1. Kai si banci sipelajari arah Pengerana 3:1, 7?

PIGA-PIGA kalak meriah akapna ngeranai, tapi si debanna persinik. Mon-mon, siarapken melala min ngerana piga-piga turang seninata. Janah si debanna ka siarapken sitik ngerana. Tapi situhuna, bagi si ikataken ayat tema artikel enda, lit waktu ngerana janah lit waktu sinik.​—Baca Pengerana 3:1, 7.

2. Ise si lit hakna nentuken uga arusna kita ngerana?

² Banci kita ngerana eme pemere bas Jahwe nari. (Kel. 4:10, 11; Ket. 4:11) Isampati Jahwe kita arah Pustaka ngangkai uga carana nggunaken pemere e alu tepat. I bas artikel enda, sibahas kari piga-piga contoh bas Pustaka si banci nampati kita meteh ndigan arusna kita ngerana janah ndigan ka arusna sinik. Sibahas ka kari uga perasan Jahwe sanga begiNa kita ngerana man kalak si deban. Pertama-tama, mari sibahas ndigan arusna kita ngerana.

3. Menurut Roma 10:14, ndigan arusna kita ngerana?

³ Katawari pe kita arus siap nceritaken kerna Jahwe ras KerajanNa. (Mat. 24:14; baca Roma 10:14.) Adi bage silakoken, siusih kap Jesus. Salah sada alasen si pentingna Jesus reh ku doni eme nceritaken kebenaren kerna Bapakna. (Joh. 18:37) Tapi, arus siinget maka carata mpeseh berita e pe seh kel pentingna. Emaka sanga siceritaken kerna Jahwe man kalak si deban, perlu silakoken “alu lemah lembut janah mehamat.” Perlu ka sicidahken maka siergai perasan kalak e ras kai si itekina. (1 Pet. 3:15) Alu bage, kita labo terjeng ngerana man kalak e, tapi siajari ka kalak e kerna Jahwe, janah banci saja e kena ku pusuhna.

4. Menurut Kuan-kuanen 9:9, uga rananta banci nampati kalak si deban?

 ⁴ Pertua-pertua la banci sangsi ngerana man sekalak turang senina adi perlu iakapna kalak e inasehati. Tapi, perlu idaramina waktu si tepat gelah ula mela iakap turang senina e. Itimaina ngayak la lit kalak si deban si megisa. Arus iusahaken pertua gelah rananna la erban kitik ukur kalak. Amin pe bage, ula enda erbanca maka lanai surung ibereken pertua-pertua nasehat arah Pustaka si banci nampati kalak ngelakoken kai si benar. (Baca Kuan-kuanen 9:9.) Engkai maka ula kita sangsi ngerana sanga iperluken? Sibahas kari dua contoh si berbeda. Contoh si pertama eme sekalak dilaki si perlu mpersingeti anakna, janah contoh si peduaken eme sekalak diberu si ngerana man sekalak dilaki si nandangi jadi raja.

5. Katawari Imam si Mbelin Eli arusna ngerana?

⁵ Lit dua anak Imam si Mbelin Eli, janah keleng kel atena kalak e. Tapi la iergai anak-anakna e Jahwe. Lit tugas anak-anakna e si penting eme jadi imam bas kemah ingan ersembah. Tapi igunakenna kuasa si lit bas ia e alu cara si salah. La ka iergaina korban si ipersembahken man Jahwe. Janah terang-terangen ilakokenna perbahanen seks si salah. (1 Sam. 2:12-17, 22) Menurut Undang-Undang Musa, anak-anak Eli e arus mate. Tapi, alu medate ngenca ipersingetina anak-anakna e, janah pediatna terus ngelayani i kemah ingan ersembah. (Ul. 21:18-21) Uga nge tanggapen Jahwe ngidah perbahanen Eli e? Nina man Eli, “Engkai maka ipehagandu anakndu lebih asa Aku?” Dungna, iputusken Jahwe gelah duana anak Eli si jahat e iukum mate.​—1 Sam. 2:29, 34.

6. Kai si banci sipelajari arah Eli?

⁶ Lit sada pelajaren si penting sidat arah Imam Eli. Adi siteh lit temanta ntah keluargata ngelanggar undang-undang Dibata, ngeranalah kita man bana. Perlu siingetken ia kerna patoken-patoken Jahwe. Kenca si e, perlu sipastiken maka nggo datna penampat arah wakil Jahwe nari eme arah pertua-pertua. (Jak. 5:14) La kita nggit bagi Imam Eli si ergan kapna temanna ntah pe keluargana asangken Jahwe. Memang iperluken sipat si perpang gelah banci ngerana man teman ntah pe keluargata si salah perbahanenna, tapi e lit gunana. Gundari, perdiateken contoh si la seri ras Eli, eme Abigail, sekalak diberu arah Israel nari.

