1. Perentah kai si ibereken Jesus man murid-muridna? (Nen gambar bas sampul majalah enda.)

I BAS berngi sope Jesus mate, iberekenna sada perentah si jelas man murid-muridna. Nina, “Bagi aku nggo ngkelengi kena, kena pe arus sikeleng-kelengen.” Nina ka, “Adi kena sikeleng-kelengen, kerina kalak meteh maka kena me murid-muridku.”​—Joh. 13:34, 35.

2. Engkai maka kita arus sikeleng-kelengen?

² Nina Jesus, sekalak jelma banci iteh pengikut Jesus adi ikelengina kalak si deban bagi Jesus nggo ngkelengi pengikutna. Kata-kata e ibereken Jesus man pengikutna bas abad pertama janah gundari pe kata-kata e ipake denga. E me sebapna arus kita sikeleng-kelengen amin pe mon-mon mesera.

3. Kai kari sibahas bas artikel enda?

³ Perban kerina kita la sempurna, mesera siakap ngkelengi alu bulat ukur. Amin pe bage, arus siusahaken ngusih Kristus. Bas artikel enda, sibahas kari uga kekelengen banci nampati kita gelah terus erdame ras kalak si deban, la mbeda-bedaken kalak, ras nggit ngalo-ngalo kalak si deban. Sibahas ka kari usihen turang seninata si terus ncidahken kekelengen aminna pe mesera iakapna ngelakokenca. Sanga pelajarindu artikel enda, sungkunlah bandu, ‘Kai si banci kuusih arah kalak e?’

4. Menurut Matius 5:23, 24, ngkai maka arus kita erdame ras turang senina si rate segat man banta?

⁴ Iajari Jesus kita gelah siusahaken erdame ras turang senina si rate segat man banta. (Baca Matius 5:23, 24.) Nina Jesus ka, adi siban ateta meriah ukur Dibata, arus kita erdame ras kalak si deban. Meriah kel ukur Jahwe adi siusahaken asa ngasupta erdame ras turang seninata. Tapi, adi terus segat ateta turang seninata janah la siusahaken erdame ras ia, sia-sia sisembah Dibata.​—1 Joh. 4:20.

5. Engkai maka mesera iakap sekalak turang senina erdame?

⁵ Mon-mon, banci saja mesera siakap erdame. Engkai? Cuba ukuri kai si terjadi man Markus. * Kitik kel ukurna sanga lit sekalak turang senina mandangi ia janah ngataken kai si la mehuli kerna ia man turang senina si deban. Uga tanggapen Markus? Nina Markus, “La terkuasaiku bangku, emaka merawa kel aku bana.” Tapi, kenca si e menyesal kel Markus janah mindo maaf ia man turang senina e. Erdame atena ras ia. Tapi turang senina ndai la nggit erdame. Tangtangna bagenda Markus rukur, ‘Engkai maka terus kuusahaken erdame ras ia, adi ia pe labo nggit?’ Tapi ikataken pertua keliling man bana gelah ula ia nyerah. Kai si ilakoken Markus?

6. (a) Kai si ilakoken Markus gelah banci erdame? (b) Uga Markus ndalanken nasehat si lit bas Kolose 3:13, 14?

⁶ Sanga iukuri Markus mulihi kai si ilakokenna e, sadar me ia maka nggo ulin iakapna bana asangken kalak si deban. Emaka iperubahina atena carana rukur e. (Kol. 3:8, 9, 12) Ijumpaina mulihi turang senina e janah mindo maaf ia. Piga-piga kali itulisna ka surat man turang senina e. Ikatakenna menyesal kel ia janah erteman atena mulihi. Iberekenna ka piga-piga hadiah gelah meriah ukur turang senina e. Tapi terus denga segat ate turang senina ndai janah lenga ia nggit ngampunisa.  Amin pe bage, terus ate Markus matuhi perentah Jesus guna ngkelengi turang seninana ras ngampunisa. (Baca Kolose 3:13, 14.) Adi keleng ateta turang seninata bali bagi si ilakoken Jesus, terus siusahaken erdame aminna pe la ia nggit. Tetap sitotoken gelah banci erteman mulihi ras ia.​—Mat. 18:21, 22; Gal. 6:9.

7. (a) Kai si isuruh Jesus gelah silakoken? (b) Situasi si sulit kai si iadapi sekalak turang seninata?

⁷ Nina Jesus, kai si ateta ilakoken kalak man banta, bage ka lah silakoken man bana. Nina ka, ula man kalak si ngkelengi kita ngenca kita rate keleng. (Luk. 6:31-33) Misalna, lit turang senina bas runggun rusur ngelakken kam janah la ia nggit mperkuanken kam. Uga adi bage si terjadi? E me si iadapi Lara. Nina, “Lit sekalak turang senina si lalap ngelakken aku, janah la kuteh ngkai. Stres kel aku janah lanai kuakap meriah bas perpulungen.” Tangtangna, rukur Lara, ‘Labo kap lit salahku. Turang senina bas runggun pe mamang atena ngidah ia.’

