1. Kai si banci sipelajari arah kata-kata Raja Salomo bas Pengerana 7:20?

 ITULIS Raja Salomo bagenda, “La lit kalak si bujur bas doni si lalap erban si mehuli janah la pernah erban dosa.” (Peng. 7:20) Payo kel kata-kata e! Kerina kita enggo erdosa. (1 Joh. 1:8) Emaka, kerina kita merluken pengampunen arah Dibata ras kalak si deban.

2. Uga nge perasanndu adi imaapken temanndu kam?

² Pasti pernah kam erban salah man temanndu. Emaka mindo maap kam man bana gelah rembak kena mulihi. Uga nge perasanndu adi imaapken temanndu e kam? Pasti tenang pusuhndu janah meriah ukurndu!

3. Penungkunen kai kari sibahas bas artikel enda?

³ Jahwe ateta jadi Temanta si rembakna kel. Tapi mon-mon, rananta ntah pe perbahanenta banci erban Ia kecewa. Amin pe bage, Jahwe lalap nggit ngampuni kita. Kai si erban kita tek kerna si e? Kai bedana pengampunen Jahwe ras pengampunen jelma? Janah, kalak si uga nge si banci ndatken pengampunen Dibata?

4. Engkai maka kita tek Jahwe lalap nggit ngampuni?

⁴ Pustaka erban kita tek maka Jahwe lalap nggit ngampuni. Sanga turiken Jahwe kerna diriNa man Musa  bas Gunung Sinai, isuruhNa sada malekat guna ngataken, “Jahwe, Jahwe kap Dibata si perkuah, si mehuli, la nukah merawa, janah dem alu kekelengen si setia ras kebenaren. Kucidahken kekelengen si setia man ribun kalak. Kuampuni kesalahen, pelanggaren, ras dosa.” (Kel. 34:6, 7) Jahwe eme Dibata si mehuli ras perkuah. Lalap Ia nggit ngampuni kalak si ertobat.​—Neh. 9:17; Ms. 86:15.

5. Perban iteh Jahwe kerinana kerna kita, kai si ilakokenNa? (Masmur 103:13, 14)

⁵ Perban Jahwe Si Nciptaken kita, itehNa kerinana kerna kita. Luar biasa kel sanga siukuri maka iteh Jahwe kerinana kerna tiap kalak bas doni enda. (Ms. 139:15-17) IdahNa kerina kekurangen si iwarisken orang tuata man banta. ItehNa ka kerina si terjadi bas geluhta si erban sipat-sipatta bagi si gundari enda. Perban itehNa kerinana kerna kita, e ngiahken Ia guna ncidahken perkuah ateNa man banta.​—Ms. 78:39; baca Masmur 103:13, 14.

6. Kai buktina nggit Jahwe ngampuni kita?

⁶ Enggo buktiken Jahwe maka nggit Ia ngampuni kita. ItehNa maka kerina kita erdosa janah dungna mate perban kai si ilakoken Adam. (Rom. 5:12) Labo kita banci erban dirita ntah pe kalak si deban bebas arah dosa ras kematen. (Ms. 49:7-9) Tapi, Dibatata si perkeleng cidahkenNa perkuah ateNa alu erban pengaturen gelah banci kita bebas. Kai si ilakokenNa? Bagi si ikataken bas Johanes 3:16, ikorbanken Jahwe AnakNa si tonggal mate guna kita. (Mat. 20:28; Rom. 5:19) Ikorbanken Jesus geluhna gelah kalak si erkiniteken man bana banci bebas arah dosa ras kematen. (Heb. 2:9) Pasti ceda kel ukur Jahwe ngidah Anak si keleng ateNa ipermelaken ras isiksa seh ngasa mate! Tek kita, pasti labo pediat Jahwe AnakNa mate adi la ateNa ngampuni kita.

7. Ise saja nge si enggo pernah iampuni Jahwe si icatat bas Pustaka?

⁷ Bas Pustaka melala contoh kerna kalak si enggo iampuni Jahwe. (Ep. 4:32)  Ise nge si ingetndu? Banci saja ingetndu Raja Manase. Jahat kel perbahanenna. Isembahna berhala janah iahkenna kalak si deban nembah berhala. Bunuhna anakna, janah persembahkenna jadi korban man berhala. Tamakenna ka patung dibata palsu bas rumah pertoton Jahwe si badia. Bagenda nina Pustaka kerna ia, “Melala kel perbahanen jahat si lakokenna si erban Jahwe merawa man bana.” (2 Kro. 33:2-7) Tapi, perban Manase tuhu-tuhu ertobat, nggit Jahwe ngampuni ia. Ban Dibata ka mulihi ia jadi raja. (2 Kro. 33:12, 13) Selain Manase, banci saja ingetndu ka Raja Daud. Mbelin kel dosana man Jahwe, erlua-lua ia ras munuh. Tapi sanga tuhu-tuhu ia ertobat janah akuina dosana, nggit Jahwe ngampuni ia. (2 Sam. 12:9, 10, 13, 14) Arah contoh ndai, tek kita maka Jahwe nggit ngampuni kalak si ertobat. Gundari, mari sibahas kai bedana pengampunen Jahwe ras pengampunen jelma.

