ENTEREM kalak meteh maka Jesus ihukum mate bas tiang radu ras dua kalak penjahat. (Mat. 27:35-38) Tapi, lit kang kalak si la tek man kai si ikataken Pustaka kerna mayat Jesus si isikapken guna ikuburken janah itamaken bas kuburen.​—Mrk. 15:42-46.

Lit piga-piga pakar si la tek man kai si itulis bas Injil. La akap kalak e mungkin penjahat si ihukum mate ikuburken bas kuburen bagi si debanna. Bas majalah Smithsonian, bagenda nina sekalak wartawan si gelarna Ariel Sabar, “Penjahat si isalibken biasana eme kalak si jahat kel ras la erguna. Selain si e, lit piga-piga ahli si ngataken maka la mungkin pediat kalak Roma kalak si bage ikuburken bagi kalak si biasana.” Ate kalak Roma gelah mela kel akap penjahat e. Emaka mayatna biasana pediat kalak e bas tiang, gelah ipangani binatang-binatang liar. Kenca si e, ibenterken ku kuburen massal.

Tapi menurut penemuan arkeologi, labo bage iban man kerina kalak Jahudi si ihukum mate. Bas tahun 1968, idat me tulan-tulan sekalak dilaki si ihukum mate bas abad pertama. Tulan-tulan e idat bas perkuburen keluarga kalak Jahudi, i deher Jerusalem. Tulan-tulan e lit bas osuari, ntah pe kotak ingan nimpan tulan-tulan. I je lit sada tulan tumit si enggo leket ku kayu janah lit paku si masuk ku tulan e. Paku e gedangna 11,5 sentimeter. Nina Ariel, “Tulan tumit e eme tulan sekalak dilaki si gelarna Yehokhanan. Tulan e ndukung keterangen bas Injil kerna Jesus si ikuburken.” Nina ka, “Tulan tumit Yehokhanan e jadi bukti maka bas jaman Jesus banci saja ipediat kalak Roma nge kalak Jahudi si ihukum mate bas tiang, ikuburken bagi biasana.”

Arah penemuan e, erbage-bage pendapat kalak kerna uga posisi Jesus ipakuken bas tiang. Tapi jelas siidah arah penemuan e, lit kalak jahat si ihukum mate ikuburken bagi biasana, labo ibenterken saja ku kuburen massal. Jelas me, banci kita tek man kai si ikataken Pustaka kerna mayat Jesus si ikuburken. Lit bukti-bukti si ndukung kai si ikataken Pustaka.

Si pentingna, enggo inubuatken Jahwe maka Jesus ikuburken bas kuburen kalak bayak, janah Kata Dibata lalap terjadi. La lit si banci ngambatisa.​—Jes. 53:9; 55:11.