1. Kai si nampati umat Jahwe tetap setia nembah Jahwe amin pe ngadapi melala masalah?

 IKATAKEN Pustaka maka gundari kita nggeluh bas “masa si sulit janah bahaya.” (2 Tim. 3:1) Umat Jahwe ngadapi masalah si iadapi kalak si deban perban nggeluh bas doni si ikuasai Setan enda. Selain si e, iadapi umat Jahwe ka tentangen si deban perban ngelayani Jahwe. Kai nge si banci nampati umat Jahwe? Salah sadana eme perban enggo sigejapken penampat Jahwe janah siteh maka Ia “Dibata si nggeluh.”—Jer. 10:10; 2 Tim. 1:12.

2. Kai maksudna Jahwe e Dibata si nggeluh?

² Idah Jahwe kerina tentangen si sangana siadapi janah lalap Ia nggit nampati kita. (2 Kro. 16:9; Ms. 23:4) Adi siinget Jahwe e Dibata si nggeluh, ngasup kita ngadapi tentangen kai pe. Mari siperdiateken uga Raja Daud enggo nggejapken kerna si e.

3. Kai nge maksud Daud sanga ikatakenna, “Jahwe Dibata si nggeluh”?

³ Daud tuhu-tuhu nandai Jahwe janah andalkenna Ia. Sanga Raja Saul ras kalak si deban erusaha munuh Daud, ertoto Daud mindo penampat Jahwe. (Ms. 18:6) Kenca ijawap Dibata toto Daud janah selamatkenNa ia, nina Daud, “Jahwe Dibata si nggeluh kap!” (Ms. 18:46) Kai nge maksud Daud? Menurut salah sada referensi Pustaka, kata-kata Daud e ncidahken maka tek kel Daud Jahwe e “Dibata si nggeluh si lalap nggit nampati umatNa.” Arah pengalamen Daud, itehna maka iperdiateken Dibata kerina si terjadi man bana janah lalap banci sampatiNa ia. Si e tuhu-tuhu mpegegehi Daud guna terus ngelayani Jahwe ras muji Ia.—Ms. 18:​28, 29, 49.

4. Kai saja nge gunana adi tek kita Jahwe e Dibata si nggeluh?

 ⁴ Adi tek kita maka Jahwe e Dibata si nggeluh, banci kita semangat ngelayani Ia. Ngasup kita ngadapi tentangen janah teriahken kita gelah terus kerja keras bas pelayanenta. Selain si e, ertekad kita gelah terus rembak ras Jahwe.

DIBATA SI NGGELUH PASTI MPEGEGEHI KAM

5. Kai nge si mpetetap ukurta sanga ngadapi masalah? (Pilipi 4:13)

⁵ Adi siinget Jahwe e Dibata si nggeluh janah lalap Ia nggit nampati kita, banci kita megenggeng ngadapi masalah si mbelin ntah pe si kitik. Banci sampatiNa kita ngadapi masalah kai pe perban labo lit masalah si mberatsa akapNa. Ia Dibata si Madakuasa, banci bereNa kita gegeh gelah ngasup kita megenggeng. (Baca Pilipi 4:13.) Enda tuhu-tuhu mpetetap ukurta. Adi sigejapken penampat Jahwe sanga kita ngadapi masalah si kitik, tek kita maka pasti sampatiNa kita ngadapi masalah si terbelinen.

6. Kai si terjadi man Daud sanga ia nguda denga si erban ia reh tekna man Jahwe?

⁶ Cuba perdiateken dua pengalamen Daud si erban ia reh tekna man Jahwe. Sanga ia nguda denga, dahinna permakan. Pernah reh sada beruang ras sada singa, babana biri-biri bapakna. Bas duana situasi e, pang kel Daud ngayaki binatang e janah selamatkenna biri-biri e. Tapi labo ianggap Daud maka ia berhasil perban gegehna saja. Tehna si erban ia berhasil eme perban gegeh arah Jahwe. (1 Sam. 17:​34-37) La pernah lupaken Daud pengalamenna e. Alu ngukuri si e, reh tekna ia pasti banci ibereken Dibata si nggeluh gegeh man bana bas masa depan.

7. Kai nge si iukuri Daud janah uga e nampati ia ngelawan Goliat?

⁷ Sanga umur Daud lenga seh 20 tahun, lawes ia ndahi perkemahen pasuken Israel. Idahna mbiar kel pasuken e perban raksasa Pilisti si gelarna Goliat reh ‘ngelawan pasuken Israel.’ (1 Sam. 17:​10, 11) Mbiar kel pasuken Israel perban si iperdiateken kalak e galang kel raksasa e janah rananna pe ngancam kalak e. (1 Sam. 17:​24, 25) Tapi Daud labo e si iperdiatekenna. Ianggapna ancamen Goliat e labo man pasuken Israel, tapi man “pasuken perang Dibata si nggeluh.” (1 Sam. 17:26) Si ukuri Daud eme Jahwe. Tek Daud maka Dibata si enggo nampati ia sanga jadi permakan, pasti ka banci nampati ia bas situasi e. Perban andalkenna Dibata, pang Daud ngelawan Goliat janah menang me ia.—1 Sam. 17:​45-51.

