1. Kai biasana si erban kita mbiar?

 CUBA ukuri piga-piga situasi si adapi turang seninata enda. Contohna Nestor ras diberuna, María. * Merhat kalak e ngelayani bas daerah si merluken terbuen perberita. Guna ngelakoken si e, arus isederhanaken kalak e geluhna. Tapi mbiar kalak e la kari tuhu-tuhu meriah ukurna adi lanai melala senna. Contoh si deban eme Biniam. Ia tading bas ingan si ngelarang pendahinta. Kenca ia jadi Saksi Jahwe, itehna maka banci saja ianiaya pagi ia. Si e erban ia mbiar. Tapi, reh biarna ka ia ngukuri tanggapen keluargana adi teh kalak e ia enggo jadi Saksi Jahwe. Contoh si deban ka eme Valérie. Ikataken dokter ia sakit kanker ganas. Mesera kel kapna ndarami ahli bedah si banci nambari ia alu la make dareh. Emaka wajar adi mbiar kel ia mate.

2. Engkai maka arus sikendaliken kebiarenta?

² Pernah nge kam mbiar bagi turang seninata ndai? Teremen arah kita pernah. Adi la sikendaliken kebiarenta, banci kari siban keputusen si la mehuli si mpengaruhi hubungenta ras Jahwe. E me sura-sura Setan. Atena nggunaken kebiarenta gelah la sipatuhi undang-undang Jahwe, termasuk perentahNa guna erberita si meriah. (Ket. 12:17) Setan e jahat, kejam, ras megegeh. Tapi pasti banci kita menang ngelawan ia. Uga carana?

3. Kai si banci nampati kita ngendaliken kebiarenta?

 ³ Adi tek kita maka keleng ate Jahwe kita ras lindungiNa kita, labo banci ipebiar-biar Setan kita. (Ms. 118:6) Contohna, penulis Masmur 118 ngadapi piga-piga masalah si mberat. Melala musuhna, musuhna e termasuk peminpin-peminpin (ayat 9, 10). Mon-mon, mberat kel masalah si adapina (ayat 13). Pernah ka datna disiplin si tegas arah Jahwe (ayat 18). Amin gia bage, bagenda nina, “Labo aku mbiar.” Kai si erban pemasmur e la mbiar? Amin pe idisiplin Jahwe ia, itehna maka keleng kel ate Bapakna si i surga e man bana. Teh pemasmur ka maka la soal uga situasi si adapina, Dibatana si perkeleng pasti lalap nggit nampati ia.​—Ms. 118:29.

4. Adi tek kita maka keleng ate Dibata kita, kebiaren kai si banci sikendaliken?

⁴ Arus kita tek maka keleng ate Jahwe kita. Adi tek kita, banci sikendaliken kebiaren enda: (1) mbiar la ngasup ncukupi keperlun keluarga, (2) mbiar man jelma, ras (3) mbiar mate. Turang senina si iceritaken bas paragrap 1 ndai, banci ngendaliken kebiarenna perban tek kalak e keleng ate Dibata man kalak e.

5. Kai saja si banci jadi kebiaren kepala keluarga? (Nen gambar sampul.)

⁵ Penting kel akap kepala keluarga Kristen tanggung jawapna guna ncukupi keperlun keluargana. (1 Tim. 5:8) Adi kam sekalak kepala keluarga, banci saja sedekah pandemi enda mbiar kam lanai kari lit dahinndu. Bicara lanai kari lit dahinndu, banci saja mbiar kam lanai kari datndu dahin si deban. Mbiar kam la kari banci berekenndu pangan ras ingan tading man keluargandu. Ntah, bali bagi Nestor ras María ndai, banci saja la kapndu kam ngasup adi sitik ngenca uang masukndu. Enggo berhasil kel Setan nggunaken kebiaren si bage gelah lanai layani kalak Jahwe.

6. Ate Setan tek kita kerna kai?

⁶ Ate Setan tek min kita maka labo keleng ate Jahwe kita ras labo sampatiNa kita ncukupi keperlun keluargata. Adi bage perukurenta, dungna sipertahanken ateta pendahinta si gundari, amin pe arus silakoken kai si erban ceda hubungenta ras Jahwe.

