ARTIKEL PELAJAREN 23
“Ipebadia min GelarNdu”
“O Jahwe, gelarNdu lit rasa lalap.”—MSM. 135:13, Terjemahan Dunia Baru, (NW).
LAGU 10 Mari Puji Jahwe!
SI IBAHAS *
1-2. Masalah kai nge si penting kel iakap Saksi-Saksi Jahwe?
KITA lit bas masalah si seh kel pentingna. Masalah e lit hubungenna ras gelar Jahwe bage pe caraNa merentah. Perban kita Saksi Jahwe, penting kel siakap e duana.
2 Siteh maka gelar Dibata perlu ipebadiaken. Janah nggo sipelajari ka maka kerina kalak arus meteh cara Jahwe merentah me si mehulina. Emaka, seh kel pentingna si e duana.
3. Kai saja si lit hubungenna ras gelar Jahwe?
3 Kerina kerna Jahwe termasuk cara Ia merentah lit hubungenna ras gelarNa. Emaka, adi penting kel siakap gelah gelar Jahwe e ipebadiaken, penting ka kel siakap gelah iangkai kerina kalak maka cara Jahwe merentah me si mehulina. Jelas me, lit hubungenna gelar Jahwe ras caraNa merentah selaku Penguasa Si Meganjangna.—Nen kotak “ Si Termasuk bas Mpebadiaken Gelar Jahwe.”
4. Kai si ikataken Masmur 135:13 kerna gelar Dibata? Janah penungkunen kai saja si man bahasenta?
4 Istimewa kel gelar Jahwe e. (Baca Masmur 135:13 si lit bas cataten i teruh.) * Engkai maka gelar Dibata e seh kel pentingna? Uga nge tangtangna gelar e ipitnah? Uga cara Dibata mpebadiaken gelarNa? Janah uga carata ikut mbela gelarNa? Sibahas kari jawapenna.
SEH KEL PENTINGNA SADA GELAR
5. Kai si banci saja isungkun kalak sanga ibegina gelar Dibata perlu ipebadiaken?
5 Imulai Jesus contoh pertotonna alu ngataken, “Ipebadia min gelarNdu.” (Mat. 6:9) Enda buktina maka salah sada si pentingna si arus sitotoken eme gelah gelar Dibata ipebadiaken. Kai ertina gelar Dibata ipebadiaken? Ipebadiaken ertina iban jadi bersih ntah pe murni. Tapi, banci saja lit si tersungkun-sungkun, “Gelar Jahwe me nggo badia, bersih, ras murni. Engkai ka maka perlu ipebadiaken?” Guna njawapsa, perlu siteh kai saja si lit hubungenna ras sada gelar.
6. Engkai maka bage kel ergana sada gelar?
6 Gelar seh kel pentingna. Gelar labo ngenca kata si banci itulis ntah pe si banci ibelasken. Nina Pustaka, “Gelar mehuli ergan kap, asangken erta-erta.” (Kua. 22:1; Peng. 7:1) Engkai maka bage kel ergana gelar e? Perban kai si iukuri kalak kerna sekalak jelma lit hubungenna ras gelarna. Emaka si pentingna labo cara gelar e itulis ntah pe ibelasken, tapi kai si iukuri kalak si deban sanga idahna ntah pe ibegina gelar e.
7. Kai si ilakoken kalak gelah ceda gelar Dibata?
7 Enterem kalak ceda banna gelar Jahwe. Uga carana? Alu ngataken kai si la tuhu kerna Jahwe gelah negatif perukuren kalak kerna Ia. Enda tangtangna terjadi i Taman Eden. Mari sibahas kai si terjadi paksa si e.
UGA TANGTANGNA GELAR DIBATA IPITNAH?
8. Kai si iteh Adam ras Hawa? Janah penungkunen kai saja si banci siukuri kerna kalak e?
8 Iteh Adam ras Hawa gelar Dibata eme Jahwe, janah itehna ka melala kebenaren si penting kerna Ia. Misalna, iteh kalak e maka Jahwe e Pencipta, perban Ia si mereken kegeluhen, ingan tading si mejile, ras teman geluh si sempurna. (Kej. 1:26-28; 2:18) Tapi, terus nge iukuri kalak e kerina pasu-pasu arah Jahwe? Terus nge iusahaken kalak e gelah reh kelengna atena Jahwe janah reh bagesna pengerganna man Jahwe? Siteh jawapenna sanga kalak e icubai musuh Dibata.
