BANGSA Israel sangana ersikap guna ngepari Lau Jordan. Kentisik nari, seh me kalak e ku negri si nggo ijanjiken Dibata. Tapi, rempet lit piga-piga kalak si reh ndahi kalak e, eme diberu-diberu arah bangsa si deban. Iundang kalak e kalak Israel si dilaki gelah reh ku pesta si ibanna. Enda kesempaten si luar biasa man kalak Israel si jarang kel terjadi. Banci lit teman-temanna si mbaru, banci ia landek-landek, janah banci ka ipanna pangan si ntabeh. Enda kerina pasti erban meriah ukur. Tapi, kebiasan ras patoken geluh diberu-diberu e beda kel ras kai si iajarken Undang-Undang Dibata man kalak Israel. Aminna pe bage, banci saja iakap kalak Israel, ‘Aman-aman saja nge kari. Lo kari kami terpengaruh.’

 Tapi, kai si terjadi? Nina Pustaka, “Kalak Israel enggo mulai erlua-lua ras diberu-diberu bangsa Moap si i je.” Situhuna, tujun diberu-diberu e gelah dilaki kalak Israel nembah dibata-dibata kalak e. Janah dungna berhasil! Emaka, ‘nembeh ate Jahwe ia kerina.’​—Bil. 25:1-3.

Enggo ilanggar kalak Israel e dua Undang-Undang Dibata: Isembah kalak e berhala, janah ilakokenna perbahanen seks si salah. Perban la patuh man Dibata, ribun kalak Israel mate. (Kel. 20:4, 5, 14; Ul. 13:6-9) Janah si sedihna kel, nggo ndeher kel kalak e ku Taneh Perjanjin. Seumpama patuh kalak Israel man Undang-Undang Dibata, la min ndai sempat mate ribun kalak. Banci ikeparina Lau Jordan janah masuk ku Taneh Perjanjin.​—Bil. 25:5, 9.

Ikataken Rasul Paulus, “Kerina si terjadi man kalak e jadi pelajaren janah itulis guna jadi persinget man banta si nggeluh i bas wari-wari pendungi doni enda.” (1 Kor. 10:7-11) Pasti meriah kel ukur Setan perban ilakoken kalak Israel dosa serius, janah dungna la banci kalak e masuk ku Taneh Perjanjin. Emaka perlu kita erlajar arah kejadin enda, sebap siteh maka meriah kel ukur Setan adi berhasil ia erban kita la masuk ku doni si mbaru!

Ijebak Setan atena kalak Kristen, janah igunakenna cara si nggo pernah ipakena. Bali bagi bas jaman Israel mbarenda, igunaken Setan perbahanen seks si salah guna njebak kita gundari. Jebaken enda seh kel bahayana janah menukah kel kita kena, salah sadana pornografi.

Gundari, sekalak jelma banci ngenen pornografi janah ise pe la metehsa. Mbarenda, adi lit si ngenen pornografi atena, arus ia ku bioskop guna nonton film porno ntah pe lawes ku toko buku guna nukur buku porno. Tapi perban mela ia idah kalak, la ia surung ku je. Adi gundari, perban nggo lit Internet, sekalak jelma banci ngenen pornografi bas inganna erdahin ntah pe bas motorna. Janah bas melala negri, sekalak dilaki ntah pe diberu la perlu ndarat rumah nari guna ngenen pornografi.

Selain si e perban lit HP ras tablet, nggo reh nukahna akap kalak ngenen pornografi. Banci inenna sanga erdalan ntah naik bus ntah pe naik kereta api.

Perban gundari nggo menukah kel ngenen pornografi janah banci inen alu la ise pe metehsa, nggo reh teremna kalak si kena akibatna asangken mbarenda. Kalak si ngenen pornografi banci terganggu pusuh peratenna, lanai merga kapna bana, janah banci sontar perjabunna. Si parahna, banci ceda hubungenna ras Dibata. Jelas me, melala kel rugina adi ngenen pornografi. Ngeri kel pengaruh pornografi e janah ndekah kel maka banci bene pengaruhna. Janah lit ka si la banci bene pengaruhna e.

Tapi, ilindungi Jahwe ateNa kita arah jebaken Setan e. Adi ilindungi Jahwe ateta kita, arus kita tuhu-tuhu patuh man baNa, ula bagi dilaki-dilaki kalak Israel mbarenda. (Kel. 19:5) Ingetlah maka ciga kel ate Dibata pornografi. Engkai maka banci sikataken bage?