7. Ate Jesus tek kita kerna kai?

⁷ Jesus ngenca situhu-tuhu nandai Bapakta si i surga. Emaka bagenda nina, ‘Teh Bapakta kai keperlunta amin pe lenga sipindo.’ (Mat. 6:8) Iteh Jesus maka nggit Jahwe mereken keperlunta. Selaku kalak Kristen, kita anggota keluarga Dibata. Emaka banci kita tek pasti idalanken Jahwe, selaku Kepala Keluargata, prinsip si enggo ikatakenNa bas 1 Timotius 5:8.

8. (a) Adi mbiar kita la ngasup ncukupi keperlun keluargata, kai si banci nampati kita? (Matius 6:31-33) (b) Uga carata ngusih turang senina bas gambar si mbagiken panganna?

⁸ Adi tek kita maka keleng ate Jahwe kita bage pe keluargata, la kita ragu maka pasti berekenNa keperlunta. (Baca Matius 6:31-33.) Nggit Jahwe mereken keperlunta. Ia Dibata si perkeleng janah nggit mere. Sanga ciptakenNa doni enda, labo gelah nggeluh saja kita banNa. IdemiNa doni enda alu kai si erban meriah ukurta. (Kej. 2:9) Amin pe mon-mon bias-bias man ngenca sidat,  perlu siinget maka si e pe banci sidat perban ibereken Jahwe. (Mat. 6:11) Perlu lalap siinget maka pengorbanen kai pe si enggo siban la terbandingken ras pemere Jahwe man banta gundari bage pe bas masa depan. Enda me si dungna isadari Nestor ras María.​—Jes. 65:21, 22.

9. Kai si banci sipelajari arah Nestor ras María?

⁹ Entabeh kel pergeluh Nestor ras María bas Kolombia. Bagenda nina kalak e, “Isederhanaken kami ate kami geluh kami, janah bere kami ate kami terbuen man Jahwe. Tapi mbiar kami la kari kami ermeriah ukur adi lanai melala sen kami.” Kai si nampati kalak e ngendaliken kebiarenna? Ukuri kalak e uga Jahwe engkelengi kalak e sedekah enda. Tek kalak e maka pasti nge lalap bereken Jahwe keperlun kalak e. Emaka itadingken kalak e pendahinna si galang gajina. Dayaken kalak e rumahna, nce pindah kalak e ku ingan si merluken terbuen perberita. Uga perasan kalak e kenca banna keputusen e? Nina Nestor, “Banci gejapken kami maka tuhu kel kata-kata bas Matius 6:33. La pernah kami kurang kai pe. Gundari reh riahna kap kami ndalani geluh kami.”

10. Engkai maka enterem kalak mbiar man jelma?

¹⁰ Mbarenda nari, jelma enggo rusur ncilakai jelma. (Peng. 8:9) Contohna, lit si gunakenna kuasana ncilakai kalak si deban, lit si kejam perbahanenna, lit si nokoh-nokohi i sekolah ras gangguna teman kelasna, janah lit si kejam perbahanenna man keluargana. Emaka labo ateta mamang adi enterem kalak mbiar man jelma. Uga cara Setan nggunaken kebiaren enda?

11-12. Uga Setan nggunaken kebiaren man jelma bas nyerang kita?

¹¹ Igunaken Setan kebiarenta man jelma gelah ngadi kita erberita ras gelah lanai sipatuhi Jahwe. Perban ipengaruhi Setan, lit piga-piga pemerentah ngelarang pendahinta, ntah pe isiksana kita. (Luk. 21:12; Ket. 2:10) Bas doni si ikuasai Setan enda, melala kalak si mereken keterangen si salah kerna Saksi Jahwe janah ipitnahna kita. Kalak si tek man bual e banci saja nokohi kita, ntah pe  siksana kita. (Mat. 10:36) Sengget nge kita ngidah cara Setan e? Sitik pe lang, perban mulai abad pertama pe enggo gunaken Setan cara e bas nyerang umat Dibata.​—Perb. 5:27, 28, 40.

