1. Uga nge perasan Jahwe sanga biri-biriNa si bene mulihken ku Ia?

BAGI si nggo sibahas bas artikel sebelumna, ipeseri Jahwe diriNa ras permakan si mehuli, si ermediate man kerina biri-biriNa. IdaramiNa ka tiap biri-biriNa si bene. Nina man kalak Israel si nggo nadingken Ia, “Mulihlah ku Aku, maka Aku mulih ku kam.” Seh asa gundari, Jahwe bage denga. Nina, ‘Aku la pernah berubah.’ (Mal. 3:6, 7) Nina Jesus maka adi lit sada saja umat Jahwe si mulihken man baNa, seh kel riahna ukur Jahwe bage pe kerina malekat.​—Luk. 15:10, 32.

2. Kai kari sibahas bas artikel enda?

² Bas artikel enda sibahas kari telu perumpaman Jesus. Arah kerina perumpaman e, sipelajari kari uga carana nampati kalak si nggo ndauh arah Jahwe. Sibahas kari piga-piga sipat si perlu sicidahken guna nampati biri-biri si bene mulihken ku Jahwe. Bas artikel enda pe sibahas kari ngkai maka meriah ukurta adi siusahaken kel nampati kalak si la aktif.

3-4. Engkai maka iusahaken sekalak diberu ndarami sen logam pirakna si bene bagi si iceritaken bas Lukas 15:8-10?

³ Arus siusahaken kel ndarami kalak si mulihken atena ku Jahwe. Bas perumpaman si icatat bas Injil Lukas, iceritaken Jesus kerna sekalak diberu si kebenen barangna si meherga eme sada sen logam pirak. Iusahaken diberu e kel ndarami sen logamna si bene e. E me bagin si pentingna arah cerita e.​—Baca Lukas 15:8-10.

⁴ Iceritaken Jesus uga perasan diberu e sanga datna sen logam pirakna si bene. Bas jaman Jesus, adi lit sekalak diberu erjabu, mon-mon ibereken mamakna sepuluh sen logam pirak man bana jadi hadiah perjabunna. Iakap diberu si lit bas perumpaman  Jesus e maka sen logamna ndabuh bas lante. Emaka ipegeluhna lampu janah idaramina sen logam e bas rumahna. Tapi la idatna, perban banci saja kurang terangna lampu e. Kenca si e, manjar-anjar isapuna kerina rumahna. Dungna, idatna me sen logamna e bas abu si isapuna. Erndilap-ndilap teridah sen e perban cahaya lampuna. Meriah kel ukur diberu e. Perban riahna akapna, iceritakenna man teman-temanna ras man tetanggana.

5. Engkai maka la menukah njumpai kalak si la aktif?

⁵ Bagi si icidahken bas perumpaman Jesus, adi lit barang si bene, perlu kel usaha ndatkenca. Bage ka pe, gelah banci siteh i ja tading kalak si nggo ndauh arah runggun, perlu kel lit usahata. Banci saja nggo ertahun-tahun dekahna kalak e la aktif. Banci saja nggo pindah ia ku ingan si deban, janah la lit turang senina bas daerah e si nandai ia. Tapi gundari, lit piga-piga kalak si merhat kel mulihken ku Jahwe. Mulihi atena ngelayani Jahwe radu ras turang senina bagi si mbarenda. Emaka perlu kalak e penampatta.

6. Kai si banci ilakoken kerina turang senina bas runggun guna ndarami kalak si la aktif?

⁶ Kerina perberita bas runggun banci ikut nampati bas ndarami kalak si la aktif, termasuk pertua-pertua, perintis, ntah pe anggota keluarga arah kalak si la aktif. Lit nge temanndu ntah pe turang seninandu si la aktif? Ntah, pernah nge kam jumpa ras kalak si la aktif sanga kam erberita arah rumah ku rumah ntah pe erberita bas ingan si nterem jelma? Kataken man bana, adi nggit ia idahi pertua, pindolah alamat ntah pe nomor teleponna janah bereken man pertua.

7. Kai si banci sipelajari arah kai si ikataken sekalak pertua si gelarna Thomas?

⁷ Kai saja si banci ilakoken pertua-pertua guna ndarami kalak si mulihken atena man Jahwe? Perdiateken kai nina Thomas, * sekalak pertua si tading i Spanyol. Enggo lebih 40 Saksi si isampatina mulihken ku runggun. Nina Thomas, “Biasana si pertama kulakoken eme kusungkun turang senina si banci saja itehna i ja kalak si la aktif e tading. Ntah ku sungkun perberita si ingetna ise saja kalak si lanai reh ku perpulungen. Menam kerina turang senina bas runggun meriah kel ukurna nampati perban iikutken ka kalak e ndarami kalak si la aktif. Kenca si e, kudahi me turang senina si la aktif e. Kusungkun uga keadan anak-anakna ras anggota keluargana si deban. Piga-piga kalak si la aktif, banci saja rusur mbarenda ibabana anak-anakna ku perpulungen. Janah banci saja anak-anakna e pernah jadi perberita. Kalak e pe banci isampati mulihken ku Jahwe.”