8. Engkai maka Jahwe me Hakim si mehulina?

⁸ Jahwe eme “Hakim sebelang doni.” (Kej. 18:25) Hakim si mehuli arus tuhu-tuhu angkaina undang-undang. Bage me Jahwe, janah Ia kap Si Mereken Undang-Undang. (Jes. 33:22) La lit ise pe si bagi Jahwe tepatna bas nentuken kai si benar ras si salah. Hakim si mehuli pe perlu ka tehna kerina faktana sope erban sada keputusen. Bage me si lalap ilakoken Jahwe. Emaka, Ia me Hakim si mehulina.

9. Sope iampuni Jahwe sekalak jelma, kai saja nge si ukuriNa?

⁹ Jahwe tehNa kerina faktana emaka banci lalap ibanNa keputusen si benar, tapi hakim manusia la bage. (Kej. 18:20, 21; Ms. 90:8) Adi jelma, ihakimina kalak arah kai si idahna ras si begina saja. Tapi Jahwe ndauh buen si banci ilakokenNa. ItehNa kai si mpengaruhi sipat ras perbahanen sekalak jelma. Contohna, itehNa cara sekalak jelma ipebelin, pendidikenna, inganna tading, kesehaten mentalna, ras emosina. Iteh Jahwe ka isi pusuh sekalak jelma. ItehNa engkai maka ilakoken sekalak jelma sada hal ras kai sura-surana. La lit si terbuni arah Jahwe nari. (Heb. 4:13) Emaka, sanga ampuni Jahwe sekalak jelma, keputusenNa pasti benar, perban tehNa kerina faktana.

10. Engkai maka banci kita tek keputusen Jahwe lalap benar ras adil? (Ulangen 32:4)

¹⁰ Keputusen Jahwe lalap benar ras adil. Ia Dibata si la erpilihen. Sanga ampuniNa sekalak jelma, si inenNa labo penampilenna, kebayakenna, kedudukenna ntah pe kengasupenna. (1 Sam. 16:7; Jak. 2:1-4) Jahwe la banci isogok ntah pe ipaksa. (2 Kro. 19:7) Sanga Jahwe erban keputusen, labo perasanNa si ngendaliken keputusenNa e. (Kel. 34:7) Tek kita maka Jahwe me Hakim si mehulina, perban tehNa kerina kerna kita bage pe situasita.​—Baca Ulangen 32:4.

11. Kai bedana cara Jahwe ngampuni ras jelma?

¹¹ Iteh penulis Kitap-Kitap Heber maka cara Jahwe ngampuni la bagi cara jelma ngampuni. Menurut sada buku, mon-mon igunaken penulis e kata Heber si “ipake guna njelasken cara Jahwe ngampuni kalak si erdosa. Kata e la pernah ipake guna njelasken cara manusia  ngampuni.” Jahwe ngenca si lit kuasaNa guna tuhu-tuhu ngampuni kalak si ertobat. Kai hasilna perban ampuni Jahwe kita?

12-13. (a) Kai si igejapken kalak si iampuni Jahwe? (b) Kenca ampuni Jahwe kita, kai si la pernah ilakokenNa?

¹² Adi siinget maka enggo ampuni Jahwe kita, sigejapken me “kemalemen ate,” dame pusuhta, janah bersih pusuh peratenta. Pengampunen si bage labo rehna arah jelma, tapi arah Jahwe. (Perb. 3:19) Sanga ampuni Jahwe kita, hubungenta ras Ia banci rembak mulihi bagi tempa-tempa la pernah silakoken dosa.

¹³ Adi enggo ampuni Jahwe kita, lanai ingetNa dosata ntah pe hukumNa kita perban dosata e. (Jes. 43:25; Jer. 31:34) Ipedauh Jahwe dosata arah kita nari “bagi dauhna matawari terbit ku matawari terbenam.” * (Ms. 103:12) Sanga siukuri uga belinna pengampunen Jahwe, ngata bujur kel kita janah luar biasa kel siakap. (Ms. 130:4) Tapi, kalak si uga nge si ampuni Jahwe?

14. Kai si enggo sipelajari kerna alasen Jahwe ngampuni kita?

¹⁴ Bagi si enggo sipelajari, alasen Jahwe ngampuni kita labo itentuken uga belinna dosata. Selain si e, selaku Pencipta, Si Mereken Undang-Undang, ras Hakimta, banci lalap ibanNa keputusen si benar. Tapi kai saja si ukuri Jahwe sope ngampuni kita?

