Aku lahir 19 Mei 1940 i kota Amioûn, Lebanon. Piga-piga tahun kenca si e pindah keluarga kami ku kota Tripoli, i je me aku ipebelin. Keluarga kami ermeriah ukur ras sikeleng-kelengen. Aku ipebelin bas kebenaren, aku anak si nguda arah lima sembuyak. Dua kami dilaki janah telu diberu. Labo ndarami sen si pentingna akap orang tuaku. Si pentingna akap keluargaku eme mpelajari Pustaka, perpulungen, ras nampati kalak si deban nandai Dibata.

Mbarenda, bas runggun kami lit piga-piga kalak Kristen si pengarapenna nggeluh i surga. Salah sadana eme Michel Aboud, si mandu pelajaren i bas runggun. Itehna kebenaren i New York janah mulai ia erberita i Lebanon bas tahun 1921. Kuinget denga maka mehuli kel ia man dua turang seninata lulusen Sekolah Gilead eme Anne ras Gwen Beavor. Mehamat kel ia man kalak e. Kerina kami jadi teman kompak. Ertahun-tahun kenca si e meriah kel ukurku banci jumpa ras Anne i Amerika Serikat. La ndekah kenca si e jumpa ka aku ras Gwen si paksa si e enggo erjabu ras Wilfred Gooch janah ngelayani i Betel London, Inggris.

Sanga aku nguda denga sitik ngenca Saksi i Lebanon. Tapi semangat kel kami nceritaken kerna Pustaka man kalak si deban amin pe lit tentangen arah peminpin-peminpin agama. Lit piga-piga kejadin si kuinget denga asa gundari.

Bas sada wari, erberita aku ras kakakku si gelarna Sana bas sada apartemen janah rempet lit pendeta ndahi kami. Kuakap lit si mpeseh kerehen kami man pendeta e. Mulai iisak-isakken pendeta e kakakku janah reh dekahna reh kasarna ia. Sorongkenna kakakku seh ngasa ndabuh arah tangga nari. Emaka luka daging kakakku. Tapi lit kalak si nelpon polisi. Reh me polisi janah ipastikenna maka lit si nampati kakakku. Kenca si e, pendeta e ibaba ku kantor polisi janah lit kepe babana pistol. Isungkun kepala polisi e ia, “Kam situhuna peminpin agama ntah ketua geng?”

Kejadin si deban si jelas denga kel kuinget eme sanga isewa runggun kami bus guna erberita ku daerah terpencil. Paksa si e, kerina erdalan alu mehuli. Tapi berubah situasina sanga lit sekalak pendeta si meteh maka kami sangana erberita i je. Ipepulungna enterem jelma janah iserang kalak e kami, lit ka si mbenteri kami alu batu. Luka bapakku janah kuinget denga ayona dem dareh. Jenari, bapak ras mamak mulihken ku bus janah kami kerina pe ikut. Paksa si e, mbiar kel kami. Tapi sanga bersihken mamak luka bapak e, bagenda nina mamak, “O Jahwe, ampuni min kalak e. La teh kalak e kai si lakokenna.” Kuinget lalap kata-kata mamak e.

Kejadin si deban eme sanga reh kami ndahi keluarga i kuta kemulihen kami. Bas rumah bulangku jumpa kami ras sekalak uskup si ihamati jelma si enterem. Itehna maka orang tuaku Saksi-Saksi Jahwe. Sanga si e, umurku enem tahun denga. Tapi icubaken uskup e mpemelaken aku alu nungkun, “Engkai maka lenga kam iperidiken?” Kukataken maka aku kitik denga janah nggit aku iperidiken adi kuteh terbuen kerna Pustaka janah enggo paguh kinitekenku. La meriah akapna megi jawapenku e. Emaka ikatakenna man bulangku maka aku la sopan.

Tapi situhuna pengalamen si la mehuli si bage labo mbue. Kalak Lebanon buen nge kalakna mehuli janah mekacar. Emaka, banci kami erberita man enterem kalak Lebanon janah melala ka si nggit erlajar Pustaka.

