1. Engkai maka arus siperdiateken persinget Jesus?

IKATAKEN Jesus kerna wari-wari pendungi, nina, “Perdiatekenlah diri kena gelah ula pusuh kena iberati alu . . . perasan kuatir kerna kegeluhen enda.” Maksudna, kuatir kerna keperlunta tiap wari. (Luk. 21:34) Arus siperdiateken persinget Jesus e. Engkai? Perban bali bagi kalak si deban, arus ka siadapi masalah-masalah si banci erban kita stres ntah pe tertekan.

2. Kai saja masalah turang seninata si erban ia stres?

² Mon-mon, banci sekali reh kerina masalahta janah banci dungna kita stres. Perdiateken contoh-contoh enda. Lit sekalak turang seninata si gelarna John, * terganggu sistem sarafna. Itadingken ndeharana ka ia kenca 19 tahun erjabu, sengget kel ia janah getem kel pusuhna. Kenca si e, dua anakna si diberu lanai ngelayani Jahwe. Lit ka sekalak perbulangen ras ndeharana si gelarna Bob ras Linda, mberat kel masalah kalak e. Ipecat kalak e arah pendahinna, janah arus itadingkenna rumahna perban lanai tergalarisa cicilenna. Selain si e, ikataken dokter ka maka mekelek sakit jantung Linda janah lit ka pinakitna si deban si erban lemah daya tahan tubuhna.

3. Kai si banci sipelajari kerna Jahwe arah Pilipi 4:6, 7?

³ Tek kita maka pasti iangkai Jahwe uga perasanta sanga kita stres, perban Ia Si Nciptaken kita janah Ia Bapakta si perkeleng. IsampatiNa ka ateNa kita ngadapi masalahta. (Baca Pilipi 4:6, 7.) Bas Pustaka, melala iceritaken kerna  masalah si iadapi umat Dibata. Lit ka iceritaken kerna uga Jahwe nampati kalak e ngadapi masalahna. Mari sibahas piga-piga contohna.

4. Kai saja tentangen si iadapi Elia? Kai si igejapken Elia kerna Jahwe?

⁴ Sanga Elia ngelayani Jahwe, mberat kel situasina janah melala kel tentangenna. Raja Ahap, salah sada raja Israel si la setia, erjabu ia ras Isebel si kejam janah nembah Baal. Ipengaruhi Ahap ras Isebel kalak Israel gelah nembah Baal janah ibunuh kalak e nabi-nabi Jahwe. Tapi Elia banci selamat. Janah sanga terjadi kelihen, banci ka ia selamat perban isampati Jahwe. (1 Raj. 17:2-4, 14-16) Selain si e, tek ka Elia man Jahwe sanga itentangna nabi-nabi bage pe kalak si nembah Baal janah iiahkenna bangsa Israel nembah Jahwe. (1 Raj. 18:21-24, 36-38) Enggo igejapken Elia janah inenna maka lalap isampati Jahwe ia janah iselamatkenNa bas situasi si seh kel beratna e.

5-6. Menurut 1 Raja-Raja 19:1-4, uga perasan Elia? Janah kai buktina keleng ate Jahwe Elia?

⁵ Baca 1 Raja-Raja 19:1-4. Mbiar kel Elia sanga ibegina ibunuh Ratu Isebel atena ia. Emaka kiam ia ku Berseba. Sanga nggo latih kel akapna “madin iakapna ia mate.” Engkai maka sempat bage? Perban ia manusia si la sempurna janah ‘seri perasanna ras kita.’ (Jak. 5:17) Banci saja lanai kapna ia ngasup perban nggo latih kel kapna janah stres ia. Enggo  sia-sia akapna usahana guna nampati kalak Israel mulihken ku Jahwe. Banci saja la kapna lit si berubah janah sisada kapna bana ngelayani Jahwe. (1 Raj. 18:3, 4, 13; 19:10, 14) Banci saja mamang ateta ngkai maka banci bage perasan Elia padahal ia sekalak nabi si setia. Tapi, iangkai Jahwe uga perasan Elia.

