1. Engkai maka Setan ipeseri ras sekalak perburu?

TUJUN sekalak perburu eme nangkap ntah pe munuh binatang. Banci jadi pakena erbage-bage siding, bagi si ituriken bas Pustaka. (Jop 18:8-10) Kai si lakoken sekalak perburu gelah kena siding binatang si iburuna? Iperdiatekenna alu megermet ku ja binatang e lawes, kai si menarik akapna, ras siding kai si cocok nangkapsa. Setan pe bage, perdiatekenna kita alu megermet. Iperdiatekenna ku ja kita lawes, kai si menarik siakap, kenca si e banna siding janah arapkenna gelah kena siding kita. Tapi, ipetetap Pustaka ukurta maka amin pe kita enggo kena siding banci nge kita lepas. Ajari Pustaka ka kita gelah ula kena siding e.

2. Kai dua siding si rusur ipake Setan?

² Lit dua siding si rusur ipake Setan, eme sipat meganjang rukur ras merangap. * Ribun tahun dekahna enggo berhasil Setan make dua sipat e. Ia bali bagi kalak si nangkap perik si erusaha erban perik masuk ku siding si ibanna. (Ms. 91:3) Tapi banci kita la kena siding Setan e, perban enggo kataken Jahwe kai saja siding si gunaken Setan.​—2 Kor. 2:11.

3. Engkai maka umat Jahwe si dungna meganjang rukur ras merangap itulis bas Pustaka?

³ Igunaken Jahwe piga-piga pengalamen umatNa guna ngajari kita kerna bahayana sipat meganjang rukur ras merangap. Sibahas kari kerna piga-piga umat Jahwe si enggo kena siding Setan. Payo nge enda mbuktiken maka kita pe pasti kena siding Setan? Lang! Ipastiken Jahwe gelah kai si terjadi man umatNa itulis bas Pustaka guna jadi  “persinget man banta.” (1 Kor. 10:11) ItehNa maka banci kita erlajar arah kalak e gelah ula kena siding Iblis.

4. Kai si terjadi man banta adi meganjang rukur kita?

⁴ Ate Setan meganjang rukur min kita. Sebap adi meganjang rukur kita, enggo bali kita ras ia janah lanai kita banci nggeluh rasa lalap. (Kua. 16:18) Emaka persingeti Rasul Paulus kita gelah ula “jadi sombong janah dungna ndatken hukumen si seri ras Iblis.” (1 Tim. 3:6, 7) Enda banci terjadi la soal kita mbaru denga bas kebenaren ntah pe enggo ndekah ngelayani Jahwe.

5. Menurut Pengerana 7:16, 20, uga nge kalak si meganjang rukur e?

⁵ Sipat meganjang rukur eme sipat si mentingken bana. Usahaken Setan gelah dirita saja siukuri labo Jahwe, terlebih ka sanga lit masalahta. Contohna, pernah nge kam ipitnah ntah pe la adil perbahanen kalak man bandu? Ate Setan merawa min kam man Jahwe ntah pe man turang seninandu. Ate Setan ula min dalankenndu nasehat si bere Jahwe bas ndungi masalahndu. Tapi atena dungindu min masalahndu alu carandu.​—Baca Pengerana 7:16, 20.

6. Kai si banci pelajarindu arah pengalamen sekalak turang seninata bas Belanda?

⁶ Cuba ukuri pengalamen turang seninata si tading i Belanda. Merawa ia janah kitik kel ukurna perban kesalahen turang seninana bas runggun. Lanai atena erteman ras kalak e. Nina, “Sisada kel kuakap bangku, janah la termaapkenku kesalahenna e. Kukataken man perbulangenku maka arus kami pindah ku runggun si deban.” Kenca si e, itontonna acara JW Broadcasting^® bulan Maret tahun 2016. Bas acara e lit piga-piga nasehat si ibahas kerna uga arusna kita erurusen ras turang seninata si erban kitik ukurta. Nina turang seninata e, “Sadar aku maka  arus aku meteruk ukur janah si perlu kuukuri eme kesalahenku, labo kuusahaken ngubah turang seninaku bas runggun. Acara e nampati aku gelah terus ngukuri Jahwe perban Ia ngenca si lit hakna nentuken kai si arus silakoken.” Kai pelajarenna? Sanga adapindu masalah, teruslah ukuri kerna Jahwe. Pindolah penampatNa gelah banci seri perukurenndu ras Ia bas ngenen turang seninandu. Bapakta si i surga idahNa kesalahen e, tapi nggit Ia ngampuni kalak e. AteNa usihndu ka Ia.​—1 Joh. 4:20.