Sanga aku sekolah denga, lit sekalak turang senina si nguda denga reh arah Venezuela nari ku Lebanon. Pulung ia bas runggun kami janah bas pudi wari ngerondong ia ras kakakku si gelarna Wafa. Dungna,  erjabu kalak e janah tading i Venezuela. Rusur ikirim Wafa surat janah perban tedeh kel atena kami iusahakenna gelah nggit bapak ngajak kami pindah ku Venezuela. Dungna, pindah kami ku Venezuela.

Pindah kami ku Venezuela tahun 1953 janah tading kami i Caracas, i deher istana presiden. Perban aku nguda denga, meriah kuakap sanga kuidah motor presiden lewat. Tapi orang tuaku mesera akapna erban penyesuaien bas negri e perban beda bahasana, budayana, panganna, ras cuacana. Dungna, banci iban kalak e penyesuaien, tapi lit kejadin si la mehuli.

Sakit bapakku. La sangka kami si e terjadi perban sedekah enda lalap ia sehat ras megegeh. Si inget kami pe la ia pernah sakit. Tapi kepeken kena kanker pankreas ia janah arus ioperasi. Seminggu kenca si e mate bapak.

La terturiken kami uga cedana ukur kami perban kejadin e. Paksa si e umurku 13 tahun. La isangka kami mate bapak. La teh kami uga kami ndalani kegeluhen enda adi la lit bapak. Piga-piga waktu dekahna kenca bapak mate, la teraloken mamak maka bapak enggo lanai lit. Tapi, teh kami maka la kami banci lalap erceda ate. Sampati Jahwe kami ngadapi situasi si mberat e. Bas pudi wari, sanga umurku 16 tahun lulus aku arah sekolah i Caracas janah merhat kel aku erdahin guna nampati keluargaku.

Paksa si e, kakakku Sana erjabu ras Rubén Araujo, si mulih ku Venezuela kenca lulus Sekolah Gilead. Kenca erjabu, pindah kalak e ku New York. Perlu iakap keluargaku aku kuliah, emaka berkat aku ku New York. I je, tading aku ras kakakku si enggo erjabu ndai. Mbue kel penampat kalak e man bangku si erban aku reh rembakna ras Jahwe. Selain si e, melala turang senina si paguh kinitekenna bas runggun bahasa Spanyol ingan kami pulung si lit i Brooklyn. Misalna, Milton Henschel ras Frederick Franz si ngelayani i Betel Brooklyn.

Kenca menam setahun kuliah i New York mulai kuukuri kerna geluhku. Paksa si e rusur kuukuri kerna artikel si lit bas Sora Ermomo si mbahas kerna kalak Kristen si lit cita-cita rohanina. Kuidah maka meriah kel akap perintis-perintis ras anggota Betel si lit i runggun kami janah merhat aku bage kalak e. Tapi aku lenga iperidiken. Kuteh maka arus kubaktiken geluhku man Jahwe. Emaka kubaktiken geluhku man Jahwe janah iperidiken bas tanggal 30 Maret 1957.

Kenca iperidiken, mulai kuukuri kerna ngelayani sepenuh waktu. Merhat kel aku jadi perintis tapi kuteh maka e labo menukah.  Uga carana gelah banci aku kuliah janah merintis? Aku ras keluargaku rusur sikirim-kirimen surat. Bas surat-surat e kuceritaken man kalak e maka ngadi ateku kuliah. Mulih ateku ku Venezuela janah jadi perintis ateku.

Bas bulan Juni 1957 mulih aku ku Caracas. Paksa si e, situasi ekonomi keluarga kami sangana la mehuli. Perlu sekalak nari si cari makan. Paksa si e ka lit si nawarken man bangku pendahin bas bank. Tapi merhat kel aku merintis. Situhuna, tujunku mulih ku Venezuela eme guna merintis. Dungna, erdahin me aku bas bank e janah merintis. Bage me si kulakoken piga-piga tahun dekahna. Sibuk kel aku tapi meriah kel ukurku.