9. Menurut Kejadin 2:16, 17 ras 3:1-5, kai si ikataken Jahwe man Adam ras Hawa? Janah uga cara Setan erbual man kalak e?
9 Baca Kejadin 2:16, 17 ras 3:1-5. Igunaken Setan nipe guna nungkun man Hawa, nina, “Tuhu kin ikataken Dibata man bandu maka la banci ipanndu sada pe buah batang kayu si i bas peken enda?” Alu nggunaken penungkunen e iban Setan gelah negatif perukuren Hawa man Dibata. Situhuna si ilarang Dibata si la banci ipan Adam ras Hawa eme buah arah sada batang kayu saja ngenca. Tapi, kerina buah batang kayu si debanna banci ipan kalak e. Pasti seh kel buena buah si banci ipan Adam ras Hawa. (Kej. 2:9) Jelas me, melala kel si nggo ibereken Jahwe man kalak e. Jadi bual nge penungkunen Setan e ndai. Iban Setan gelah iakap Hawa Dibata e la nggit mere. Banci saja tersungkun-sungkun Hawa, ‘Kai nge si la ate Dibata iberekenNa bangku?’
10. Uga carana ipitnah Setan gelar Dibata alu terang-terangen? Janah kai akibatna?
10 Sanga nungkun Setan man Hawa, patuh denga Hawa man Dibata Jahwe. Ikataken Hawa man Setan perentah Dibata si seh kel jelasna. Ikataken Hawa ka maka njemak batang kayu e saja pe la banci ilakoken kalak e. Iteh Hawa maka adi la kalak e patuh, mate me kalak e. Tapi nina Setan ngaloi, “Labo tuhu e, labo kam mate.” (Kej. 3:2-4) Emaka gundari, nggo terang-terangen kel ikataken Setan maka Dibata e perbual. Ipitnahna Dibata janah nggo ceda banna gelar Dibata. Paksa si e me Setan jadi Iblis, si ertina “tukang pitnah.” Tek Hawa man kai si kataken Setan. “Kena tipu” me ia. (1 Tim. 2:14) Perban tek Hawa man Setan lebihen asangken man Jahwe, dungna iban Hawa keputusen si la mehuli. La ia patuh man Jahwe janah ipanna buah si ilarang Jahwe. Kenca si e, iberekenna ka man Adam.—Kej. 3:6.
11. Kai si arusna ilakoken Adam ras Hawa? Janah ngkai maka la bage ilakoken kalak e?
11 Cuba ukurindu kai si arusna ikataken Hawa man Setan. Bayangken adi bagenda nina, “La kam kutandai pe! Tapi Bapakku, Jahwe, kuteh uga Ia. Keleng kel ateku Ia, janah tek aku baNa. Nggo melala kel si iberekenNa man bangku ras Adam. Pang nari nge kam bage ngerana! Lawesken, to!” Bicara tetap min ndai Hawa setia janah bage nina man Setan, pasti meriah kel ukur Jahwe! (Kua. 27:11) Tapi la icidahken Hawa ras Adam kekelengen si setia man Jahwe. Perban si e me la banci ibela kalak e gelar Jahwe sanga ipitnah Setan.
12. Kai si ilakoken Setan gelah sangsi Hawa? Janah kai si la ilakoken Adam ras Hawa?
12 Bagi si nggo sibahas ndai, iusahaken Setan erban ceda gelar Jahwe i Taman Eden. Ibanna Hawa sangsi payo nge ntah lang Jahwe e Bapak si mehuli. Janah perban la ibela Adam ras Hawa gelar Jahwe, dungna berhasil me Setan mpengaruhi kalak e gelah mberontak man Bapakna. Gundari, igunaken Setan ka cara si seri. Isebarkenna pitnah kerna Jahwe gelah ceda gelar Jahwe. Akibatna, menukah iakap Setan mpengaruhi kalak gelah la patuh man Jahwe selaku Penguasa.
