ARTIKEL PELAJAREN 26
Sampati Kalak si Deban si Sangana Latih Ukurna
“Seperukuren min kena kerina, sepenggejapen, sikeleng-kelengen, melias ras mesayang, janah meteruk ukur.”—1 PET. 3:8.
LAGU 107 Usihlah Kekelengen Jahwe
SI IBAHAS *
1. Uga carata ngusih Jahwe, Bapakta si perkeleng?
KELENG kel ate Jahwe kita. (Joh. 3:16) Siusih ateta Bapakta si perkeleng e. Emaka siusahaken gelah kita “sepenggejapen, sikeleng-kelengen, melias ras mesayang” man kerina kalak, terlebih-lebih man “turang seninata si sada kiniteken.” (1 Pet. 3:8; Gal. 6:10) Sisampati ateta turang seninata si sangana ngadapi masalah si erban ia stres.
2. Kai si man bahasenta bas artikel enda?
2 Kerina kalak si atena jadi umat Jahwe, pasti ngadapi masalah si erban ia stres. (Mrk. 10:29, 30) Janah perban nggo reh deherna kedungen doni enda, banci jadi reh buena ka masalah si arus siadapi. Uga carata sisampat-sampaten? Mari sibahas kai si banci sipelajari arah Lut, Jop, ras Naomi. Sibahas ka kari piga-piga masalah si iadapi turang seninata janah uga carata nampati kalak e.
SABARLAH
3. Bagi si ikataken bas 2 Petrus 2:7, 8, kai keputusen si iban Lut? Kai akibatna?
3 Salah keputusen si iban Lut. Ipilihna tading ras kalak Sodom si seh kel jahatna. (Baca 2 Petrus 2:7, 8.) Subur kel daerah e, tapi melala kel tentangen si arus iadapi Lut i je. (Kej. 13:8-13; 14:12) Banci jadi meriah kel iakap ndehara Lut tading bas kota e janah meriah ka akapna erteman ras piga-piga kalak si lit i je, piah dungna lanai ia patuh man Jahwe. Mate me ia sanga ipenusur Dibata udan api ras kertah ku daerah e. Duana tunangen anak Lut pe mate. Bene me rumah Lut, ertana, janah si sedihna kel, ndeharana pe mate. (Kej. 19:12-14, 17, 26) Bas masa si susah e, tetap Jahwe sabar ngenen Lut.
Perban mekuah ate Jahwe Lut ras keluargana, isuruhNa malekat nelamatken kalak e (Nen paragrap 4)
4. Kai buktina maka sabar kel Jahwe nampati Lut? (Nen gambar bas sampul majalah enda.)
4 Amin gia ipilih Lut tading i Sodom, tetap denga mekuah ate Jahwe ia. IsuruhNa dua malekat nelamatken Lut ras keluargana. Isuruh malekat e gelah mis lawes Lut nadingken Sodom. Tapi la mis ikutken Lut perentah e sebap “lenga tetap ukur Lut.” Dungna, itangkap malekat-malekat e tan Lut janah ibabana ia ras keluargana lawes je nari. (Kej. 19:15, 16) Isuruhna Lut kiam ku daerah pegunungen. Tapi la ikutken Lut perentah Jahwe e, ipindona gelah kiam ia ku kota si ndeherna. (Kej. 19:17-20) Sabar Jahwe megiken Lut janah ipediatNa Lut lawes ku kota e. Tapi dungna mbiar ka ia i je, janah pindah ia ku daerah pegunungen bagi si tangtangna ikataken Jahwe ndai. (Kej. 19:30) Tuhu-tuhu sabar kel Jahwe nampati Lut! Uga carata ngusih Ia?
5-6. Bagi si ikataken 1 Tesalonika 5:14, uga carata ngusih Dibata?
5 Bali bagi Lut, banci saja lit turang seninata si salah erban keputusen janah dungna dat masalah ia. Adi lit terjadi bage, kai si arus silakoken? Banci jadi sikataken ateta, ‘Enggo iperanindu kai si isuanndu.’ Payo ka kin bage. (Gal. 6:7) Tapi situhuna lit nge si terulin si banci silakoken. Banci siusih cara Jahwe nampati Lut. Uga carana?
