1. Kai si arus ilakoken enterem kalak si reh ku Jerusalem?

ENTEREM dilaki ras diberu reh ku Jerusalem. Kalak e rehna arah erbage-bage ingan janah bahasana pe beda-beda. Lit kejadin si luar biasa si idah kalak e, piga-piga kalak Jahudi rempet-rempet banci ngerana bas bahasa kalak e. Tapi si lebih luar biasana akap kalak e eme kai si kataken piga-piga kalak Jahudi ndai bage pe si kataken Rasul Petrus man kalak e. Iteh jelma si enterem e me maka arus kalak e erkiniteken man Jesus Kristus gelah banci selamat. Mbelin kel pengaruh berita e man kalak e. Kenca megi berita e bagenda nina kalak e, “Kai dage si arus lakoken kami?” Nina Rasul Petrus ngaloi, “Kerina kena arus iperidiken.”​—Perb. 2:37, 38.

2. Kai kari sibahas bas artikel enda? (Nen gambar sampul.)

² Si terjadi seterusna pe luar biasa. Lit kira-kira 3.000 kalak si iperidiken bas wari e janah jadi murid Kristus. Mulai paksa si e terus idalanken pengikut Jesus perentah guna erban murid. Gundari pe murid-murid Jesus terus ngelakoken pendahin e. Tapi gundari labo banci mis kalak iperidiken kenca piga-piga jam kita ngerana ras ia. Banci saja perlu waktu piga-piga bulan, setahun, ntah pe lebih gelah kalak si erlajar Pustaka banci iperidiken. Perlu kerja keras guna nampati sekalak jelma jadi murid Kristus. Banci saja igejapkenndu si e sanga ajarkenndu Pustaka man kalak si deban. Bas artikel enda sibahas kari kai si banci ilakokenndu guna nampati kalak si erlajar Pustaka gelah banci iperidiken.

3. Menurut Matius 28:19, 20, kai si arus ilakoken kalak si erlajar gelah banci iperidiken?

³ Sope lenga iperidiken, kalak si erlajar Pustaka arus dalankenna kai si pelajarina. (Baca Matius 28:19, 20.) Adi bage banna, ia seri ras kalak si mbages kurakna taneh gelah banci bangunna rumahna i datas batu, bagi “kalak pentar” bas perumpaman Jesus. (Mat. 7:24, 25; Luk. 6:47, 48) Uga carana nampati kalak si erlajar ndalanken kai si pelajarina? Mari sibahas telu carana.

4. Kai si banci silakoken guna nampati kalak si erlajar gelah iperidiken? (Nen ka kotak “ Sampatilah si Erlajar Erban Tujun ras Ngelakokenca.”)

⁴ Sampati si erlajar erban tujun. Engkai maka enda penting? Cuba bayangkenndu lawes kam ku ingan si ndauh, pasti la kapndu latih ngukuri perdalanenndu e adi ngadi kam bas ingan-ingan si mejile. Bage ka pe adi kalak si erlajar Pustaka erban piga-piga tujun jangka pendek janah berhasil ia ngelakokenca, tehna me maka banci nge ia iperidiken. Gunakenlah bagin “Cuba Lakoken Enda” bas buku Ermeriah Ukur Seh Rasa Lalap! guna nampati si erlajar Pustaka ras kam erban tujun-tujun jangka pendek. Bas pendungi pelajaren, bahaslah ras si erlajar e maka kai si lit bas bagin e banci nampati ia ngelakoken kai si pelajarina. Adi lit tujun si deban si atendu ilakoken kalak si erlajar Pustaka ras kam, tuliskenlah e bas bagin “Si debanna.” Bahaslah bagin e alu ratur ras kalak si erlajar guna meteh tujun jangka pendek ras tujun jangka panjang si banci lakokenna.