IPEBADIAKEN JAHWE GELARNA
13. Menurut Esekiel 36:23, kai berita utama bas Pustaka?
13 Sinik saja nge Jahwe sanga ipitnah Setan? Lang. Kerina isi Pustaka mpebetehken kerna kai si nggo ilakoken Jahwe guna mbuktiken maka tuduhen Setan bas Taman Eden labo tuhu. (Kej. 3:15) Janah banci siban kesimpulen maka berita utama bas Pustaka eme: Arah Kerajan si ipinpin AnakNa, ipebadiaken Jahwe me gelarNa, ibanNa doni enda dame janah kalak si benar ngenca si tading i je. Emaka adi sibaca Pustaka, banci siangkai uga Jahwe mpebadiaken gelarNa.—Baca Esekiel 36:23.
14. Kai si ilakoken Jahwe guna mbela gelarNa kenca pemberontaken i Eden?
14 Enggo icubaken Setan erbage-bage cara gelah peraten Jahwe la terjadi. Tapi Setan la pernah berhasil. Ikataken Pustaka kai saja si nggo ilakoken Jahwe, janah si e kerina mbuktiken maka Jahwe e Bapak si perkeleng ras Penguasa si mehulina. Memang, sedih kel Jahwe sanga mberontak Setan ras kerina si ndukung ia. (Msm. 78:40) Amin gia bage, kai pe si ilakoken Jahwe lalap pentar, adil, ras sabar. Rusur ka icidahken Jahwe kuasaNa si luar biasa. Janah si pentingna, icidahken Jahwe kekelengen i bas kerina perbahanenNa. (1 Joh. 4:8) Jelas me, terus iusahaken Jahwe mbela gelarNa.
Ipitnah Setan Jahwe janah erbual ia man Hawa. Ribun tahun dekahna, terus ipitnahna Dibata (Nen paragrap 9-10, 15) *
15. Uga cara Setan mpitnah gelar Dibata gundari? Janah kai akibatna?
15 Terus ipitnah Setan gelar Dibata seh asa gundari. Iusahakenna gelah sangsi kalak tuhu ntah lang Dibata e madakuasa, adil, pentar, ras perkeleng. Misalna, iusahaken Setan gelah tek kalak maka Pencipta e la lit. Bicara tek pe kalak Dibata e lit, iusahaken Setan gelah iakap kalak perentah Dibata e la adil janah mesera kel ndalankenca. Iajarkenna ka maka Jahwe e Dibata si la lit perasanna janah kejam perban itutungNa kalak bas api neraka. Adi tek kalak man bual Setan e, mbelin kemungkinenna la kalak e nggit Jahwe jadi Penguasana. Sope lenga Setan ikernepken, pasti terus ipitnahna gelar Jahwe. Janah iusahakenna ka gelah itadingkenndu Jahwe. Berhasil nge ia?
KAI SI BANCI ILAKOKENNDU?
16. Uga kita banci ikut mpebadiaken gelar Jahwe?
16 Ibereken Jahwe kesempaten man manusia si la sempurna gelah ikut mpebadiaken gelarNa. Alu bage, banci ilakokenndu kai si mbarenda la ilakoken Adam ras Hawa. Amin gia nterem kalak bas sekelilingta ipitnahna ras ihinana gelar Jahwe, banci sikataken man kalak e maka Jahwe me Dibata si benar, badia, mehuli, ras perkeleng. (Jes. 29:23) Banci ka sidukung pemerentahen Jahwe. Salah sada carana eme siberitaken maka pemerentahen Jahwe me si mehulina janah pemerentahen e ngenca si banci erban kita nggeluh alu dame ras ermeriah ukur.—Msm. 37:9, 37; 146:5, 6, 10.
