1. Engkai maka anak muda erguna kel man runggun?

KENA anak muda, erguna kel kena man runggun. Enterem arah kena sehat denga janah megegeh. (Kua. 20:29) Melala si banci ilakoken kena guna nampati turang senina. Banci saja merhat kena jadi sinampati runggun. Tapi banci saja kena erpengakap maka ngudasa denga kena iakap kalak janah lenga ngasup ndalanken tugas si penting. Amin pe kena nguda denga melala si banci ilakoken kena gundari gelah tek turang senina man kena janah iergaina kena.

2. Kai kari sibahas bas artikel enda?

² Bas artikel enda sibahas kari kerna Raja Daud. Sibahas ka kari kerna dua raja Juda eme Asa ras Josapat. Sibahas kari tentangen si adapi telu dilaki enda, uga kalak e ngadapisa, janah kai si banci ipelajari anak muda arah kalak e.

3. Kai salah sada cara si banci ilakoken anak muda guna nampati turang senina si enggo metua bas runggun?

³ Sanga Daud nguda denga, lit piga-piga keterampilenna si erguna man kalak si deban. Contohna, perban beluh ia main musik, banci igunakenna keterampilenna e guna nampati Saul, raja si ilantik Jahwe. (1 Sam. 16:16, 23) Kena anak muda, lit nge keterampilen kena si banci erguna man turang  senina bas runggun? Enterem arah kena lit keterampilen kena. Misalna, adi beluh kena nggunaken teknologi, banci sampati kena turang senina si enggo metua nggunaken tablet ntah pe alat elektronikna si deban guna pelajaren pribadi ras perpulungen. Pasti ergaina kel penampat kena e.

4. Bagi Daud, sipat-sipat kai si perlu ipebelin anak muda? (Nen gambar sampul.)

⁴ Daud sekalak dilaki si terbukti ertanggung jawap janah banci iandalken. Contohna, sanga ia nguda denga, rajin ia ngurus biri-biri bapakna. Bas ngelakoken tugasna e, lit bahaya si arus iadapina. Bas pudi wari, bagenda nina man Raja Saul, “Aku kap si mpermakani biri-biri bapakku. Sanga aku mpermakani, reh sada singa maba sada biri-biri arah rarasen e. Pernah ka reh sada beruang, bage kang si banna. Emaka kuayaki binatang e, kuserang, janah kuselamatken biri-biri e arah babahna nari.” (1 Sam. 17:34, 35) Ertanggung jawap kel ia ngurus biri-biri bapakna janah sitik pe la ia mbiar ngelindungisa. Anak muda banci ngusih Daud alu rajin ngelakoken tugas kai pe si ibereken man bana.

5. Menurut Masmur 25:14, kai si pentingna si arus ilakoken anak muda?

⁵ Sanga Daud nguda denga usahakenna kel rembak ras Jahwe. Hubungenna ras Jahwe ndauh pentingen asangken sipatna si perpang ras keterampilenna main musik. Jahwe e labo ngenca Dibata Daud tapi temanna ka, rembak kel Daud ras Jahwe. (Baca Masmur 25:14.) Anak muda, si pentingna si banci ilakokenndu eme usahakenlah rembak ras Dibata Jahwe. Adi bage banndu, banci reh buena tanggung jawap si alokenndu bas runggun.

6. Uga pengakap piga-piga kalak kerna Daud?

⁶ Salah sada masalah si adapi Daud eme lit kalak si erpengakap maka ia ngudasa denga ras la ertanggung jawap. Contohna, sanga ilawan Daud atena Goliat, ilarang Raja Saul ia janah nina, “Kam kitik denga.” (1 Sam. 17:31-33) Sope si e pe, tuduh abangna ia la ertanggung jawap. (1 Sam. 17:26-30) Tapi, labo iakap Jahwe maka Daud e ngudasa denga ntah pe la ertanggung jawap. ItandaiNa kel Daud. Alu gegeh si bereken Temanna eme Jahwe banci taluken Daud Goliat.​—1 Sam. 17:45, 48-51.

