Aku lahir tanggal 22 Desember 1929, i Noville, kuta si kitik i deher Bastogne, i Belgia Ardennes. Lit siwah peternaken bas kuta kami. Sanga aku anak-anak, meriah kuakap nampati orang tuaku bas peternaken. Aku ras adekku Raymond, tiap wari mereh susu lembu janah ikut ka kami nampati bas juma. Bas kuta kami e, kerina kalak nggit sisampat-sampaten.

Orang tuaku eme Emile ras Alice, agamana Katolik. Tiap wari Minggu reh kalak e ku acara Misa. Tapi kira-kira tahun 1939, reh perintis arah Inggris nari ku kuta kami janah tawarkenna man bapakku majalah Consolation (gundari majalah Perdiatekenlah!). Mis iteh bapakku e kebenaren janah mulai bacana Pustaka. Lanai ia reh ku acara Misa, emaka tetangga kami si gelgel e mekacar, itentangna bapak. Ipaksa kalak e bapak gelah tetap eragama Katolik, emaka rusur kel kalak e erdebat.

Sedih kel aku ngidah bapakku itentang. Emaka, ertoto aku man Dibata gelah sampatiNa bapakku, bagi si kuturiken bas awal artikel enda. Meriah kel ukurku perban dungna ngadi tetangga kami nentang bapakku. Enda erban aku tek maka Jahwe eme “Si Megiken toto.”

Tanggal 10 Mei 1940, iserang Nazi Jerman me Belgia. Akibatna, enterem kalak si arus melariken diri arah negara e termasuk keluarga kami. Kiam keluarga kami ku bagin selatan Prancis. Bas perdalanen, mon-mon adapi kami situasi si bahaya perban tentera Jerman ras Prancis sangana erperang.

 Dungna, mulih kami ku peternaken kami, tapi enggo hampir kerina erta kami ijarah. Biang kami si gelarna Bobbie ngenca si tading ngalo-ngalo kami. Pengalamen e erban aku tersungkun-sungkun, ‘Engkai maka lit perang ras melala kesusahen?’

Bas masa-masa perang e, reh Turang Senina Emile Schrantz a mpegegehi kami. Ia sekalak pertua ras perintis si setia. Jelas kel iturikenna arah Pustaka engkai maka kita susah janah ijawapna ka penungkunenku si deban kerna kegeluhen. Emaka, reh rembakna aku ras Jahwe janah tek aku Ia Dibata si perkeleng.

Amin pe perang e lenga dung, keluarga kami banci jumpa bage pe ergaul ras turang senina. Bulan Agustus 1943, Turang Senina José-Nicolas Minet ndahi peternaken kami guna erkhotbah. Nungkun ia, “Ise si nggit iperidiken?” Angkat tan aku ras bapak. Iperidiken me kami bas sungai deher peternaken kami.

Bulan Desember 1944, bas Perang Doni II, tentera Jerman erban serangen si terakhir ku Eropa bagin barat. Serangen e igelari Pertempuran Bulge. Kami tading ndeher ku daerah perang e, janah lit kira-kira sada bulan kami tading bas ruangen si lit i teruh taneh. Bas sada wari, sanga kubere man asuh-asuhen kami, lit sada peluru si isina bahan peledak itembakken ku daerah peternaken kami. Hancur banna atap gudang kami. Sekalak tentera Amerika si sangana ndeher i je, serko nina, “Tiarap!” Kiam aku janah tiarap aku i deherna. Itamana helmna ku takalku guna ngelindungi aku.

Kenca dung perang e, iaturken kami gelah banci terus komunikasi ras turang senina bas runggun i Liège, kira-kira 90 kilometer ku sebelah utara. Dungna, banci ban kami kelompok si kitik guna erlajar i Bastogne. Mulai aku erdahin i kantor pajak, janah lit kesempatenku erlajar bagin hukum. Dungna, erdahin aku bas kantor pemerentahen.  Bas tahun 1951, iaturken kami sada kebaktin wilayah si kitik i Bastogne. Hadirinna lit kira-kira 100 kalak. Termasuk me i je Elly Reuter. Ia perintis si semangat, ersepeda ia 50 kilometer dauhna guna reh ku acara kebaktin e. Mis kami singenan janah dungna tunangen kami. Lit dat Elly undangen guna ikut ku Sekolah Gilead i Amerika Serikat. Emaka, itulis Elly surat ku kantor pusat janah jelaskenna engkai maka la ia banci ikut bas sekolah e. Paksa si e, Turang Senina Knorr si ertanggung jawap bas organisasi. Balasna surat Elly janah katakenna maka bas sada wari pagi banci saja Elly ras dilakina ikut Sekolah Gilead. Erjabu me kami bas bulan Februari 1953.

