1. Kai salah sada sipat Jesus si kena kel ku pusuhta? Jelasken.

BANCI iangkai Jesus masalah si iadapi manusia si la sempurna. Sipat Jesus e kena kel ku pusuhta. Sanga i doni, Jesus ‘ermeriah ukur ras kalak si ermeriah ukur janah tangis ras kalak si tangis.’ (Rom. 12:15) Misalna, sanga mulih 70 muridna alu ermeriah ukur perban nggo berhasil kalak e erberita, “meriah kel akap Jesus.” (Luk. 10:17-21) Tapi, sanga idah Jesus erceda ate kel kalak perban mate Lasarus, “megogo janah ceda kel atena.”​—Joh. 11:33.

2. Engkai maka banci icidahken Jesus sipat sepenggejapen?

² Amin gia Jesus sempurna, mekuah atena janah mehuli ia man manusia si erdosa. Engkai maka banci ia bage? Alasen si pentingna eme perban keleng atena manusia. Bagi si ikataken bas artikel sebelumna, ‘jadi kel atena manusia.’ (Kua. 8:31, Terjemahan Dunia Baru) Perban keleng atena manusia, iusahakenna ngangkai cara rukur kalak e. Nina Rasul Johanes, “Iteh Jesus nge isi pusuh manusia.” (Joh. 2:25) Banci igejapken kalak si ijumpai Jesus maka Jesus e perkuah ate janah perkeleng kel. Emaka nggit kalak e megiken berita si meriah si ipesehna. Adi terus siusahaken jadi kalak si perkuah ate bagi Jesus, banci kita lebih berhasil i bas nampati kalak sanga erberita.​—2 Tim. 4:5.

3-4. (a) Adi sepenggejapen kita, uga nge perasanta kerna dahin erberita? (b) Kai nge si man bahasenta?

³ Iteh Rasul Paulus maka wajip ia erberita, janah kita pe bage. (1 Kor. 9:16) Tapi, adi sepenggejapen kita, labo kewajipen saja siakap erberita e. Nggit kita erberita perban ermediate kita man kalak janah sisampati ateta kalak e. Siteh maka “riahen kap i bas mere asangken i bas ngalo.” (Perb. 20:35) Adi terus siinget ayat e, reh riahna siakap i bas erberita.

 ⁴ Bas artikel enda, sibahas kari uga carana ncidahken sipat sepenggejapen bas pelayanenta. Si pertama, sibahas uga perasan Jesus nandangi kalak si deban janah kai si banci sipelajari arah ia. Kenca si e, sibahas empat cara i bas ngusih Jesus.​—1 Pet. 2:21.

5-6. (a) Man ise nge icidahken Jesus sipat sepenggejapen? (b) Bagi si inubuatken bas Jesaya 61:1, 2, ngkai maka mekuah ate Jesus man jelma si nterem janah erberita ia man kalak e?

⁵ Mari sibahas uga Jesus ncidahken sipat sepenggejapen. Bas sada waktu, latih kel iakap Jesus bage pe murid-muridna perban mbaru denga kalak e dung erberita janah la sempat istirahat. ‘Man pe la kalak e sempat.’ Emaka iajak Jesus murid-muridna ‘ngadi kentisik.’ Lawes kalak e ku “ingan si melungen guna nerapken bana.” Tapi, sanga idah jelma si nterem kalak e lawes ku je, kiam jelma si nterem e janah leben kalak e seh i je. Seh kenca Jesus i je janah idahna jelma si nterem e, uga perasanna janah kai si ilakokenna? “Mekuah atena * nandangi kalak e, erkiteken kalak e bagi biri-biri si la lit permakanna. Emaka mulai ia ngajar janah melala si iajarkenna.”​—Mrk. 6:30-34.