5. Menurut Markus 10:17, 22, kai si ipindo Jesus ilakoken sekalak dilaki si bayak janah engkai?

⁵ Sampati si erlajar Pustaka erban perubahen si iperluken. (Baca Markus  10:17-22.) Iteh Jesus maka mesera kel iakap kalak si bayak ndayaken kerina ertana. (Mrk. 10:23) Tapi, tetap ipindo Jesus man dilaki si bayak e gelah ibanna perubahen si mbelin bas geluhna. Engkai? Perban keleng ate Jesus ia. Banci jadi la kita nggit ngiahken kalak si erlajar ngelakoken kai si pelajarina perban siakap lenga ia siap erban perubahen si iperluken. Memang perlu waktu guna ngambekken kebiasan si la mehuli bage pe makeken sipat-sipat si mbaru. (Kol. 3:9, 10) Tapi, reh terna ibahasndu ras kalak si erlajar Pustaka kerna perubahen si perlu ibanna, reh terna ka ia berubah. Alu mbahas kerna si e, buktikenndu maka keleng atendu ia.​—Ms. 141:5; Kua. 27:17.

6. Engkai maka perlu sisungkun pendapat kalak si erlajar kerna pelajaren si sangana ibahas?

⁶ Penting sisungkun pendapat kalak si erlajar kerna kai si sangana ibahas. Alu bage, banci siteh kai si angkai kalak si erlajar e. Adi ratur siban bage, reh nukahna siakap mbahas kai si banci saja mesera kapna ngalokenca. Melala penungkunen si iban bas buku Ermeriah Ukur Seh Rasa Lalap! Contohna, penungkunen bas pelajaren 04: “Adi menurutndu uga nge perasan Jahwe sanga silebuh gelarNa?” Penungkunen bas pelajaren 09: “Kai saja si atendu totokenndu?” Tangtangna banci saja mesera akap si erlajar e njawap penungkunen e. Tapi banci siajari ia erban kesimpulen arah ayat-ayat ras gambar-gambar si lit bas buku e.

7. Uga kita banci nggunaken pengalamen kalak si deban alu cara si mehuli?

⁷ Sanga kalak si erlajar Pustaka enggo meteh kai si perlu lakokenna, iahken ia ngelakokenca alu nggunaken pengalamen kalak si deban. Contohna, adi si erlajar e mesera kapna reh ku perpulungen alu ratur, banci cidahkenndu man bana video Iperdiateken Jahwe Aku bagin “Darami Terbuen” bas pelajaren 14. Bas pelajaren-pelajaren si lit i buku Ermeriah Ukur Seh Rasa Lalap! banci datndu pengalamen si bage bas bagin “Pelajari Terbagesen,” ntah pe “Darami Terbuen.” * Tapi, ula bandingkenndu ia ras kalak si deban alu ngataken, “Adi kalak si deban banci ngelakokenca, kam pe pasti banci.” Pediatlah si erlajar e si erban keputusen. Kenca tonton kena sada video, bahaslah ras si erlajar e kai si nampati kalak bas video e ngelakoken kai si ajarken Pustaka. Banci ka bahasndu salah sada ayat si penting ntah pe kai si erguna si ilakoken kalak bas video e. Adi banci, jelas ban man bana uga Jahwe nampati kalak bas video e.

8. Uga carata nampati si erlajar gelah keleng atena Jahwe?

⁸ Sampatilah si erlajar Pustaka gelah keleng atena Jahwe. Uga carana? Daramilah kesempaten guna ngajarken terbuen kerna sipat-sipat Jahwe. Jelasken man si erlajar maka Jahwe e Dibata si ermeriah ukur janah nggit nampati kalak si engkelengi Ia. (1 Tim. 1:11; Heb. 11:6) Cidahken man bana maka pasti datna melala manpaat adi dalankenna si pelajarina e. Jelasken ka man bana maka kerina manpaat e banci datna perban keleng ate Jahwe ia. (Jes. 48:17, 18) Adi reh kelengna atena Jahwe, reh belinna ka me sura-surana erban perubahen si iperluken.​—1 Joh. 5:3.

