1. Kai saja nge si perlu ilakoken sope mbangun rumah?

CUBA bayangkenndu, lit kalak si atena mbangun rumah. Enggo itehna rumah si uga si atena ibangunna. Mis nge ia lawes ku toko bangunen guna nukur bahan-bahan si iperlukenna, kenca si e ibangunna rumah e? Pasti lang. Sope lenga ibangunna, arus ikirana lebe asa kai nge biayana. Engkai maka e penting? Perban perlu ipastikenna lebe bias ntah lang senna guna mbangun rumah e ngayak dung. Adi nggo ikirana kerina biayana, mbelin kemungkinenna banci idungina rumahna e.

2. Menurut Lukas 14:27-30, kai si perlu tuhu-tuhu iukurindu sope lenga iperidiken?

² Perban keleng atendu Jahwe janah ngata bujur kam man kerina si nggo ilakokenNa bandu, banci saja tersuruh ukurndu iperidiken. Tapi ope lenga kam iperidiken, kai si perlu ilakokenndu? Perlu ikirandu lebe biayana, bali bagi kalak si atena mbangun rumah ndai. Engkai? Cuba perdiatekenndu kata-kata Jesus si icatat bas Lukas 14:27-30. (Baca.) I je, ibahas Jesus kerna kai si perlu silakoken gelah banci jadi muridna. Arus kita siap nanggung “biayana.” Maksudna, arus kita siap ngadapi masalah ntah pe erban pengorbanen. (Luk. 9:23-26; 12:51-53) Emaka sope kam iperidiken, arus tuhu-tuhu iukurindu kai saja pagi si iadapindu adi nggo jadi murid Kristus kam. Alu bage, adi nggo iperidiken kam, reh siapna me kam ngelayani Dibata.

3. Kai si man bahasenta bas artikel enda?

³ Pasu-pasu si idatndu perban jadi murid Jesus ndauh buen asangken si nggo ikorbankenndu. Adi kam nggo iperidiken, banci mbue datndu pasu-pasu, gundari bage pe bas wari si pepagi. Bas artikel enda, sibahas kari piga-piga penungkunen si penting kerna iperidiken. Alu bage, banci itehndu nggo nge kam siap iperidiken ntah lang.

4. (a) Kai ertina mbaktiken diri man Jahwe? (b) Kai ertina ‘lanai banci kam nggeluh man dirindu sendiri’ bagi si ikataken bas Matius 16:24?

⁴ Kai ertina pembaktin? Ope iperidiken arus lebe ibaktikenndu dirindu man Jahwe. Uga carana? I bas toto, katakenlah man Jahwe alu bulat ukur maka gunakenndu atendu geluhndu guna ngelayani Ia seh rasa lalap. Sanga ibaktikenndu dirindu man Dibata, ‘lanai banci kam nggeluh man dirindu sendiri.’ (Baca Matius 16:24.) Ikatakenndu man Jahwe maka mulai bas wari e, si pentingna man bandu eme ngelayani Ia, labo kesenangenndu sendiri. Janah enda sada kehamaten si mbelin perban kam nggo jadi jang Jahwe. (Rom. 14:8) Pembaktin e sada janji si serius man Jahwe. La pernah ipaksa Jahwe kita erban janji si bage. Tapi adi kita nggo erjanji, ate Jahwe sitepati min janjita e.​—Msm. 116:12, 14.

5. Kai bedana pembaktin ras iperidiken?

⁵ Kai hubungen pembaktin ras iperidiken? Sanga baktikenndu dirindu man Jahwe, ise pe la metehsa. Tapi sanga kam iperidiken, e ilakoken i lebe-lebe jelma si nterem, biasana bas kebaktin. Sanga kam iperidiken, icidahkenndu man jelma si nterem maka nggo ibaktikenndu dirindu man Jahwe. * Iteh kalak me maka ikelengindu Jahwe alu kerina kegeluhenndu, pusuhndu, perukurenndu, ras gegehndu.​—Mrk. 12:30.

6-7. Menurut 1 Petrus 3:18-22, kai alasenna maka iperidiken e penting?

