Itehndu nge?
Selain bukti si lit bas Pustaka, kai ka si mbuktiken maka kalak Israel pernah jadi budak i Mesir?
Menurut Pustaka, Jusup ibaba kalak Midian ku Mesir. Janah bas pudi wari, Jakup eme bapak Jusup pindah Kanaan nari ku Mesir radu ras keluargana. Kalak e tading i daerah Gosen i deher Lau Nil. (Kej. 47:1, 6) ‘Dungna nggo nterem kel kalak Israel janah megegeh.’ Enda erbanca mbiar kalak Mesir man kalak Israel, emaka ibanna kalak e jadi budak.—Kel. 1:7-14.
Lit piga-piga kalak si ngataken maka cerita bas Pustaka e labo pernah terjadi. Tapi arah piga-piga bukti banci siteh maka keturunen Sem * pernah jadi budak i Mesir.
Misalna, idat ahli-ahli benda sejarah ingan tading kalak si nai si nggo runtuh i Mesir bagin utara. Ikataken Dr. John Bimson maka menurut bukti si nggo idat, lit lebih 20 ingan tading keturunen Sem bas daerah e. Selain si e, nina sekalak ahli budaya Mesir si nai si gelarna James K. Hoffmeier, “Mulai kira-kira tahun 1800 seh asa tahun 1540 sope Masehi, nterem kalak si nggunaken bahasa Semitik arah Asia bagin barat merhat pindah ku Mesir.” Nina ka, “Abraham, Isak, ras Jakup nggeluh bas masa si e, emaka peristiwa-peristiwa si lit bas buku Kejadin terjadi bas masa si e.”
Lit ka bukti si deban si rehna arah Mesir bagin selatan. Bas sada papirus si asalna kira-kira arah tahun 2000 seh ngasa 1600 sope Masehi, lit itulis gelar budak-budak si erdahin bas sada rumah i Mesir bagin selatan. Lebih 40 arah gelar budak ndai eme keturunen Sem. Dahin budak-budak e lit si erdakan, lit jadi tukang tenun, janah lit ka jadi buruh. Nina Hoffmeier, “Bas sada rumah i Thebaid [Mesir bagin selatan] saja, lit lebih 40 keturunen Sem si erdahin jadi budak. Emaka banci ikataken nterem keturunen Sem tading i belang-belang Mesir, khususna i deher [Lau Nil].”
Itulis sekalak ahli benda sejarah si gelarna David Rohl maka piga-piga gelar budak bas daftar e “seri ras gelar-gelar kalak bas Pustaka.” Misalna, lit gelar bagi Isakar, Aser, ras Siprah. (Kel. 1:3, 4, 15) Nina Rohl ka, “E jadi bukti maka kalak Israel pernah jadi budak i Mesir.”
Nina Dr. Bimson, “Ibuktiken sejarah maka tuhu kai si ikataken Pustaka kerna kalak Israel si pernah jadi budak i Mesir janah dungna ibebasken.”
^ par. 4 Sem eme salah sada arah telu anak Nuah. Keturunen Sem banci saja termasuk kalak Elam, kalak Aser, kalak Kaldea si nai, kalak Heber, kalak Siria, ras piga-piga suku kalak Arab.