Cuba ukuri: Undang-undang si ibereken Dibata man kalak Israel, beda kel ras undang-undang bangsa si deban bas jaman e. Bali bagi tembok, undang-undang Dibata ngelindungi bangsa Israel janah ngajari kalak e gelah ula ilakokenna kai si salah bagi si ilakoken bangsa-bangsa i sekelilingna. (Ul. 4:6-8) Arah undang-undang e, siteh  maka ciga kel ate Jahwe perbahanen seks si salah.

Sanga ikataken Jahwe perbahanen si ciga ateNa si ilakoken bangsa-bangsa i sekeliling Israel, nina Jahwe man bangsa Israel, ‘Ula ikut-ikut perbahanen bangsa Kanaan, si ku je Kubaba kam gundari. Perbahanen kalak e erbahanca maka taneh e la bersih, emaka Kuukum me taneh e.’ Perban Dibata Israel seh kel badiana, ciga kel ateNa perbahanen kalak Kanaan. Dungna, la bersih ntah pe najis iakap Dibata negri e.​—Im. 18:3, 25.

Amin gia nggo iukum Jahwe kalak Kanaan, nterem denga si ngelakoken perbahanen seks si salah. Lebih 1.500 tahun kenca si e, ikataken Paulus maka kalak Kristen nggeluh i tengah-tengah kalak si ‘pusuh peratenna lanai erpenggejapen.’ Kalak e ‘ngelakoken perbahanen si la meteh mela janah la pernah puas ngelakoken kerina si najis.’ (Ep. 4:17-19) Gundari pe, nterem kalak si la mela ngelakoken perbahanen seks si salah. Perban kita umat Jahwe, arus siusahaken kel gelah la sinen gambar-gambar porno si lit i japa pe.

Pornografi e situhuna nghina Dibata. Sanga iciptaken Dibata manusia, ibanNa manusia e mirip ras Ia. Emaka banci siteh si apai si mehuli si apai si lang. Perban pentar kel Dibata, ibanNa me batas-batas kerna hubungen seks. AteNa kalak si nggo erjabu saja ngenca si banci ngelakokenca. (Kej. 1:26-28; Kua. 5:18, 19) Emaka, kalak si erban pornografi ntah pe si ngiahken kalak si deban ngenenca, la kapna penting patoken si nggo ibereken Dibata. Tuhu-tuhu la iergai kalak e Jahwe. Kalak si bage iukum Dibata me pagi.​—Rom. 1:24-27.

Tapi uga adi lit kalak si sengaja mbaca ntah pe nonton pornografi? Banci saja labo bahaya akap kalak e. Tapi situhuna idukungna kalak si la ngergai patoken Jahwe. Banci saja labo seh ku je ukur kalak e sanga tangtangna inenna pornografi. Tapi jelas kel ikataken Pustaka maka kalak si nembah Dibata si tuhu-tuhu arus ciga kel atena pornografi. Nina Pustaka, ‘O kam si erkeleng ate  man Jahwe, cigalah ateNdu kai si la mehuli.’​—Msm. 97:10.

Banci jadi labo ateta ngenen pornografi, tapi melala kel tentangenna. La kita sempurna, janah banci saja arus silawan sura-sura seks si salah. Selain si e, pusuhta pe banci itipuna kita, ikatakenna maka labo salah ngenen pornografi. (Jer. 17:9) Tapi nterem ka si nggo jadi umat Jahwe berhasil ngelawan sura-sura si salah e. Emaka teklah kam maka banci kam berhasil la ngenen pornografi. Bas Pustaka lit ikataken uga carana gelah ula kita kena jebaken Setan e. Mari sibahas.

Bagi si nggo sibahas ndai, terus ipediat kalak Israel sura-sura si salah reh belinna bas pusuhna. Parah kel akibatna. Gundari pe banci kang terjadi bage. Nina Jakup, adek tiri Jesus, “Tiap kalak . . . itarik janah igoda alu sura-surana sendiri. Jenari kenca sura-sura e reh belinna, turah me dosa.” (Jak. 1:14, 15) Adi reh belinna janah reh gegehna sura-sura si salah bas pusuh sekalak jelma, mbelin kemungkinenna ilakokenna dosa. Emaka adi lit sura-sura si salah kerna seks, mislah siambekken, ula terus siukuri.

Nina Jesus, “Adi tanndu ntah nahendu erban kam erdosa, potonglah e janah ambekken. . . . Bage ka pe, adi matandu erban kam erdosa, cungkillah e janah ambekken.” (Mat. 18:8, 9) Labo maksud Jesus gelah tuhu-tuhu sipotong dagingta. Tapi maksudna arus mis siambekken kai pe si banci erban kita ngelakoken dosa. Kai contohna?