8. Bas perumpaman kerna anak si bene si icatat bas Lukas 15:17-24, uga perbahanen bapak man anakna si nggo ertobat?

⁸ Sipat-sipat kai si arus lit bas kita gelah banci sisampati kalak si la aktif mulihken ku Jahwe? Banci kita erlajar arah perumpaman Jesus kerna anak si bene. (Baca Lukas 15:17-24.) Ikataken Jesus maka dungna isadari anak e kesalahenna janah mulih ia ku rumah. Kiam bapakna ngalo-ngalo anakna e janah idakepna kel ia. Ieteh anak e me maka keleng denga ate bapakna ia. Ersalah kel iakap anak e bana janah lanai iakapna ia cocok jadi anak. Iceritaken anak e uga perasanna man bapakna. Tutus kel ate bapakna megikenca janah iangkaina kel uga perasan anakna e. Ipetetap bapakna atena ukur anakna e maka tetap denga nge ia iban bagi anak si ikelengi, labo bagi si erdahinna. Emaka, iban bapakna  pesta si mbelin janah iberekenna baju si mejile man anakna si nggo ertobat.

9. Sipat-sipat kai si arus sicidahken gelah banci sisampati kalak si la aktif mulihken ku Jahwe? (Nen kotak “ Cara Nampati Kalak Mulihken ku Jahwe.”)

⁹ Jahwe bali bagi bapak si lit bas perumpaman e. Keleng ateNa turang senina si la aktif janah mulihken min atena kalak e man baNa. Adi siusih Jahwe banci sisampati kalak e gelah mulih. Gelah banci sisampati kalak e, arus kita sabar, sepenggejapen, janah perkeleng. Engkai maka arus sicidahken sipat-sipat si bage? Janah uga carana?

10. Engkai maka kita arus sabar sanga sisampati kalak rembak mulihi ras Jahwe?

¹⁰ Perlu waktu gelah banci kalak mulih ku Jahwe, emaka arus kita sabar. Enterem kalak si la aktif ngataken maka nggit dungna kalak e ngelayani Jahwe perban mulih-ulih rusur pertua-pertua ras turang senina ndahi ia. Sekalak turang senina si gelarna Nancy arah Asia Tenggara nari ngataken, “Melala kel kudat penampat arah sekalak teman si mehuli bas runggun. Keleng atena aku, ianggapna aku bagi agina. Iingetkenna aku kerna kai si mehuli si pernah ilakoken kami ras-ras. Sanga kuceritaken uga perasanku, sabar kel ia mbegiken aku. Janah la ia mbiar-mbiar mereken nasehat man bangku. Ibuktikenna ia teman si tuhu-tuhu, katawari pe nggit ia nampati aku.”

11. Engkai maka sipat sepenggejapen banci nampati kalak si sangana kitik ukurna?

¹¹ Sanga kitik ukur kalak, biasana sakit kel akapna. Sipat sepenggejapen bali bagi tambar si mejile si banci erban malem pusuh kalak. Piga-piga kalak jadi la aktif perban lit turang senina si erban kitik ukurna janah lalap atena nembeh ertahun-tahun dekahna. Janah e si  erbanca maka lanai atena mulih ku Jahwe. Banci saja la adil iakapna turang senina man bana. Emaka, banci saja perlu ia kalak si nggit megiken ia janah ngangkai perasanna. (Jak. 1:19) María, sekalak turang senina si pernah la aktif ngataken, “Si kuperluken eme kalak si nggit megiken aku, ngapuli aku sanga aku sedih, janah mere penampat ras nasehat si kuperluken.”

12. Engkai maka kekelengen Jahwe banci ipeseri ras nali?

¹² Nina Pustaka maka kekelengen Jahwe man umatNa banci ipeseri ras nali. Engkai? Cuba bayangkenndu situasi enda: Kam sangana bas tengah laut si merawa, janah menam kam gedap. Kenca si e, lit si mbenterken pelampung man bandu. Pelampung e banci nampati kam gelah la gedap, emaka pasti ngata bujur kel kam. Tapi, labo bias pelampung e saja ngenca si erban kam selamat. Laut e mbergeh kel, emaka gelah banci selamat arus kam nangkih ku perahu. Emaka, arus ka lit kalak si mbenterken nali man bandu janah narik kam ku perahu. Nina Jahwe man kalak Israel si nggo ndauh arah Jahwe nari, “Kutarik kalak e ku Aku alu nali kekelengen.” (Hos. 11:4, Terjemahan Dunia Baru) Bage me perasan Dibata man kalak si gundari lanai ngelayani Ia janah si sangana gedap bas masalah ras kekuatirenna. Ate Jahwe ieteh kalak e min maka keleng denga ateNa kalak e, janah itarikNa ateNa kalak e mulihi. Banci igunaken Jahwe kam bas ncidahken kekelengenNa man kalak e.

