ERTAHUN-TAHUN dekahna nyumbang kalak Israel guna pendahin ibadah si benar. Tapi bas jaman Jesus arus igalari kalak Jahudi piga-piga jenis pajak janah enda mberati kalak e kel.

Guna mbiayai erbage-bage pendahin bas rumah pertoton, tiap kalak Jahudi bas jaman Jesus biasana nggalari pajak si buena setengah sekel (dua drakhma). Bas jaman Jesus pajak e ipake guna nukur binatang si man persembahenken bage pe ngurus rumah pertoton si ibangun Herodes. Piga-piga kalak Jahudi nungkun man Petrus, igalari Jesus nge pajak e ntah lang janah la ipermasalahken Jesus kerna pajak e. Ikataken Jesus man Petrus i ja banci datna sen logam guna nggalari pajak e.​—Mat. 17:24-27.

Mbarenda, umat Jahwe pe isuruh nggalari perpuluhen eme sepersepuluh arah hasil juma kalak e ntah pe penghasilenna. (Im. 27:30-32; Bil. 18:26-28) Perhitungen kel peminpin-peminpin agama i bas si e. Iarusken kalak e gelah igalari kalak perpuluhen guna tiap hasil ranina, termasuk rempah-rempah bagi ‘sinuan-sinuan mint, jera page, ras jera.’ Ikataken Jesus maka labo salah mereken perpuluhen. Tapi si salah eme cara kalak Parisi bage pe ahli Undang-Undang Musa bas ndalanken undang-undang e.​—Mat. 23:23.

Selain si e, bas jaman Jesus arus ka igalari kalak Jahudi pajak man kalak Roma eme bangsa si njajah kalak e. Contohna, kalak si lit jumana arus galarina pajak alu sen ntah pe barang. Galangna pajak si arus galarina eme 20 seh 25 persen arah hasil jumana e. Selain si e, lit ka pajak kepala man tiap kalak Jahudi. Sanga ijebak kalak Parisi atena Jesus isungkunna kerna pajak enda. Jawapen Jesus ncidahken uga arusna perukurenta kerna pajak, nina, “Bereken man Kaisar si jadi bagin Kaisar, tapi bereken man Dibata si jadi bagin Dibata.”​—Mat. 22:15-22.

Lit ka pajak man tiap barang si masuk ntah pe si ndarat arah sada daerah. Pajak enda ipindo bas pelabuhen, jembaten, persimpangen dalan, pintu masuk kota, ntah pe pintu masuk pajak.

Susah kel akap kalak perban erbage-bage pajak si itetapken pemerentahen Roma. Ikataken sekalak ahli sejarah Roma si gelarna Tacitus maka sedekah pemerentahen Kaisar Tiberius si merentah sanga Jesus i doni, ipindo kalak Siria ras Judea gelah pajak ikurangi perban mberatsa kap kalak e nggalarisa.

Reh susahna akap kalak perban pemungut pajak mindo pajak buen asangken si arusna igalari. Bas jaman e banci ikuti kalak lelang guna ndatken jabaten selaku pemungut pajak. Si ipilih eme kalak si nawarken erga si meganjangna. Kenca ipilih, isuruh pemungut pajak e me kalak si deban guna mindo sen pajak. Kalak enda pe idaramina ka untung man dirina alu mindo sen pajak lebihen asangken arusna. Banci saja Sakeus nuruh kalak si deban guna mindo sen pajak. (Luk. 19:1, 2) Erkiteken si e, segat ate kalak pemungut pajak janah la kalak nggit erteman ras ia.