¹² Labo tentangen arah pemerentah ngenca senjata si igunaken Setan. Contohna, piga-piga kalak biaren ia ngadapi tanggapen keluargana asangken isiksa. Keleng kel ate kalak e keluargana. Atena tandai keluargana min Jahwe ras keleng min ate kalak e Ia. Sedih kel akap kalak e sanga begina ranan keluargana si la ngergai Dibata si benar ras umatNa. Memang, lit ka nge kalak si nentang si dungna nggit ngaloken kebenaren. Tapi adi lanai anggap keluargata kita keluargana, uga tanggapenta?

13. Engkai maka perlu siukuri kekelengen Jahwe sanga lit tentangen arah keluargata? (Masmur 27:10)

¹³ Baca Masmur 27:10. Pasti malem kel pusuhta sanga sibaca ayat e. Adi siinget maka keleng kel ate Jahwe kita, pasti la kita mbiar ngadapi tentangen arah keluargata. Tek kita maka pasti iupahi Jahwe kita adi tetap kita setia. Ibereken Jahwe kari kerina keperlunta, sampatiNa kita gelah tenang, tetap ermeriah ukur, janah tetap rembak ras Ia. Jahwe banci iandalken, lebihen asangken ise pe. Bage me si igejapken Biniam si iceritaken ndai.

14. Kai si banci sipelajari arah pengalamen Biniam?

¹⁴ Tek Biniam maka keleng ate Jahwe ia. Enda nampati ia ngendaliken kebiarenna man jelma. Amin pe tehna banci saja ia isiksa, nggit ia jadi Saksi Jahwe. Bagenda nina, “Ndauh parahen penyiksan si terjadi asangken si kubayangken. Amin pe bage, biaren denga aku ngadapi tentangen arah keluargaku. Mbiar aku keputusenku jadi Saksi Jahwe erban kecewa bapakku janah lanai kari aku ergai keluargaku.” Tapi tek Biniam maka Jahwe lalap nampati kalak si keleng ateNa. Nina Biniam, “Kuukuri kerna kalak si deban si enggo isampati Jahwe sanga kalak e ngadapi masalah ekonomi, perbahanen si la adil, bage pe kejahaten. Kuteh maka adi tetap aku setia man Jahwe, pasti pasu-pasuNa aku. Sanga rusur aku itahan ras isiksa, banci kugejapken  maka lalap aku isampati Jahwe adi tetap aku setia.” Jahwe tuhu-tuhu jadi sekalak Bapak man Biniam, janah umat Jahwe jadi keluarga man bana.

15. Engkai maka wajar adi mbiar kita mate?

¹⁵ Bas Pustaka, kematen ikataken musuh. (1 Kor. 15:25, 26) Banci saja kuatir kita sanga sibayangken kematen. Apai ka adi kita ntah pe keluargata sangana mekelek penakitna. Perasan si bage wajar nge. Engkai? Perban sanga ciptaken Jahwe kita, banNa sura-sura bas pusuhta guna nggeluh rasa lalap. (Peng. 3:11) Tapi situhuna, lit ka nge gunana adi mbiar kita mate. Contohna, e banci nampati kita milih pangan si sehat, rajin olahraga, ertambar, janah sipedauh kai pe si erban geluhta bahaya.

16. Uga cara Setan nggunaken kebiarenta man kematen?

¹⁶ Iteh Setan maka meherga siakap geluhta. Ituduhna maka kai pe nggit kita ngorbankenca, termasuk hubungenta ras Jahwe gelah banci kita tetap nggeluh. (Jop 2:4, 5) Sitik pe la tuhu tuduhenna e! Tapi perban Setan “banci erban manusia mate,” usahakenna nggunaken kebiarenta man kematen erban kita nadingken Jahwe. (Heb. 2:14, 15) Mon-mon, kalak si ipengaruhi Setan ngancam kita. Bunuhna atena kita adi tetap kita setia man Jahwe. Banci ka gunaken Setan masalah kesehaten erban kita lanai setia. Misalna, dokter ntah pe keluargata si la Saksi banci saja maksa kita ngaloken transfusi dareh, padahal e ngelanggar undang-undang Dibata. Banci ka lit si ngajak kita ngaloken pertambar si la sesuai ras prinsip-prinsip Pustaka.