8. Kai si banci erban reh tekna kam maka pasti isampati Jahwe kam? (Nen ka gambar.)

⁸ Kita pe banci berhasil ngadapi tentangen adi siinget maka Dibata si nggeluh lalap nggit nampati kita. (Ms. 118:6) Banci kita reh tekna maka Jahwe pasti nampati kita adi siukuri kai si ilakokenNa mbarenda. Bacalah cataten Pustaka si ngingetken kita kerna uga Jahwe nelamatken umatNa. (Jes. 37:​17, 33-37) Selain si e, baca ntah pe tontonlah laporen si lit bas jw.org si nuriken uga Jahwe ndukung turang seninata bas jaman gundari. Banci ka ingetndu uga Jahwe sedekah enda enggo nampati kam. Ula kitik ukurndu amin pe la lit pengalamenndu si luar biasa bagi naluken beruang ntah pe singa. Engkai? Perban situhuna enggo  melala si ilakoken Jahwe bas geluhndu. Enggo itarikNa kam jadi temanNa. (Joh. 6:44) Selain si e, perban penampat Jahwe nge maka banci denga kam ngelayani Ia seh asa gundari. Emaka, pindolah gelah sampati Jahwe kam nginget uga Ia njawap totondu, mereken keperlunndu bas waktu si tepat, ntah pe nampati kam bas masa-masa si susah. Alu ngukuri pengalamen-pengalamen e, banci reh tekna kam maka pasti kam lalap isampati Jahwe.

9. Kai si perlu siinget sanga ngadapi tentangen? (Kuan-kuanen 27:11)

⁹ Adi siinget Jahwe e Dibata si nggeluh, banci benar perukurenta ngadapi tentangen. Engkai? Perban siukuri dungna kai si pentingna. Ikataken Setan maka sanga siadapi tentangen, pasti sitadingken Jahwe. Emaka, carata ngadapi tentangen mpengaruhi perasan Jahwe. (Jop 1:​10, 11; baca Kuan-kuanen 27:11.) Tapi adi tetap kita setia man Jahwe, sibuktiken maka keleng ateta Jahwe janah sibuktiken Setan e perbual. Banci saja bas inganndu tading, itentang pemerentah umat Jahwe. Banci saja adapindu masalah ekonomi, ntah pe kalak si lit bas inganndu la tertarik man berita si meriah, ntah adapindu masalah si debanna. Adi bage, ingetlah maka situasindu e banci jadi kesempaten guna erban meriah ukur Jahwe. Perlu ka ingetndu, labo pernah pediatNa kam ngadapi tentangen lebihen asangken si ngasup kam ngadapisa. (1 Kor. 10:13) Pasti bereNa kam gegeh gelah banci megenggeng.

DIBATA SI NGGELUH PASTI NGUPAHI KAM

10. Kai nge si ibereken Dibata si nggeluh man kalak si nembah Ia?

¹⁰ Iupahi Jahwe kalak si nembah Ia. (Heb. 11:6) IbereNa kita kedamen janah banci puas geluhta gundari. Selain si e, bas wari si pepagi banci kita nggeluh si  rasa lalap. Tek kita maka merhat Jahwe mereken upah man banta janah lit kuasaNa ngelakoken si e. Emaka, terus ateta mereken si mehulina i bas nembah Ia bagi si ilakoken umatNa mbarenda. Contohna Timotius bas abad pertama.—Heb. 6:​10-12.

11. Kai si ngiahken Timotius kerja keras bas runggun? (1 Timotius 4:10)

¹¹ Baca 1 Timotius 4:10. Tek Timotius maka pasti upahi Jahwe ia. E me si ngiahken ia kerja keras ngelayani Jahwe bage pe kalak si deban. Uga carana? Lakokenna kai si ikataken Paulus eme gelah beluh ngajar sanga bas pelayanen bage pe bas runggun. Timotius pe jadi usihen man turang senina, la soal si nguda denga ntah pe si enggo metua. Ibereken ka tugas si mesera man bana, termasuk mereken nasehat si tegas tapi perkeleng. (1 Tim. 4:​11-16; 2 Tim. 4:​1-5) Tek Timotius amin pe mon-mon la lit si ngidah kerja kerasna ntah pe si ngergai pendahinna, pasti nge upahi Jahwe ia.—Rom. 2:​6, 7.

