1. Menurut Kolose 2:4, 8, kai si ilakoken Setan gelah kita jadi budakna?

ATE Setan ulanai min sikelengi Jahwe. Emaka, iusahakenna mpengaruhi carata rukur gelah kita jadi budakna janah dungna bali perukurenta ras ia. Itipuna ntah pe igodana kita alu kai si menarik siakap gelah siikutken ia.​—Baca Kolose 2:4, 8.

2-3. (a) Engkai maka arus siperdiateken persinget bas Kolose 2:8? (b) Kai si man bahasenta bas artikel enda?

² Kita kerina banci itipu Setan! Ingetlah, persinget si ibereken Paulus bas Kolose 2:8 labo itulisna man kalak si la umat Dibata, tapi man kalak Kristen si nggo ipilih ku surga. (Kol. 1:2, 5) Adi kalak e pe arus hati-hati, terlebih ka kita gundari. (1 Kor. 10:12) Engkai? Perban Setan nggo isampetken ku doni janah iusahakenna kel nipu umat Dibata si setia. (Ket. 12:9, 12, 17) Selain si e, bas jamanta gundari kalak jahat ras penipu “reh dekahna reh jahatna.”​—2 Tim. 3:1, 13.

³ Bas artikel enda, sibahas kari uga Setan nggunaken “tipun si kosong” guna mpengaruhi perukurenta. Sibahas ka telu “akal Iblis si jahat.” (Ep. 6:11) Bas artikel seterusna, sibahas kerna uga carana ngambekken kai si la mehuli si lit bas perukurenta perban taktik Setan. Tapi si pertama, sibahas lebe uga cara Setan nipu kalak Israel kenca kalak e masuk ku Taneh Perjanjin janah kai pelajarenna banta.

4-6. Menurut Ulangen 11:10-15, perubahen kai si arus iadapi kalak Israel i bas nuan-nuan sanga kalak e bas Taneh Perjanjin?

⁴ Beluh kel Setan nggoda kalak Israel gelah nembah berhala. Uga carana? Iteh Setan perlu kalak e pangan, emaka imanpaatkenna e gelah ilakoken kalak Israel kai si ngena atena. Sanga masuk kalak Israel ku Taneh Perjanjin, arus ipelajari kalak e cara si mbaru i bas nuan-nuan. Sanga i Mesir, ipalerken kalak Israel lau Sungai Nil ku jumana. Tapi bas Taneh Perjanjin, la lit sungai si galang, emaka gelah turah sinuan-sinuanna perlu kalak e udan ras namur ntah pe embun. (Baca Ulangen 11:10-15; Jes. 18:4, 5) E me sebapna arus ipelajari kalak e uga cara si mbaru. Enda labo menukah perban nterem kalak si beluh nuan-nuan nggo mate bas taneh mesawang.

⁵ Ijelasken Jahwe man umatNa maka nggo berubah keadan kalak e janah arus ipelajarina cara si mbaru i bas nuan-nuan. Kenca si e ipersingeti Jahwe kalak e, nina, ‘Jaga maka ula kam papak ibabai kalak i bas Aku nari lako nembah ras erdahin man dibata-dibata si deban.’ (Ul. 11:16, 17) Tempa-tempa la lit hubungenna persinget enda ras nuan-nuan. Engkai maka ipersingeti Jahwe kalak e?

⁶ Iteh Jahwe maka kalak Israel pasti tergoda guna nungkun kerna uga carana erjuma man kalak si nembah berhala si lit i sekeliling kalak e. Memang beluhen nge kalak si nembah berhala e nuan-nuan asangken kalak Israel, emaka banci ipelajarina cara nuan-nuan  arah kalak e. Tapi lit bahayana. Kalak Kanaan nembah Baal janah cara rukur kalak e pe nggo terpengaruh. Iakap kalak e Baal me si mpuna langit ras si mereken udan. Ate Jahwe ula min umatNa terpengaruh kiniteken si bage. Tapi mulih-ulih kalak e nembah Baal. (Bil. 25:3, 5; Hak. 2:13; 1 Raj. 18:18) Gundari, mari siperdiateken uga Setan dungna banci erban kalak Israel jadi budakna.

