ARTIKEL PELAJAREN 10
Kekelengen man Jahwe Erban Tersuruh Ukurndu Iperidiken
“Engkai aku la iperidiken saja?”—PERB. 8:36.
LAGU 37 Bulat Ukur Layani Jahwe
SI IBAHAS *
1-2. Menurut Perbahanen Rasul-Rasul 8:27-31, 35-38, ngkai maka pejabat Etiopia e nggit iperidiken?
NGGIT nge kam iperidiken gelah jadi murid Kristus? Enterem si nggit iperidiken perban keleng atena Jahwe, janah ngata bujur kel ia nandangi kerina si mehuli si nggo ilakoken Jahwe man bana. Contohna eme sekalak pejabat si erdahin man ratu Etiopia.
2 Sanga ibegi pejabat Etiopia e penjelasen arah Kitap si Badia, mis atena iperidiken. (Baca Perbahanen Rasul-Rasul 8:27-31, 35-38.) Engkai? Sanga ijumpai Pilipus pejabat e, ia sangana bas perdalanen naik gereta kuda arah Jerusalem ku Etiopia. Paksa si e, ibacana kitap Nabi Jesaya. Pasti iergaina kel Kata Dibata. Kenca ibegina penjelasen Pilipus, ngata bujur kel pejabat e perban kai si nggo ilakoken Jesus man bana. Selain si e, pasti keleng atena Jahwe. Engkai maka banci sikataken bage? Perban mbaru denga ia mulih arah Jerusalem guna nembah Jahwe. Enggo itadingkenna agama si ikutkenna kitik-kitik nari, janah isembahna Dibata si benar radu ras bangsa si ipilih Dibata. Emaka, kekelengenna man Jahwe me si erbanca tersuruh ukurna ngelakoken kai si seh kel pentingna, eme iperidiken ras jadi murid Kristus.—Mat. 28:19.
3. Kai saja nge si erbanca maka lit kalak si lenga iperidiken? (Nen kotak “ Bagi Taneh si Apai nge Pusuhndu?”)
3 Kam pe banci tersuruh ukurndu iperidiken adi keleng atendu Jahwe. Tapi banci saja lit si ngambati kam gelah la iperidiken. Mari sibahas piga-piga contohna. Banci saja keleng kel atendu keluargandu ras teman-temanndu, janah mbiar kam adi iperidiken kam kari, segat ate kalak e man bandu. (Mat. 10:37) Ntah banci saja meriah denga akapndu ngelakoken kebiasan-kebiasan si ciga ate Dibata janah mesera kapndu nadingkenca. (Msm. 97:10) Ntah, banci saja kam ipebelin bas keluarga si ngerayaken wari raya agama palsu. Banci saja meriah akapndu nginget kenangen-kenangen sanga ngerayakenca mbarenda. Perban si e, banci saja mesera akapndu nadingken perayan-perayan si la ngena ate Jahwe. (1 Kor. 10:20, 21) Emaka perlu sisungkuni banta, “I bas pusuhku, kai ntah ise nge kuakap si pentingna?”
ALASEN SI PENTINGNA
4. Kai nge alasen si pentingna maka tersuruh ukurta iperidiken?
4 Ope denga kam erlajar ras Saksi-Saksi Jahwe, banci saja nggo iergaindu Pustaka janah keleng atendu Jesus. Tapi gundari pengerganndu man Pustaka bage pe kekelengenndu man Jesus nggo reh bagesna. Selain si e, banci saja meriah kapndu erteman ras Saksi-Saksi Jahwe. Pasti keleng atendu janah meherga akapndu si e kerina. Tapi, kerina e banci saja lenga tentu erban kam nggit mereken geluhndu man Jahwe janah iperidiken. Alasen si pentingna si erban tersuruh ukurndu iperidiken eme perban keleng atendu Jahwe. Adi keleng atendu Jahwe lebihen asangken kai pe, pasti la ipediatndu kai pe ntah ise pe ngambati kam ngelayani Ia. Kekelengenndu man Jahwe me si erban tersuruh ukurndu iperidiken, janah kekelengen e ka si jadi pagar si njaga kam gelah tetap setia man Jahwe kenca iperidiken.