8. Kai si ilakoken Lara gelah banci erdame, janah kai si banci sipelajari arah pengalamenna e?

⁸ Lit piga-piga si ilakoken Lara gelah banci erdame. Ertoto ia man Jahwe, janah ijumpaina turang senina ndai. Kenca si e icakapken kalak e masalahna, sidakepen ia, janah dungna erdame. Teridah nggo dung masalah kalak e. Tapi nina Lara, “Bas pudi wari, mulihi aku la iperkuankenna. Kitik kel ukurku.” Tangtangna, iakap Lara banci ia ermeriah ukur adi berubah perbahanen turang seninana e man bana. Tapi dungna isadari Lara maka si pentingna eme tetap mehuli man turang seninana e janah ‘tuhu-tuhu ngampuni ia.’ (Ep. 4:32–5:2) Inget Lara maka kalak Kristen si perkeleng “la ngkira kesalahen kalak.” Arus ka ia “ngasup nggengken kai pe, tek nandangi kai pe, tetap erpengarapen, janah megenggeng i bas kai pe.” (1 Kor. 13:5, 7) Dungna lanai ia kuatir. Janah bas pudi wari, mekacar dungna turang senina ndai man Lara. Adi siusahaken erdame ras turang seninata janah terus ateta keleng kalak e,  banci kita tek maka ‘Dibata si dem kekelengen ras dem kedamen terus ras kita.’​—2 Kor. 13:11.

9. Menurut Perbahanen Rasul-Rasul 10:34, 35, ngkai maka kita la mbeda-bedaken?

⁹ Jahwe la mbeda-bedaken. (Baca Perbahanen Rasul-Rasul 10:34, 35.) Adi la kita mbeda-bedaken, sibuktiken maka kita anak-anakNa. E ertina sipatuhi perentah guna ngkelengi kalak si deban bagi kita ngkelengi dirita sendiri, janah ikut kita njaga perdamen ras turang seninata.​—Rom. 12:9, 10; Jak. 2:8, 9.

10-11. Kai si ilakoken sekalak turang senina gelah banci ilawanna perasan negatif?

¹⁰ Piga-piga kalak mesera iakapna la mbeda-bedaken. Misalna, cuba perdiateken kai si iadapi turang seninata Ruth. Sanga ia remaja denga, pernah la mehuli perbahanen kalak arah negri si deban man bana. Kai akibatna? Nina Ruth, “Nembeh ateku kerina si lit hubungenna ras negri e. Seri kuakap kerina kalak arah negri e, termasuk turang senina pe labo kuakap mehuli.” Kai si lakoken Ruth gelah lanai bage perasanna?

¹¹ Isadari Ruth maka arus iusahakenna ngelawan perasanna e. Ibacana erbage-bage pengalamen ras laporen arah negri e bas Buku Tahunan. Nina, “Kuusahaken positif perukurenku nandangi kalak arah negri e. Mulai kuperdiateken maka turang senina si lit i je semangat kel ngelayani Jahwe. Dungna sadar aku maka kalak e pe bagin arah turang seninaku si lit i belang-belang doni.” Bas pudi wari, sadar ka Ruth maka arus ibuktikenna kekelengenna. Nina, “Jumpa kenca aku ras turang seninata arah negri e, kuusahaken kel mekacar man kalak e. Ngerana-ngerana aku ras kalak e, janah kuusahaken nandaisa terdeheren.” Kai hasilna? Nina Ruth, “Dungna lanai negatif perasanku man kalak e.”

12. Kai buktina maka Sarah mbeda-bedaken denga?

¹² Piga-piga kalak la isadarina maka ia mbeda-bedaken denga. Misalna Sarah, iakapna ia la mbeda-bedaken kalak perban seri iakapna kerina kalak la soal kai warna kulitna, keadan ekonomina, ntah pe tanggung jawapna bas runggun. Tapi nina, “Dungna kusadari aku mbeda-bedaken denga.” I bas kai? Keluarga Sarah meganjang sekolahna, emaka riahen kapna erteman ras kalak si bage. Janah pernah ka bagenda nina man temanna, “Ras kalak si meganjang sekolahna ngenca aku nggit erteman. Tapi adi la lit sekolahna la aku nggit erteman.” Jelas me, perlu Sarah berubah. Uga carana?

13. Kai silakoken Sarah gelah banci ia berubah, janah kai si banci sipelajari?

¹³ Isampati pertua keliling Sarah ngukuri perbahanenna e. Nina Sarah, “Ipujina aku perban setia aku ngelayani, perban komentarku, janah pemetehku kerna Pustaka. Kenca si e, ikatakenna maka selain reh tambahna pemetehta, perlu ka siusahaken meteruk ukur, rate mekuah, ras sisadari lit nge kekurangenta.” Idalanken Sarah nasehat pertua keliling e. Nina, “Sadar aku maka si pentingna eme arus kita mehuli janah perkeleng.” Dungna iubahna me carana rukur nandangi turang seninana. Nina, “Kuusahaken ngenen sipat-sipat si erban kalak e meherga iakap Jahwe.” Uga kita? Pasti la ateta siakap kita hebaten asangken kalak si deban perban lit sekolahta! Adi tuhu-tuhu ‘sikelengi temanta si sada kiniteken,’ la kita mbeda-bedaken.​—1 Pet. 2:17.

