1. Kai ertina mbiar man Dibata? Janah ngkai maka kalak si keleng atena Dibata perlu ka mbiar man baNa?

KELENG ATE kalak Kristen man Dibata, janah mbiar ka kalak e man baNa. Menurut piga-piga kalak, la akapna mungkin ngkelengi Dibata janahna mbiar man baNa. Tapi mbiar si imaksud i jenda labo mbiar si negatif. Sibahas kari kai maksudna mbiar man Dibata. Adi mbiar sekalak jelma man Dibata, e ertina tuhu-tuhu iergaina janah ihamatina Dibata. La atena ceda hubungenna ras Dibata, emaka iusahakenna kel gelah la ilakokenna kai si erban ceda ukur Dibata.​—Msm. 111:10; Kua. 8:13.

2. Menurut kata-kata Raja Daud bas Masmur 86:11, kai saja kari si man bahasenta?

² Baca Masmur 86:11 si lit bas cataten i teruh. * Sanga siukuri kata-kata bas ayat e, jelas me iangkai Daud maka penting kel ngergai Dibata. Gundari, mari sibahas uga kita banci ngusih Daud. Si pertama, sibahas kari piga-piga alasen ngkai maka perlu siergai gelar Dibata. Si peduaken, sibahas ka uga kita banci mbuktiken maka siergai kel gelar Jahwe bas kegeluhenta.

3. Kai nge si idah Musa si banci saja erban terus iergaina gelar Dibata?

³ Bayangken kai si iadapi Musa. Ia sangana bas gua i gunung batu, janah idatna pengenehenen kerna kemulian Jahwe si lewat  i lebe-lebena. Bas buku Pemahaman Alkitab ikataken maka enda me pengalamen si luar biasana si pernah terjadi man manusia ope kerehen Jesus. Ibegi Musa kata-kata si banci saja malekat si mpesehsa, “Aku kap [Jahwe]. Aku kap Dibata si dem alu lias ate ras perkuah ate. Aku la sukah merawa, janah Kucidahken keleng ateKu si mbelin ras kesetianKu si tetap. Kusehken padanku man meribu-ribu kesusuren janah Kualemi kejahaten ras dosa.” (Kel. 33:17-23; 34:5-7) Sanga ibelasken Musa gelar Jahwe, mbelin kemungkinenna mis ingetna pengenehenen e. E me sebapna bas pudi wari ipersingeti Musa bangsa Israel gelah ‘ipehaga kalak e gelar Dibata si mulia.’​—Ul. 28:58.

4. Kai si banci nampati kita gelah reh bagesna pengerganta man Jahwe?

⁴ Sanga sigunaken gelar Jahwe, arus ka siukuri uga kin Ia situhuna. Perlu siukuri kerna sipat-sipat Jahwe bagi kuasa, pentar, adil, ras kekelengen. Adi siukuri kerina e bage pe kerina sipatNa si deban, reh bagesna me pengerganta man Jahwe.​—Msm. 77:12-16.

5-6. (a) Kai erti gelar Dibata? (b) Menurut Keluaren 3:13, 14 ras Jesaya 64:8, alu cara kai saja iban Jahwe peratenNa terjadi?

⁵ Kai si banci siteh kerna erti gelar Dibata? Melala pakar setuju maka gelar Jahwe ertina “Ia si Erbanca Jadi.” Erti gelar e ngingetken kita maka la lit si banci mpengadi Jahwe guna ngelakoken peratenNa, janah kai pe sura-sura Jahwe pasti banci ilakokenNa. Uga carana?

⁶ Jahwe banci jadi kai pe gelah peratenNa terjadi. (Baca Keluaren 3:13, 14.) * Rusur kita iingetken arah publikasi gelah siukuri kerna kai si luar biasa enda. Selain si e, banci ka iban Jahwe umatNa si la sempurna jadi kai pe si iperlukenNa gelah terjadi peratenNa janah banci ilayani kalak e Ia alu cara si mehuli. (Baca Jesaya 64:8.) Alu cara-cara si bage me iban Jahwe peratenNa terjadi. La lit kai pe si banci mpengadi Jahwe ngelakokenca.​—Jes. 46:10, 11.