5. Penungkunen kai saja si man bahasenta?
5 Nina Jesus arus sikelengi Jahwe alu kerina kegeluhenta, pusuhta, perukurenta, ras gegehta. (Mrk. 12:30) Kai saja si perlu ilakokenndu gelah bage belinna kekelengenndu ras pengerganndu man Jahwe? Adi ukurindu uga belinna kekelengen Jahwe man bandu, pasti kam pe nggit ngkelengi Ia. (1 Joh. 4:19) Adi nggo keleng atendu Jahwe, kai si pasti igejapkenndu ras ilakokenndu? *
6. Menurut Roma 1:20, kai salah sada carana gelah banci kam erlajar kerna Jahwe?
6 Pelajarilah kerna Jahwe arah ciptanNa. (Baca Roma 1:20; Ket. 4:11) Ukurilah kepentaren Jahwe si teridah arah caraNa nciptaken sinuan-sinuan ras binatang. Pelajari ka kerna uga luar biasana manusia iciptaken. (Msm. 139:14) Selain si e, ukuri ka uga hebatna matawari, salah sada arah miliaren bintang. * (Jes. 40:26) Adi ukurindu kerina e, reh bagesna pengerganndu man Jahwe. Tapi meteh kerna kepentaren Jahwe ras kuasaNa saja lenga bias. Gelah banci kam rembak ras Jahwe, perlu pelajarindu terbuen kerna Ia.
7. Gelah banci keleng kel atendu Jahwe, arus kam tek nandangi kai?
7 Arus kam tek maka ermediate kel Jahwe bandu. Mungkin nge iakapndu Jahwe, Si Nciptaken alam semesta enda nggit mperdiateken kam? Adi la kapndu mungkin, ingetlah maka Jahwe “labo ndauh i bas kita nari sekalak-sekalak.” (Perb. 17:26-28) “Itandai Dibata kerina perukuren ras sura-suranta,” janah erjanji Ia man bandu bagi si ikataken Daud man Salomo, “Adi idahindu Ia, ijumpaiNa kam.” (1 Kro. 28:9) Janah situhuna, banci kam erlajar Pustaka gundari perban “itarik” Jahwe kam. (Joh. 6:44) Kenca iangkaindu kerina si nggo ilakoken Jahwe bandu, pasti reh kelengna atendu Ia.
8. Uga carana kita ngata bujur man Jahwe perban nggo keleng ateNa kita?
8 Uga carata ngata bujur man Jahwe perban nggo keleng ateNa kita? Salah sada carana eme alu ertoto man baNa. Sanga iturikenndu kai saja si erbanca kam kuatir janah ikatakenndu bujur man kerina si nggo ilakokenNa, reh kelengna atendu Ia. Janah reh rembakna kam ras Jahwe sanga igejapkenndu ijawapNa pertotonndu. (Msm. 116:1) Banci kam tuhu-tuhu tek maka iangkai Jahwe kam. Tapi gelah banci kam reh rembakna ras Jahwe, arus iangkaindu caraNa rukur. Arus ka itehndu kai saja ateNa si ilakokenndu. Sada ngenca carana eme mpelajari Pustaka.
Cara si mehulina gelah banci rembak ras Jahwe janah siteh kai peratenNa eme alu erlajar Pustaka (Nen paragrap 9) *
9. Kai buktina iergaindu Pustaka?
9 Usahakenndulah gelah reh bagesna pengerganndu man Pustaka. I bas Pustaka ngenca lit kebenaren kerna Jahwe bage pe kerna peratenNa. Kai buktina maka iergaindu Pustaka? Bacalah Pustaka tiap wari, persiapenlah kam lebe sope erlajar Pustaka ras si ngajari kam, janah dalankenlah kai si nggo ipelajarindu. (Msm. 119:97, 99; Joh. 17:17) Lit nge jadwalndu mbaca Pustaka? Ikutkenndu nge jadwal e janah bacandu Pustaka tiap wari?