7. Kai si terjadi man Raja Ussia?

⁷ Ussia eme raja Juda si berhasil. Menang ia bas melala perang, melala kota si ibangunna, janah melala ka jumana perban “ban Dibata ia makmur.” (2 Kro. 26:3-7, 10) Tapi bagenda nina Pustaka, “Kenca mbelin kuasa Ussia, meganjang ukurna, e me si erbanca ia ndabuh.” Enggo iperentahken Jahwe maka imam-imam ngenca si banci nutung kemenyan bas rumah pertoton. Tapi, perban Raja Ussia meganjang rukur la ia nggit megiken nasehat. Ilakokenna kai si labo hakna, masuk ia ku rumah pertoton janah tutungna kemenyan. Emaka la meriah ukur Jahwe ngidah ia janah banNa ia kena kusta seh ngasa ia mate.​—2 Kro. 26:16-21.

8. Menurut 1 Korinti 4:6, 7, uga carana gelah la kita meganjang rukur?

⁸ Banci nge kita meganjang rukur janah silakoken dosa bagi Raja Ussia? Cuba perdiateken pengalamen José. Ia enggo ndekah jadi pertua janah bisnisna pe sukses kel. Ipesehna khotbah-khotbah bas pertemuan wilayah ras regional, janah pertua-pertua keliling pe mindo saran man bana. Bagenda nina, “Tek aku man kengasupen ras pengalamenku, lanai kuandalken Jahwe. Megegeh kuakap bangku, emaka lanai kubegiken persinget ras nasehat arah Jahwe.” Dungna, ilakoken José dosa si serius janah ipedarat ia arah runggun nari. Piga-piga tahun si lewat ialoken ia mulihi. Bagenda nina gundari, “Ajari Jahwe aku maka si pentingna labo kai tugasta tapi ngelakoken kai pe si isuruhNa.” Teruslah siinget maka la soal kai kengasupenta ntah pe tugasta bas runggun,  enda kerina rehna arah Jahwe nari. (Baca 1 Korinti 4:6, 7.) Adi meganjang rukur kita, labo nggit Jahwe nggunaken kita.

9. Perban Setan ras Hawa merangap, kai si lakoken kalak e?

⁹ Adi siukuri kerna sipat merangap, siinget me Setan si Iblis. Selaku malekat Jahwe, pasti melala mbarenda hak istimewana. Tapi, la ia puas. Atena ia min si isembah padahal Jahwe ngenca si arus isembah. Usahaken Setan ka gelah la kita puas man kai si enggo lit bas kita. Enda teridah sanga ia ngerana ras Hawa. Perban keleng ate Jahwe man Hawa ras perbulangenna, melala kel pangan si berekenNa man kalak e. “Kerina buah batang kayu si lit bas taman” banci pan kalak e kecuali sada ngenca. (Kej. 2:16) Tapi, itipu Setan Hawa gelah akapna perlu ipanna buah si ilarang Jahwe. Hawa la puas man kai si lit bas ia, terbuen min atena. Siteh kai si terjadi seterusna. Erdosa Hawa janah dungna mate me ia.​—Kej. 3:6, 19.

10. Kai si terjadi perban Raja Daud jadi merangap?

¹⁰ Enggo bereken Jahwe kebayaken man Daud, banNa ia jadi raja, janah rusur ia menang bas perang. Ikataken Daud maka pasu-pasu Dibata e ‘la terceritaken perban buena’ janah ngata bujur kel ia. (Ms. 40:5) Tapi perban sipat merangap, lupaken Raja Daud kai si enggo ilakoken Jahwe man bana. La ia puas man kai si enggo ibereken Jahwe man bana. Amin pe enggo lit piga-piga diberuna, ngena atena Batseba eme diberu Uria kalak Het. Erhubungen seks Daud ras Batseba janah dungna hamil me diberu e. Salah kel perbahanen si ilakoken Daud e, tapi dungna ilakokenna ka kesalahen si terbelinen. Iban Daud rencana guna munuh Uria! (2 Sam. 11:2-15) Kai nge si ukuri Daud paksa si e? Akapna nge la banci idah Jahwe si lakokenna e? Amin pe enggo ndekah kel Daud ngelayani Jahwe, tapi banci ia jadi kalak si merangap janah dungna melala masalahna. Tapi bas pudi wari, akuina dosana e janah robah ia. Ngata bujur kel ia man Jahwe perban nggit Jahwe ngampuni ia.​—2 Sam. 12:7-13.

11. Menurut Epesus 5:3, 4, kai si banci erban kita lanai merangap?

 ¹¹ Kai si banci sipelajari arah pengalamen Daud? Gelah ula kita merangap perlu kita tetap ngata bujur man kerina si enggo ibereken Jahwe. (Baca Epesus 5:3, 4.) Arus kita puas man kai si lit bas kita. Sanga tangtangna siajari kalak erlajar Pustaka, siiahken ia ngukuri sada pasu-pasu si enggo alokenna janah ngata bujur ia man Jahwe perban pasu-pasu e. Adi tiap wari ukurina sada pasu-pasu, e ertina enggo lit pitu pasu-pasu si totokenna bas seminggu. (1 Tes. 5:18) Bage ka nge si lakokenndu? Adi ukurindu kerina si enggo lakoken Jahwe man bandu, e erban kam ngata bujur man baNa. Adi ngata bujur kam, puas me kam man kai si lit bas kam. Adi puas kam, bene me sipat merangap e.