17. Engkai maka la perlu kita mbiar mate? (Roma 8:37-39)

¹⁷ Memang labo ateta mate. Tapi amin pe kita mate, tetap nge keleng ate Jahwe kita. (Baca Roma 8:37-39.) Amin pe teman-teman Jahwe enggo mate, tetap ingetNa kalak e. AnggapNa kalak e nggeluh denga. (Luk. 20:37, 38) Tedeh ateNa kalak e janah merhat kel Ia mpekekesa. (Jop 14:15) Enggo meherga kel erga si galari Jahwe guna nebus kita gelah banci ‘sidat kegeluhen si rasa lalap.’ (Joh. 3:16) Siteh maka keleng kel ate Jahwe kita janah ermediate Ia man banta. Emaka, sanga sakit kita ntah pe terancam geluhta, la kita nggit nadingken Jahwe. Tetap sipindo man baNa pengapul, kepentaren, ras gegeh. Bage me si ilakoken Valérie ras dilakina.​—Ms. 41:3.

18. Kai si banci sipelajari arah pengalamen Valérie?

¹⁸ Kekelengen nampati Valérie ngendaliken kebiarenna man kematen. Sanga umurna 35 tahun, ikataken dokter maka penakit Valérie kanker ganas janah jarang kel penakit e lit. Bagenda nina Valérie, “Berubah kel kegeluhen kami sanga teh kami lit penakit kankerku. Arus aku operasi besar gelah banci tetap nggeluh. Kusungkuni melala ahli bedah, tapi kerina kalak e la nggit ngoperasi aku adi la make dareh. Mbiar kel aku, tapi la mungkin kualoken transfusi dareh perban e ngelanggar perentah Dibata. Segedang geluhku, enggo kugejapken maka keleng kel ate Jahwe aku. Gundari me kesempatenku mbuktiken kekelengenku man baNa. Tiap kataken dokter berita si la mehuli, reh belinna sura-suraku erban Jahwe bangga janah la kupediat  Setan si menang. Dungna, berhasil aku operasi alu la make dareh. Memang, lit denga nge masalah kesehatenku, tapi lalap bereken Jahwe kai si iperluken kami. Contohna, bas perpulungen akhir pekan, sope teh kami kerna penakitku e, lit pembahasen artikel si erjudul ‘Menghadapi Kesukaran dengan Tabah.’ * Artikel enda tuhu-tuhu nampati kami. Rusur kel baca kami artikel e. Artikel-artikel si bage ras kegiaten rohani, erban dame pusuh kami. Banci kami tetap seimbang janah banci ban kami keputusen si mehuli.”

19. Kai si terjadi ntisik nari?

¹⁹ Alu penampat Jahwe, enterem kalak Kristen i belang-belang doni ngasup ngadapi situasi si sulit ras ngelawan Iblis. (1 Pet. 5:8, 9) Kam pe banci bage. Ntisik nari isuruh Jahwe me Jesus ras si 144.000 “guna engkernepken pendahin Iblis.” (1 Joh. 3:8) Kenca si e, umat Dibata si lit i doni ‘lanai pagi mbiar nandangi kai pe janah la lit si erban kalak e nggirgir.’ (Jes. 54:14; Mi. 4:4) Sope si e terjadi, perlu denga kita erjuang ngendaliken kebiarenta.

20. Kai si banci nampati kita ngendaliken kebiarenta?

²⁰ Arus terus sipepaguh kinitekenta maka keleng ate Jahwe umatNa janah lindungiNa kita. Carana eme siukuri ras sicakapken uga mbarenda Jahwe ngelindungi umatNa. Banci ka siukuri uga Jahwe enggo nampati kita ngadapi masalah si mberat. Pasti banci sikendaliken kebiarenta alu penampat Jahwe!​—Ms. 34:4.