Iergai Jahwe Kata “Amin” si Ibelasken Kita
IERGAI Jahwe kerina si nggo silakoken i bas nembah Ia. ‘Idengkehken ras ibegiNa’ umatNa, janah iperdiatekenNa kerina usahata guna muji Ia amin pe sitik ngenca si banci silakoken. (Mal. 3:16) Contohna kata si mungkin nggo rusur sibelasken eme “amin.” Aminna pe gendek kata e, meherga nge iakap Jahwe? Meherga. Gelah siteh alasenna, mari sibahas erti kata “amin” janah uga kata e igunaken bas Pustaka.
“KERINA BANGSA E NGALOISA, ‘AMIN!’”
Kata “amin” ertina “terjadilah bage” ntah pe “pasti.” Kata e rehna arah kata dasar bahasa Heber si ertina “setia” ntah pe “terteki.” Mon-mon kata e ipake bas persoalen hukum. Kenca sekalak jelma ersumpah, ikatakenna “amin” guna mbuktiken maka kai si ikatakenna e benar janah nggit ia ngaloken kerina akibatna. (Bil. 5:22, Terjemahan Dunia Baru) Perban nggo ikatakenna “amin” i lebe-lebe jelma si nterem, pasti lebih tersuruh ukurna nepati janjina e.—Neh. 5:13.
Contoh si luar biasa i bas nggunaken kata “amin” lit bas Ulangen pasal 27. Kenca bangsa Israel masuk ku Taneh Perjanjin, arus kalak e pulung i kelang-kelang Deleng Ebal ras Deleng Gerisim guna megiken undang-undang Dibata ibacaken. Tapi, selain megiken undang-undang e, arus ka ikataken kalak e maka nggit ia matuhisa. Arus ikatakenna “Amin!” tiap kenca ibegina kai si banci terjadi adi la kalak e patuh. (Ul. 27:15-26) Bayangkenlah sora jutan dilaki, diberu, bage pe anak-anak si njawap alu semangat! (Jos. 8:30-35) Pasti la terlupaken kalak e kai si ikatakenna bas wari e. Janah itepati bangsa Israel janjina, sebap nina Pustaka, “Kidekah geluh Josua, bangsa Israel nembah man [Jahwe]. Janah kenca ia mate pe tetap denga kalak Israel nembah man [baNa], kidekah nggeluh denga peminpin-peminpin si enggo naksiken kerina si enggo ibahan [Jahwe] man Israel.”—Jos. 24:31.
Jesus pe nggunaken kata “amin” guna mperjelas maka kai si ikatakenna e benar. Tapi beda carana nggunakenca. Labo ibelaskenna “amin” kenca kalak si deban ngerana. Tapi ibelaskenna kata e sope ia ngerana (bas bahasa Karo iterjemahken jadi “situhuna”). Mon-mon dua kali ibelaskenna kata e, nina “amin amin” (“tuhu-tuhu kel”). (Mat. 5:18; Joh. 1:51) Alu bage, ipetetapna ukur kalak si megiken ia maka kai si ikatakenna e kebenaren si pasti. Tetap kel ukur Jesus ngatakenca perban nggo ibereken man bana kuasa erban kerina janji Dibata terjadi.—2 Kor. 1:20; Ket. 3:14.
“KERINA PERPULUNGEN NGATAKENCA ‘AMIN’ JENARI IPUJINA [JAHWE]”
Bangsa Israel pe ngataken “amin” sanga muji Jahwe janah ertoto man baNa. (Neh. 8:6; Msm. 41:14) Kenca ipeseh sada pertoton, kalak si megikenca ngataken “amin” guna ncidahken maka setuju ia man kai si ikataken bas toto e. Emaka, kalak e kerina banci ikut muat bagin janah reh riahna akapna acara rohani e. E me si terjadi bas perayan si iban kenca ibaba Raja Daud Peti Perjanjin ku Jerusalem. Bas perayan e, ertoto Daud alu bulat ukur arah sada lagu si icatat bas 1 Kronika 16:8-36. Kata-katana e kena kel ku pusuh kerina si reh emaka “kerina perpulungen ngatakenca ‘Amin’ jenari ipujina [Jahwe].” Jelas me, meriah kel ukur kalak e banci ras-ras nembah Jahwe.
Kalak Kristen bas abad pertama pe nggunaken kata “amin” sanga muji Jahwe. Kalak si nulisken Pustaka pe rusur nggunaken kata e bas suratna. (Rom. 1:25; 16:27; 1 Pet. 4:11) Bas buku Ketangkasen iceritaken kerna malekat-malekat si imuliakenna Jahwe alu ngataken, “Amin! Haleluyah!” (Ket. 19:1, 4) Kalak Kristen bas abad pertama biasana ngataken “amin” kenca dung ertoto bas perpulungen. (1 Kor. 14:16) Tapi labo asal iulih-ulihi kalak e saja kata e.
ENGKAI MAKA KATA “AMIN” E PENTING
Kenca siteh uga umat Dibata mbarenda nggunaken kata “amin,” banci siteh ngkai maka penting kel mbelasken kata e kenca dung ertoto. Adi sibelasken “amin” bas pendungi totota, sibuktiken maka tutus ateta ertoto. Janah adi sikataken “amin” alu ersora ntah pe i bas pusuh saja kenca dung kalak si deban ertoto, sibuktiken maka setuju kita man kai si ipeseh bas toto e. Perdiateken ka alasen si deban ngkai maka “amin” si ibelasken kita e penting.
Gelah tuhu-tuhu siperdiateken sanga lit si ertoto, perban e termasuk bas nembah Jahwe. Sisembah Jahwe labo saja alu ngataken “amin,” tapi teridah ka arah uga perbahanenta sanga ertoto. Perban bas pusuhta nari ateta ngataken “amin,” sibegikenlah pertoton e alu tutus.
Ersada kita selaku umat Jahwe. Sanga lit si ertoto bas perpulungen, kerina anggota runggun ipersada perban seri toto si ibegikenna. (Perb. 1:14; 12:5) Adi radu kita ras turang seninata ngataken “amin,” reh kompakna me kita. La soal sikataken “amin” alu ersora ntah pe i bas pusuhta, e banci erban Jahwe reh nggitna mereken pemindonta.
Sipuji Jahwe alu ngataken “amin”
Sipuji Jahwe. Iperdiateken Jahwe kerina si ilakoken kita i bas nembah Ia. (Luk. 21:2, 3) ItehNa ngkai maka sisembah Ia ras kai si lit bas pusuhta. Aminna pe la banci kita reh ku perpulungen janah arah telepon ngenca kita megikenca, tek kita maka iperdiateken Jahwe nge kata “amin” si ibelasken kita. Sanga sikataken “amin,” ikut kita muji Jahwe radu ras turang seninata si reh ku perpulungen.
Kata “amin” si ibelasken kita mungkin tempa sederhana, tapi situhuna penting kel e. Ensiklopedia Pemahaman Alkitab ngataken maka “alu nggunaken sada kata enda,” banci ibuktiken umat Dibata maka kalak e “tuhu-tuhu tek, setuju, janah paguh kel arapen si lit bas pusuhna.” Mbera kata “amin” si ibelasken kita erban meriah ukur Jahwe.—Msm. 19:15.
