TEK kita maka itegu-tegu Jahwe umatNa janah iberekenNa kai si iperluken kalak e gelah tetap rembak ras Ia bas “wari-wari pendungi” enda. (2 Tim. 3:1) Tapi, gelah sidat manpaatna, kerina kita arus patuh man Jahwe. Banci sipeseri situasita ras kai si ilakoken kalak Israel sanga bas taneh mesawang. Paksa si e, arus iban kalak e tindaken sanga ibegina sora terompet.

Iperentahken Jahwe man Musa, “Bahan dua terompet. Terompet e itepa i bas pirak nari gelah ipake guna ndilo kalak Israel pulung ras nuruh berkat nadingken ingan erkemah.” (Bil. 10:2) Arus iembus imam-imam terompet e alu piga-piga cara si la seri guna mpebetehken man kalak Israel kai si arus ilakoken kalak e. (Bil. 10:3-8) Gundari, ialoken umat Dibata ka petunjuk-petunjuk alu piga-piga cara. Lit kari telu cara si man bahasenta, janah sibandingken kari e ras terompet si iembus bas jaman Israel. (1) Umat Dibata iundang reh ku kebaktin ntah pe ku acara khusus si debanna. (2) Pertua-pertua iundang ngikuti pelatihen. (3) Kerina runggun isuruh gelah ngikutken pengaturen si nggo iperbarui ntah pe isesuaiken.

Adi iembus imam-imam duana terompet, e ertina pulung ate Jahwe “kerina perpulungen” bas pintu masuk sebelah timur kemah ingan ersembah. (Bil. 10:3) Kerina suku si ibagi jadi empat kelompok janah erkemah i sekeliling kemah ingan ersembah, megi sora terompet e. Kalak si kemahna ndeher ku pintu masuk banci mis reh bas piga-piga menit saja. Tapi kalak si agak ndauh kemahna, banci saja perlu terbuen waktu ras gegeh gelah banci reh. La soal ndeher ntah pe ndauh, ate Jahwe gelah kerina min pulung guna megiken petunjukNa.

Gundari, lanai kita pulung bas kemah ingan ersembah. Tapi kerina kita iundang gelah reh ku kebaktin regional ntah pe ku acara-acara khusus si debanna. Bas acara e sialoken informasi ntah pe petunjuk si penting. Umat Jahwe arah erbage-bage negri ngikuti acara si seri. Pasti meriah kel iakap kalak si nggit reh ku acara si bage. Piga-piga si reh ku acara e ndauh rumahna. Aminna pe bage, kerina kalak si reh nggejapken manpaat si sebanding ras pengorbanen si nggo ibanna gelah banci reh.

Uga kerna turang seninata si ndauh kel rumahna arah ingan kebaktin? Perban teknologi si nggo reh majuna, banci ka idat kalak e manpaat arah acara-acara si bage. Janah banci ka iakapna ia nggo tempa-tempa langsung reh ku acara e. Misalna, sanga reh wakil arah kantor pusat ndahi kantor cabang i Benin, iban kalak e sada acara khusus. Acara e pe isiarken ku Arlit,  Niger, sada kota pertambangen i Gurun Sahara. Lit 21 kalak si nonton acara e, termasuk piga-piga peminat. Aminna pe kalak e lit bas ingan si seh kel dauhna, tapi iakap kalak e bagi tempa nggo radu ia pulung ras kerina hadirin si jumlahna 44.131 kalak. Nina sekalak turang seninata, “Bujur kel ning kami perban acara enda nggo isiarken ku ingan kami. Banci igejapken kami keleng kel ate kena kami.”

Adi sada terompet saja ngenca iembus imam, “kepala-kepala terpuk saja ngenca” si arus pulung bas kemah perjumpan. (Bil. 10:4) I je, ibereken Musa informasi ras pelatihen man kalak e gelah reh beluhna kalak e bas minpin sukuna. Adi kam salah sada si minpin suku e, pasti iusahakenndu kel reh gelah datndu manpaat arah perjumpan e.

