Nina Turang Seninata Lisa, * “Kena kel ku pusuhku kiniulin turang senina.” E me si erban ia tertarik man kebenaren. Bage ka me si igejapken Anne, nina, “Si tangtangna erban aku tertarik man kebenaren labo perban kai si iajarken Saksi Jahwe, tapi perban mehuli kel kalak e.” Gundari enggo meriah akap Lisa ras Anne mbaca ras ngukuri Pustaka.

Uga carata ncidahken kiniulin gelah kena ku pusuh kalak? Mari sibahas dua carana, eme alu rananta ras perbahanenta. Selain si e, sibahas ka kari man ise saja arus sicidahken kiniulin.

Bas Kuan-kuanen pasal 31, lit ituriken kerna diberu si pentar. Nina ayat e, “Mehuli ia ngerana.” Bas bahasa aslina ayat e iterjemahken “undang-undang kiniulin lit bas ia.” (Kua. 31:26) Pediatna “undang-undang” e mpengaruhi ia gelah tehna kai si arus katakenna ras uga cara ngatakenca. Undang-undang e pe arus lit bas perbapan. Enterem orang tua, isadarina maka adi kasar pengeranana, la mehuli pengaruhna man anakna. Emaka, adi mehuli pengerana orang tua, reh nukahna akap anak-anakna patuh man bana.

La soal kita orang tua ntah lang, uga carana gelah mehuli pengeranata? Jawapenna lit bas Kuan-kuanen 31:26. Nina i je, perlu kita ‘pentar ngerana.’ Maksudna perlu sipilih lebe kata-kata si ateta sibelasken, ras uga cara mpesehsa. Perlu ka siukuri penungkunen enda, ‘Adi bagenda ningku, merawa nge ia, ntah meriah ukurna?’ (Kua. 15:1) Jelas me, perlu siukuri lebe sope kita ngerana.

Bas Kuan-kuanen lit ka ikataken, “Ranan si la iukuri lebe bali bagi kena tebak pedang.” (Kua. 12:18) Adi siinget maka kata-kata bage pe carata ngerana banci mpengaruhi kalak, teriahken me kita guna njaga rananta. Adi ngerana kita sesuai ras “undang-undang kiniulin,” la sibelasken ranan si erban kalak sakit hati ntah pe ranan si kasar. (Ep. 4:31, 32) Tapi positip min rananta, mehuli, ras lembut. Enggo bereken Jahwe usihen kerna si e sanga ipetetapNa ukur pelayanNa Elia si sangana mbiar. Malekat si jadi wakil Jahwe, ngerana man Elia alu “sora si lembut janah la megang.” (1 Raj. 19:12) Tapi, jadi kalak si mehuli labo bias terjeng mehuli rananta. Arus ka mehuli perbahanenta. Uga carana?

Adi mehuli ranan bage pe perbahanenta, e mbuktiken maka enggo siusih Jahwe. (Ep. 4:32; 5:1, 2) Lisa, si ituriken ndai nceritaken kiniulin si icidahken Saksi Jahwe. Nina, “Sanga rempet arus pindah keluarga kami, lit dua pasang Saksi Jahwe cuti gelah banci nampati kami. Situhuna paksa si e lenga bo aku erlajar Pustaka!” Kiniulin si icidahken kalak e, erban merhat Lisa meteh kebenaren.

 Anne, si iceritaken ndai pe, ergaina kel kiniulin Saksi Jahwe. Nina, “Perban la mehuli perbahanen kalak bas doni enda, mesera kuakap tek man kalak si deban. Emaka, sanga jumpa aku ras Saksi Jahwe, labo aku teksa man kalak e. Tersungkun-sungkun aku, ‘Engkai maka perdiateken kalak e aku?’ Tapi perban mehuli kalak si ngajari aku Pustaka, mulai aku tek man bana.” Kai hasilna? “Dungna, tutus ateku erlajar Pustaka.”

Kena kel ku pusuh Lisa ras Anne kiniulin turang senina, emaka dungna nggit kalak e erlajar kebenaren. Kiniulin turang senina nampati kalak e gelah tek man Jahwe ras umatNa.