12. Kai si lakoken Judas perban ia merangap?

¹² Sipat si merangap erban Judas Iskariot ngelakoken perbahanen si la mehuli ras dungna hianatina Jesus. Tapi labo mbarenda nari ia kalak si la mehuli. (Luk. 6:13, 16) Ipilih Jesus ia jadi rasulna janah isuruh ia njaga kotak sen perban tek Jesus man bana. Sen e igunaken Jesus ras rasul-rasulna guna mbiayai pendahin erberita, bagi si lakoken umat Jahwe gundari i belang-belang doni. Amin pe rusur begi Judas persingeti Jesus murid-muridna gelah ula merangap, tapi dungna mulai ia nangko. (Mrk. 7:22, 23; Luk. 11:39; 12:15) La begiken Judas persinget e.

13. Ndigan sipat Judas si merangap teridah?

¹³ La ndekah sope Jesus mate, teridah me sipat Judas si merangap e. Simon si pernah kena kusta ngundang Jesus, Maria, ras Marta man ku rumahna. Sanga man, icurcurken Maria minak wangi si seh kel ergana ku takal Jesus. Merawa Judas ras murid-murid si deban ngidah si e. Banci jadi murid-murid erpengakap maka ulin sen e ipake guna pendahin erberita. Tapi, Judas merawa perban alasen si deban. Perban ia “pinangko,” itangkona atena sen arah kotak sen. Perban ia merangap, dungna hianatina Jesus guna ndatken sen.​—Joh. 12:2-6; Mat. 26:6-16; Luk. 22:3-6.

14. Uga sekalak perbulangen ras ndeharana ndalanken kata-kata Jesus bas Lukas 16:13?

¹⁴ Ingetken Jesus pengikutna, nina, “La kena banci jadi budak man Dibata bage pe man Kebayaken.” (Baca Lukas 16:13.) Kata-kata Jesus e tuhu denga seh asa gundari. Contohna, bas Rumania lit sekalak perbulangen ras ndeharana ndalanken kata-kata Jesus e. Itawarken man kalak e sada pendahin bas sada negara maju. Nina kalak e, “Perban melala kel utang kami bas bank, tangtangna akap kami pendahin e pasu-pasu arah Jahwe nari.” Tapi lit masalah si banci terjadi. Adi aloken kalak e pendahin e, enggo kurang kari waktu kalak e ngelayani Jahwe. Kenca baca kalak e artikel si erjudul “Pertahankan Loyalitas dengan Kebulatan Hati” bas Menara Pengawal 15 Agustus 2008, iban kalak e me keputusen. Nina kalak e, “Adi tujun kami pindah ku negri si deban guna ndatken terbuen sen, lanai kari Jahwe si pentingna bas geluh kami. Pasti ceda hubungen kami ras Jahwe.” Emaka itulak kalak e tawaren ndai. Idat perbulangen e dahin bas negrina si banci ncukupi keperlun kalak e. Nina ndeharana, “Lalap nge sampati Jahwe umatNa.” Meriah akap kalak e perban pentingen akapna hubungenna ras Jahwe asangken sen.

15. Engkai kita tek maka banci nge kita lepas arah siding Setan?

¹⁵ Kai si arus silakoken adi enggo mulai lit sipat meganjang rukur ras merangap bas dirita? Banci kita robah. Ikataken Paulus maka kalak ‘si enggo itangkap Setan nggeluh-nggeluh’ banci denga lepas arah sidingna nari. (2 Tim. 2:26) Enda me si terjadi man Daud. Ibegikenna nasehat Natan, robah ia, janah pehulina hubungenna ras Jahwe. Ula pernah kita lupa maka ndauh gegehen Jahwe asangken Setan. Emaka, adi sialoken penampat Jahwe, banci kita lepas arah siding kai pe si iban Setan.

16. Kai si banci nampati kita gelah la kena siding Setan?

¹⁶ Memang ulin adi la kita pernah meganjang rukur ras merangap. Banci kita bage perban penampat Dibata. Tapi ula siakap maka kita kalak si megegeh janah labo pernah jadi meganjang rukur ras merangap. Kalak si enggo ndekah ngelayani Jahwe pe banci dungna jadi meganjang rukur ras merangap. Emaka pindolah penampat Jahwe tiap wari gelah sampatiNa kam mereksa perukuren ras perbahanenndu. (Ms. 139:23, 24) Usahakenlah asa ngasupndu gelah ula kam meganjang rukur ras merangap!

17. Kentisik nari kai si terjadi man Iblis?

¹⁷ Enggo ribun tahun dekahna Setan jadi perburu. Tapi kentisik nari iiket me ia janah dungna ikernepken. (Ket. 20:1-3, 10) Lanai kita sabar ngidah si e terjadi. Sope si e terjadi, teruslah kita hati-hati man kerina siding Setan. Siusahakenlah asa ngasupta gelah ula meganjang rukur ntah pe merangap. Ertekadlah kita ‘ngelawan Iblis, pasti kiam Iblis e arah kita nari.’​—Jak. 4:7.