⁶ Sanga ituriken Elia uga perasanna, la irawai Jahwe ia. Tapi, isampati Jahwe ia gelah paguh mulihi. (1 Raj. 19:5-7) Icidahken Jahwe kuasaNa si mbelin gelah benar cara Elia rukur. Selain si e, ikataken Jahwe ka maka lit denga 7.000 kalak i Israel si la nggit nembah Baal. (1 Raj. 19:11-18) Enda kerina jadi bukti maka keleng ate Jahwe Elia.

7. Kai pelajarenna banta kenca siteh uga cara Jahwe nampati Elia?

⁷ Sangana nge melala masalahndu si erban kam stres? Terapuli kel kita perban siteh maka iangkai Jahwe uga perasan Elia. Tek kita maka iangkai Jahwe ka uga perasanta sanga ngadapi masalah. ItehNa kai si ngasup kita ngelakokenca ras si lang. ItehNa ka perukuren ras perasanta. (Msm. 103:14; 139:3, 4) Adi tek kita man Jahwe bagi Elia, pasti isampatiNa kita ngadapi kerina masalah si erban kita stres.​—Msm. 55:23.

8. Kai si ilakoken Jahwe guna nampati kam sanga kam stres?

⁸ Sanga stres kita, banci siakap lanai lit jalan keluar masalahta e janah dungna putus asa kita. Adi bage sangana situasindu, ingetlah maka pasti kam isampati Jahwe. Uga carana? Iundang Jahwe kam gelah iturikenndu kerina masalahndu bage pe perasanndu man baNa. Pasti ijawap Jahwe pertotonndu janah isampatiNa kam. (Msm. 5:4; 1 Pet. 5:7) Emaka teruslah ertoto man Jahwe. Memang labo mis kari Ia ngerana man bandu bagi si ilakokenNa man Elia, tapi ngerana Ia arah Pustaka bage pe organisasiNa. Contoh-contoh si ibacandu bas Pustaka banci ngapuli kam janah erban kam semangat mulihi. Turang seninata pe banci ka mpegegehi kam.​—Rom. 15:4; Heb. 10:24, 25.

9. Sanga lit masalahta, ngkai maka perlu kita teman?

⁹ Isuruh Jahwe Elia gelah iberekenna deba tugasna man Elisa. Situhuna enda cara Jahwe gelah lit teman Elia si banci nampati ia gelah megenggeng sanga kitik ukurna. Emaka, perlu ka situriken masalahta man temanta gelah banci isampatina kita tetap semangat. (2 Raj. 2:2; Kua. 17:17) Adi lenga kapndu lit temanndu cerita, totokenlah man Jahwe. Pasti isampatiNa kam gelah datndu teman si paguh kinitekenna si banci mpegegehi kam.

10. Kai pengaruh pengalamen Elia man banta? Janah kai si banci sipelajari arah janji Jahwe bas Jesaya 40:28, 29?

¹⁰ Sanga stres Elia, isampati Jahwe ia janah ngasup dungna ia ngelayani Jahwe puluhen tahun dekahna. Pengalamen Elia banci erban kita semangat. Mon-mon, la erngadi-ngadi reh masalahta dungna latih kel siakap janah stres kita. Tapi, adi tek kita man Jahwe pasti iberekenNa kita gegeh gelah ngasup kita terus ngelayani Ia.​—Baca Jesaya 40:28, 29.

11-13. Kai si erbanca latih ukur telu umat Dibata, janah kai pengaruhna man kalak e?

¹¹ Lit ka umat Dibata si pernah latih kel  kapna rukur ntah pe stres. Salah sadana eme Hanna. Mela ia perban la banci lit anakna. Selain si e lalap ia itokohi kiduana. (1 Sam. 1:2, 6) Latih kel kapna rukur, ngandung ia lalap, janah lanai tena man.​—1 Sam. 1:7, 10.

¹² Raja Daud pe pernah kang latih kapna rukur. Cuba siukuri kai saja masalahna. Lalap iingetna dosana janah salah lalap akapna bana. (Msm. 40:13) Anak si ikelengina eme Absalom mberontak ngelawan ia janah dungna mate anakna e. (2 Sam. 15:13, 14; 18:33) Ihianati sahabatna ka ia. (2 Sam. 16:23–17:2; Msm. 55:13-15) Bas masmur si itulis Daud, buen isina kerna uga latihna akapna rukur bage pe kerna kinitekenna si paguh man Jahwe.​—Msm. 38:6-11; 94:17-19.