7. Kai si banci pelajarindu arah Daud?

 ⁷ Kai si banci pelajarindu arah pengalamen Daud? Pelajarenna eme perlu kita sabar. Banci jadi perlu waktu man kalak si enggo nandai kam kitik-kitik nari guna meteh maka kam enggo reh dewasana. Amin pe bage, teklah kam maka labo si teridah saja ngenca si inen Jahwe. TandaiNa kam janah tehNa kai si banci ilakokenndu. (1 Sam. 16:7) Usahakenndulah reh rembakna ras Dibata. Daud banci rembak ras Jahwe perban perdiatekenna ciptanNa. Ukurina kai si banci pelajarina kerna Jahwe arah ciptanNa. Kam pe perlu lakokenndu bage. (Ms. 8:3, 4; 139:14; Rom. 1:20) Selain si e, si banci lakokenndu eme mindo penampat si perlukenndu man Jahwe. Contohna, lit nge teman sekolahndu si nokohi kam perban kam sekalak saksi Jahwe? Adi lit, ertotolah kam mindo penampat Jahwe guna ngadapi tentangen e. Dalankenlah nasehat si erguna si datndu arah Pustaka, arah buku-bukuta, ras video-videota si erpalasken Pustaka. Tiap igejapkenndu maka isampati Jahwe kam ngadapi tentangen, reh belinna me kinitekenndu. Alu bage, sanga idah kalak iandalkenndu Jahwe, tek me ia man bandu.

8-9. Kai si erbanca maka sabar Daud nimai sope ia jadi raja? Janah kai si banci ipelajari anak muda arah ia nari?

⁸ Ukurilah tentangen si deban si adapi Daud. Kenca ilantik ia jadi raja, arus ia nimai piga-piga tahun ope lenga sah ia jadi raja i Juda. (1 Sam. 16:13; 2 Sam. 2:3, 4) Sanga si e, kai si nampati ia tetap sabar? Labo kitik ukurna tapi lakokenna si banci ilakokenna. Contohna, sanga ia jadi buronen bas daerah kalak Pilisti, ilawanna musuh-musuh kalak Israel. Alu bage, lindungina batas-batas daerah Juda.​—1 Sam. 27:1-12.

⁹ Kai si banci ipelajari anak muda arah Daud nari? Lakokenlah kai si banci ilakokenndu guna nampati turang senina. Cuba ukuri pengalamen sekalak turang seninata si gelarna Ricardo. * Mulai kin ia remaja, enggo merhat kel ia jadi perintis biasa. Tapi nina pertua lenga ia ngasup. Amin pe bage labo kitik ukurna janah la ia nyerah. Sebalikna, reh lalana igunakenna waktuna guna erberita. Nina, “Adi kuinget mulihi kai si terjadi mbarenda, sadar aku maka perlu aku maju secara rohani. Kuusahaken lalap ndahi kalak si lit minatna janah ope kalak e kudahi, kuban lalap persiapen. Dungna lit kalak si erlajar Pustaka ras aku. Reh rusurna aku erberita, reh beluhna kuakap aku.” Gundari Ricardo enggo jadi perintis biasa ras sinampati runggun janah beluh kel ia erberita ras ngajar.

10. Bas sada kesempaten, kai si ilakoken Daud sope ibanna sada keputusen si penting?

¹⁰ Cuba ka ukuri situasi si deban si adapi Daud. Sanga ia ras prajurit-prajuritna cebuni arah Saul nari bas daerah kalak Pilisti, lawes kalak e nadingken keluargana guna erperang. Sanga kalak e lawes, reh sada pasuken musuh ngerampok rumah kalak e janah itabanna keluarga kalak e. Perban Daud sekalak prajurit si erpengalamen banci saja menukah iakapna erban rencana guna nelamatken keluargana. Tapi, la bage iban Daud. Ipindona petunjuk Jahwe arah sekalak imam si gelarna Abiatar, bagenda nina Daud man Jahwe, “Arus kin kuayaki perampok-perampok ah?” Ikataken Jahwe man Daud maka arus iayakina perampok-perampok e janah pasti banci iselamatkenna kalak si itaban. (1 Sam. 30:7-10) Kai si banci ipelajarindu arah kejadin enda?