9. Engkai maka janji si lit bas Markus 10:29, 30 banci nampati kalak si erlajar erban pengorbanen?

⁹ Gelah si erlajar Pustaka banci iperidiken, lit pengorbanen si arus ibanna. Bali bagi dilaki si bayak si ituriken ndai, kalak si erlajar banci jadi perlu ikorbankenna ertana. Adi dahinna sedekah enda la cocok menurut Pustaka, arus daramina dahin si deban. Banci jadi lanai ia nggit erteman ras kalak si la engkelengi Jahwe, janah banci ka tadingken keluargana ia perban segat ate keluargana Saksi Jahwe. Iangkai Jesus maka la menukah erban pengorbanen si bage. Tapi pengorbanenna e labo sia-sia, perban erjanji Jesus maka kalak si ngikutken ia ndatken melala turang senina si perkeleng. (Baca Markus 10:29, 30.) Uga carata nampati kalak si erlajar gelah gejapkenna pasu-pasu e?

10. Kai si banci pelajarindu arah pengalamen Manuel?

¹⁰ Jadi teman si mehulilah kam man kalak si isampatindu erlajar. Penting kel igejapken kalak si erlajar maka ermediate kam man bana. Engkai? Cuba perdiateken kai nina Manuel si tading i Meksiko sanga ia erlajar Pustaka denga, “Sope erlajar, lalap sungkuni guruku uga beritaku. Enda erban menukah kuakap nuriken kai pe man bana. Banci kugejapken maka ermediate kel ia man bangku.”

11. Kai gunana adi siban waktuta man kalak si erlajar Pustaka ras kita?

¹¹ Nggit Jesus mereken waktuna man murid-muridna, emaka siusih ateta ia alu mereken waktuta man kalak si erlajar Pustaka ras kita. (Joh. 3:22) Adi cocok kapndu, banci undangndu ia ku rumahndu minem kopi, man, ntah pe nonton acara bulanen JW Broadcasting^®. Banci jadi ergaina kel undangen e, apai ka adi undangndu ia sanga melungen  akapna, misalna sanga teman-teman ras keluargana sangana ngerayaken perayan si la cocok menurut Pustaka. Kazibwe si tading i Uganda ngataken, “Melala si kupelajari kerna Jahwe sanga kuban waktuku ras guruku, labo ngenca sanga erlajar Pustaka. Banci kuidah maka keleng kel ate Jahwe umatNa janah meriah ukur umatNa. Aku pe merhat bagi kalak e.”

12. Engkai maka perlu ganti-ganti temanta sanga mandu pelajaren Pustaka?

¹² Ajaklah perberita si deban sanga mandu pelajaren Pustaka. Mon-mon, banci jadi nukahen siakap sisada mandu pelajaren Pustaka ntah pe seri lalap temanta sanga mandu pelajaren e. Tapi adi ganti-ganti temanndu si reh ndahi ia banci reh belinna manpaat si dat kalak si erlajar e. Dmitrii si tading i Moldova ngataken, “Tiap perberita si ajak guruku, la seri carana njelasken. Enda nampati aku meteh cara si deban bas ndalanken si kupelajari. Selain si e, lanai aku melasa sanga tangtangna aku reh ku perpulungen, perban enggo enterem turang senina si kutandai.”

13. Engkai maka arus sisampati kalak si erlajar gelah reh ku perpulungen?

¹³ Sampatilah kalak si erlajar gelah reh ku perpulungen. Engkai maka e penting? Perban iperentahken Jahwe umatNa gelah pulung ras-ras. (Heb. 10:24, 25) Selain si e, turang seninata bas runggun banci bagi keluargata. Sanga pulung kita ras kalak e, tempa-tempa ras-ras sipan pangan si seh kel tabehna. Adi sampatindu kalak si erlajar gelah reh ku perpulungen, e ertina sampatindu ia gelah banci iperidiken. Tapi banci saja mesera iakapna ngelakokenca. Uga carandu nggunaken buku Ermeriah Ukur Seh Rasa Lalap! bas nampati kalak si erlajar?