6 Isuruh Jahwe dua malekat ndai guna nampati Lut gelah selamat sanga Sodom ikernepken, labo guna mpersingeti Lut saja. Bage ka pe, perlu sipersingeti turang seninata adi lit perbahanenna si banci erban ia dat masalah. Tapi banci kang sisampati ia. Perlu kita sabar amin gia la mis dalankenna pedah Jahwe bas Pustaka. Siusihlah dua malekat ndai. Ula nyerah bas nampati turang seninata janah ula kita lanai nggit erteman ras ia. Tapi siusahakenlah terus nampati ia. (1 Joh. 3:18) Bagi tempa sitangkap tanna ntah pe sisampati ia ndalanken pedah Pustaka.—Baca 1 Tesalonika 5:14.
7. Kai si banci silakoken gelah banci siusih cara Jahwe ngenen Lut?
7 Situhuna, iteh Jahwe maka melala kel kelemahen Lut, tapi labo e si iperdiatekenNa. Isuruh Jahwe Rasul Petrus gelah itulisna bas Pustaka maka Lut e kalak si benar. Meriah kel ukurta perban nggit Jahwe ngalemi kita. (Msm. 130:3) Banci nge siusih uga cara Jahwe ngenen Lut? Banci. Adi rusur siukuri sipat-sipat mehuli turang seninata, reh sabarna kita sanga erurusen ras kalak e. Alu bage sanga sipersingeti ia, reh nukahna iakapna megiken kita.
MEKUAHLAH ATETA KALAK SI DEBAN
8. Kai buktina mekuah ateta kalak si deban?
8 Jop la bagi Lut, la ibanna keputusen si salah. Amin pe bage, mberat kel masalah si iadapi Jop. Bene kerina ertana, janah lanai ia iergai kalak. Mekelek ka kel pinakitna. Si sedihna ka mate kerina anakna. Ipitnah telu temanna ka ia. Engkai maka la mekuah ate teman-temanna e ia? Salah sada alasenna, la iusahaken kalak e ngangkai uga situhuna situasi Jop. Akibatna, salah sangka
kalak e janah ihakimina Jop. Uga carana gelah ula kita bage? Arus siinget maka Jahwe ngenca metehsa uga situhuna situasi kalak. Adi lit turang seninata si cerita kerna masalahna, tutuslah ateta megikenca. Janah usahakenlah nggejapken kai si igejapkenna. Emaka banci dungna sepenggejapen kita ras ia.9. Adi mekuah ateta turang seninata, kai si ula silakoken? Engkai?
9 Adi mekuah ateta turang seninata, la sicikurakken ia man kalak si deban. Kalak si meriah akapna cikurak banci erban turang senina lanai siangkan janah lanai ersada. (Kua. 20:19; Rom. 14:19) La ia perkuah janah la iukurina rananna. Dungna reh getemna pusuh kalak si sangana latih kapna rukur. (Kua. 12:18; Ep. 4:31, 32) Asangken cikurak, padin sidarami sipat-sipat mehuli temanta e janah siukuri uga carata nampati ia ngadapi masalahna.
Adi lit turang seninata si la iukurina rananna, sabarlah kita megikenca, janah apuli ia bas waktu si cocok (Nen paragrap 10-11) *
10. Kai si banci sipelajari arah Jop 6:1-3?
10 Baca Jop 6:1-3. Mon-mon, la iukuri Jop lebe sope ia ngerana. Tapi dungna nyesal ia. (Jop 42:6) Bali bagi Jop, kalak si sangana latih kapna rukur banci jadi la iukurina lebe sope ia ngerana. Dungna nyesal ia. Kai si perlu silakoken? Ula sipandangi ia janah mekuah min ateta. Ingetlah, labo iciptaken Jahwe manusia gelah ngadapi masalah bagi siadapi gundari. Emaka, wajar adi lit umat Jahwe si la iukurina rananna sanga latih kel kapna rukur. Banci saja salah si ikatakenna kerna Jahwe ntah pe kerna kita. Tapi ula min mis kita merawa ntah pe sihakimi ia.—Kua. 19:11.