12. Engkai maka nggit pertua-pertua terus kerja keras man turang senina? (Nen ka gambar.)

¹² Gundari pe, pertua-pertua tek maka idah Jahwe ras ergaiNa si ilakoken kalak e. Selain mpermakani, ngajar, ras erberita, melala pertua ikut bas proyek pembangunen, bage pe nampati kalak si kena bencana. Lit ka si ikut bas Kelompok Pengunjung Pasien bage pe bas Panitia Penghubung Rumah Sakit. Teh pertua maka runggun e Jahwe punana labo jelma. Emaka, kerja keras kalak e ndahiken tugas-tugasna janah tek kalak e pasti upahi Dibata kai si ilakoken kalak e.—Kol. 3:​23, 24.

13. Uga perasan Jahwe ngidah usahata ngelayani Ia?

¹³ Memang, labo kerina kita banci jadi pertua. Tapi kerina kita banci mere man  Jahwe. Meriah kel ukur Dibatata sanga silakoken si mehulina bas ngelayani Ia. PerdiatekenNa sanga sibereken sumbangen man pendahin sebelang doni amin pe labo mbue si banci sibereken. Meriah ukurNa sanga rusaha kita mere komentar bas perpulungen amin pe kita permela. Meriah ka ukurNa sanga nggit kita ngampuni kalak si erban kita tersinggung. Amin pe labo siakap mbue si banci silakoken, teklah kita maka ergai Jahwe kerina e. Keleng ateNa kam janah pasti kam upahiNa.—Luk. 21:​1-4.

TETAP REMBAK RAS DIBATA SI NGGELUH

14. Engkai maka rembak ras Jahwe banci nampati kita tetap setia? (Nen ka gambar.)

¹⁴ Adi rembak kita ras Jahwe, reh nukahna siakap tetap setia man baNa. Bage me si igejapken Jusup. La ia nggit ngelakoken perbahanen seks si salah. Teh Jusup maka perdiateken Jahwe ia, janah la atena erban Jahwe la senang. (Kej. 39:9) Gelah banci kita rembak ras Jahwe, perlu kita ertoto janah mpelajari KataNa eme Pustaka. Alu bage, hubungenta banci reh paguhna ras Ia. Adi enggo rembak kita ras Jahwe, bali bagi Jusup, la kita nggit ngelakoken kai pe si erban Jahwe la senang.—Jak. 4:8.

15. Kai si banci sipelajari arah kalak Israel sanga kalak e bas taneh mesawang? (Heber 3:12)

¹⁵ Kalak si lupa maka Jahwe e Dibata si nggeluh, nukah kel la setia man baNa. Bage me si terjadi man kalak Israel sanga kalak e bas taneh mesawang. Tek kalak e Jahwe e lit, tapi mulai kalak e ragu banci bereken Jahwe keperlun kalak e ntah lang. Nina kalak e, “Tuhu nge lit Jahwe ras kita ntah lang?” (Kel. 17:​2, 7) Dungna, mberontak kalak e man Dibata. Pasti la kita nggit bagi kalak e.—Baca Heber 3:12.

16. Kai si banci nguji kinitekenta?

¹⁶ Doni enda banci erban mesera siakap  rembak ras Jahwe. Melala kalak si la tek Dibata e lit. Rusur siidah, kalak si bage entabeh pergeluhna. Sanga siidah kerna si e, kinitekenta banci iuji. Memang tek nge kita Dibata e lit. Tapi banci saja mulai kita ragu, nggit nge Ia nampati kita ntah lang. Penulis Masmur 73 pernah bage gejapkenna. Idahna kalak si la matuhi undang-undang Dibata, entabeh pergeluhna. Akibatna, mulai ia ragu lit denga nge gunana ngelayani Dibata ntah lang.—Ms. 73:​11-13.

17. Kai si banci nampati kita tetap rembak ras Jahwe?

¹⁷ Kai si erban berubah perukuren penulis masmur? Ukurina kai si dungna terjadi man kalak si la tek man Jahwe. (Ms. 73:​18, 19, 27) Ukurina ka kai saja manpaatna ngelayani Dibata. (Ms. 73:24) Kita pe banci siukuri pasu-pasu si enggo bereken Jahwe man banta. Ukuri ka uga min ndai kegeluhenta adi la silayani Jahwe. Alu bage, banci kita tetap setia janah bagi penulis masmur, sikataken, “Erguna kel kuakap reh deherna ras Dibata.”—Ms. 73:28.

18. Engkai maka la perlu kita mbiar ngadapi wari si pepagi?

¹⁸ Ngasup kita ngadapi tentangen kai pe bas wari-wari pendungi enda perban kita “budak Dibata si nggeluh ras benar.” (1 Tes. 1:9) Iperdiateken Dibata kita janah lalap sampatiNa kita. Mbarenda iperdiateken Dibata umatNa, gundari pe bage. Ntisik nari, siadapi me kiniseran si mbelin. Tapi, labo kita sisada. Jahwe lit ras kita. (Jes. 41:10) Mbera-mbera kerina kita “jadi pang janah sikataken, ‘Jahwe kap si nampati aku, emaka labo aku mbiar.’”—Heb. 13:​5, 6.