati, si umurna kira-kira 2.000 tahun, rehna arah masa Bait si Peduaken [kira-kira 100 SM], tapi Kodeks Aleppo itulis kira-kira tahun 930 Masehi.” Menurut piga-piga ahli, gulungen Ein Gedi si ibuka secara digital ndai jadi bukti maka isi lima buku si itulis Musa la pernah berubah amin pe nggo ribun tahun. Janah amin gia buku e nggo itulis ulang, isina labo berubah.