11. Kai si banci ilakoken pertua guna ngusih Elihu?
Gal. 6:1) Kai si banci ilakoken pertua guna nampatisa? Arus iusih kalak e Elihu. Ibegiken Elihu Jop janah banci ia sepenggejapen ras Jop. (Jop 33:6, 7) Ipersingetina Jop kenca nggo iangkaina uga perukuren Jop. Adi tuhu-tuhu ibegiken pertua sekalak jelma janah iusahakenna ngangkai uga keadanna, e buktina iusihna Elihu. Hasilna, sanga iberekenna persinget banci mis kena ku pusuh kalak si ipersingetina e.
11 Mon-mon, kalak si sangana stres pe perlu ipersingeti. (APULILAH KALAK ALU RANANNDU
12. Uga perasan Naomi kenca mate perbulangenna ras dua anakna?
12 Naomi sekalak diberu si setia si keleng atena Jahwe. Tapi kenca mate perbulangenna ras dua anakna, igantina atena gelarna jadi “Mara,” si ertina “Pagit.” (Rut 1:3, 5, 20, 21) Salah sada permen Naomi eme Rut, terus itemanina Naomi bas masa si susah e. Labo isampatina saja ngenca Naomi, tapi iapulina ka ia alu rananna. Alu kata-kata si sederhana janah bas pusuh nari, ibuktiken Rut maka keleng atena Naomi janah ras atena lalap.—Rut 1:16, 17.
13. Engkai maka perlu sisampati kalak si mate teman geluhna?
13 Sanga lit turang seninata si mate teman geluhna, perlu kel ia penampatta. Perbulangen ras ndehara bali bagi dua batang kayu si turah sideheren. Reh dekahna ersada urat batang kayu e. Sanga meruah ntah pe mate salah sada batang kayu e, batang kayu si sada nari pe pasti terpengaruh. Bage ka pe, sanga lit kalak si mate teman geluhna, banci jadi ndekah kel getem pusuhna. Nina Paula * si rempet mate perbulangenna, “Rempet kel berubah geluhku janah putus asa kel aku. Lanai lit temanku arih. Mbarenda kerina kuturiken man perbulangenku. Lalap kami ras sanga senang bage pe susah. Lalap ibegikenna aku sanga kuceritaken masalahku. Bagi tempa ibelah dua kuakap bangku.”
Uga carana nampati kalak si lanai lit teman geluhna? (Nen paragrap 14-15) *
14-15. Kai si banci silakoken guna ngapuli kalak si mate teman geluhna?
14 Kai si banci silakoken guna ngapuli kalak si mate teman geluhna? Si pertama ngeranalah kita ras ia, amin gia banci jadi segan kita ntah pe la siteh kai si ateta sibelasken. Nina Paula si nggo iceritaken ndai, “Kuteh nge la ntabeh kap kalak ncakapken kerna kematen. Banci saja mbiar ia kitik kari ukur kalak si megikenca. Tapi situhuna, padin nge bage asangken sengkebabah pe la ngerana.” Banci jadi labo iarapken kalak si erceda ate e melala kita ngerana. Nina Paula ka, “Adi kataken temanku saja, ‘Aku pe ikut sedih ya,’ nggo meriah kel kuakap.”
15 Nina William, si mate ndeharana piga-piga tahun si lewat, “Meriah kuakap adi lit si nceritaken kai si mehuli si inget kalak e kerna ndeharaku. Kuteh maka keleng janah iergai kalak ia. Terpegegehi janah terapuli kel aku, perban penting kel kuakap ndeharaku e bas geluhku janah meherga kel kuakap ia.” Nina sekalak turang seninata si nggo mbalu si gelarna Bianca, “Terpegegehi kel aku adi lit si ertoto ras aku janah ibacakenna sada ntah dua ayat man bangku. Meriah kuakap adi lit si cerita kerna perbulangenku janah ibegikenna ka aku sanga kuceritaken kerna ia.”
16. (a) Kai si arus silakoken guna nampati kalak si erceda ate? (b) Menurut Jakup 1:27, kai tanggung jawapta?