Piga-piga kalak banci saja menukah akapna melasken kata-kata si mehuli ras cirem perban bage kin budayana ntah pe bage kin ia kalakna. Memang si e mehuli. Tapi adi e ngenca si ngiahken ia gelah jadi kalak si mehuli, e ertina lenga cidahkenna kiniulin bagi si arapken Dibata.​—Bandingken Perbahanen Rasul-Rasul 28:2.

 Kiniulin eme sipat si ihasilken kesah si badia Dibata. (Gal. 5:22, 23) Adi reh belinna ateta kiniulinta, arus kita nggit itegu-tegu kesah si badia. Adi bage siban, e ertina keleng ateta Jahwe, janah siusih ateta Ia. Selaku kalak Kristen, siusih ateta Jesus alu engkelengi ras ermediate man kalak si deban. Emaka, alasen si utama nggit kita ncidahken kiniulin eme keleng ateta Dibata Jahwe ras kalak si deban. Alu bage, kiniulin banci jadi sipatta si rehna arah pusuh nari janah sesuai bagi si arapken Dibata.

Banci saja menukah siakap ncidahken kiniulin man kalak si mehuli man banta ntah pe man kalak si enggo sitandai. (2 Sam. 2:6) Salah sada carana eme ngata bujur man kalak e. (Kol. 3:15) Tapi uga adi lit kalak si la siakap perlu kita mehuli man bana?

Jahwe me usihen si utamana bas ncidahken kiniulin man kerina kalak, la soal kalak e cocok ngalokenca ntah lang. Arah Pustaka, iajariNa kita kerna uga carana ncidahken sipat enda. Istilah “kiniulin si luar biasa” rusur igunaken bas Kitap-Kitap Junani Kristen. Istilah enda banci maksudna pemere si ibereken perban mehuli si merekenca, labo perban si ngalokenca cocok ndatkenca. Uga Dibata ncidahken kiniulin si bage man banta?

Cuba siukuri kiniulin Jahwe si enggo cidahkenNa man miliaren jelma. BerekenNa kai si iperluken kalak e gelah banci tetap nggeluh. (Mat. 5:45) Situhuna, sope sitandai Jahwe, enggo cidahkenNa kiniulinNa man banta. (Ep. 2:4, 5, 8) Contohna, bereNa si mehulina man banta eme AnakNa si tonggal guna nebus kita. Itulis Rasul Paulus maka bereken Jahwe korban tebusen “perban seh kel belinna kiniulinNa si luar biasa.” (Ep. 1:7) Amin pe kita erdosa janah mon-mon erban Jahwe kecewa, lalap itegu-teguNa ras iajariNa kita. Petunjuk ras rananNa bali bagi “udan rintik-rintik.” (Ul. 32:2) Ndigan pe la banci sibalas kerina kiniulin Jahwe. Situhuna, adi la cidahken Jahwe kiniulinNa si luar biasa e man banta, la lit arapenta bas wari si pepagi.​—Bandingken 1 Petrus 1:13.

Kiniulin Jahwe e kena kel ku pusuhta, janah e ngiahken kita ngusih Ia. Emaka, mehuli ateta man kerina kalak, labo man piga-piga kalak saja. Silakoken ateta bage bas kegeluhenta tiap wari. (1 Tes. 5:15) Adi lalap sicidahken kiniulin, kita bali bagi api unggun sanga mbergeh wari. Banci kita jadi pergegeh man keluargata, turang senina, temanta erdahin, temanta sekolah, ras tetanggata.

Cuba ukuri ise bas keluargandu ntah pe bas runggun si merluken penampatndu. Banci saja lit kalak bas runggun si merluken penampatndu guna ngurus rumah bage pe halamenna, ntah dahin si deban bagi belanja. Selain si e, sanga kam erberita, adi jumpa kam ras kalak si merluken penampatndu, sampatilah ia.

Perban siusih Jahwe, mbera-mbera ranan bage pe perbahanenta lalap ngikutken “undang-undang kiniulin.”