Bas tahun e ka, Elly ras aku ikut bas Kebaktian Masyarakat Dunia Baru si iban bas Yankee Stadium, New York. I je jumpa aku ras sekalak turang senina si nawarken dahin si mejile man bangku. Ajakna kami pindah ku Amerika Serikat. Kenca totoken kami kerna si e man Jahwe, itulak kami tawaren e janah mulih kami ku Belgia guna ndukung kelompok si kitik i Bastogne. I je lit kira-kira sepuluh perberita. Setahun kenca si e, meriah kel ukur kami perban lahir anak kami dilaki si gelarna Serge. Tapi, sedih kel kami perban pitu bulan kenca si e sakit Serge janah dungna mate. Ituriken kami uga getemna pusuh kami man Jahwe janah terpegegehi me kami perban arapen kekeken.

Bulan Oktober 1961, kudat me dahin paruh waktu, emaka banci kari aku merintis. Tapi bas wari e ka, kudat telepon arah hamba cabang i Belgia. Isungkunna aku nggit ntah lang aku ngelayani jadi hamba wilayah (gundari igelari pertua keliling). Ningku ngaloi, “Banci nge jadi perintis kami lebe sope ngaloken tugas enda?” Isetujui me pemindonku e. Kenca ngelayani kami jadi perintis waluh bulan dekahna, bulan September 1962 mulai me kami ngelayani bas dahin keliling.

Kenca dua tahun kami bas dahin keliling, iundang kami ngelayani bas Betel i Brussels. Mulai kami ngelayani i je bas bulan Oktober 1964. Melala kel dat kami pasu-pasu bas tugas si mbaru enda. La ndekah kenca ikunjungi Turang Senina Knorr Betel kami tahun 1965, sengget kel aku perban ilantik jadi hamba cabang. Dungna, iundang aku ras ndeharaku ikut Sekolah Gilead kelas 41. Kata-kata Turang Senina Knorr 13 tahun si lewat, enggo terjadi gundari. Kenca wisuda kami, mulih kami ku Betel Belgia.

Ertahun-tahun dekahna kudat kesempaten nggunaken pemetehku bas bagin hukum guna nampati umat Jahwe. Kusampati kalak e gelah bebas beribadah bas Eropa bage pe negara si debanna. (Pil. 1:7) Perban tugas e, banci kuhubungi pejabat bas lebih 55 negara  si ngelarang pendahinta. Kupetandaken diriku selaku “pelayan Dibata,” labo kuturiken pengalamenku bas bagin hukum. Rusur kudarami petunjuk Jahwe arah toto, perban kuteh “pusuh sekalak raja [hakim] bali bagi lau si maler bas tan Jahwe. Ia si nentuken ku ja ateNa permalerna.”—Kua. 21:1.

Lit sada pengalamen si la terlupaken aku sanga ngerana aku ras anggota Parlemen Eropa. Enggo rusur kupindo waktuna gelah banci kami ngerana, janah dungna nggit ia. Nina, “Kubereken kam waktu lima menit, la banci lebih sada menit pe.” Mungkuk aku janah ertoto aku. Nungkun anggota parlemen e kai si kulakoken. Ningku ngaloi, “Ngata bujur aku man Dibata perban kam salah sada pelayanNa.” Nungkun ia, “Kai maksudndu?” Kucidahken man bana Roma 13:4. Agamana Protestan, emaka tehna Pustaka janah ergaina isina. Dungna, ngerana kami setengah jam dekahna janah lancar kel perjumpan kami e. Ikatakenna ka maka ergaina pendahin Saksi-Saksi Jahwe.

Ertahun-tahun dekahna, umat Jahwe erjuang mbela hakna bas erbage-bage kasus hukum i Eropa. Contohna kerna kenetralen, hak asuh anak, pajak, ras si debanna. Sada kesempaten si luar biasa kuakap banci ngidah uga Jahwe mereken kemenangen man umatNa. Enggo lebih 140 kasus si imenangken Saksi-Saksi Jahwe bas Mahkamah Eropa untuk Hak Asasi Manusia!