11. Sope ibanndu keputusen, kai si banci ilakokenndu?   

 ¹¹ Sope ibanndu keputusen, pindolah nasehat kalak si deban. Cakapkenlah ras orang tuandu. Banci ka ipindondu nasehat si mehuli arah pertua-pertua si enggo melala pengalamenna. Tek Jahwe man dilaki-dilaki si enggo ilantik enda, emaka kam pe banci tek man kalak e. Kalak e “pemere” Jahwe man runggun. (Ep. 4:8) Banci ibanndu keputusen si mehuli adi iusihndu kiniteken kalak e janah ibegikenndu nasehat si mehuli si iberekenna man bandu. Gundari, mari sibahas kai si banci sipelajari arah Raja Asa.

12. Sanga tangtangna Raja Asa merentah, uga nge sipat-sipatna?

¹² Sanga Raja Asa nguda denga, ia kalak si meteruk ukur janah perpang. Contohna, kenca bapakna Abia mate, ia si jadi raja janah ikernepkenna kerina berhala-berhala bas negrina. Isuruhna ka ‘kalak Juda ndarami Jahwe Dibata nini bulang kalak e ras ndalanken Undang-Undang Musa bage pe perentah Dibata.’ (2 Kro. 14:1-7) Sanga Sera kalak Etiopia ras 1.000.000 prajuritna nyerang Juda, mis ipindo Asa penampat Jahwe, nina, “O Jahwe, ise pe banci sampatiNdu, la soal enterem ntah sitik, la soal megegeh ntah lemah. O Jahwe Dibata kami, sampati min kami sebap Kam kap si andalken kami.” Arah kata-katana enda teridah maka tek kel Asa ngasup Jahwe ngelindungi ia ras rakyatna. Perban tek Asa man Bapakna si i surga, ‘italuken Jahwe me kalak Etiopia.’​—2 Kro. 14:8-12.

13. Kai si terjadi man raja Asa bas pudi wari ras engkai?

¹³ Pasti ngeri kel akap Asa sanga reh 1.000.000 prajurit nyerang ia, tapi perban penampat Jahwe berhasil ia nalukenca. Tapi sanga reh tentangen si deban si la bage beratna, la iandalkenna Jahwe. Tentangen e rehna arah Raja Baasa, Israel nari. Sanga si e, pindona penampat raja Siria. Keputusen si banna e la mehuli hasilna. Emaka nina Jahwe man Asa arah Nabi Hanani, “Perban labo Jahwe Dibatandu si andalkenndu tapi raja Siria si andalkenndu, emaka bene kesempatenndu naluken raja Siria.” Mulai paksa si e erperang lalap Raja Asa. (2 Kro. 16:7, 9; 1 Raj. 15:32) Kai pelajarenna man banta?

14. Kai buktina iandalkenndu Jahwe? Menurut 1 Timotius 4:12, kai hasilna adi bage banndu?

 ¹⁴ Tetaplah meteruk ukur janah terus andalken Jahwe. Sanga kam iperidiken ibuktikenndu maka erkiniteken kel kam man Jahwe. Meriah kel ukur Jahwe ngidah si lakokenndu e janah alo-aloNa kam bas keluargaNa. Gundari si perlu lakokenndu eme teruslah andalken Jahwe. Banci jadi menukah akapndu ngandalken Jahwe sanga arus ibanndu keputusen si seh kel pentingna. Tapi uga adi bas situasi si deban, iandalkenndu denga nge Jahwe? Seh kel pentingna ngandalken Jahwe sanga ibanndu keputusen kerna hiburen, dahin, ras tujun geluhndu. Ula pernah andalkenndu kepentarenndu. Tapi daramilah prinsip-prinsip bas Pustaka si banci nampati kam erban keputusen, jenari dalanken. (Kua. 3:5, 6) Adi bage banndu, meriah me ukur Jahwe ngidah kam janah iergai turang senina kam.​—Baca 1 Timotius 4:12.