17. Kai si ilakoken Jesus gelah itandai kalak gelar Bapakna?
17 Sanga sibela gelar Jahwe, siusih me Jesus Kristus. Enggo iban Jesus gelar Bapakna itandai kalak. (Joh. 17:26) Uga carana? Selain igunakenna gelar Jahwe, iajarken Jesus ka kebenaren kerna Bapakna. Misalna, ibuktiken Jesus maka ajaren kalak Parisi kerna Jahwe labo tuhu. Ikataken kalak e maka Jahwe e Dibata si kejam, kasar, mesera muat ukurNa, janah mesera ndeherisa. Tapi, isampati Jesus kalak si deban gelah iteh kalak e maka Bapakna tuhu-tuhu masuk akal, sabar, perkeleng, janah nggit ngampuni. Icidahkenna ka uga kin Bapakna e arah perbahanenna perban iusihna sipat-sipat Bapakna bas kegeluhenna tiap wari.—Joh. 14:9.
18. Kai si banci silakoken guna mbuktiken maka kerina tuduhen man Jahwe labo tuhu?
18 Bagi Jesus, banci siberitaken kerna Jahwe man kalak si deban. Alu bage, banci iteh kalak e gelar Dibata si badia janah iergaina. Banci ka siajarken man kalak e maka Jahwe Dibata si mehuli ras perkeleng. Adi silakoken e, sibuktiken maka kerina tuduhen man Jahwe labo tuhu. Janah banci siusih sipat-sipat Jahwe. Enda banci silakoken aminna pe kita la sempurna. (Ep. 5:1, 2) Jelas me, arah ranan bage pe perbahanenta, banci sibuktiken uga kin Jahwe e situhuna. Alu bage, sipebadiaken gelar Dibata. Sibebasken kalak arah ajaren si salah kerna Dibata. Sibuktiken ka maka manusia si la sempurna banci setia man Dibata.—Jop 27:5, NW.
Sisampati ateta kalak si erlajar Pustaka gelah itehna sipat-sipat Jahwe si mehuli ras perkeleng (Nen paragrap 18-19) *
19. Menurut Jesaya 63:7, kai si perlu silakoken gelah kalak si erlajar Pustaka keleng atena Dibata?
19 Lit ka si banci silakoken guna mpebadiaken gelar Jahwe. Sanga siajarken kebenaren Pustaka man kalak si deban, rusur sikataken maka Jahwe ngenca si lit hakna merentah alam semesta. Tapi, tujunta si pentingna eme nampati si erlajar Pustaka gelah keleng atena Bapakta, Jahwe, janah tetap setia man baNa. Emaka, selain sibahas kerna aturen-aturen si ibereken Dibata selaku Penguasa, arus ka rusur sicakapken kerna sipat-sipat Jahwe. Sicidahken ateta uga kin situhuna Jahwe e. (Baca Jesaya 63:7.) Adi bage siban, sisampati kalak si erlajar gelah keleng atena Jahwe janah ipatuhina Jahwe perban tuhu-tuhu atena ngelakokenca.
20. Kai si man bahasenta bas artikel seterusna?
20 Carata ngajar ras perbahanenta, banci erban kalak si deban ngukuri kerina si mehuli kerna Jahwe sanga ibegina kerna gelar e. Teriahken ka kalak e gelah rembak ras Jahwe. Ibahas kari e bas artikel seterusna.
LAGU 2 Jahwe Eme GelarNdu
^ par. 5 Masalah penting kai si lit hubungenna ras manusia bage pe malekat? Engkai maka seh kel pentingna masalah e? Janah ngkai maka kita pe ikut terlibat? Bas artikel enda, sibahas kari penungkunen-penungkunen e bage pe penungkunen si debanna kerna si e. Enda nampati kita gelah reh rembakna ras Jahwe.
^ par. 4 Masmur 135:13, NW, “O Jahwe, gelarNdu lit rasa lalap. O Jahwe, gelarNdu lit arah jaman ku jaman.”
^ par. 62 KETERANGEN GAMBAR: Ipitnah Iblis Dibata, janah ikatakenna man Hawa maka Dibata e perbual. Ribun tahun dekahna, nggo isebarken Setan ajaren si salah, misalna ikatakenna Dibata e kejam janah labo lit Pencipta.
^ par. 64 KETERANGEN GAMBAR: Ibahas sekalak turang seninata kerna sipat-sipat Dibata sanga lit kalak si erlajar Pustaka ras ia.