14. Uga carana ngiahken kalak si erlajar gelah reh ku perpulungen?

¹⁴ Gunakenlah pelajaren 10 bas buku Ermeriah Ukur Seh Rasa Lalap! guna ngiahken kalak si erlajar gelah reh ku perpulungen. Sope buku enda irilis, piga-piga perberita si erpengalamen isuruh ncubaken make pelajaren 10 e bas nampati kalak si erlajar. Hasilna, enterem kalak si erlajar ras kalak e nggit reh ku perpulungen. Tapi, labo arus timaindu seh pelajaren 10 maka undangndu kalak si erlajar reh ku perpulungen. Mislah undang ia ku perpulungen janah teruslah ban bage. La seri kerina tentangen si adapi kalak si erlajar. Emaka, perdiatekenlah tentangen kai si adapi kalak si erlajar gelah banci sampatindu ia. Ula kitik ukurndu adi la ia mis nggit reh ku perpulungen. Sabarlah kam janah ula nyerah.

15. Kai si banci saja erban kalak si erlajar mbiar?

¹⁵ Lit nge perbiarndu sanga jadi Saksi Jahwe atendu mbarenda? Banci saja iakapndu maka labo pernah kam banci erberita arah rumah ku rumah. Ntah banci saja mbiar kam itentang keluargandu ntah pe teman-temanndu. Adi bage perasanndu, banci angkaindu perasan kalak si sangana isampatindu erlajar. Ikataken Jesus maka lit piga-piga kalak si bage kebiarenna. Tapi, iahkenna pengikutna gelah ula ngadi ngelayani Jahwe perban mbiar. (Mat. 10:16, 17, 27, 28) Uga Jesus nampati pengikutna gelah la mbiar? Uga kita banci ngusih Jesus?

16. Uga kita banci nampati kalak si erlajar gelah banci erberita?

 ¹⁶ Teruslah sampati kalak si erlajar gelah ceritakenna si pelajarina. Banci saja lit perbiar murid-murid Jesus sanga kalak e isuruh erberita. Tapi, isampati Jesus kalak e alu nuduhken i ja kalak e erberita ras berita kai si arus ipeseh kalak e. (Mat. 10:5-7) Uga carandu ngusih Jesus? Sampati kalak si erlajar gelah tehna man ise saja ia banci erberita. Contohna, sungkun ia lit nge tandaina kalak si banci saja merhat meteh ajaren-ajaren Pustaka. Kenca si e, sampati ia nikapken kai si arus ikatakenna alu cara si sederhana. Adi cocok, banci sampatindu ia alu nggunaken bagin si erjudul “Lit si Ngataken” ras “Lit si Nungkun” bas buku Ermeriah Ukur Seh Rasa Lalap! Sanga bahas kena bagin e, sampatilah kalak si erlajar nggunaken Pustaka bas mereken jawapen si sederhana ras tepat.

17. Uga kita banci nggunaken Matius 10:19, 20, 29-31 sanga nampati kalak si erlajar gelah andalkenna Jahwe?

¹⁷ Sampati kalak si erlajar gelah andalkenna Jahwe. Ipetetap Jesus ukur murid-muridna maka pasti sampati Jahwe kalak e perban keleng ateNa kalak e. (Baca Matius 10:19, 20, 29-31.) Kataken man kalak si erlajar maka Jahwe pe pasti nampati ia. Banci sampatindu ia gelah andalkenna Jahwe. Sanga ras-ras kena ertoto, turiken kerna tujunna bas toto. Franciszek si tading i Polandia ngataken, “Rusur belasken guruku kerna tujunku bas toto. Kuidah uga Jahwe njawap toto guruku e. Mis ka aku mulai ertoto. Kugejapken penampat Jahwe sanga mindo ijin aku man bosku si mbaru gelah banci aku ikut perpulungen bage pe pertemuan regional.”

18. Uga perasan Jahwe man kalak si ngajarken Pustaka?

¹⁸ Ermediate kel Jahwe man kalak si sangana sisampati erlajar Pustaka. Iergai Jahwe janah keleng ka ateNa kalak si ngajarken Pustaka, si enggo kerja keras guna nampati kalak gelah rembak ras Ia. (Jes. 52:7) Adi lenga lit si erlajar Pustaka ras kam, banci temanindu perberita si deban sanga ngajarken Pustaka. Alu bage, banci sampatindu kalak si erlajar Pustaka maju secara rohani janah iperidiken.