⁶ Perlu nge iperidiken? Cuba ukurindu kata-kata si lit bas 1 Petrus 3:18-22. (Baca.) Bahtra si iban Nuah jadi bukti maka erkiniteken Nuah man Dibata. Bage ka pe sanga kam iperidiken, ibuktikenndu maka nggo ibaktikenndu dirindu man Jahwe. Tapi tuhu-tuhu nge perlu iperidiken? Perlu. Ikataken Rasul Petrus alasenna. Si pertama, iperidiken erban kam ‘selamat.’ Iperidiken banci erban kita selamat adi nggo sibuktiken kita erkiniteken man Jesus, tek kita maka ia mate guna kita, ipekeke guna nggeluh i surga, janah gundari ia nggo “i sebelah kanan Dibata.”

⁷ Si peduaken, iperidiken erban ‘bersih pusuh peratenta.’ Kenca sibaktiken dirita ras iperidiken, hubungenta ras Dibata jadi istimewa. Perban nggo tuhu-tuhu kita ertobat janah erkiniteken man korban tebusen, iampuni Dibata me dosa-dosata. E me si erbanca ‘bersih pusuh peratenta’ i lebe-lebe Dibata.

8. Kai arusna alasen si pentingna si erban kam merhat iperidiken?

⁸ Kai arusna alasen si pentingna si erban kam merhat iperidiken? Kenca ipelajarindu Pustaka, dungna melala tehndu kerna Jahwe, misalna, kerna sipat-sipatNa ras caraNa rukur. Kerina si ipelajarindu e kena kel ku pusuhndu janah erban keleng kel atendu Jahwe. Kekelengen e me si arusna jadi alasen si pentingna si erban kam merhat iperidiken.

9. Kai maksudna iperidiken i bas gelar Bapa ras Anak ras kesah si badia bagi si ikataken Matius 28:19, 20?

⁹ Alasen si deban si erban kam merhat iperidiken eme perban nggo tek kam man kai si ipelajarindu bas Pustaka nari. Cuba perdiatekenndu kai si ikataken Jesus sanga iperentahkenna kita erban murid. (Baca Matius 28:19, 20.) Menurut Jesus, kalak si iperidiken arus iperidiken “i bas gelar Bapa ras Anak ras kesah si badia.” Kai maksudna? Arus kam tuhu-tuhu tek nandangi kebenaren si iajarken Pustaka kerna Jahwe, Jesus, ras kesah si badia. Kerina kebenaren e mbelin kel kuasana janah banci kena ku pusuhndu. (Heb. 4:12) Mari sibahas piga-piga kebenaren e.

10-11. Kai saja kebenaren kerna Bapakta Jahwe si nggo ipelajarindu ras itekindu?

 ¹⁰ Cuba ukuri mulihi sanga itehndu kebenaren-kebenaren kerna Bapakta: gelarNa eme “Jahwe,” Ia “Si Meganjangna i belang-belang doni,” janah ‘Ia kap ngenca Dibata.’ (Msm. 83:18, Terjemahan Dunia Baru; Jes. 37:16) Ia si mereken kegeluhen ras si nelamatken kita. (Msm. 3:9; 36:10) Enggo ibanNa pengaturen gelah banci kita ibebasken arah dosa ras kematen, janah ibereNa ka kita arapen gelah nggeluh si rasa lalap. (Joh. 17:3) Kenca ibaktikenndu dirindu man Jahwe ras iperidiken, kam jadi sekalak Saksi Jahwe. (Jes. 43:10-12) Kam jadi bagin keluarga si nembah Jahwe si lit i belang-belang doni, si megah iakapna make gelar Jahwe ras mberitaken gelar e.​—Msm. 86:12.

¹¹ Pasti ngata bujur kel kita perban siangkai kai si iajarken Pustaka kerna Bapakta Jahwe. Sada kehamaten kel enda banta! Adi tek kam man kerina kebenaren e, pasti tersuruh ukurndu mbaktiken diri man Jahwe.

12-13. Kai saja kebenaren kerna Anak Dibata si nggo ipelajarindu ras itekindu?

