Guna erban meriah ukur Jahwe, arus kita erkiniteken. Tapi bas Pustaka ikataken maka “kiniteken labo lit bas kerina kalak.” (2 Tes. 3:2) Kata-kata Paulus e tujunna man “kalak si kejam ras kalak si jahat” si nganiaya ia. Tapi kata-kata e pe berlaku ka man jelma si deban. Lit kalak si la tek maka Dibata e lit amin pe enggo idahna bukti-bukti si jelas. (Rom. 1:20) Lit ka kalak si ngataken maka tek ia man Dibata. Tapi terjeng tek saja man Dibata labo bias guna erban meriah ukurNa.

Arus kita tek maka Jahwe e lit janah “upahiNa” kalak si tek man baNa. (Heb. 11:6) Kiniteken eme sipat si ihasilken kesah si badia. Gelah banci sidat kesah si badia arus sipindo arah toto. (Luk. 11:​9, 10, 13) Selain si e, penting ka sibaca Pustaka perban kalak si nulis Pustaka itegu-tegu kesah si badia. Kenca si e, siukuri kai si enggo sibaca janah sidalanken kai si enggo sipelajari. Adi bage siban, sipediat kesah si badia nampati kita ndatken kiniteken si erban meriah ukur Dibata.