⁶ Perdiateken ngkai maka mekuah ate Jesus ntah pe sepenggejapen ia ras kalak e. Idahna kalak e “bagi biri-biri si la lit permakanna.” Banci saja iteh Jesus maka piga-piga arah kalak e mesera pergeluhna janah arus kerja keras guna mere man keluargana. Ntah pe banci saja lit si ceda kel atena perban mate kalak si ikelengina. Adi bage keadan kalak e, banci saja iteh Jesus perasan kalak e. Bagi si nggo ibahas bas artikel sebelumna, Jesus pe banci jadi pernah ngadapi kerina masalah e. Iperdiatekenna perasan kalak janah tersuruh ukurna ngapuli kalak e alu mberitaken berita si meriah.​—Baca Jesaya 61:1, 2.

7. Uga kita banci ngusih Jesus?

 ⁷ Kai si banci sipelajari arah Jesus? Bali bagi kalak i sekeliling Jesus, kalak i sekelilingta pe “bagi biri-biri si la lit permakanna.” Erjuang kalak e ngadapi erbage masalah, janah si iperluken kalak e lit bas kita, eme berita si meriah kerna Kerajan Dibata. (Ket. 14:6) Emaka siusih Tuanta alu mberitaken berita si meriah perban ‘keleng ateta kalak si la ergegeh dingen musil.’ (Msm. 72:13) Perban mekuah ateta man kalak, tersuruh ukurta nampati kalak e.

8. Kai salah sada cara gelah sepenggejapen kita bas pelayanenta? Ceritaken contohna.

⁸ Uga carana gelah banci kita sepenggejapen sanga erberita? Perlu sibayangken kai si iukuri ras si igejapken kalak si ijumpai kita. Kenca si e, sibanlah man kalak e bali bagi uga ateta iban kalak man banta sanga siadapi keadan si iadapi kalak e. * (Mat. 7:12) Mari sibahas empat cara ngelakokenca. Si pertama, ukurilah kai si iperluken tiap kalak. Sanga erberita, bali kita bagi dokter. Sekalak dokter si mehuli iukurina kai si iperluken tiap pasienna. Isungkunna uga keadan kalak e janah ibegikenna alu tutus sanga ijelasken pasienna kai si igejapkenna. Labo mis ibereken dokter e tambar si cocok iakapna, tapi ipereksana lebe terdauhen gejala tiap pasienna gelah banci iberekenna tambar si pas. Bage ka pe, labo seri carata mbenaken percakapen ras tiap kalak sanga kita erberita. Siusahaken ngangkai keadan ras pendapat tiap kalak.

9. Kai si la banci silakoken, janah kai si perlu silakoken?

⁹ Sanga jumpa ras sekalak jelma bas erberita, ula min siakap nggo siteh uga keadan kalak e, kai si itekina, bage pe uga maka bage kinitekenna. (Kua. 18:13) Banlah penungkunen gelah siteh uga keadan kalak e ras kai si itekina. (Kua. 20:5) Adi cocok bas daerahndu, sungkunilah kerna pendahinna, keluargana, uga latar belakangna, ras pendapatna. Adi siban penungkunen, banci siteh kai si tuhu-tuhu iperluken kalak e. Kenca bage, banci kita sepenggejapen janah sisampati ia bagi si ilakoken Jesus.​—Bandingken ras 1 Korinti 9:19-23.

10-11. Bagi si ikataken bas 2 Korinti 4:7, 8, kai cara si peduaken gelah banci sicidahken sipat sepenggejapen? Ceritaken contohna.

¹⁰ Si peduaken, bayangkenlah uga pergeluh kalak e. Perban kita la sempurna, kita pe ngadapi erbage masalah. Emaka sitik buena banci siangkai keadan kalak e. (1 Kor. 10:13) Siteh maka mesera kel kegeluhen bas jamanta gundari.  Penampat Jahwe ngenca si erban kita ngasup ndalanisa. (Baca 2 Korinti 4:7, 8.) Tapi ukurilah kalak si la erteman ras Jahwe. Arus sisada kalak e erjuang ngadapi doni enda. Bagi Jesus, mekuah ateta man kalak e, janah tersuruh ukurta guna mberitaken “berita si mehuli.”​—Jes. 52:7.

