1. Kai si erban kita sekalak-sekalak banci jadi umat Jahwe?

JAHWE si narik kita sekalak-sekalak. (Joh. 6:44) Kai maksudna? Sanga iperdiateken Jahwe miliaren kalak bas doni enda, idahNa lit si mehuli bas kam. ItehNa maka lit sura-surandu engkelengi Ia. (1 Kro. 28:9) Itandai Jahwe kam, angkaiNa perasanndu, janah keleng ateNa kam. Pasti malem kel pusuhndu meteh si e.

2. Uga cara Jesus nampati kita gelah banci sibayangken perasan Jahwe man tiap umatNa?

² Ermediate kel Jahwe man tiap umatNa. Gelah banci sibayangken perasan Jahwe kerna si e, bereken Jesus perumpaman kerna sekalak permakan si 100 biri-birina. Sanga papak sada biri-birina, kai nge si lakoken permakan e? “Tadingkenna si 99 e i gunung jenari lawes ia ndarami si papak e.” Sanga datna biri-biri e, labo rawaina biri-biri e tapi meriah kel ukurna. Kai pelajarenna? Meherga iakap Jahwe tiap biri-biriNa. Nina Jesus, “Bapakku si i surga la ateNa papak sada pe arah kalak si kitik enda.”​—Mat. 18:12-14.

3. Kai kari sibahas bas artikel enda?

³ Pasti la ateta erban kitik ukur turang seninata. Adi bage, uga carana gelah la siban kalak e tertuktuk? Kai nge si banci silakoken adi lit si erban kitik ukurta? Sibahas kari e bas artikel enda. Tapi, sipelajari lebe ise nge maksudna “kalak si kitik” bas Matius pasal 18.

4. Ise nge “kalak si kitik enda”?

⁴ “Kalak si kitik enda” eme kerina murid Jesus. La soal asa kai pe umur kalak e, kalak e “bagi anak-anak” perban nggit iajari Jesus. (Mat. 18:3) Amin pe beda-beda latar  belakang, budaya, pendapat, ras sipat kalak e, kerinana kalak e erkiniteken man Jesus Kristus. E me sebapna maka keleng kel ate Jesus kalak e.​—Mat. 18:6; Joh. 1:12.

5. Uga nge perasan Jahwe adi lit umatNa isakiti?

⁵ Meherga akap Jahwe kerina “kalak si kitik enda.” Situhuna perasan Jahwe mirip ras perasanta man anak-anak. Perban siteh anak-anak e lebih lemah janah kurang pengalamenna adi ibandingken ras kalak dewasa, silindungi ateta ia. Biasana nembeh ateta ngidah kalak adi sakitina kalak si deban. Terlebih ka adi si sakitina e anak-anak janah banci ka kita merawa. Jahwe pe bage, lindungiNa ateNa tiap umatNa. Nembeh ateNa janah banci ka Ia merawa adi umatNa isakiti.​—Jes. 63:9; Mrk. 9:42.

6. Menurut 1 Korinti 1:26-29, uga nge pengakap doni enda kerna murid-murid Jesus?

⁶ Kai alasen si deban maka murid-murid Jesus banci ipeseri ras “kalak si kitik”? Doni enda erpengakap maka kalak si penting eme kalak bayak, kalak si terkenal, ras si lit jabatenna. Murid-murid Jesus biasana labo kalak si bage. Emaka ianggap doni enda murid-murid Jesus “kalak si kitik” si la penting janah la erguna. (Baca 1 Korinti 1:26-29.) Tapi labo bage pengakap Jahwe.

7. Uga arusna perasanta man turang seninata?

⁷ Keleng ate Jahwe kerina umatNa la soal kalak e enggo ndekah ntah mbaru denga ngelayani Ia. Kerina kalak e penting akap Jahwe. Emaka kita pe arusna penting siakap kalak e. ‘Sikelengilah kerina temanta si sada kiniteken,’ labo piga-piga kalak saja. (1 Pet. 2:17) Nggit kita ngelakoken kai pe guna ngelindungi ras nampati kalak e. Adi siteh enggo siban kitik ukur turang seninata, ula siban tempa-tempa la lit kai pe si terjadi. Ula kita erpengakap maka kalak e si menukahsa tersinggung janah arusna maapkenna kita. Engkai maka lit turang seninata si kitik ukurna? Banci saja lit arah kalak e si rendah akapna bana perban latar belakangna. Ukurina kel kai nina kalak kerna dirina, dungna nukah kitik ukurna. Si debanna ka mbaru denga bas kebenaren. Banci jadi sengget ia ngidah kelemahen turang senina si deban. Adi menukah kitik ukurta, siusahakenlah gelah ula menukahsa kitik ukurta. Alu bage, tenang me pusuh ras perukurenta janah mehuli hubungenta ras turang seninata.

