1. Engkai maka piga-piga umat Jahwe pernah sisada kapna bana?

TEREMEN arah kita pasti pernah sisada siakap banta. Piga-piga kalak kentisik ngenca gejapkenna perasan si bage. Tapi si debanna banci saja ndekah maka bene perasan si bage. Banci saja sisada siakap banta sanga kita i tengah-tengah jelma si enterem. Piga-piga mesera akapna ndarami teman bas runggunna si mbaru. Si debanna ka, perban rembak ia ras keluargana, sisada kapna bana sanga pindah ia ku ingan si ndauh arah keluargana. Lit ka si tedeh atena kalak si ikelengina si enggo mate. Selain si e, kalak si mbaru denga erlajar kebenaren sisada akapna bana sanga itentang ras ianiaya anggota keluarga bage pe temanna ia.

2. Penungkunen kai kari sibahas?

² Iteh Jahwe janah angkaiNa kai pe kerna kita. Sanga sisada siakap banta, itehNa perasanta janah sampatiNa ateNa kita. Uga Jahwe nampati kita? Kai si banci silakoken gelah la siakap sisada banta? Uga carata nampati kalak bas runggun si sisada akapna bana? Mari sibahas jawapenna.

3. Kai buktina maka ermediate Jahwe man Elia?

³ Ate Jahwe ermeriah ukur min kerina kalak si nembah Ia. Ndeher Ia ras kita sekalak-sekalak janah iperdiatekenNa kita sanga kitik ukurta. (Ms. 145:18, 19) Cuba ukuri kerna Jahwe si ermediate kel man Elia. Dilaki si setia e nggeluh sanga terjadi masa-masa si sulit bas sejarah Israel.  Paksa si e, melala umat Jahwe si isiksa janah Elia pe ibunuh kalak e atena. (1 Raj. 19:1, 2) Selain si e, banci saja kitik ukur Elia perban akapna ia nari ngenca nabi si ngelayani Jahwe. (1 Raj. 19:10) Mis sampati Dibata Elia. Ikirim Jahwe sada malekat guna mpetetap ukur nabiNa e maka labo ia sisada janah melala denga kalak Israel si mbiar man Dibata.​—1 Raj. 19:5, 18.

4. Uga Markus 10:29, 30 mbuktiken maka ermediate kel Jahwe man kalak si lanai isampati keluargana ras teman-temanna?

⁴ Iteh Jahwe maka sanga silayani Ia, banci jadi lit anggota keluarga ras teman-temanta lanai nggit nampati kita. Banci saja perban kuatir, nungkun Petrus man Jesus, “Enggo tadingken kami kerinana janah ikutken kami kam. Kai nge si aloken kami pagi?” (Mat. 19:27) Ipetetap Jesus ukur murid-muridna alu ngataken maka melala pagi dat kalak e turang senina bas runggun si bali bagi keluargana. (Baca Markus 10:29, 30.) Erjanji ka Bapakta si i surga maka sampatiNa kalak si nggit ngelayani Ia. (Ms. 9:10) Cuba ukuri kai saja si banci lakokenndu guna ngaloken penampat Jahwe sanga sisada akapndu bandu.

5. Kai manpaatna adi ukurindu uga Jahwe enggo nampati kam?

⁵ Ukurilah uga Jahwe nampati kam. (Ms. 55:22) Alu bage banci tehndu maka labo kam sisada. Sekalak turang senina si gelarna Mita, * si anggota keluargana la lit Saksi ngataken, “Sanga kuukuri uga Jahwe enggo nampati aku gelah ngasup ngadapi situasi si sulit, e erbanca lanai kuakap sisada janah e mpetetap ukurku maka lalap sampati Jahwe aku.”

6. Uga 1 Petrus 5:9, 10 banci nampati kalak si sisada kapna bana?

⁶ Ukuri uga Jahwe nampati turang senina si sisada kapna bana. (Baca 1 Petrus 5:9, 10.) Ertahun-tahun dekahna Hiroshi ngenca Saksi Jahwe bas keluargana,  bagenda nina, “Banci siteh maka turang senina bas runggun lit nge masalahna. Tapi tetap ilayani kalak e Jahwe asa ngasupna. Enda tuhu-tuhu mpegegehi aku bage pe turang senina si deban si la lit Saksi anggota keluargana.”

7. Uga toto banci nampati kam?

⁷ Raturlah ertoto, mbaca Pustaka, ras reh ku perpulungen. Kataken uga kin situhuna perasanndu man Jahwe. (1 Pet. 5:7) Sekalak turang seninata si gelarna Massiel la lit anggota keluargana Saksi Jahwe, bagenda nina, “Salah sada si pentingna si banci nampati aku gelah lanai kuakap sisada bangku eme ertoto man Jahwe. Jahwe tuhu-tuhu jadi Bapak man bangku. Ertoto aku man baNa piga-piga kali sada wari. Kukataken man baNa uga kin perasanku situhuna.”