16 Bali bagi Rut si lalap itemanina Naomi si nggo mbalu, kita pe arus sisampati kalak si erceda ate. Nina Paula, si iceritaken ndai, “Kenca mate perbulangenku, nterem si nampati ras ngapuli aku. La ndekah kenca e, mulihken kalak e ndahiken dahinna sekalak-sekalak. Tapi, keadanku tuhu-tuhu nggo berubah. Terapuli kel aku adi lit si ngangkai maka kalak si erceda ate perlu waktu gelah banci semangat mulihi, banci jadi erbulan-bulan ntah pe ertahun-tahun dekahna.” Memang la seri cara tiap kalak ngadapi ceda ate. Piga-piga kalak banci ka mis semangat mulihi. Tapi lit ka si mis ceda ka mulihken ukurna sanga ilakokenna kai si pernah ilakokenna ras kalak si nggo mate e. Siingetlah maka ibereken Jahwe kita kesempaten ras tanggung jawap guna nampati kalak si erceda ate.—Baca17. Engkai maka arus sisampati turang seninata si itadingken teman geluhna?
17 Lit ka si getem kel pusuhna janah stres kel ia perban itadingken teman geluhna. E me si iadapi Joyce. Itadingken perbulangenna ia perban diberu si deban. Nina Joyce, “Memang getem nge pusuhku adi mate perbulangenku. Tapi ndauh kel getemen kuakap perban itadingkenna aku. Adi mate ndai ia perban kecelakan ntah pe sakit, labo min dalihsa kuakap perban labo bage atena. Tapi bas
situasi e, sengaja ia nadingken aku. Mela kel kuakap janah lanai kel lit kuakap ergaku.”18. Uga carata nampati kalak si lanai lit teman geluhna?
18 Adi mehuli kita man kalak si lanai lit teman geluhna, enda bukti keleng ateta ia. Bas masa-masa si bage me perlu ia teman. (Kua. 17:17) Kai saja si banci silakoken? Banci siundang ia man ras kita. Banci ka siajak ia gawah-gawah ntah pe erberita. Selain si e, banci ka siajak ia ikut bas kebaktin jabuta. Adi silakoken e, meriah me ukur Jahwe, perban ‘itemaniNa kalak si lanai piher ukurna’ ntah pe si getem pusuhna janah ‘ikawaliNa diberu balu-balu.’—Msm. 34:19; 68:6.
19. Menurut 1 Petrus 3:8, kai si perlu silakoken?
19 Lanai ndekah, sanga Kerajan Dibata nggo merentah i doni, ilupaken me kerina si erban kita susah. Seh kel riahna ukurta perban sanga si e pagi, kerina “kejadin-kejadin si enggo lepas ilupaken.” (Jes. 65:16, 17) Sope si e kerina terjadi, sisampat-sampatenlah kita janah sibuktiken alu ranan ras perbahanenta maka keleng ateta kerina turang seninata.—Baca 1 Petrus 3:8.
LAGU 111 Si Erban Meriah Ukur
^ par. 5 Lut, Jop, bage pe Naomi setia ngelayani Jahwe. Amin pe bage, tetap nge lit masalahna si erban latih kapna rukur. Bas artikel enda, sibahas kari kai si banci sipelajari arah pengalamen kalak e. Sibahas ka ngkai maka perlu kita sabar janah mekuah ateta kalak si deban, bage pe ngkai maka perlu siapuli turang seninata si sangana ngadapi masalah.
^ par. 13 Gelar-gelar bas artikel enda nggo iganti.
^ par. 57 KETERANGEN GAMBAR: Sabar sekalak pertua megiken sekalak senina si la iukurina rananna perban sangana latih kel akapna rukur. Tapi sanga nggo lebih tenang ia, ipersingeti pertua ndai ia alu manjar-anjar.
^ par. 59 KETERANGEN GAMBAR: Sekalak perbulangen ras ndeharana itemanina sekalak turang senina si mbaru denga mate ndeharana. Janahna ngenen foto-foto, cerita-cerita kalak e kerna ndehara turang seninata e ndai.