10. Kai salah sada si erbanca maka istimewa kel Pustaka e?
10 Pustaka e buku si seh kel istimewana. Engkai? Salah sada alasenna eme perban bas Pustaka lit tulisen ras laporen arah kalak si pernah ngidah Jesus. Bas Pustaka ngenca lit penjelasen si tepat kerna kai si nggo ilakoken Jesus man bandu. Adi ipelajarindu kai si ikataken ras si ilakoken Jesus, pasti merhat kam erteman ras ia.
11. Kai si arus silakoken gelah reh kelengna ateta Jahwe?
11 Usahakenlah gelah keleng atendu Jesus, alu bage reh kelengna atendu Jahwe. Engkai? Perban iusih Jesus sipat-sipat Bapakna alu sempurna. (Joh. 14:9) Emaka adi terus ipelajarindu kerna Jesus, reh jelasna iangkaindu cara rukur Jahwe janah merhat kam rembak ras Ia. Cuba ukurindu, mekuah kel ate Jesus man kalak si ianggap rendah eme kalak mesera, sakit, ntah pe lemah. Selain si e, ukuri ka nasehat si ibereken Jesus guna kegeluhenta tiap wari ras kai gunana man bandu perban ndalankenca.—Mat. 5:1-11; 7:24-27.
12. Adi terus ipelajarindu kerna Jesus, tersuruh ukurndu ngelakoken kai?
12 Reh kelengna atendu Jesus adi iukurindu pengorbanen si nggo ibanna gelah dosata banci iampuni. (Mat. 20:28) Sanga itehndu nggit Jesus mate man bandu, tersuruh ukurndu ertobat janah iusahakenndu gelah iampuni Jahwe. (Perb. 3:19, 20; 1 Joh. 1:9) Adi reh kelengna atendu Jesus ras Jahwe, pasti merhat kam ersada ras kalak si keleng ka atena Jesus ras Jahwe.
13. Kai si nggo ibereken Jahwe man bandu?
13 Usahakenlah ngkelengi kalak si ngkelengi Jahwe. Banci saja la iangkai keluargandu ras teman-temanndu si la nandai Jahwe ngkai maka nggit kam mereken geluhndu man Jahwe. Banci jadi, itentangna ka kam. Tapi, pasti isampati Jahwe kam. IberekenNa turang senina bas runggun jadi keluargandu. Adi tetap kam rembak ras kalak e, pasti keleng ate kalak e kam janah isampatina kam. (Mrk. 10:29, 30; Heb. 10:24, 25) Dungna, banci saja lit pagi keluargandu si ikut ngelayani Jahwe janah patuh man perentahNa.—1 Pet. 2:12.
14. Menurut 1 Johanes 5:3, uga perasanndu kerna perentah Jahwe?
14 Usahakenlah ngergai ras ndalanken perentah Jahwe. Sope itandaindu Jahwe, banci saja kam sendiri si nentukenca kai si benar ras si salah iakapndu. Tapi gundari, nggo itehndu maka adi idalankenndu perentah Jahwe, pasti reh ulina geluhndu. (Msm. 1:1-3; baca 1 Johanes 5:3.) Cuba ukurindu nasehat Pustaka man perbulangen, ndehara, orang tua, ras anak-anak. (Ep. 5:22–6:4) Kenca idalankenndu nasehat e, tambah nge keriahen ukur bas keluargandu? Janah kenca ikutkenndu petunjuk Jahwe kerna milih teman, jadi kalak si reh ulina nge kam? Reh riahna nge ukurndu? (Kua. 13:20; 1 Kor. 15:33) Mbelin kemungkinenna ijawapndu ue man kerina penungkunen e.
15. Kai si perlu ilakokenndu sanga la itehndu uga carana ndalanken nasehat Pustaka?
15 Mon-mon banci saja la itehndu uga carana ndalanken nasehat Pustaka si nggo ipelajarindu. E me sebapna igunaken Jahwe organisasiNa guna nikapken publikasi si erpalasken Pustaka. Kerina publikasi e nampati kam mbedaken kai si benar ras si salah. (Heb. 5:13, 14) Sanga ibacandu ras ipelajarindu kerina publikasi e, idahndu me maka jelas kel nasehat-nasehat Pustaka e janah erguna. Mbelin kemungkinenna kam pe tertarik jadi bagin organisasi Jahwe.