Sedekah tahun 1990-en, kerja sama aku ras Senina Philip Brumley arah kantor pusat, bage pe Senina Valter Farneti arah Italia. Sampati kami ate kami turang senina bas Kuba gelah banci bebas nembah Jahwe. Kutulis surat man kedutaan besar Kuba i Belgia. Kenca si e, jumpa aku ras sekalak pejabat si isuruh guna ngurus pemindon kami e. Bas perjumpan kami si pertama e, lenga banci idungi kami masalah si erban pemerentah ngelarang pendahinta.

Kenca ertoto kami man Jahwe mindo petunjuk, ipindo kami ijin guna ngirimken 5.000 Pustaka ku Kuba. Seh me Pustaka e janah banci ibagiken man turang senina. Emaka tek kami ipasu-pasu Jahwe usaha kami e. Kenca si e, pindo kami ka ijin guna ngirim 27.500 Pustaka. Pemindon kami e pe isetujui. Meriah kel ukurku perban banci kusampati turang senina i Kuba ndatken Pustaka.

Rusur kudahi Kuba guna nampati turang senina gelah banci bebas nembah Jahwe.  Perban tugas e, banci meriah aku kerja sama ras enterem pejabat pemerentah.

Bas tahun 1994, lebih sada juta kalak arah suku Tutsi si ibunuh i Rwanda. Si sedihna, piga-piga turang seninata pe terbunuh. Mis iban pengaturen gelah sada kelompok turang senina si dilaki mereken penampat man turang seninata si lit i je.

Kenca seh kelompok kami i Kigali, ibu kota Rwanda, idah kami melala lubang bekas tembaken i dingding kantor penerjemahen bage pe bas depot publikasita. Begi kami melala cerita si sedih kerna turang seninata si ibunuh alu piso. Tapi begi kami ka cerita kerna kekelengen turang seninata. Contohna, jumpa kami ras sekalak turang seninata arah suku Tutsi, si ibuniken bas lubang i teruh taneh 28 wari dekahna. Ia iurus sada keluarga arah turang seninata suku Hutu. Sedekah perjumpan i Kigali, ipegegehi kami ras iapuli kami lebih 900 turang seninata.

Kenca si e, ilewati kami perbatasen muat kami lawes ku Zaire (gundari igelari Republik Demokratik Kongo). Perban enterem turang seninata arah Rwanda si melariken diri ku ingan ngungsi i deher kota Goma, ate kami ndarami kalak e. Perban la lit idah kami kalak e, ertoto kami man Jahwe gelah banci kami jumpa ras kalak e. Kenca si e, lit sekalak jelma reh ndahi kami. Isungkun kami ia, ntah lit tehna i ja Saksi Jahwe. Nina ngaloi, “Aku kap Saksi Jahwe. Ota kutaruhken kena ku ingan Panitia Penanggulangen Bencana.” Kenca pegegehi kami panitia e, jumpai kami ka kira-kira 1.600 kalak si ngungsi. Kalak e pe ipegegehi kami ka. Bacaken kami surat arah Badan Pinpinen. Kena kel ku pusuh turang senina megi kata-kata enda: “Lalap kena totoken kami. Iteh kami labo tadingken Jahwe kena.” Payo kel kata-kata Badan Pinpinen e. Gundari, lebih 30.000 Saksi Jahwe i Rwanda!

Kenca erjabu kami hampir 58 tahun dekahna, ndehara si kukelengi, Elly, medem bas kematen tahun 2011. Kuturiken man Jahwe maka getem kel pusuhku, emaka apuliNa aku. Terapuli ka aku sanga erberita man kalak si deban.

Amin pe umurku enggo 90-en, tetap denga aku ikut erberita tiap minggu. Meriah ka ukurku nampati bas Departemen Hukum bas kantor cabang Belgia. I je, banci kuceritaken pengalamenku man kalak si deban, janah banci ka kupermakani turang senina si nguda denga bas keluarga Betel.

Kira-kira 84 tahun si lewat, i je me tangtangna aku ertoto man Jahwe. Mulai je nari terus aku reh rembakna ras Jahwe. Ngata bujur kel aku perban begiken Jahwe totoku segedang geluhku.—Ms. 66:19. b