7. Engkai maka sempat Abigail ngerana man Daud?

 ⁷ Abigail e ndehara sekalak tuan taneh si bayak si gelarna Nabal. Sanga kiam Daud ras anak buahna arah Raja Saul nari, sempat kalak e tading ras permakan-permakan Nabal. Ilindungi kalak e ka asuh-asuhen Nabal arah perampok. Ngata bujur nge Nabal? Lang. Sanga ipindo Daud sitik inemen ras pangan man Nabal guna ia ras anak buahna, merawa Nabal janah isergangna kalak e. (1 Sam. 25:5-8, 10-12, 14) Emaka ibunuh Daud atena kerina dilaki bas rumah tangga Nabal. (1 Sam. 25:13, 22) Uga gelah e la terjadi? Iteh Abigail maka enda me waktuna ngerana. Emaka alu pang, ngerana ia man Daud amin pe arus iadapina 400 dilaki si ersenjata si sangana melihe ras merawa.

8. Kai si banci sipelajari arah contoh Abigail?

⁸ Sanga jumpa Abigail ras Daud, la ia mbiar ngerana tapi tetap ia mehamat janah iusahakenna gelah tek Daud man kai si ikatakenna e. Amin pe labo Abigail si ersalah, mindo maaf ia man Daud. Ikatakenna maka itehna Daud e kalak si mehuli, janah pasti ilakoken Daud ka kari si mehuli. Ipindo Abigail ka penampat Jahwe gelah isampatiNa ia. (1 Sam. 25:24, 26, 28, 33, 34) Bagi Abigail, adi siidah lit kalak ngelakoken perbahanen si banci erban ia ngelakoken kesalahen si serius, arus kita pang ngerana man bana. (Msm. 141:5) Arus mehamat kita ngelakokenca, janah arus ka kita pang. Adi sibereken nasehat man kalak si merlukenca alu cara si perkeleng, e buktina kita teman sejati.​—Kua. 27:17.

9-10. Kai si perlu inget pertua sanga mereken nasehat?

⁹ Khususna pertua-pertua arus pang mere nasehat man turang senina si erban keputusen si salah. (Gal. 6:1) Pertua-pertua e sadar maka kalak e sendiri pe la sempurna janah banci saja perlu ka pagi inasehati. Amin pe bage, tetap ipersingetina kalak si merluken disiplin.  (2 Tim. 4:2; Tit. 1:9) Sanga mere nasehat, iusahaken pertua ngelakokenca alu cara si mehuli ras sabar. Bage ibanna perban keleng atena kalak e. (Kua. 13:24) Tapi si pentingna, iergai kalak e atena Jahwe alu ngikutken patokenNa ras ngelindungi runggun arah bahaya.​—Perb. 20:28.

¹⁰ Enggo sibahas ndigan arusna kita ngerana. Tapi lit ka waktuna kita arus tetap sinik. Situasi sulit kai saja si banci saja siadapi paksa si e?

11. Perumpaman kai si igunaken Jakup janah kai hubungenna ras kata-katata?

¹¹ Mon-mon banci saja mesera siakap la ngataken kai si ateta sikataken. Igunaken Jakup perumpaman si nggambarken uga serana ngelakokenca. Nina, “Adi lit kalak si la pernah salah i bas ngerana, sempurna kap ia janah banci ikuasaina dirina.” (Jak. 3:2, 3) I bas takal ras babah kuda, biasana itama tali gelah kuda e banci ikuasai. Adi isuruh kalak si nangkih kuda atena kuda e belok ntah pe ngadi, arus itarikna tali e. Adi la mekeskes ijemakna tali e, perkiam kuda e la kari terkuasai. Akibatna banci kari cilaka kuda e ntah pe kalak si nangkih kuda e. Bage ka pe rananta, adi la sikuasai, kata-katata banci erban melala masalah. Cuba perdiateken piga-piga situasi si erbanca kita arus “ngkuasai” rananta ntah pe “ngkuasai” dirita gelah tetap sinik.

12. Ndigan “sikuasai rananta” ras “sikuasai dirita gelah tetap sinik?”

¹² Kai si ilakokenndu adi lit turang senina meteh berita si la banci iceritaken man kalak si deban? Misalna, jumpa kam ras sekalak turang senina si asalna arah negri si ngelarang pendahin erberita. Tergoda nge kam nungkun ia kerna uga carana pendahinta ilakoken i je? Pasti mehuli nge tujunndu nungkunsa. Keleng  ateta turang seninata janah ermediate kita man kalak e. Sitotoken ka ateta kalak e. Amin gia bage, enda me waktuna “sikuasai rananta” janah “sikuasai dirita gelah tetap sinik.” Adi sipaksa kalak nceritaken kai si arusna la banci iceritakenna, e ertina la ateta keleng ia. Janah la ka ateta keleng turang seninata si nggo tek man bana maka pasti la iceritakenna kegiatenta man kalak si deban. Pasti la ateta nambahi masalah turang seninata bas negri si ngelarang pendahinta. Selain si e, turang senina si ngelayani bas negri si ngelarang pendahinta pe, pasti la nggit mereken keterangen kerna kegiaten Saksi-Saksi Jahwe si lit i negrina.