16. Uga cara Jahwe ngaturken umatNa?
16 Usahakenlah nandai organisasi Jahwe janah dukunglah. Enggo iatur Jahwe gelah umatNa ipersada bas runggun-runggun. Kepala kerina runggun eme Jesus, Anak Dibata. (Ep. 1:22; 5:23) Enggo ipilih Jesus piga-piga dilaki si erpengarapen ku surga guna ngaturken kerina pendahin si isuruh Jesus ilakoken. Igelari Jesus kalak e “budak si setia janah pentar.” Serius kel iakap budak e tanggung jawapna guna nampati kam rembak ras Dibata janah terus rembak ras Ia. (Mat. 24:45-47) Salah sada cara budak si setia e nampati kam eme ipastikenna gelah dilaki-dilaki si ncukupi syarat me si ipilih jadi pertua. Kalak enda banci njaga ras ngelindungi kam. (Jes. 32:1, 2; Heb. 13:17; 1 Pet. 5:2, 3) Iusahaken pertua-pertua e asa ngasupna erkorban guna kam, iapulina kam, janah isampatina gelah reh rembakna kam ras Jahwe. Tapi, salah sada si pentingna si ilakoken kalak e eme nampati kam gelah banci iajarindu kalak si deban kerna Jahwe.—Ep. 4:11-13.
17. Menurut Roma 10:10, 13, 14, ngkai maka siceritaken kerna Jahwe man kalak si deban?
17 Sampatilah kalak si deban gelah keleng atena Jahwe. Iperentahken Jesus murid-muridna gelah ngajari kalak kerna Jahwe. (Mat. 28:19, 20) Banci saja sidalanken perentah e perban siakap e sada kewajipen. Tapi sanga reh belinna kekelengenndu man Jahwe, seri kari perasanndu bagi Rasul Petrus ras Johanes si ngataken, “La terngadiken kami ngerana kerna kai si nggo idah kami ras si ibegi kami.” (Perb. 4:20) Adi banci sisampati kalak ngkelengi Jahwe, pasti la terturiken uga riahna ukurta. Bayangken uga riahna akap Pilipus sanga isampatina pejabat Etiopia e mpelajari kebenaren arah Kitap si Badia janah dungna iperidiken! Selain si e, adi iusihndu Pilipus janah ipatuhindu perentah Jesus guna erberita, ibuktikenndu maka nggit kam jadi Saksi Jahwe. (Baca Roma 10:10, 13, 14.) Kenca si e, bagi pejabat Etiopia ndai, banci saja dungna rukur kam, “Engkai aku la iperidiken saja?”—Perb. 8:36.
18. Kai kari sibahas bas artikel seterusna?
18 Keputusen si pentingna bas geluhndu eme iperidiken. Perban serius kel e, arus tuhu-tuhu iukurindu kai erti keputusen e. Emaka, bas artikel seterusna sibahas kari: Kai saja si perlu itehndu kerna iperidiken? Kai saja si perlu ilakokenndu sope iperidiken bage pe kenca iperidiken?
LAGU 2 Jahwe Eme GelarNdu
^ par. 5 Lit piga-piga kalak si keleng atena Jahwe tapi sangsi denga ia iperidiken ras jadi Saksi Jahwe. Adi bage si igejapkenndu, bas artikel enda sibahas kari kai saja si banci ilakokenndu gelah tersuruh ukurndu iperidiken.
^ par. 5 Tiap kalak la seri, emaka banci saja lit si atena ngikutken saran-saran bas artikel enda alu uruten si la seri.
^ par. 6 Contoh-contoh si debanna banci nenndu bas brosur Benarkah Kehidupan Diciptakan? ras brosur Asal Mula Kehidupan—Lima Pertanyaan yang Patut Direnungkan.
^ par. 61 KETERANGEN GAMBAR: Ibereken sekalak turang senina risalah man sekalak singuda-nguda sanga ia belanja.