7. Kai si perlu silakoken gelah reh bagesna pengerganta man Bapakta si i surga?

 ⁷ Kai si perlu silakoken gelah reh bagesna pengerganta man Bapakta si i surga? Perlu siukuri kai saja si nggo ilakokenNa janah uga Ia nggo nampati kita. Misalna, sanga siukuri kerna ciptan, luar biasa kel siakap perban nggo iciptaken Dibata Jahwe kerinana. (Msm. 8:4, 5) Janah, adi siukuri uga Jahwe nggo nampati kita bas ngelakoken peratenNa, reh bagesna me pengerganta man baNa. Jelas me, gelar Jahwe perlu kel siergai! Gelar e nggambarken kerina kerna Bapakta, kerina si nggo ilakokenNa, ras kerina si nandangi ilakokenNa.​—Msm. 89:8, 9.

8. Menurut Ulangen 32:2, 3, kai ate Jahwe gelah ilakoken umatNa?

⁸ Ope masuk bangsa Israel ku bas Negri Perjanjin, ipebetehken Jahwe man Musa kata-kata arah sada lagu. (Ul. 31:19) Kenca si e, lagu e arus iajarken Musa man bangsa Israel. (Baca Ulangen 32:2, 3.) Adi siukuri ayat 2 ras 3, la ate Jahwe ibuniken gelarNa. La ateNa mbiar kalak ngelebuh gelarNa perban iakap kalak gelar e seh kel badiana. Situhuna, ate Jahwe gelah kerina kalak meteh gelarNa! Ngata bujur kel bangsa Israel perban banci ibegi kalak e kai si iajarken Musa kerna Jahwe ras gelarNa si luar biasa. Malem kel ate kalak e megi kata-kata Musa, bali bagi udan rintik-rintik ku das dukut-dukut. Kai si arus silakoken gelah carata ngajar pe banci erban malem ate kalak?

9. Kai si banci silakoken gelah ikut kita mpebadiaken gelar Jahwe?

⁹ Sanga erberita kita arah rumah ku rumah ntah pe bas ingan si nterem jelma, banci sipake Pustaka guna mpebetehken man kalak maka Jahwe me gelar Dibata. Banci sibereken buku-bukuta ntah pe sicidahken videota bage pe situs webta, si isina muji Jahwe. Bas inganta erdahin, sekolah, ntah pe sanga gawah-gawah, banci saja lit kesempatenta mpebetehken kerna Dibatata si perkeleng bage pe kerna sipat-sipatNa. Banci ka siceritaken kerna kai si luar biasa si nandangi ilakoken Jahwe man banta bage pe man doni enda. Banci saja paksa si e me isadari kalak maka keleng kel ate Jahwe kerina manusia. Sanga sipebetehken man kalak si deban kebenaren kerna Bapakta si perkeleng, ikut kita mpebadiaken gelar Dibata. Sisampati kalak meteh maka nggo melala bual kerna Dibata si iajarken man kalak e. Pasti malem kel atena sanga ibegina ajaren Pustaka.​—Jes. 65:13, 14.

10. Sanga siajari kalak si deban, ngkai maka la bias adi siajari kerna undang-undang ras peraturen Dibata saja ngenca?

¹⁰ Sanga erlajar Pustaka kita ras kalak, sisampati ateta ia gelah itehna janah igunakenna gelar Jahwe. Selain si e, sisampati ka ateta kalak e gelah itandaina uga kin situhuna Jahwe e. Banci nge e terjadi adi undang-undang ras peraturen Dibata saja ngenca siajarken? Banci saja kalak si erlajar Pustaka nggo iangkaina undang-undang Dibata, janah kerina undang-undang e seh kel jilena iakapna. Tapi, perban keleng nge atena Jahwe maka patuhina Ia? Ingetlah maka Adam ras Hawa pe itehna undang-undang Dibata, tapi la tuhu-tuhu keleng atena Jahwe, si mereken undang-undang e. (Kej. 3:1-6) Emaka sanga siajari kalak si deban, la bias adi siajari kerna undang-undang ras peraturen Dibata saja ngenca.