15. Menurut 2 Kronika 18:1-3; 19:2, kesalahen kai si iban Raja Josapat?

¹⁵ Bali bagi kalak si deban kam pe la sempurna. Emaka banci saja lakokenndu kesalahen. Tapi ula perban si e lanai lakokenndu kai si banci lakokenndu bas ngelayani Jahwe. Cuba ukurindu kerna Raja Josapat. Melala kel sipat-sipatna si mehuli. Sanga ia nguda denga “layanina Dibata bapakna janah dalankenna perentahNa.” Selain si e, suruhna ka pejabat-pejabatna ku kota-kota si lit bas Juda guna ngajari rakyatna kerna Jahwe. (2 Kro. 17:4, 7) Tapi, amin pe ia kalak si bujur, mon-mon ibanna ka nge keputusen si la mehuli. Emaka persingeti Jahwe ia arah sekalak nabi. (Baca 2 Kronika 18:1-3; 19:2.) Pelajaren kai si banci datndu arah kejadin e?

16. Kai si banci pelajarindu arah pengalamen Rajeev?

¹⁶ Aloken ras dalankenlah nasehat si ibereken man bandu. Bali bagi anak muda si deban, banci jadi erjuang kam erban Jahwe si pentingna bas geluhndu. Amin pe mesera, ula kitik ukurndu. Cuba perdiateken pengalamen sekalak anak muda si gelarna Rajeev. Iceritakenna pengalamenna sanga ia remaja denga, nina, “Mon-mon la kuteh kai ateku kulakoken bas geluhku. Bali bagi enterem anak muda si deban, riahen kuakap olahraga ntah pe ngelakoken kai si erban meriah ukurku  asangken reh ku perpulungen ntah pe erberita.” Kai si nampati ia? Sekalak pertua si ermediate mere nasehat man bana. Nina Rajeev, “Isampatina aku ngukuri pedah si lit bas 1 Timotius 4:8.” Alu meteruk ukur idalanken Rajeev nasehat e janah ukurina mulihi kai si pentingna bas geluhna. Nina, “Kuputusken ngelayani Jahwe alu erbage-bage cara janah e kuban si pentingna bas geluhku.” Kai hasilna? Nina Rajeev, “Piga-piga tahun kenca kualoken nasehat e, dungna enggo ncukupi syarat aku jadi sinampati runggun.”

17. Uga perasan turang senina kerna anak muda si ngelayani Jahwe?

¹⁷ Pasti iergai turang senina kel anak muda si “ersada” ras kalak e ngelayani Jahwe. (Sep. 3:9) Meriah ukur kalak e ngidah semangat kena ras kai si enggo ilakoken kena.​—1 Joh. 2:14.

18. Bagi si ikataken bas Kuan-kuanen 27:11, uga nge perasan Jahwe kerna anak muda si ngelayani Ia?

¹⁸ Anak muda, ula kena lupa maka keleng ate Jahwe kena janah tek Ia man kena. Enggo nubuatken Jahwe maka bas wari-wari pendungi enda enterem pagi anak muda si nggit ngelayani Ia. (Ms. 110:1-3) ItehNa keleng ate kena Ia janah merhat kena mereken si mehulina bas ngelayani Ia. Emaka sabarlah kena man kalak si deban ras ula kena nyerah. Sanga lakoken kena kesalahen, alokenlah disiplin ras pelatihen si ibereken man kena, anggaplah e rehna arah Jahwe nari. (Heb. 12:6) Rajinlah kena ngelakoken tugas kai pe si ibereken man kena. Tapi si pentingna, banlah meriah ukur Bapak kena si i surga.​—Baca Kuan-kuanen 27:11.