SANGA kalak Heber bas Negri Perjanjin, awal tahun imulai bas musim mbajak ras nuan eme kira-kira bulan September/​Oktober.

Mbarenda, asa dekahna sada bulan itentuken arah perputaren bulan si dekahna 29 ntah pe 30 wari. Asa dekahna sada tahun, itentuken arah perputaren matawari. Tapi perban tahun si iban menurut perputaren bulan gendeken asangken tahun si iban menurut perputaren matawari, perlu darami kalak e carana gelah duana sesuai. Contohna, tambahi kalak e piga-piga wari bas tiap tahun. Ntah pe, tambahi kalak e sada bulan bas tahun-tahun tertentu. Bulan tambahen e, biasana iban bas pendungi tahun e. Alu bage, bas tiap tahun lalap seri bulanna musim nuan ras musim rani.

Bas jaman Musa, ikataken Jahwe man kalak Israel maka bulan si pertama eme bulan Abip ntah pe Nisan, kira-kira bulan Maret/April. (Kel. 12:2; 13:4) Bas bulan Nisan, lit perayan kalak Israel. Bas perayan e, arus persembahken kalak e buah barli si pertama man Jahwe.​—Kel. 23:15, 16.

Lit sekalak pakar si ngataken maka “nukah nge nentuken bas tahun si apai perlu itambahken sada bulan.” Katakenna ka maka “Paskah arus ilakoken sanga bulan purnama eme bas bulan Nisan (14 Nisan). Tapi Paskah pe arus ilakoken kenca ekuinoks vernal (titik musim semi) eme sanga suari ras berngi seri dekahna. Adi lit akap kalak e kemungkinenna Paskah terjadi sope musim semi, tambahi kalak e sada bulan [bulan si pe-13-ken] sope bulan Nisan.”

Cara e me si igunaken Saksi Jahwe bas nentuken tanggal Peringet-ingeten Kematen Jesus. Acara e ilakoken tanggal 14 Nisan menurut kalender kalak Heber, eme bas musim semi (kira-kira bulan Maret/April). Sope seh tanggal e, enggo iumumken man runggun-runggun i sebelang doni. *

Tapi uga carana kalak Heber nentuken ndigan sada bulan imulai ntah pe ndigan dung? Gundari, tading sinen kalenderta ntah pe perangkat elektronikta. Tapi bas jaman Pustaka, labo bage kel nukahna.

Bas jaman Nuah, sada bulan dekahna 30 wari. (Kej. 7:11, 24; 8:3, 4) Tapi kenca si e, bas kalender kalak Heber, sada bulan lenga tentu 30 wari. Bas kalender kalak e, tanggal 1 bas bulan e eme sanga tangtangna teridah bulan sabit. E terjadi 29 wari ntah pe 30 wari kenca wari si pertama bas bulan sebelumna.

Daud ras Jonatan pe pernah cakapkenna kerna bulan si mbaru. Nina kalak e, “Pagi kap perayan bulan baru.” (1 Sam. 20:5, 18) Emaka, banci saja, bas jaman kalak e, perpindahen bulan enggo ikira sebelumna. Uga cara kalak Israel nentuken pergantin bulan? Keterangen kerna si e lit bas Misnah eme kumpulen undang-undang kalak Jahudi si la tertulis bage pe kebiasanna. Menurut Misnah, kenca kalak Jahudi mulih arah pembuangen Babilon nari, Sanhedrin (Pengadilen Agama Jahudi) terlibat bas nentuken ndigan bulan si mbaru imulai. Bas sada tahun, lit pitu bulan si lit perayanna. Bas bulan-bulan e, rapat kalak e pagi-pagi si lampas bas wari si pe-30-ken. Uga cara kalak e nentuken katawari imulai bulan si mbaru?

Lit piga-piga dilaki si isuruh ku bukit-bukit i sekeliling Jerusalem guna ngenen langit sanga berngi wari. Sanga mulai idah kalak e bulan sabit, mis laporken kalak e ku Pengadilen Agama Jahudi. Adi enggo bias akap Pengadilen Agama Jahudi laporen si alokenna, iumumken kalak e maka imulai me bulan si mbaru. Uga adi mekapal kel embun ntah pe asap si erban bulan la banci teridah? Iumumken me maka bulan e 30 wari  dekahna, janah paginna maka imulai bulan si mbaru.

Guna ngumumken maka bulan si mbaru enggo imulai, iban kalak e api bas puncak Gunung Saitun, si lit i deher Jerusalem. Bas ingan-ingan si deban si meganjangna pe, i belang-belang Israel, iban api gelah teh kalak kerna si e. Dungna, sanga cara e lanai ipake, lit kalak si itugasken guna mpeseh berita maka bulan si mbaru enggo imulai. Emaka, kalak Jahudi si i Jerusalem, i belang-belang Israel, bage pe bas ingan-ingan si debanna banci tehna maka bulan si mbaru enggo imulai. Alu bage, banci kalak e radu ngelakoken perayan.

Tabel enda banci nampati kam ngangkai bulan-bulan, perayan, bage pe musim bas jaman kalak Heber.