11. Sanga siajari kalak kerna undang-undang ras peraturen Dibata, kai si banci silakoken guna nampati kalak e ngkelengi Jahwe?

¹¹ Undang-undang ras peraturen Jahwe lalap erguna man banta. (Msm. 119:97, 111, 112)  Tapi, gelah iteh kalak si erlajar kerna si e, arus iangkaina maka kerina peraturen si iban Jahwe perban keleng ateNa kita. Emaka, banci sisungkun kalak si erlajar ras kita, “Menurutndu, ngkai maka ibereken Dibata peraturen e? Arah je nari, kai si banci sipelajari kerna sipat Dibata?” Adi sisampati kalak si erlajar ngukuri kerna Jahwe, ngkelengi Ia, ras ngergai gelarNa, reh nukahna me kena ku pusuhna kai si ipelajarina e. Labo ngenca iergaina undang-undang Dibata, tapi keleng ka atena Jahwe si mereken kerina undang-undang e. (Msm. 119:68) Reh paguhna me kinitekenna janah reh ngasupna me ia ngadapi tentangen si bali bagi api.​—1 Kor. 3:12-15.

12. Engkai maka sempat Daud erdua ukur? Janah kai akibatna?

¹² Kata-kata si deban si itulis Daud bas Masmur 86:11 eme “pebulat min ukurku.” Kata-kata e pe seh kel pentingna. Segedang geluhna, iteh Daud maka menukah kel manusia erdua ukur. I bas sada paksa, sanga cinder Daud i das atap istana, idahna sekalak diberu sangana ridi. Diberu e gelarna Batseba janah ia nggo erjabu. Paksa si e, uga nge keadan pusuh Daud? Itehna undang-undang Jahwe si ngataken, ‘Ula mengga atendu ndehara kalak.’ (Kel. 20:17) Tapi, terus itatap Daud diberu e. Isenangkenna atena Jahwe, tapi mengga ka atena diberu e ntah pe bana atena. Erdua ukur ia. Aminna pe segedang geluhna keleng atena Jahwe janah mbiar ia man baNa, tapi paksa si e, pentingen iakap Daud dirina. E me si erbanca maka ilakoken Daud kai si la mehuli. Perban dosana e, ceda ibanna gelar Jahwe. Ibanna ka kalak si la ersalah jadi susah, termasuk keluargana sendiri.​—2 Sam. 11:1-5, 14-17; 12:7-12.

13. Ja nari banci siteh maka Daud lanai erdua ukur?

¹³ Idisiplin Jahwe me Daud, dungna mehuli ka hubungen Daud ras Jahwe. (2 Sam. 12:13; Msm. 51:4-6, 19) Pasti inget Daud kerina kesusahen ras masalah si terjadi perban ia erdua ukur. Kata-kata Daud bas Masmur 86:11 pe banci iterjemahken jadi, “Banlah gelah ula aku erdua ukur.” Isampati Jahwe nge Daud mpebulat ukurna ntah pe gelah la erdua ukur? Ue, bas pudi wari ikataken Pustaka maka “bulat ukurna ngikutken TUHAN.”​—1 Raj. 11:4; 15:3.

14. Penungkunen kai si perlu siukuri janah ngkai?

¹⁴ Pengalamen Daud banci mpegegehi kita janah jadi persinget man umat Jahwe gundari. La soal mbaru denga kita ngelayani Jahwe ntah pe nggo ertahun-tahun, perlu  siukuri penungkunen enda, ‘Kuusahaken nge ngelawan godan Setan si banci erban aku erdua ukur?’

15. Adi sinen gambar si erban kita ngukuri kai si lit hubungenna ras perbahanen seks si salah, uga perasan mbiar man Dibata banci ngelindungi kita?