¹¹ Enda me si igejapken sekalak turang seninata si gelarna Sergey. Sope erlajar kebenaren, persinik janah permela kel ia. Mesera akapna ngerana ras kalak si deban. Bas pudi wari, nggit ia erlajar Pustaka. Nina, “Arah Pustaka, kuteh maka kalak Kristen arus nceritaken kinitekenna man kalak si deban. Kuakap kel mbarenda ngasa ndigan pe labo aku banci ngelakokenca.” Tapi, iukurina kalak si lenga ndatken kebenaren. Isadarina maka pasti mesera kel kegeluhen kalak e perban lenga nandai Jahwe. Nina ka, “Kai si mbaru kupelajari erban meriah kel ukurku janah dame pusuhku. Kuteh maka kalak si deban pe perlu ndatken kebenaren enda.” Perban nggo lebih iangkai Sergey perasan kalak, dungna reh pangna ia erberita. Nina Sergey, “Kepeken, perban kuceritaken man kalak kerna Pustaka, dungna jadi lebih percaya diri aku. Reh tekna ka aku man kai si nggo kupelajari.” *

12-13. Engkai maka perlu kita sabar man kalak si iajari kita? Ceritaken perumpamanna.

¹² Si peteluken, sabarlah man kalak si iajarindu. Adi kita nggo siteh kebenaren arah Pustaka. Tapi kalak si deban banci saja lenga pernah pe ibegina. Selain si e, nterem kalak si tek kel ia nandangi kai si nggo itekina sedekah enda. Banci saja penting kel e iakapna janah banci erban ia ndeher ras keluargana, teman-temanna, janah banci ikut bas adat. Uga carata nampati kalak e?

¹³ Ukuri perumpaman enda: Kai nge si perlu ilakoken adi lit jembaten si nggo ndekah, ceda, janah perlu iganti? Biasana, sanga ibangun jembaten si mbaru, jembaten si ndekah e tetap denga  ipake. Kenca jembaten si mbaru e nggo dung, iruntuhken me jembaten si ndekah. Bage ka pe, la banci sisuruh gelah mis itadingken kalak kinitekenna si “ndekah” si merga kel iakapna. Tangtangna mungkin perlu sisampati lebe ia gelah tuhu-tuhu iergaina ajaren si “mbaru,” eme ajaren Pustaka si mbaru denga itehna. Kenca bage me maka nggo banci tadingkenna kinitekenna si mbarenda. Mon-mon perlu waktu guna nampati kalak erban perubahen e.​—Rom. 12:2.

14-15. Uga carana nampati kalak gelah iangkaina ajaren kerna kegeluhen si rasa lalap bas pardis i doni? Ceritaken contohna.

¹⁴ Adi sabar kita bas pelayanen, la siarapken gelah mis iangkai kalak ntah pe mis ialokenna kebenaren arah Pustaka sanga tangtangna kel e ibegina. Tapi, perban siangkai perasan kalak, teriahken kita guna nampati ia gelah manjar-anjar iukurina ajaren Pustaka. Misalna, uga kita banci nampati kalak gelah iangkaina maka lit arapenta nggeluh rasa lalap bas pardis i doni? Enterem jelma la itehna ajaren enda. Banci saja tek kalak e adi nggo mate sekalak jelma, lanai bo banci ia nggeluh mulihi. Entah, banci saja tek kalak e kerina kalak mehuli lawes pagi ku surga. Uga carana nampati kalak e?

