Lit erbage-bage tugas kalak Lewi si la ngelayani jadi imam. Misalna jadi petugas rumah pertoton. Si mere petunjuk man kalak e i bas ndalanken dahinna eme kepala penjaga rumah pertoton. Sekalak penulis Jahudi si gelarna Philo njelasken kai tugas kalak e, “Piga-piga ertugas njaga pintu masuk. Lit ka si ertugas njaga ingan si badia [i bas rumah pertoton]. Erjaga kalak e i je gelah ula masuk kalak si la cocok menurut undang-undang, la soal sengaja ntah lang. Selain si e, lit ka si ertugas ngkelilingi rumah pertoton janah ganti-ganti si ertugas, lit si ciger janah lit ka si berngi.”

Anggota Pengadilen Agama Jahudi banci mindo penampat man kalak e. Kalak e ngenca arah kelompok kalak Jahudi si ibere pemerentah Roma maba senjata.

Nina sekalak ahli si gelarna Joachim Jeremias, “Sanga Jesus itangkap, ikataken Jesus maka tiap wari ia ngajar bas Rumah Pertoton, tapi la pernah itangkap. (Mat. 26:55) Arah kata-kata Jesus e teridah maka si nangkap ia eme petugas Rumah Pertoton.” Selain si e nina Jeremias, kalak si pernah isuruh nangkap Jesus pe eme petugas rumah pertoton. (Joh. 7:32, 45, 46) I bas pudi wari, iperentahken anggota Pengadilen Agama Jahudi gelah kepala penjaga bage pe piga-piga petugas rumah pertoton nangkap murid-murid Jesus. Sanga Paulus isaren ndarat arah rumah pertoton nari, banci saja si ngelakokenca pe petugas rumah pertoton ka.​—Perb. 4:1-3; 5:17-27; 21:27-30.