“Bas sada wari, ipancing-pancing senina sepemerenku aku gelah rubat ras ia. Kujemak kerahungna janah mulai kucekak ia. Kubunuh ateku ia.”​—Paul.

“Bas rumah, menukah kel aku merawa. Perban alasen si sepele saja pe banci aku merawa. Sanga aku merawa, barang kai pe si lit i deherku banci kucedai.”​—Marco.

Banci saja la pernah bage kel rawana kita. Tapi, mon-mon mesera siakap ngkuasai dirita. Engkai? Alasen si utamana eme perban siwarisi dosa arah manusia si pertama eme Adam. (Rom. 5:12) Bagi Paul ras Marco, piga-piga kalak mesera akapna nahan emosina. Lit ka si mesera akapna ngkuasai perukurenna. Misalna, terus iukurina kai si erban ia mbiar ntah pe si erban kitik ukurna. Si debanna mesera ka iakapna nahan sura-surana ngelakoken perbahanen seks si salah, minem-minem, ntah pe nggunaken narkoba.

Adi la sikuasai perukurenta, sura-surata, ras perbahanenta, banci parah kel akibatna. Tapi adi sipebelin sipat ngasup ngkuasi diri, e banci la terjadi. Gelah banci sipebelin sipat e, mari sibahas telu penungkunen enda: (1) Kai kin sipat ngasup ngkuasai diri e? (2) Engkai maka sipat e penting? (3) Uga kita banci mpebelin sipat si ihasilken kesah si badia e? (Gal. 5:22, 23) Kenca si e, sibahas kari kai si perlu silakoken adi mon-mon la banci sikuasai dirita.

Kalak si ngasup ngkuasai dirina la mis ikutkenna kerina sura-surana. Tapi, itahanna dirina gelah la ikatakenna ntah pe ilakokenna kai si erban Jahwe la senang.

Jesus jadi usihen bas ngkuasai diri. Nina, “Sanga ia ihina, la ihinana mulihken. Sanga inanamina kiniseran, la iancamna kalak si erbanca ia ngenanami kiniseran. Tapi iserahkenna kerina man Hakim si adil.” (1 Pet. 2:23) Sanga Jesus i tiang siksan, ihina musuh-musuhna ia tapi banci ikuasaina dirina. (Mat. 27:39-44) Banci ka itahanna dirina sanga melala penungkunen peminpin agama man bana guna njebak ia. (Mat. 22:15-22) Janah sanga piga-piga kalak Jahudi si merawa mbenteri ia atena alu batu, la ilawan Jesus! Tapi “cebuni ia, jenari ndarat i bas rumah pertoton nari.”​—Joh. 8:57-59.

Aminna pe kita la sempurna, banci nge siusih Jesus? Banci. Itulis Rasul Petrus, “Kristus pe ngenanami kiniseran guna kena, janah ia jadi usihen gelah ikutken kena dalan-dalanna alu  megermet.” (1 Pet. 2:21) Emaka banci siikutken Jesus alu megermet i bas ngasup ngkuasai diri. Engkai maka enda penting?

Adi siban ateta Jahwe senang, perlu sikuasai dirita. Aminna pe nggo ndekah kita setia ngelayani Jahwe, hubungenta ras Ia banci saja ceda adi la sikuasai perbahanenta ras rananta.

Perdiateken contoh Musa. Bas jamanna, ia me “dilaki si lembutna i belang-belang doni.” (Bil. 12:3, Terjemahan Dunia Baru) Puluhen tahun dekahna, sabar Musa ngadapi kalak Israel si rusur jungut-jungut. Tapi bas sada wari la banci ikuasai Musa dirina. Paksa si e, mulihi bangsa Israel jungut-jungut perban la bias lau. Merawa me Musa janah isergangna bangsa e, nina, “Begiken, o kam si tukang berontak! Terpaksa kin ipedarat kami man bandu lau i bas batu enda nari?”​—Bil. 20:2-11.

Gagal Musa ngkuasai dirina. La imuliakenna Jahwe sanga ibere Jahwe lau man kalak e alu mukjizat. (Msm. 106:32, 33) Akibatna la ibere Jahwe ia masuk ku Taneh Perjanjin. (Bil. 20:12) Banci saja, menyesal kel Musa seh ngasa ia mate erkiteken perbahanenna e.​—Ul. 3:23-27.