¹⁵ Iceritaken sekalak turang seninata cara si sedekah enda nggo berhasil ipakena. Pertama, ibacakenna Kejadin 1:28. Kenca si e, isungkunna si mada jabu, “I ja nge ate Dibata manusia nggeluh, janah bas keadan si uga?” Enterem jelma ngataken, “I doni, janah meriah ate Dibata geluh kalak e.” Kenca bage ibacaken turang seninata e Jesaya 55:11 janah isungkunna berubah ntah lang sura-sura Dibata. Biasana nina si mada jabu, “Lang.” Dung e maka ibacaken turang seninata e Masmur 37:10, 11 janah isungkunna uga nge masa depan manusia. Alu cara enda, nggo isampatina piga-piga kalak ngangkai maka tetap denga ate Dibata kalak mehuli nggeluh rasa lalap bas Pardis i doni.

16-17. Menurut Kuan-kuanen 3:27, kai saja si banci silakoken bukti siperdiateken kalak si deban? Ceritaken contohna.

¹⁶ Si peempatken, ukurilah kai saja si banci ilakokenndu bukti iperdiatekenndu kalak e. Misalna, uga adi reh kita bas waktu si kurang cocok iakap si mada jabu? Banci kita mindo maaf janah sikataken maka reh ka kita mulihi bas waktu si cocok. Uga adi si mada jabu e perlu penampat guna ngelakoken piga-piga dahin? Entah, uga adi la banci ia ndarat rumah nari janah perlu ia penampat guna ngurus piga-piga hal? Bas keadan si bage, mungkin banci sisampati kalak e.​—Baca Kuan-kuanen 3:27.

¹⁷ Sada perbahanen si mehuli, amin gia biasa saja, banci erguna kel. E me  si igejapken sekalak turang seninata si diberu. Mekuah atena man keluarga si mbaru denga mate anakna. Anakna e mbaru lahir. Emaka itulisna surat man keluarga e. Bas surat e itulisna piga-piga ayat si mereken pengapul. Uga tanggapen keluarga e? Itulis mamak bayi e, “Nderbih getem kel pusuhku, tapi surat e tuhu-tuhu mpegegehi kami. Kuergai kel suratndu e. Terapuli kel kami mbacasa. Nderbih nggo lebih 20 kali kubaca surat e. La kusangka isi surat e tuhu-tuhu mehuli, perkeleng, ras mpegegehi kami. Tuhu-tuhu ngata bujur kel kami.” Adi siusahaken ngangkai masalah kalak janah sidarami cara guna nampatisa, banci ka sidat hasil si mehuli bagi si ndai.

18. Menurut 1 Korinti 3:6, 7, kai si perlu siinget kerna baginta bas pelayanen, janah ngkai?

¹⁸ I bas pelayanen, ikut kita muat bagin bas nampati kalak erlajar kerna Dibata. Tapi, perlu siinget bagin Jahwe me si pentingna. (Baca 1 Korinti 3:6, 7.) Ia me si narik kalak man baNa. (Joh. 6:44) Dungna, si nentuken nggit ntah lang sekalak jelma ngaloken berita si meriah eme uga keadan pusuhna. (Mat. 13:4-8) Ingetlah nterem si la nggit ngaloken berita si meriah si ipeseh Jesus, padahal ia Guru si mehulina! Emaka situhuna, la perlu kitik ukurta adi nterem kalak la nggit megiken kita aminna pe nggo siusahaken nampati ia.

19. Kai gunana adi sepenggejapen kita bas pelayanenta?

¹⁹ Melala sidat gunana adi sepenggejapen kita bas pelayanenta. Reh riahna siakap pelayanenta. Reh riahna ka ukurta perban kita nggo mere. Janah kalak si “pusuh ras perbahanenna ngaloken kebenaren guna kegeluhen si rasa lalap” banci reh nukahna iakapna ngaloken berita si meriah. (Perb. 13:48) Emaka “sanga lit denga kesempaten, lakokenlah kai si mehuli man kerina kalak.” (Gal. 6:10) Alu bage, meriah me ukurta perban banci simuliaken Bapakta si i surga.​—Mat. 5:16.