Adi ternenndu pornografi, ula ikatakenndu, ‘Lo banci aku terpengaruh.’ Mislah tulihken ku si deban. Adi bas TV idahndu, mislah mateken TV-ndu e. Adi bas komputer ntah pe bas HP idahndu, mis ka lah mateken. Janah ukurilah kai si mehuli. Alu bage, reh nukahna akapndu ngendaliken pikirenndu janah la kam ikuasai sura-sura si salah.

Banci saja lanai pernah inenndu pornografi, tapi mon-mon ingetndu denga kai si  pernah inenndu mbarenda. Gambar ntah pe pikiren kerna seks, ndekah maka banci bene bas ingeten sekalak jelma. Katawari pe banci teringet mulihi. Dungna banci reh sura-sura guna ngelakoken kai si najis, bagi masturbasi (njemak-njemak alat kelamin seh asa puas nafsu seks). Emaka, reh kenca sura-sura e mislah silawan.

Teruslah usahaken gelah perukuren ras perbahanenndu ngena ate Dibata. Usihlah Rasul Paulus si ‘ipekpekina dagingna janah ijadikenna bagi budak.’ (1 Kor. 9:27) Ula kam nggit jadi budak sura-sura si salah. ‘Robahlah alu ngobah perukurenndu. Alu bage, banci ibuktikenndu maka peraten Dibata e mehuli, sempurna, janah erban Ia senang.’ (Rom. 12:2) Ingetlah: Adi ikutkenndu sura-surandu si salah, la kel kam banci ermeriah ukur. Tapi, adi ngena ate Dibata perukuren ras perbahanenndu, pasti meriah ukurndu.

Cuba hapalndu piga-piga ayat Pustaka. Adi reh kenca perukuren si salah, mislah ukuri ayat-ayat e. Misalna Masmur 119:37; Jesaya 52:11; Matius 5:28; Epesus 5:3; Kolose 3:5; ras 1 Tesalonika 4:4-8 banci nampati kam gelah bagi Jahwe carandu rukur janah ciga atendu pornografi. Arah ayat-ayat e pe, banci ka itehndu kai si iarapken Jahwe bas kam nari.

Kai si arus ilakokenndu adi la ngasup kapndu bandu nulak sura-sura guna ngenen ntah pe ngukuri kai si lit hubungenna ras seks? Usihlah Jesus. (1 Pet. 2:21) Kenca iperidiken, terus ia igoda Setan. Kai si ilakoken Jesus? Terus itulakna kerina godan e alu nggunaken ayat-ayat Pustaka. Nina, “Laweslah Setan!” jenari itadingken Setan me ia. Bali bagi Jesus si la pernah nyerah ngelawan Iblis, kam pe ula min nyerah. (Mat. 4:1-11) Terus iusahaken Setan ras doni si jahat enda gelah lalap iukurindu kai si lit hubungenna ras seks. Tapi, ula kam pernah nyerah. Banci kam menang ngelawan pornografi. Adi pindondu penampat Jahwe, banci italukenndu musuh e.

Teruslah ertoto man Jahwe gelah isampatiNa kam. Nina Paulus, “Pesehlah pemindon kena man Dibata . . . Alu bage kedamen i bas Dibata nari si banci naluken perukuren kai pe, ngarak-ngarak pusuh ras perukuren kena erkelangken Kristus Jesus.” (Pil. 4:6, 7) Pasti ngasup kam nulak perukuren si salah adi lit kedamen Dibata bas pusuhndu. Adi iperembakndu dirindu ku Jahwe, ‘irembakkenNa ka diriNa man bandu.’​—Jak. 4:8.

Banci kita la kena jebaken Setan adi terus kita ndeher ras Penguasa si meganjangna bas alam semesta enda. Nina Jesus, “Reh me penguasa doni enda [Setan]. Tapi labo ia erkuasa nandangi aku.” (Joh. 14:30) Engkai maka bage nina Jesus? Pernah ikatakenna, “Si nuruh aku ras aku kap. Labo itadingkenNa aku sisada, perban lalap kulakoken si ngena ateNa.” (Joh. 8:29) Adi terus iusahakenndu ngelakoken kai si ngena ate Jahwe, teklah kam maka la kam pernah itadingkenNa. Ula pernah nenndu pornografi, gelah ula kam kena jebaken Setan.