¹⁵ Misalna, adi nenndu gambar bas TV ntah pe bas Internet si erbanca kam ngukuri kai si lit hubungenna ras perbahanen seks si salah, kai nge si ilakokenndu? Banci saja ikatakenndu man dirindu maka gambar e labo termasuk pornografi. Tapi e banci igunaken Setan gelah kam erdua ukur. (2 Kor. 2:11) Gambar e banci ipeseri ras sada alat si ipake guna naka kayu si galang. Adi sekali denga itakandu kayu e alu alat ndai, la banci mis beka kayu e. Tapi, kenca mulih-ulih itakakenndu, dungna beka me kayu e. Bage ka pe, sanga sinen gambar si erban kita ngukuri kai si lit hubungenna ras perbahanen seks si salah, pengaruhna banci saja la mis teridah. Tapi dungna e banci erban kita erdua ukur janah silakoken dosa si erban ceda hubungenta ras Jahwe. Emaka ula pediat kai pe si la mehuli masuk ku perukurenta! Teruslah pebulat ukurndu gelah mbiar man gelar Jahwe!

16. Sanga siadapi godan, penungkunen kai si perlu siukuri?

¹⁶ Labo arah gambar-gambar si erban kita ngukuri perbahanen seks si salah ngenca si igunaken Setan. Tapi igunakenna ka cara-cara si deban guna nggoda kita. Kai nge si arus silakoken? Banci saja labo salah kel siakap cara-cara Setan e. Misalna, banci saja bagenda kita rukur: ‘Labo dalih bage kuban. Labo kari aku ipecat.’ Salah kel cara rukur si bage. Perlu siukuri penungkunen-penungkunen si bagenda: ‘Enda nge cara si igunaken Setan gelah aku erdua ukur? Adi kuikutken cara si salah, banci nge kuban ceda gelar Jahwe? Adi bage kuban, reh rembakna  nge aku ras Dibata ntah reh dauhna?’ Ukurilah penungkunen-penungkunen e. Gelah banci ijawapndu penungkunen-penungkunen e alu jujur, ertotolah mindo kepentaren man Dibata. (Jak. 1:5) Adi bage banndu banci kam ilindungi arah godan Setan. Pasti reh nukahna akapndu nulak godan e alu tegas, bagi si ilakoken Jesus sanga nina man Setan, “Laweslah Setan!”​—Mat. 4:10.

17. Engkai maka la banci kita erdua ukur? Ban perumpamanna.

¹⁷ La mehuli adi kita erdua ukur. Cuba bayangkenndu sada tim sepak bola si la kompak. Lit anggota tim si lalap atena puji kalak, lit ka si lalap ngelanggar peraturen, janah lit ka si la iergaina pelatihna. Tim si bage pasti mesera menang. Tapi adi kompak sada tim, pasti reh nukahna akapna menang. Pusuhndu bali bagi sada tim si kompak e adi ipebulatndu ukurndu, sura-surandu, ras perasanndu guna ngelayani Jahwe. Ingetlah, merhat Setan erban kam erdua ukur. Ate Setan gelah siukuri ras silakoken kai si salah, aminna pe situhuna siteh maka e erban Jahwe la senang. Tapi ula pediat iban Setan kam erdua ukur. Alu bage banci kam terus ngelayani Jahwe alu bulat ukur.​—Mat. 22:36-38.

18. Bagi si ikataken Miha 4:5, kai nge si jadi tekadndu?

¹⁸ Ertotolah kam man Jahwe bagi Daud, “Pebulat min ukurku gelah mbiar man gelarNdu.” Usahakenlah asa ngasupndu ngelakoken kai si ikataken bas toto e. Tiap wari, sanga ibanndu keputusen la soal si kitik ntah pe si galang, buktikenlah maka iergaindu gelar Jahwe si badia. Alu bage, selaku Saksi Jahwe banci ibanndu gelar e imuliaken. (Kua. 27:11) Janah kerina kita banci ngataken kai si ikataken Nabi Miha, “Kami erdalan i bas gelar Jahwe Dibata kami seh rasa lalap.”​—Mi. 4:5, NW.