13. Ceritaken sada pengalamen si mbuktiken maka kekelengen banci nampati kalak mulihken ku Jahwe.

¹³ Penting kel mpetetap ukur kalak si la aktif maka keleng ate Jahwe kalak e janah kita  pe keleng ka ateta kalak e. Pablo, si iceritaken bas artikel sebelumna pernah la aktif 30 tahun dekahna. Nina, “Bas sada wari, paksa erpagi-pagi, sanga berkat aku arah rumah, jumpa aku ras turang senina si nggo metua si seh kel ulina. Mekacar kel ia janah ajakna aku ngerana-ngerana. Ngandung me aku bali bagi anak-anak. Kukataken man bana maka Jahwe me si ngirim ia gelah ngerana ras aku. Paksa si e, mis kuputusken mulih ku Jahwe.”

14. Menurut Lukas 15:4, 5, kai si ilakoken sekalak permakan kenca idatna biri-birina si bene?

¹⁴ Kenca jumpa kita ras kalak si la aktif, arus terus sisampati ras sidukung kalak e. Bali bagi anak si bene bas perumpaman Jesus, banci saja sakit kel iakapna, janah perlu waktu gelah banci tuhu-tuhu malem. Janah perban sedekah enda nggo melala kel ia ipengaruhi doni Setan, mbelin kemungkinenna lanai bagi mbarenda ia rembakna ras Jahwe. Arus sisampati kalak e gelah reh paguhna kinitekenna man Jahwe. Bas perumpaman kerna biri-biri si bene, ikataken Jesus maka itama permakan e biri-biri e ku das barana, jenari babana mulih ku rarasen. Melala waktu ras gegeh si nggo ipake permakan e guna ndarami biri-biri si bene e. Tapi, itehna maka perlu ka iangkipna janah ibabana biri-biri e mulih ku rarasen perban biri-biri e lanai kesahna mulih si sada.​—Baca Lukas 15:4, 5.

15. Uga kita banci nampati kalak si lemah gelah mulihken ku Jahwe? (Nen Kotak “ Alat si Mbelin Kel Gunana.”)

¹⁵ Banci saja melala waktu ras gegeh si iperluken guna nampati kalak si la aktif bas ngatasi masalah si iadapina. Tapi melala sidat penampat arah kesah si badia Jahwe, Pustaka, ras publikasi si isikapken organisasi. Jadi pasti banci sisampati kalak e mulihi rembak ras  Jahwe. (Rom. 15:1) Uga carana? Sekalak pertua si erpengalamen ngataken, “Adi lit kalak si la aktif mulih atena ku Jahwe, biasana perlu ka ia erlajar Pustaka mulihi.” * Emaka, adi isuruh pertua kam nampati kalak si la aktif erlajar Pustaka, alokenlah tugas e adi kam ngasup. Nina pertua e ka, “Perberita si nampati kalak e erlajar arus banci jadi teman si mehuli. Alu bage, kalak si la aktif menukah iakapna nuriken isi pusuhna.”

16. Engkai banci kita tek maka isampati malekat kita?

¹⁶ Enterem pengalamen si mbuktiken maka malekat-malekat ikut ras kita bas ndarami kalak si la aktif, si mulihken atena ku Jahwe. (Ket. 14:6) Misalna, perdiateken pengalamen Silvio arah Ekuador. Bas sada wari, tutus kel atena ertoto gelah banci mulihken ku runggun. Sanga ertoto denga ia, reh me dua pertua ku rumahna. Bas wari e ka, mulai me isampati dua pertua e Silvio.

17. Kai pasu-pasuna adi sisampati kalak si la aktif?

¹⁷ Adi sisampati kalak si la aktif gelah mulihken ku Jahwe, pasti meriah kel ukurta. Perdiateken kai nina Salvador, sekalak perintis si usahakenna kel nampati kalak si la aktif. Nina, “Mon-mon perban riahna kuakap, ngandung ateku. Meriah kel ukurku banci erdahin radu ras Jahwe guna nampati biri-biriNa ndarat arah doni Setan enda janah mulihken ku runggun.”​—Perb. 20:35.

18. Adi sangana kam la aktif, kam banci tek nandangi kai?

¹⁸ Adi sangana kam ndauh arah umat Jahwe, teklah kam maka keleng denga ate Jahwe kam. AteNa gelah mulihken kam man baNa. Memang gelah banci kam mulihken ku Jahwe, lit piga-piga si perlu ilakokenndu. Tapi, bali bagi bapak bas perumpaman Jesus, sangana kam itimai-timai Jahwe gelah mulihken man baNa, janah meriah kel ukurNa ngalo-ngalo kam.