13. Menurut Kuan-kuanen 11:13, kai si perlu ilakoken pertua-pertua janah ngkai?

¹³ Khususna pertua-pertua perlu matuhi nasehat si icatat bas Kuan-kuanen 11:13 alu la nceritaken keterangen kai pe man kalak si la lit hakna metehsa. (Baca.) Banci saja enda mesera, khususna man pertua si nggo erjabu. Engkai? Biasana, ndehara ras perbulangen rusur ngerana-ngerana, iceritakenna kai si lit bas ukurna, kai si erban ia mbiar, ntah pe isi pusuhna gelah kalak e tetap kompak. Tapi sekalak pertua itehna maka la banci “ikatakenna rahasia” turang senina si lit bas runggun. Adi ikatakenna, turang senina lanai tek man bana janah gelarna pe banci ceda. Kalak si lit tanggung jawapna bas runggun ‘la banci nipu.’ (1 Tim. 3:8) Maksudna, lain si ikatakenna man kalak janah lain ka man kalak si deban. Kalak e pe la banci jadi percikurak. Adi keleng ate pertua ndeharana, pasti la katakenna kai pe man ndeharana adi la kin perlu iteh ndeharana.

14. Kai si perlu ilakoken ndehara pertua gelah la ceda gelar perbulangenna?

¹⁴ Kai si perlu ilakoken ndehara pertua gelah la ceda gelar perbulangenna? La banci ipaksana perbulangenna nceritaken rahasia si la banci itehna. Adi bage, labo ngenca idukungna perbulangenna tapi iergaina ka kalak si nceritaken masalah ku perbulangenna. Janah si pentingna, ibanna meriah ukur Jahwe perban ikut ia njaga runggun tetap dame ras ersada.​—Rom. 14:19.

15. Uga perasan Jahwe nandangi telu teman Jop janah ngkai?

¹⁵ I bas buku Jop, banci melala sipelajari kerna ndigan ras uga arusna kita ngerana. Kenca inanami Jop melala masalah si mberat, reh empat dilaki guna ngapuli ia ras mere nasehat man bana. Ndekah kalak e sinik. Telu arah kalak e gelarna Elipas, Bildat, ras Sopar. Sanga sinik kalak e, labo igunakenna waktuna e guna ngukuri uga carana nampati Jop. Tapi si iukurina uga carana mbuktiken maka Jop e nggo ersalah. E jelas teridah arah kata-katana man Jop. Memang piga-piga si ikataken kalak e lit ka nge perpayona, tapi buen si ikatakenna kerna Jop ras Jahwe la tuhu janah la perkeleng. Ihakimina Jop alu kejam. (Jop 32:1-3) Uga tanggapen Jahwe? Merawa kel Jahwe man telu dilaki e. IkatakenNa kalak e motu janah isuruhNa kalak e ndahi Jop gelah itotoken Jop kalak e.​—Jop 42:7-9.

16. Kai si banci sipelajari arah contoh si la mehuli si ibereken Elipas, Bildat, ras Sopar?

¹⁶ Banci sibuat pelajaren arah contoh si la mehuli si ibereken Elipas, Bildat, ras Sopar. Si pertama, la banci sihakimi turang seninata. (Mat. 7:1-5) Tapi arus sibegiken lebe kalak e sope kita ngerana. Alu bage banci tuhu-tuhu siangkai kai si sangana iadapina. (1 Pet. 3:8) Si peduaken, arus ka sipastiken maka kata-katata perkeleng janah benar. (Ep. 4:25) Janah si peteluken, arus siinget maka iperdiateken Jahwe kel rananta man kalak si deban.

17. Kai si banci sipelajari arah Elihu?

 ¹⁷ Dilaki si peempatken si ndahi Jop eme Elihu, kade-kade Abraham. Sanga ngerana Jop ras telu dilaki ndai, tutus atena megikenca. Alu bage banci iberekenna nasehat si perkeleng tapi terus terang guna mpekena cara rukur Jop. (Jop 33:1, 6, 17) Sanga Elihu ngerana, si pentingna akapna mereken kemulian man Jahwe, labo man dirina ntah pe kalak si deban. (Jop 32:21, 22; 37:23, 24) Arah Elihu, sipelajari maka lit waktuna kita perlu sinik ras mbegiken. (Jak. 1:19) Sipelajari ka maka sanga mereken nasehat, si pentingna si perlu simuliaken eme Jahwe, labo dirita sendiri.

18. Uga carana mbuktiken maka siergai pemere Dibata?

¹⁸ Sanga sidalanken pedah Pustaka kerna ndigan ras uga arusna kita ngerana, sicidahken maka siergai pemere e. Ibereken Dibata kesah si badia man Raja Salomo si pentar guna nulisken enda, “Kata si ibelasken i bas paksana bali kap ras buah emas si iamparken i bas pinggan pirak.” (Kua. 25:11) Adi tutus ateta megiken kalak ngerana janah siukuri lebe sope ngerana, rananta bali bagi buah emas si meherga janah mejile. Alu bage, la soal mbue kita ngerana ntah pe sitik, kata-katata banci mpegegehi kalak si deban janah erban Jahwe senang. (Kua. 23:15; Ep. 4:29) Enda me cara si mehulina ncidahken pengatan bujurta nandangi pemere si ibereken Dibata!