Meriah kel ukurku sanga jumpa ras Sylvia, sekalak diberu si mejile arah Jerman nari si keleng kel atena Jahwe. Ia ras orang tuana pindah ku Venezuela. Bas pudi wari erjabu kami janah lit sada anak kami dilaki eme Michel (Mike) ras sada nari diberu eme Samira. Aku si ngurus mamak janah tading ia ras kami. Memang arus aku ngadi merintis perban tanggung jawap keluarga, tapi tetap nge aku semangat erberita. Aku ras Sylvia pe erusaha ka merintis ekstra sanga musim libur.

Bagi si kuceritaken tangtangna ndai, rusur kel kuukuri kerna geluhku. Paksa si e, anak-anakku sekolah denga, ntabeh pergeluh kami, janah kalak si erdahin i bank iergaina aku. Tapi situhuna pangen kuakap aku itandai kalak selaku umat Jahwe. Lalap kuukuri kai si banci kulakoken. Emaka kucakapken kerna situasi ekonomi kami ras diberuku. Adi ngadi aku erdahin, kualoken me sen pesangon. Kuakap bias nge sen e jadi biaya kami piga-piga tahun dekahna adi isederhanaken kami geluh kami, perban labo lit utang kami.

Enda labo keputusen si menukah, tapi diberuku ras mamakku ndukung keputusen e. Emaka mulai ka kuban rencana guna merintis. Meriah kel ukurku, tapi idat kami berita si erban kami sengget.

Bas sada wari ikataken dokter maka Sylvia hamil. Sengget kami duana! Meriah nge ukur kami, tapi rukur ka aku, ‘Banci nge aku merintis?’ Amin pe bage enggo ersikap  kami ngalo-ngalo anggota keluarga kami si mbaru e. Tapi paksa si e ragu denga aku banci ntah lang aku merintis.

Kenca cakapken kami ras-ras, iputusken kami maka rencana kami la berubah. Anak kami Gabriel lahir bas bulan April 1985. Kenca si e, ngadi aku erdahin arah bank janah mulai aku merintis bas bulan Juni 1985. Bas pudi wari jadi anggota Panitia Cabang aku. Tapi kantor cabang Venezuela labo i Caracas. Emaka arus aku mulih-ulih ku Betel si dauhna kira-kira 80 kilometer, dua seh telu kali seminggu.

Kantor Cabang Venezuela lit i kota La Victoria. Emaka iputusken keluarga kami pindah ku je gelah reh deherna ku Betel. Enda perubahen si mbelin man kami. Ngata bujur kel aku man keluargaku, luar biasa kel dukungen kalak e. Kakakku Baha nggit ngurus mamak kami. Paksa si e, Mike enggo erjabu tapi Samira ras Gabriel ras kami denga tading. Perban pindah kami ku La Victoria arus tadingken kalak e teman-temanna si lit i Caracas. Selain si e, arus ka iban Sylvia penyesuaien guna tading bas kota si kitik. Arus ka ibiasaken kami tading bas rumah si terkitiken. Melala penyesuaien si arus iban kami perban pindah arah Caracas ku La Victoria.

Tapi kenca si e lit ka perubahen si deban. Erjabu Gabriel janah Samira pe lanai tading ras kami. Selain si e, aku ras Sylvia iundang ku Betel bas tahun 2007. Seh asa gundari ngelayani denga kami i Betel. Mike anak kami sintua ngelayani jadi pertua janah merintis ia ras diberuna, Monica. Gabriel pe ngelayani jadi pertua, ngelayani ia i Italia ras diberuna, Ambra. Selain si e, Samira merintis janahna nampati Betel selaku relawan jarak jauh.

Melala keputusen si mbelin si enggo kuban, tapi labo pernah aku menyesal. Bicara iulihi pe, tetap nge kuban keputusen si seri. Ngata bujur kel aku bas kerina si banci kulakoken man Jahwe. Sedekah aku ngelayani Jahwe kuteh maka penting kel hubungen si rembak ras Ia. La soal arus siban keputusen si mbelin ntah pe si kitik, banci bere Jahwe kita kedamen si banci “naluken perukuren kai pe.” (Pil. 4:6, 7) Meriah kel kuakap ras Sylvia ngelayani i Betel. Gejapken kami maka ipasu-pasu Jahwe kerina keputusen kami perban ipelebe kami Ia.