8. Cara rukur si uga si mpengaruhi murid-murid Jesus?

⁸ Kai si erbanca maka cakapken Jesus kerna “kalak si kitik enda”? Paksa si e nungkun murid-muridna, “Ise situhuna si mbelinna bas Kerajan surga?” (Mat. 18:1) Bas jaman e, enterem kalak Jahudi si merhat ianggap kalak si deban penting. Nina sekalak ahli, “Merhat kel kalak e ihormati ras jadi kalak si terkenal. E me si pentingna akap kalak e.”

9. Kai si arus ilakoken murid-murid Jesus?

⁹ Iteh Jesus maka arus erjuang kel murid-muridna ngubah cara rukur si bali bagi kalak Jahudi. Enterem kalak Jahudi erusaha gelah hebaten ia asangken kalak si deban. Emaka nina Jesus man murid-muridna, “Kalak si mbelinna arah kena arus bagi kalak si ngudana, janah kalak si muat pinpinen, bagi kalak si ngelayani.”  (Luk. 22:26) Banci sidalanken nasehat Jesus gelah jadi “kalak si ngudana” adi ‘sianggap kalak si deban ganjangen’ asangken kita. (Pil. 2:3) Adi terus kita bage, mbelin kemungkinenna la siban kalak tertuktuk.

10. Kai nasehat Paulus si perlu siikuti?

¹⁰ Tiap turang seninata lit kelebihenna si la lit bas kita. Menukah siakap meteh kelebihenna e adi siukuri sipat-sipatna si mehuli. Perlu siukuri ras sidalanken nasehat Rasul Paulus man kalak Kristen i Korinti, nina, “Kai kin si erban kena beda ras kalak si deban? La kin si lit bas kena e ibere Dibata nge? Adi memang kerina e bere Dibata, engkai maka kena sombong tempa-tempa si e hasil usaha kena?” (1 Kor. 4:7) Emaka perlu kita hati-hati gelah la siusahaken iperdiateken kalak kita ntah pe ganjangen siakap kita asangken kalak si deban. Misalna, lit turang senina si beluh khotbah, lit ka si beluh erberita, dungna melala kalak si erlajar Pustaka ras ia. Pujin kai pe si aloken kalak e arusna berekenna man Jahwe.

11. Kai si banci sipelajari arah perumpaman Jesus kerna sekalak raja ras budakna?

¹¹ Kenca nasehati Jesus pengikutna gelah la erban kalak tertuktuk, berekenna perumpaman kerna sekalak raja ras budakna. Melala kel utang budak e man raja janah la mungkin tergalarina. Tapi perban mekuah ate raja e, ianggapna enggo lunas kerina utang budak e. Bas pudi wari, ituntut budak e gelah galari budak si deban utangna si ndauh sitiken. Akibatna itamaken raja me budak si jahat e ku bas penjara. Kai pelajarenna? Nina Jesus, “Bage ka pagi iban Bapakku si i surga man kena sekalak-sekalak, adi la kin ampuni kena turang senina kena arah pusuh kena nari.”​—Mat. 18:21-35.

12. Adi la kita nggit ngampuni, kai pengaruhna man kalak si deban?

¹² Perbahanen budak si jahat e labo ngenca ngerugiken dirina, tapi ngerugiken kalak si deban. Si pertama, si irugiken budak e eme budak si rutang man bana perban “tamakenna temanna e ku penjara seh ngasa banci galarina utangna e.” Si peduaken, sedih kel budak-budak si deban meteh perbahanenna e. Nina Pustaka, “Idah budak-budak si deban kai si terjadi, sedih kel kalak e.” Bage ka me pengaruh perbahanenta man kalak si deban. Adi la kita nggit ngampuni kalak si ersalah man banta, kai si banci terjadi? Si pertama, sedih siban kalak e perban banci saja lanai ateta keleng kalak e ras lanai kita ermediate man bana. Si peduaken, latih siban ukur turang seninata bas runggun sanga tehna lit masalahta ras kalak e.