15. Menurut Lukas 12:47, 48, kai si ukuri Jahwe sope ampuniNa kita?

¹⁵ Sope ampuni Jahwe sekalak jelma, ukuriNa lebe enggo nge teh kalak ndai maka perbahanenna e salah ntah lang. Jelas kel teridah kerna si e arah kata-kata Jesus bas Lukas 12:47, 48. (Baca.) Adi lit kalak si rencanakenna ngelakoken kai si jahat ras si la ngena ate Dibata janah dungna lakokenna, enggo lakokenna dosa si serius. Kalak si bage banci saja la iampuni Jahwe.  (Mrk. 3:29; Joh. 9:41) Tapi mon-mon silakoken ka nge kai si enggo siteh salah. Adi bage, banci denga nge kita iampuni? Banci. Mari sinen kai ka si ukuri Jahwe sope ngampuni kita.

16. Kai ertina ertobat, janah engkai maka penting ertobat?

¹⁶ Sope ngampuni kita, ukuri Jahwe ka enggo nge kita ertobat ntah lang. Sekalak jelma banci ikataken ertobat adi iubahna perukurenna, perbahanenna, ntah pe sura-surana. Menyesal ia ras sedih kel kapna perban enggo lakokenna kai si salah, ntah pe perban la lakokenna kai si benar. Sedih ia labo saja perban kesalahenna e tapi perban la jagana hubungenna ras Jahwe, si dungna erban lakokenna kai si salah. Cuba siinget mulihi kerna Raja Manase ras Daud. Duana kalak e ngelakoken dosa si serius. Tapi ampuni Jahwe kalak e perban tuhu-tuhu kalak e ertobat. (1 Raj. 14:8) Jelas me, gelah ampuni Jahwe kita arus tuhu-tuhu kita ertobat. Tapi labo bias terjeng menyesal, perlu ka siban perubahen. * Jahwe pe ukuriNa ka kerna si e sope ngampuni kita.

17. Kai si arus ilakoken sekalak jelma gelah banci iampuni Jahwe, janah engkai maka e banci nampati ia gelah lanai ulihina kesalahenna e? (Jesaya 55:7)

¹⁷ Lit ka deba nari si ukuri Jahwe eme perubahen si iban sekalak jelma. Arus itadingkenna perbahanenna si salah janah lakokenna kai si ngena ate Jahwe. (Baca Jesaya 55:7.) Arus ubahna cara rukurna gelah sesuai ras cara rukur Jahwe. (Rom. 12:2; Ep. 4:23) Arus ka ia ertekad gelah lanai ukurina kai si la mehuli ntah pe ngelakokenca. (Kol. 3:7-10) Perban tek kita man korban tebusen Kristus, banci kita ampuni Jahwe janah bersihkenNa dosata. Nggit Jahwe ngampuni kita, adi idahNa siusahaken kel robah.​—1 Joh. 1:7.

18. Kai si enggo sibahas kerna pengampunen Jahwe?

¹⁸ Mari sinen mulihi piga-piga hal si penting si enggo sibahas. Si pertama, Jahwe lalap nggit ngampuni. Si peduaken, itandaiNa kel kita. Iteh Jahwe kerinana kerna kita janah tehNa tuhu-tuhu kita ertobat ntah lang. Si peteluken, adi enggo ampuni Jahwe kita, anggapNa bagi tempa-tempa la pernah silakoken dosata e. Enda banci erban bersih pusuh peratenta janah banci kita rembak mulihi ras Ia. Jelas me, pengampunen Jahwe tuhu-tuhu luar biasa!

19. Amin pe kita la sempurna janah erdosa, engkai maka banci kita ermeriah ukur?

¹⁹ Memang perban kita lenga sempurna, tetap denga nge silakoken kesalahen. Tapi, banci kita terapuli arah kata-kata si lit bas buku Pemahaman Alkitab, Jilid 2, halamen 1055, si isina: “Jahwe eme Dibata si perkuah janah itehNa kelemahenta. Emaka amin pe silakoken kesalahen perban kita la sempurna, la perlu lalap kita menyesal. (Ms. 103:8-14; 130:3) Adi siusahaken asa ngasupta ngelakoken kai si ngena ate Dibata, pasti banci kita ermeriah ukur.​—Pil. 4:4-6; 1 Joh. 3:19-22.”

20. Penungkunen kai kari sibahas bas artikel seterusna?

²⁰ Ngata bujur kel kita perban nggit Jahwe ngampuni kita adi tuhu-tuhu kita menyesal. Tapi, banci nge siusih cara Jahwe ngampuni? Kai si seri bas cara Jahwe ngampuni ras cara jelma ngampuni, tapi kai bedana? Engkai maka perlu siteh bedana? Bas artikel seterusna, sibahas kari jawapenna.