8. Engkai maka mbaca Pustaka ras ngukurisa banci nampati kam?

⁸ Raturlah mbaca Pustaka janah ukuri kejadin-kejadin si lit i je si mbuktiken maka keleng ate Jahwe kam. Sekalak turang seninata si gelarna Ivana ngasup ngadapi ranan keluargana si erban kitik ukurna, bagenda nina, “Mbaca ras ngukuri kejadin-kejadin si lit bas Pustaka bage pe pengalamen geluh umat Jahwe si seri situasina ras aku, nampati aku kel.” Piga-piga kalak Kristen nginget ayat-ayat si banci tuhu-tuhu ngapuli kalak e, misalna Masmur 27:10 ras Jesaya 41:10. Si debanna ka ibegikenna rekamen audio guna perpulungen bage pe audio pembacan Pustaka gelah lanai sisada kapna bana.

9. Engkai maka perpulungen banci erguna man bandu?

⁹ Usahakenlah ratur reh ku perpulungen. Kai si ibahas bas perpulungen banci mpegegehi kam janah banci ka reh deherna tandaindu turang seninandu. (Heb. 10:24, 25) Massiel, si ituriken ndai ngataken, “Amin pe aku permela, kuusahaken reh ku tiap perpulungen janah kubereken komentar. Enda nampati aku gelah reh rembakna ras turang senina bas runggun.”

10. Engkai maka penting erteman ras kalak Kristen si setia?

¹⁰ Ertemanlah ras kalak Kristen si setia. Bas runggun melala turang senina si tuan ntah pe ngudan asangken kam janah latar belakangna pe beda ras kam. Melala si banci pelajarindu arah kalak e. Ikataken Pustaka maka kepentaren lit “bas kalak si enggo metua.” (Jop 12:12) Kalak si enggo metua pe banci melala si pelajarina arah anak muda si setia. Ndauh  ngudan Daud asangken Jonatan tapi labo e erbanca maka kalak e la kompak. (1 Sam. 18:1) Sisampat-sampaten Daud ras Jonatan bas ngelayani Jahwe amin pe adapi kalak e tentangen si mberat. (1 Sam. 23:16-18) Irina mbaru denga jadi Saksi Jahwe, ia ngenca Saksi bas keluargana, bagenda nina, “Turang senina bas runggun bagi keluargaku kel kuakap, gunaken Jahwe kalak e nampati kita.”

11. Kai si arus silakoken gelah reh kompakna ras turang senina?

¹¹ Banci saja mesera kapndu ndarami teman si mbaru terlebih ka adi kam permela. Ratna, sekalak turang seninata si permela ngadapi tentangen perban mpelajari kebenaren, bagenda nina, “Kuteh maka perlu aku penampat arah turang senina bas runggun.” Banci saja mesera akapndu nuriken perasanndu man kalak si deban, tapi adi turikenndu perasanndu banci dungna kam kompak ras ia. Merhat teman-temanndu nampati ras mpegegehi kam tapi perlu tehna kai si iperlukenndu.

12. Engkai maka pendahin erberita banci nampati kam ndatken teman-teman si mehuli?

¹² Salah sada cara si mehulina guna ndatken teman si mehuli eme erberita ras turang senina. Mita, si enggo ituriken ndai ngataken, “Melala kudat teman si mehuli perban rusur aku erberita ras turang senina bage pe ikut bas kegiaten-kegiaten si iban organisasi. Arah teman-teman enda enggo isampati Jahwe aku ertahun-tahun dekahna.” Melala kel gunana adi erteman kita ras kalak Kristen si setia. Igunaken Jahwe teman-teman si bage guna mpegegehi kam sanga kitik ukurndu khususna sanga sisada kapndu bandu.​—Kua. 17:17.

13. Kai tanggung jawap kerina kalak bas runggun?

¹³ Kerina kalak bas runggun ertanggung jawap erban runggun e jadi ingan si dame bage pe ncidahken kekelengen man kerina kalak gelah la lit si sisada kapna bana. (Joh. 13:35) Perbahanenta ras rananta mbelin kel pengaruhna bas mpegegehi kalak si deban. Bagenda nina sekalak turang seninata, “Sanga aku erlajar kebenaren enggo bagi keluargaku kuakap runggun e. Labo aku banci jadi Saksi Jahwe adi la kin sampati kalak e.” Kai si banci lakokenndu guna nampati kalak si anggota keluargana labo Saksi Jahwe gelah gejapkenna maka turang senina bas runggun engkelengi ia?

14. Kai si banci lakokenndu gelah datndu teman si mbaru?

¹⁴ Usahakenlah ndarami teman-teman si mbaru. Banci simulai alu ngalo-ngalo kalak si mbaru denga reh ku perpulungen. (Rom. 15:7) Labo terjeng sialo-alo ia, tapi siusahaken gelah terus reh rembakna ras ia. Emaka mehulilah kam janah buktiken maka tuhu-tuhu ermediate kam man bana. Misalna, banci usahakenndu meteh kai masalahna, tapi ula ban penungkunen si banci erban ia mela. Piga-piga kalak banci saja mesera akapna nuriken perasanna, emaka ula sipaksa ia nurikenca. Sebalikna, sibanlah penungkunen-penungkunen si menukah akapna njawapsa janah sabar kita megiken jawapenna. Contohna, banci sisungkun uga tangtangna ia meteh kebenaren.