7. Tentangen kai si iadapi kalak Israel kenca seh ku Taneh Perjanjin?

⁷ Taktik Setan si pertama eme igunakenna sura-sura kalak Israel si labo salah. Ate kalak e nusur min udan gelah lit lau ku jumana. Tiap tahun, mulai akhir bulan April ngayak bulan September, jarang kel nusur udan bas Taneh Perjanjin. Biasana musim perudan mulai bulan Oktober. Gelah kalak Israel banci nggeluh janah melala asil jumana, perlu kel kalak e udan. Emaka, iusahaken Setan gelah tek kalak Israel banci reh udan adi ikuti kalak e kebiasan bangsa si nembah berhala si lit i sekelilingna. Kalak si nembah berhala e tek maka arus ilakokenna upacara tertentu gelah ipenusur dibatana udan. Kalak si la paguh kinitekenna man Jahwe tek maka enda ngenca carana gelah ula ndekahsa lego, emaka ikut kalak e bas upacara nembah Baal.

8. Kai taktik Setan si peduaken? Jelasken.

⁸ Taktik Setan si peduaken eme igodana kalak Israel ngelakoken perbahanen seks si salah. Bangsa si nembah berhala nembah dibatana alu ngelakoken perbahanen seks si salah. Bas rumah pertotonna, lit diberu ras dilaki si jadi pelacur. Labo salah iakap bangsa e homoseks ras kerina perbahanen seks si salah si debanna, malahen nggo biasa iakapna! (Ul. 23:17, 18; 1 Raj. 14:24) Iakap kalak e adi ilakokenna upacara e, nggit dibatana masu-masu taneh gelah melala hasilna. Enterem kalak Israel si ngelakoken perbahanen seks si salah bas upacara e, janah dungna isembah kalak e dibata-dibata palsu. Situhuna, kalak e nggo jadi budak Setan.

9. Kenca sibaca Hosea 2:16, 17, kai si ilakoken Setan gelah lupa kalak Israel man Jahwe?

⁹ Taktik Setan si peteluken eme ibanna gelah lupa kalak Israel man Jahwe. Bas jaman Nabi Jeremia, ikataken Jahwe maka iban nabi-nabi palsu ilupaken umat Jahwe gelar Jahwe “erkiteken Baal.” (Jer. 23:27, Terjemahan Dunia Baru) Banci jadi lanai igunaken umat Dibata gelar Jahwe janah igantina jadi gelar Baal, si ertina “Si Mpuna” ntah pe “Majiken.” E erbanca lanai terbedaken kalak Israel Jahwe ras Baal. Dungna ipersada kalak e me penembahen man Baal ras Jahwe.​—Baca Hosea 2:16, 17.

10. Kai saja taktik si igunaken Setan gundari?

¹⁰ Igunaken Setan ka taktik si bage gundari. Ibanna kalak jadi budakna alu nggunaken sura-sura si labo salah, igodana kalak ngelakoken perbahanen seks si salah, janah ibanna gelah lupa kalak man Jahwe. Mari sibahas lebe taktikna si peteluken.

11. Kai si ilakoken Setan gelah lupa kalak man Jahwe?

¹¹ Iban Setan gelah lupa kalak man  Jahwe. Kenca kerina rasul Jesus mate, piga-piga kalak si ngaku Kristen mulai ngajarken ajaren si salah. (Perb. 20:29, 30; 2 Tes. 2:3) Ibanna gelah lanai iteh kalak ise Dibata si benar. Misalna, lanai igunaken kalak e gelar Dibata bas Pustaka janah igantina jadi penggelaren bagi “Tuhan.” Perban nggo ihapus kalak e gelar Dibata janah igantina jadi “Tuhan,” dungna kalak si mbaca Pustaka lanai itehna gelar Jahwe janah lanai terbedakenna Jahwe ras dibata-dibata si deban. (1 Kor. 8:5) Ilebuh kalak e Jahwe ras Jesus alu kata “Tuhan” janah dungna nggo seri iakapna Jahwe ras Jesus. (Joh. 17:3) E me si erbanca nggo reh mbarna ajaren Tritunggal, si labo lit bas Pustaka. Akibatna, nterem kalak erpengakap maka labo mungkin sitandai Dibata. Seh kel parahna bual e!​—Perb. 17:27.

12. Kai si idukung agama palsu? Janah kai akibatna bagi si ikataken bas Roma 1:28-31?

¹² Igoda Setan kalak gelah ngelakoken perbahanen seks si salah. Bas jaman Israel mbarenda, igunaken Setan agama palsu gelah ilakoken kalak perbahanen seks si salah. Gundari pe bage ka. Idukung agama palsu perbahanen seks si salah janah biasa saja akapna perbahanen e. Akibatna, nterem kalak si ngaku ngelayani Dibata lanai ndalanken patoken Dibata kerna seks. Ijelasken Rasul Paulus kerna si e bas suratna man kalak Roma. (Baca Roma 1:28-31.) Si termasuk i bas “kai si la patut” si lit bas ayat e eme kerina perbahanen seks si salah, termasuk homoseks. (Rom. 1:24-27, 32; Ket. 2:20) Emaka, penting kel sidalanken kai si iajarken Pustaka!