¹³ Lit ka penulis masmur si cian atena kalak jahat. Banci jadi ia keturunen Asap, kalak Lewi janah ngelayani bas “rumah Dibata.” Latih kel akap penulis masmur e rukur. Lanai ia ermeriah ukur janah lanai ia puas nandangi pasu-pasu si ibereken Dibata man bana.​—Msm. 73:2-5, 7, 12-14, 16, 17, 21.

14-15. Kai si banci sipelajari arah contoh-contoh e ndai?

¹⁴ Teluna kalak e ndai tek janah ernalem man Jahwe. Ertoto kalak e man Jahwe janah iturikenna kerina si erban latih ukurna. Janah terus kalak e lawes ku rumah pertoton guna nembah Jahwe.​—1 Sam. 1:9, 10; Msm. 55:23; 73:17; 122:1.

¹⁵ Ibegiken Jahwe kalak e janah sabar Ia nampatisa. Hasilna, banci Hanna tenang. (1 Sam. 1:18) Nina Daud, ‘Kalak bujur pe mbue ngenanami kiniseran, tapi ipulahi Jahwe ia i bas kerinana nari.’  (Msm. 34:20) Janah igejapken penulis masmur dungna maka ‘icikep Jahwe tan kananna,’ janah itegu-teguNa ia alu pedah si iberekenNa. Rende ia, ‘Adi aku, senang kel kuakap, adi rembak ras Dibata. Jahwe Dibata kubahan man inganku cicio.’ (Msm. 73:23, 24, 28) Kai si banci sipelajari arah contoh-contoh e ndai? Mon-mon, banci saja mberat kel masalahta dungna latih kel siakap rukur. Tapi gelah banci tetap kita paguh, perlu siukuri uga Jahwe nggo nampati kalak si deban. Arus ka kita ertoto man baNa janah sidalanken kai si ipindoNa.​—Msm. 143:1, 4-8.

16-17. (a) Engkai maka ula pernah sitadingken Jahwe ras turang senina? (b) Kai si banci erban kita semangat mulihi?

¹⁶ Lit pelajaren si deban si banci sidat arah telu contoh ndai. Sanga latih kel ukurta ntah pe stres kita, ula pernah sitadingken Jahwe ras turang senina. (Kua. 18:1) Turang seninata si gelarna Nancy, stres kel ia sanga itadingken perbulangenna. Nina, “Megati lanai teku jumpa ntah pe ngerana ras ise pe. Tapi labo reh ulina keadanku malahen reh stresna.” Dungna iusahaken Nancy nampati  kalak si deban, hasilna reh ulina keadanna. Nina, “Sanga ituriken kalak masalahna, kubegiken ia. Perban kuperdiateken kalak si deban dungna lanai kuinget masalahku.”

¹⁷ Banci kita semangat mulihi adi reh kita ku perpulungen. E me dalanna Jahwe “nampati dingen ngapuli” kita. (Msm. 86:17) Bas perpulungen, ipegegehi Jahwe kita arah kesahNa si badia, Pustaka, bage pe turang seninata. I je pe banci kita mpegegehi sada ras si debanna. (Rom. 1:11, 12) Nina sekalak turang seninata si gelarna Sophia, “Situhuna banci aku ngasup bagenda perban isampati Jahwe ras turang senina. Perpulungen pe seh kel kuakap pentingna. Janah perban rusur aku erberita bage pe aktif bas runggun, reh nahangna kuakap rukur janah lanai aku kuatir.”

18. Sanga kitik ukurta, kai si ibereken Jahwe banta?

¹⁸ Sanga kitik ukurta ntah pe stres, siingetlah maka labo bas wari si pepagi saja kita isampati Jahwe, tapi gundari pe kita isampatiNa. IbereNa banta “sura-sura ras gegeh” gelah banci kita megenggeng.​—Pil. 2:13.

19. Kai janji si lit bas Roma 8:37-39?

¹⁹ Baca Roma 8:37-39. Ikataken Rasul Paulus maka la lit si banci nirangken kita arah keleng ate Dibata. Kai si banci silakoken guna nampati turang seninata si sangana latih kapna rukur? Bas artikel seterusna, sibahas kari uga carata ngusih Jahwe alu mperdiateken janah nampati turang seninata si sangana latih kapna rukur.