15. Uga cara kalak si paguh kinitekenna banci nampati kalak si deban bas runggun?

¹⁵ Kiniteken tiap kalak bas runggun banci reh paguhna adi ermediate kita man  sada ras si debanna. Terlebih ka adi si ermediate e eme pertua-pertua ras kalak si paguh kinitekenna. Melissa, si kitik-kitik nari ipebelin mamakna bas kebenaren ngataken, “Ngata bujur kel aku man turang-turang si lit bas runggun perban kalak e enggo bagi bapak man bangku. Rusur igunakenna waktuna ras aku janah ermediate kel ia man bangku. Katawari pe aku perlu teman ngerana, lit kalak si nggit megiken aku.” Sekalak turang senina si nguda denga si gelarna Mauricio sedih kel akapna janah sisada kapna bana sanga kalak si ngajari ia nadingken kebenaren. Bagenda nina Mauricio, “Ermediate kel pertua-pertua man bangku janah rusur kel aku sampatina. Ratur kalak e ngerana ras aku. Rusur aku ajakna erberita. Iturikenna ka permata rohani si datna sanga pelajaren pribadi janah ajakna aku rusur olahraga.” Melissa ras Mauricio enggo ngelayani sepenuh waktu.

16-17. Alu cara kai saja sisampati kalak si deban?

¹⁶ Sampatilah kalak si deban. (Gal. 6:10) Sekalak utusen injil si gelarna Leo ngelayani bas negri si ndauh arah keluargana, bagenda nina, “Si rusurna iperlukenndu eme perbahanen si mehuli bas waktu si tepat. Mbarenda pernah aku kecelakan sanga maba motor. Sanga seh aku rumah, stres kel aku. Tapi, undang sekalak perbulangen ras ndeharana aku man ku rumahna. Labo kuinget kai si pan kami paksa si e. Tapi si kuinget perbahanenna si mehuli, tutus kel atena megiken aku. Dungna, reh tenangna kuakap.”

¹⁷ Sanga bas pertemuan wilayah ras regional meriah siakap perban banci jumpa ras turang senina bage pe ncakapken kerna khotbah si enggo sibegi. Tapi Mita si iceritaken ndai ngataken, “Sisada kel kuakap bangku bas pertemuan wilayah ntah regional.” Engkai maka bage perasanna? Nina, “Lit ratusen ntah pe ribun turang senina i sekelilingku, biasana kalak e kundul ras keluargana. Ngidah si e, sisada kel kuakap bangku.” Si debanna ka mesera akapna tangtangna reh ku pertemuan wilayah ntah regional kenca mate kalak si ikelengina. Lit nge tandaindu  kalak si bage situasina? Adi lit, banci nge ajakndu kalak e radu ras kam bage pe keluargandu ku acara-acara rohani si debanna?

18. Uga carata ndalanken nasehat bas 2 Korinti 6:11-13?

¹⁸ Gunakenlah waktundu ras turang senina. Usahakenlah nggunaken waktundu ras turang senina si sisada kapna bana. ‘Sipebelinlah kekelengenta’ man kalak e. (Baca 2 Korinti 6:11-13.) Melissa, si enggo ituriken ndai ngataken, “Lalap meriah ukur kami adi undang turang senina kami ku rumahna ntah pe ajakna kami gawah-gawah.” Lit nge kalak bas runggunndu si atendu undangndu ku rumahndu?

19. Bas situasi kai saja turang seninata perlu kel sitemani?

¹⁹ Banci saja bas waktu-waktu tertentu iergai turang seninata kel adi sibereken waktuta man bana. Contohna, lit turang seninata si latih kel ukurna adi anggota keluargana si labo Saksi sangana ngerayaken perayan tertentu. Si debanna banci saja sedih kel ia bas tanggal-tanggal tertentu. Misalna, bas tanggal kematen kalak si ikelengina. Adi sigunaken waktuta ras turang senina si bage situasina, sibuktiken maka ‘tuhu-tuhu ermediate’ kita man bana.​—Pil. 2:20.

20. Uga kata-kata Jesus bas Matius 12:48-50 nampati kita sanga sisada siakap banta?

²⁰ Melala si erban umat Jahwe sisada kapna bana. Tapi ula pernah kita lupa maka tuhu-tuhu iangkai Jahwe perasanta janah sampatiNa kita arah turang seninata. (Baca Matius 12:48-50.) Adi silakoken asa ngasupta guna nampati turang seninata, sicidahken man Jahwe maka siergai runggun si enggo iberekenNa man banta. La soal uga pe perasanta, labo kita pernah sisada perban Jahwe lalap ras kita!