14. Menurut Heber 13:16, uga perasan Jahwe adi nggit kita ngalo-ngalo kalak si deban?

¹⁴ Meriah kel ukur Jahwe ngidah kalak  si nggit ngalo-ngalo kalak si deban. (Baca Heber 13:16.) Ngalo-ngalo kalak si deban ianggapNa bagin arah ibadahta, khususna sanga sisampati kalak si merluken penampat. (Jak. 1:27; 2:14-17) E me sebapna ikataken Pustaka, “Alo-alolah kalak alu meriah ukur.” (Rom. 12:13) Adi sialo-alo kalak si deban, sibuktiken kita ermediate janah keleng ateta ia. Selain si e, sibuktiken ka nggit kita erteman ras ia. Meriah kel ukur Jahwe adi idahNa sibereken panganta ntah pe inementa man kalak si deban. Jahwe pe meriah ka ukurNa adi siban waktuta man kalak si deban janah siperdiateken kalak e. (1 Pet. 4:8-10) Tapi, banci saja lit situasi si erban mesera siakap ngelakokenca.

15-16. (a) Engkai maka lit kalak si sangsi ngalo-ngalo tamu? (b) Kai si erbanca maka dungna nggit Ellen ngalo-ngalo tamu?

¹⁵ Perban situasita, banci saja sangsi kita ngalo-ngalo tamu. Cuba perdiateken pengalamen sekalak diberu si nggo janda si gelarna Ellen. Ope denga jadi Saksi Jahwe, la meriah iakapna erteman ras kalak si deban janah la ia nggit ngalo-ngalo tamu. Iakapna nterem kalak si deban si sikapen ngalo-ngalo tamu asangken ia.

¹⁶ Kenca jadi Saksi Jahwe, iubah Ellen carana rukur. Iusahakenna gelah meriah akapna ngalo-ngalo tamu. Nina, “Sanga Bale Kerajan kami ibangun, ikataken pertua man bangku lit sekalak perbulangen ras ndeharana si reh atena nampati proyek e. Isungkun pertua e aku, banci nge ntah lang kalak e tading bas rumahku sedekah dua minggu. Paksa si e, kuinget ipasu-pasu Jahwe janda si lit i Sarpat.” (1 Raj. 17:12-16) Emaka kubere kalak e tading bas rumahku. Ipasu-pasu nge ia? Nina, “Meriah kel ukurku perban labo ngenca dua minggu kalak e tading bas rumahku, tapi dua bulan. Kompak aku dungna ras kalak e.” Ellen pe reh kompakna ka ras turang senina bas runggun, e pe jadi pasu-pasu man bana. Gundari ia nggo merintis janah rusur ibabana temanna erberita ku rumahna. Nina, “Meriah kel ukurku mere! Janah melala kel kudat pasu-pasu.”​—Heb. 13:1, 2.

17. Kai dungna si isadari Leo ras ndeharana?

 ¹⁷ Banci saja nggo rusur kita ngalo-ngalo tamu. Tapi banci nge siban reh ulina? Misalna, meriah iakap Leo ras ndeharana ngalo-ngalo tamu. Biasana si iundangna orang tua, keluarga, ras teman-temanna. Meriah ka akapna ngundang pertua keliling ras ndeharana. Tapi nina Leo, “Dungna sadar kami maka si iundang kami kalak si rembak ras kami ngenca.” Kai si ilakoken Leo ras ndeharana?

18. Kai si ilakoken Leo ras ndeharana gelah reh ulina kalak e i bas ngalo-ngalo tamu?

¹⁸ Dungna Leo ras ndeharana berubah kenca iukurina kata-kata Jesus enda, “Adi kalak si ngkelengi kena ngenca ikelengi kena, kai upah kena?” (Mat. 5:45-47) Isadari kalak e maka arus iusihna Jahwe, si nggit mere man kerina kalak. Emaka iundang kalak e atena kerina turang senina si lenga pernah iundangna. Nina Leo, “Gundari, sanga kami ras-ras pulung, meriah kerina ukur kami. Reh kompakna kami sada ras si deban bage pe ras Jahwe.”

19. Uga kita mbuktiken maka kita murid Jesus, janah kai tekadndu?

¹⁹ Enggo sibahas adi keleng ateta turang seninata, banci terus sijaga perdamen, la kita mbeda-bedaken, ras nggit ngalo-ngalo kalak si deban. Emaka arus siambekken kerina perasan ras perukuren negatif nandangi turang seninata janah arus sikelengi kalak e alu bulat ukur. Adi bage siban, meriah ukurta janah sibuktiken kita tuhu-tuhu murid Jesus.​—Joh. 13:17, 35.