13. Kai si pelajarindu arah pengalamen Kristal?

¹³ Adi nggit kita ngampuni turang seninata, mbelin gunana man banta bage pe man kalak si deban. E me si gejapken sekalak perintis si gelarna Kristal. Pernah kitik ukurna ban sekalak turang senina bas runggunna. Nina Kristal, “Mon-mon sanga ia ngerana man bangku, kasar kel rananna, janah kitik ukurku megisa. Lanai aku nggit erberita ras ia. Akibatna, kisat aku erberita janah lanai meriah ukurku.” Tangtangna la akap Kristal salah perbahanenna man turang seninana e. Tapi bas pudi wari, usahakenna gelah lanai nembeh atena turang senina e  janah lanai perasanna ngenca ukurina. Dungna, banci ampunina turang senina e. Banci banna bage perban dalankenna nasehat Pustaka arah artikel si erjudul “Ampunilah dengan Segenap Hati Saudara” bas Menara Pengawal 15 Oktober 1999. Nina Kristal, “Dungna sadar aku maka kerina kita perlu erjuang gelah reh ulina sipat-sipatta. Kuinget ka maka situhuna nggit Jahwe ngampuni kita tiap wari. Gundari enggo menahang kel kuakap janah meriah ukurku.”

14. Menurut Matius 18:21, 22, kai si banci saja mesera akap Rasul Petrus ngelakokenca janah kai si banci sipelajari arah jawapen Jesus?

¹⁴ Siteh maka arus kita ngampuni. Tapi, banci saja mesera siakap ngelakokenca. Banci jadi Rasul Petrus pe pernah bage perasanna. (Baca Matius 18:21, 22.) Adi bage, kai si banci nampati kita? Si pertama, ukurilah uga rusurna Jahwe enggo ngampuni kam. (Mat. 18:32, 33) Situhuna labo kita patut iampuni. Tapi tetap ampuniNa kita. (Ms. 103:8-10) Selain si e, “kita pe arus sikeleng-kelengen.” Emaka, arus siampuni turang seninata. Enda labo pilihen. (1 Joh. 4:11) Si peduaken, ukuri kai saja gunana adi kita ngampuni. Banci kita rembak mulihi ras kalak si erban kitik ukurta, siban runggun reh kompakna, janah tetap kita rembak ras Jahwe. Selain si e, tenang ka ukurta. (2 Kor. 2:7; Kol. 3:14) Si peteluken, ertotolah man Jahwe, Dibata si nuruh kita ngampuni kalak si deban. Icedai Setan atena hubungenta ras turang seninata. Tapi ula pediat e terjadi. (Ep. 4:26, 27) Perlu kita penampat Jahwe gelah ula sempat siikutken sura-sura Setan.

15. Menurut Kolose 3:13, kai si banci lakokenndu adi lit turang senina si erban kitik kel ukurndu?

¹⁵ Uga adi lit ranan ntah perbahanen  turang senina si erban kitik kel ukurndu? Kai si perlu lakokenndu? Usahakenlah asa ngasupndu erdame ras ia. Turiken perasanndu man Jahwe. Totokenlah ia janah pindolah penampat Jahwe gelah banci idahndu sipat-sipatna si mehuli si jadi ate Jahwe. (Luk. 6:28) Adi mesera denga kapndu ngampuni ia, cubalah cakapken ras ia. Ula akapndu maka sengaja ia erban kitik ukurndu. (Mat. 5:23, 24; 1 Kor. 13:7) Tapi uga adi la ia nggit erdame ras kam? ‘Tetaplah kam sabar’ man bana. Ula kam nyerah. (Baca Kolose 3:13.) Si pentingna, ula terus kitik ukurndu gelah la ceda hubungenndu ras Jahwe. Ula pediat kai pe erban kam tertuktuk. Alu bage, buktikenndu maka kelengen atendu Jahwe asangken kai pe.​—Ms. 119:165.

16. Kai tanggung jawapta sekalak-sekalak?

¹⁶ Kerina kita ngelayani Jahwe selaku “sada rarasen” janah si negu-negusa ‘sada permakan’! Pasti ngata bujur kel kita perban persadan enda. (Joh. 10:16) Buku Diorganisasi untuk Melakukan Kehendak Yehuwa halamen 165 ngataken, “Perban enggo sidat manpaat arah persadan e, lit tanggung jawapndu guna njagasa.” Emaka perlu “silatih dirita ngenen kalak si deban bagi cara Jahwe ngenensa.” I lebe-lebe Jahwe kerina kita “kalak si kitik” si meherga. Seri nge perukurenndu bagi Jahwe? Ingetlah, iperdiateken Jahwe ras iergaiNa kerina si lakokenndu guna nampati ras ngelindungi turang seninandu.​—Mat. 10:42.

17. Kai tekadta?

¹⁷ Keleng ateta turang seninata. Perban si e, ‘ula ndigan pe silakoken kai si erban lemah kiniteken turang seninata ntah pe si erban ia ndabuh.’ (Rom. 14:13) Sianggaplah kalak e ganjangen asangken kita. Nggit kita ngampuni kalak e arah pusuhta nari. La kita nggit tertuktuk perban kalak si deban. Emaka ‘lakokenlah kai pe si erban kita nggeluh alu dame janah pegegehi sada ras si debanna.’​—Rom. 14:19.