Gundari, pertua-pertua labo “kepala” ntah pe peminpin, janah labo ka iperentahna biri-biri Dibata si ipermakanina. (1 Pet. 5:1-3) Tapi iusahakenna kel mpermakani biri-biri si lit bas runggun. Emaka pasti nggit kalak e ngaloken undangen guna ngikuti pelatihen tambahen, misalna bagi Sekolah Pelayanen Kerajan. Bas sekolah e, erlajar pertua-pertua uga carana gelah reh ulina bas ngurus runggun. Alu bage, pertua-pertua bage pe kerina turang senina bas runggun banci reh rembakna ras Jahwe. Amin gia lenga pernah kam ikut bas sekolah e, banci ka idatndu manpaat arah pertua si deban si nggo ikut bas sekolah e.

Adi berubah-ubah sora terompet si iembus imam-imam, e ertina pindah ate Jahwe kerina bangsa e ku ingan si deban. (Bil. 10:5, 6) Ratur kel cara kalak e pindah. Tapi, e pasti la menukah perban melala kel si arus ilakoken kalak e. Mon-mon banci saja lit si kisat ia pindah ku ingan si deban. Engkai?

Banci saja lit kalak Israel si iakapna nggo rusursa kalak e pindah janah rempet-rempet. Nina Pustaka, “Adi embun e ringan denga i babo Kemah e, bangsa Israel la pindah.” Tapi, ‘mon-mon embun e ringan i je karaben nari seh erpagi-pagi ngenca.’ Mon-mon ka embun e tading ‘dua wari, sada bulan, ntah pe dekahen asa si e.’ (Bil. 9:21, 22) Situhuna piga kali nge kalak e pindah-pindah? Bas Bilangen pasal 33 ikataken maka lit kira-kira 40 kali kalak e arus pindah.

Mon-mon, erkemah kalak Israel bas ingan si linggem. Perban kalak e bas ‘gurun pasir si mbelang janah melala kebiaren,’ pasti meriah ukur kalak e sanga jumpa ingan si linggem. (Ul. 1:19) Banci jadi e si erbanca piga-piga kalak kuatir adi pindah, perban mbiar kalak e lanai kari datna ingan si bage tabehna.

Sanga nggo seh waktuna kalak e berkat, banci saja piga-piga suku arus sabar nimai gilirenna. Aminna pe kerina kalak e megi sora terompet, tapi la kalak e banci radu berkat. Sanga terbegi sora terompet si pertama, suku si erkemah i sebelah timur arus berkat. Suku-suku e eme Juda, Isakar, Sebulon. (Bil. 2:3-7; 10:5, 6) Kenca berkat kalak e, iembus imam-imam me terompet si berubah-ubah sorana pedua kaliken. E tandana telu suku si sebelah selatan arus berkat. Bage me si terus ilakoken imam-imam seh ngasa kerina suku berkat.

Sanga lit perubahen bas organisasi, banci saja mesera akapndu ngalokenca. Banci saja latih akapndu perban melalasa perubahen. Banci saja nggo terbiasa kam man sada peraturen tertentu janah lanai atendu e berubah. Banci saja arus kam erjuang gelah banci sabar bas erban penyesuaien ras perubahen e. Aminna pe bage, adi siusahaken ngalokenca janah ngikutkenca, banci saja sadar me kita maka perubahen e erguna banta janah meriah siban ukur Jahwe.

Bas jaman Musa, isampati Jahwe jutan dilaki, diberu, ras anak-anak ngelewati taneh mesawang. Adi la kin isampati Jahwe janah la iberekenNa petunjuk, pasti la banci kalak e nggeluh. Gundari pe, isampati Jahwe kita gelah ngasup ngelewati wari-wari pendungi si dem alu bahaya. Alu penampat Jahwe banci reh paguhna kinitekenta janah reh rembakna kita ras Jahwe. Emaka, kerina kita pasti lalap ateta patuh bali bagi bangsa Israel si patuh sanga ibegina sora terompet!