¹² Uga perasanndu sanga itehndu kebenaren-kebenaren kerna Jesus? Misalna, Jesus me si mbelinna kenca Jahwe bas alam semesta enda. Ia si nebus kita. Nggit ia mereken geluhna guna kita. Adi erkiniteken kita man korban tebusen Jesus janah sibuktiken arah perbahanenta, iampuni me dosa-dosata. Selain si e, banci kita erteman ras Dibata janah dungna banci nggeluh si rasa lalap. (Joh. 3:16) Jesus e Imam si Mbelin. Perban penampatna, korban tebusen e banci erguna man banta janah erban kita rembak ras Dibata. (Heb. 4:15; 7:24, 25) Jesus e Raja bas Kerajan Dibata. Erkelangken Jesus, ipebadiaken Jahwe me gelarNa, ikernepkenNa kari kerina si jahat, janah iberekenNa pasu-pasu seh rasa lalap bas Pardis. (Mat. 6:9, 10; Ket. 11:15) Jesus e usihen si arus siusih. (1 Pet. 2:21) Igunakenna kegeluhenna guna ngelakoken peraten Dibata, janah siusih ateta ia.​—Joh. 4:34.

¹³ Kenca tek kam man kai si iajarken Pustaka kerna Jesus, pasti keleng atendu Anak Dibata e. Kekelengen e erban kam nggit ngusih Jesus alu nggunaken kegeluhenndu guna ngelakoken peraten Dibata. Erkiteken si e, tersuruh ukurndu mbaktiken kegeluhenndu man Jahwe janah iperidiken.

14-15. Kai saja kebenaren kerna kesah si badia si nggo ipelajarindu ras itekindu?

¹⁴ Uga nge perasanndu sanga itehndu kebenaren-kebenaren kerna kesah si badia? Misalna, kesah si badia e labo dibata tapi gegeh Dibata. Igunaken Jahwe kesah si badia e guna nampati piga-piga dilaki i bas nulisken isi Pustaka. Kesah si badia pe nampati kita ngangkai isi Pustaka janah ndalankenca. (Joh. 14:26; 2 Pet. 1:21) Ibereken Jahwe kesah si badia man banta gelah lit ‘kengasupen si luar biasa’ bas dirita. (2 Kor. 4:7) Kesah si badia e erban kita ngasup erberita, nulak godan, ngadapi situasi si erban kitik ukurta, janah ngadapi situasi si sulit. Kesah si badia pe nampati kita ncidahken sipat-sipat si mehuli, “sipat-sipat si ihasilken kesah si badia.” (Gal. 5:22) Pasti ibereken Dibata kesah si badia man ise pe si tutus atena mindosa bage pe man kalak si erkiniteken man baNa.​—Luk. 11:13.

¹⁵ Kerina umat Jahwe banci tek maka pasti isampati kesah si badia kalak e guna terus setia man Jahwe. E mpegegehi kalak e kel. Kenca kam tek man kerina kebenaren si nggo ipelajarindu kerna kesah si badia, pasti tersuruh ukurndu mbaktiken geluhndu man Jahwe ras iperidiken.

16. Kai saja si nggo sibahas?

 ¹⁶ Keputusenndu guna mbaktiken diri man Jahwe ras iperidiken eme keputusen si seh kel pentingna. Bagi si nggo sibahas, arus kam siap ngadapi kesuliten kai pe ras erban pengorbanen. Tapi, pasu-pasu si ialokenndu pagi, ndauh belinen asangken kerina si nggo ikorbankenndu. Adi kam iperidiken, banci kam selamat janah bersih pusuh peratenndu i lebe-lebe Dibata. Alasen si penting si erban kam nggit iperidiken eme kekelengenndu man Jahwe. Arus ka kam tuhu-tuhu tek man kebenaren si nggo ipelajarindu kerna Bapak, Anak, ras kesah si badia. Arah kai si nggo sibahas ndai kerina, nggo nge akapndu kam siap iperidiken?