Kai pelajarenna banta? Aminna pe nggo ndekah kita ngelayani Jahwe, la banci kita kasar ngerana man kalak si erban kitik ukurta ntah pe man kalak si perlu inasehati. (Ep. 4:32; Kol. 3:12) Memang, sanga reh tambahna umurta, banci saja reh serana siakap sabar. Tapi ingetlah Musa. La ateta ceda siban gelarta i lebe-lebe Jahwe perban la banci sikuasai dirita. Adi bage, uga carana gelah banci sipebelin sipat si penting enda?

Ertotolah mindo kesah si badia. Engkai? Ngasup ngkuasai diri eme sipat si ihasilken kesah si badia, janah nggit Jahwe mereken kesah si badia man kalak si mindosa. (Luk. 11:13) Alu kesah si badia, ibereken Jahwe kita gegeh gelah banci sikuasai dirita. (Pil. 4:13) SampatiNa ka kita gelah banci sipebelin sipat si deban si ihasilken kesah si badia, misalna kekelengen. Kekelengen banci erban reh nukahna siakap ngkuasai dirita.​—1 Kor. 13:5.

Pedauh kai pe si banci erban mesera iakapndu ngkuasai diri. Misalna, pedauh situs web ras hiburen kai pe si isina kerna kai si la mehuli. (Ep. 5:3, 4) Arus sipedauh kai pe si  banci erban kita tergoda ngelakoken kai si salah. (Kua. 22:3; 1 Kor. 6:12) Misalna, adi lit kalak si menukah tergoda ngelakoken perbahanen seks si salah, banci saja iputuskenna gelah la pernah nari nonton film ntah pe mbaca buku si romantis.

Banci saja mesera siakap ngkuasai dirita. Tapi, adi terus siusahaken, ibere Jahwe kita gegeh gelah banci sikuasai dirita. (2 Pet. 1:5-8) IsampatiNa kita gelah banci sikuasai perukurenta, rananta, ras perbahanenta. E me si igejapken Paul ras Marco, si nggo iceritaken ndai bas artikel enda. Gundari, kalak e lanai menukah merawa. Perdiateken ka pengalamen sekalak turang seninata si menukah merawa sanga maba motor. Mon-mon rubati ka ia ras supir si deban. Kai si ilakokenna guna ngatasi sipatna e? Nina, “Tiap wari tutus kel ateku ertoto. Kupelajari ka artikel-artikel si mbahas kerna ngasup ngkuasai diri janah kuhapal ka piga-piga ayat si banci nampati aku. Enggo ertahun-tahun kuban bage. Aminna pe bage, tiap erpagi-pagi arus denga kuingetken diriku gelah tetap tenang. Janah sanga lit janjiku ras kalak si deban, meter aku berkat gelah ula aku terburu-buru.”

Mon-mon gagal kita ngkuasai dirita. Adi e terjadi, banci saja mela kita ertoto man Jahwe. Tapi situhuna, paksa si e me perlu kita ertoto. Emaka, mis lah kam ertoto man Jahwe. Pindolah gelah iampuni Jahwe kam janah isampatiNa. Kenca si e, arus usahakenndu gelah ula nai lakokenndu kesalahen si seri. (Msm. 51:11-13) Pasti ibegiken Jahwe totondu si ipeseh alu bulat ukur. (Msm. 102:18) Ingetken Rasul Johanes kita maka dareh Anak Dibata nggo ‘mbersihken kita i bas kerina dosa nari.’ (1 Joh. 1:7; 2:1; Msm. 86:5) Ingetlah maka inasehati Jahwe umatNa gelah terus ngampuni kalak si deban. Emaka, tek kita pasti iampuni Jahwe kita.​—Mat. 18:21, 22; Kol. 3:13.

La senang Jahwe sanga gagal Musa ngkuasai dirina bas taneh mesawang. Aminna pe bage, iampuni Jahwe ia. Bas Pustaka pe ikataken maka Musa e kalak si paguh kel kinitekenna janah perlu siusih. (Ul. 34:10; Heb. 11:24-28) Aminna pe la ibere Jahwe Musa masuk ku Taneh Perjanjin, tapi ibereNa ia pagi nggeluh si rasa lalap bas Pardis i doni. Adi terus siusahaken ngkuasai dirita, kita pe banci nggeluh si rasa lalap.​—1 Kor. 9:25.