13. Kai ka taktik si igunaken Setan?

¹³ Igunaken Setan sura-surata si labo salah. Wajar adi sicukupi ateta keperlunta bage pe keperlun keluargata, emaka sipelajari keterampilen tertentu. (1 Tim. 5:8) Biasana, banci dungna lit keterampilenta adi tutus ateta sekolah. Tapi arus kita hati-hati. Bas melala negeri, ipelajari kalak keterampilen i sekolah, tapi i je ipelajarina ka ajaren manusia. Misalna, iajarken i je maka Dibata e  labo lit janah Pustaka labo terteki. Iajarken ka maka kerina kalak pentar tek ia kegeluhen e lit perban evolusi. (Rom. 1:21-23) Ajaren si bage la cocok ras “kepentaren Dibata.”​—1 Kor. 1:19-21; 3:18-20.

14. Adi siikuti ajaren manusia, kai akibatna?

¹⁴ Ajaren manusia la cocok ras patoken Jahwe. Ajaren e labo banci erban kita mpebelin sipat-sipat si ihasilken kesah si badia, tapi mpebelin sura-surata ngelakoken “perbahanen daging.” (Gal. 5:19-23) Ajaren e pe erban kalak jadi sombong janah “ngkelengi dirina saja.” (2 Tim. 3:2-4) Sipat si bage la cocok ras sipat meteruk ukur si ate Dibata lit bas umatNa. (2 Sam. 22:28) Piga-piga kalak si kuliah nggo bali perukurenna ras perukuren doni enda, labo perukuren Dibata. Mari sibahas contohna.

15-16. Pelajaren kai si banci sidat arah pengalamen sekalak turang seninata?

¹⁵ Sekalak turang seninata si diberu si nggo lebih 15 tahun bas dinas sepenuh waktu ngataken, “Selaku sekalak Saksi Jahwe, nggom rusur kubaca ras kubegi kai saja bahayana adi kuliah, tapi tetap aku kuliah. Labo kuakap man bangku pedah e.” Kai akibatna? Nina, “Enggo melala kel keri waktu ras tenagaku guna erlajar, dungna lanai lit waktuku ertoto bagi si mbarenda. Lanai lit gegehku erberita bage pe erban persiapen guna perpulungen. Ngata bujur kel aku perban dungna banci aku sadar maka nggo ceda hubungenku ras Jahwe perban  aku kuliah. Kuteh maka arus aku ngadi kuliah. Emaka ngadi me aku.”

¹⁶ Kai nge pengaruh pendidiken tinggi e man turang seninata ndai? Nina, “Situhuna mela nge aku ngatakenca. Pendidiken e erban aku jadi kalak si nggit mandangi, khususna turang seninata. Bagi ukurku min ateku kalak e, janah lanai aku nggit ndeher ras kalak e. Ndekah kel maka banci aku berubah. Pengalamenku enda mbuktiken maka seh kel bahayana adi la siikutken persinget si ibereken Bapakta si i surga arah organisasiNa. Jahwe ngenca si metehsa kai si mehulina man bangku. Arusna kubegiken min Ia!”

17. (a) Kai si arus siusahaken? (b) Kai si man bahasenta bas artikel berikutna?

¹⁷ Siusahakenlah gelah ula iperbudak “ajaren manusia ras tipun si kosong” si rehna arah doni Setan enda. Ula kita nggit itipu Setan. (1 Kor. 3:18; 2 Kor. 2:11) Ula pernah pediat iban Setan kam lupa man Jahwe. Ikutilah patoken Jahwe i bas geluhndu, perban e me patoken si mehulina. Janah, ula kam nggit itipu Setan gelah la ngikutken pedah Jahwe. Tapi, kai si arus ilakokenndu adi nggo tehndu kam nggo terpengaruh perukuren doni enda? Bas artikel seterusna, sibahas kari kerna uga Kata Dibata banci nampati kita ngambekken perukuren ras kebiasan si la mehuli si nggo rurat bas kita.​—2 Kor. 10:4, 5.