17. Sope iperidiken, kai si perlu ilakokenndu?

¹⁷ Adi nggo siap akapndu kam iperidiken, pasti nggo melala si ilakokenndu gelah banci kam rembak ras Jahwe. * Kai saja si nggo ilakokenndu? Kenca ratur kam erlajar Pustaka, nggo melala itehndu kerna Jahwe ras Jesus. Enggo paguh kinitekenndu. (Heb. 11:6) Tuhu-tuhu tek kam man janji-janji Jahwe si lit bas Pustaka, janah tek kam maka kinitekenndu man korban tebusen Jesus banci nelamatken kam arah dosa ras kematen nari. Enggo ertobat kam arah dosa-dosandu janah lanai ilakokenndu kai si salah. Menyesal kel kam janah mindo ampun kam man Jahwe. Enggo iubahndu kegeluhenndu. Lanai ilakokenndu kerina si la mehuli si pernah ilakokenndu, janah gundari ilakokenndu kerina si erban meriah ukur Dibata. (Perb. 3:19) Merhat kel kam nceritaken kai si nggo ipelajarindu man kalak si deban. Enggo ncukupi syarat kam jadi perberita si lenga iperidiken janah nggo ikut kam erberita ras runggun. (Mat. 24:14) Megah kel iakap Jahwe ngidah kai si ilakokenndu e. Meriah kel ukurNa banndu.​—Kua. 27:11.

18. Kai ka si banci ilakokenndu sope iperidiken?

¹⁸ Sope kam banci iperidiken, lit piga-piga si perlu ilakokenndu. Bagi si nggo sibahas, arus ibaktikenndu dirindu man Jahwe. Ertotolah kam alu bulat ukur man Jahwe. Bas toto e, erjanjilah kam man Jahwe maka igunakenndu atendu kegeluhenndu guna ngelakoken peratenNa. (1 Pet. 4:2) Kenca si e, kataken sura-surandu guna iperidiken man koordinator badan pertua. Ibanna kari pengaturen gelah piga-piga pertua banci jumpa ras kam. La perlu kam mbiar jumpa ras kalak e. Kalak enda mehuli, pasti nggo itandaina kam janah keleng atena kam. Ibahas kalak e kari ras kam ajaren-ajaren dasar Pustaka si nggo ipelajarindu. Ipastiken kalak e atena maka nggo iangkaindu ajaren-ajaren dasar e janah nggo itehndu uga seriusna pembaktin ras iperidiken e. Adi nggo banci iakap kalak e kam iperidiken,  ikatakenna me man bandu maka banci kam iperidiken bas kebaktin si reh.

19-20. Kenca iperidiken, kai si perlu ilakokenndu janah uga carana?

¹⁹ Kenca kam iperidiken, kai nge si perlu ilakokenndu? * Teruslah inget maka pembaktinndu e sada janji, janah ate Jahwe itepatindu janjindu e. Emaka, kenca kam iperidiken, arus ibuktikenndu maka nggo tuhu-tuhu ibaktikenndu geluhndu man Jahwe. Uga carana?

²⁰ Teruslah kam rembak ras turang senina bas runggun. Perban kam kalak Kristen si nggo iperidiken, kam bagin arah “teman si sada kiniteken.” (1 Pet. 2:17) Turang senina bas runggun e keluarga rohanindu. Teruslah kam reh ku perpulungen gelah reh rembakna kam ras kalak e. Perlu ka ibacandu ras iukurindu Kata Dibata tiap wari. (Msm. 1:1, 2) Dung kenca ibacandu Pustaka, banlah waktundu ngukuri alu mbages kai si ibacandu e. Hasilna, kena me ku pusuhndu Kata Dibata e. Selain si e “teruslah ertoto.” (Mat. 26:41) Adi tutus atendu ertoto, reh rembakna me kam ras Jahwe. Janah “teruslah pelebe Kerajan.” (Mat. 6:33) Banlah dahin erberita e si pentingna bas geluhndu. Alu ratur erberita, banci ijagandu kinitekenndu tetap paguh, janah banci isampatindu kalak si deban ndatken kegeluhen si rasa lalap.​—1 Tim. 4:16.

21. Kenca iperidiken, uga nge kari kegeluhen si inanamindu?

²¹ Keputusen guna mbaktiken diri ras iperidiken eme keputusen si mbelinna si pernah ibanndu bas geluhndu. Memang, iadapindu nge kari situasi si sulit. Tapi pasu-pasu si ialokenndu ndauh kari buen. Situasi sulit kai pe si iadapindu “menahang janah kentisik ngenca.” (2 Kor. 4:17) Tapi kenca kam iperidiken, banci puas iakapndu gundari janah bas masa depan datndu “kegeluhen situhu-tuhu.” (1 Tim. 6:19) Emaka ertotolah kam man Jahwe janah ukurindulah manjar-anjar penungkunen enda, “Enggo nge aku siap iperidiken?”