1. Tentangen kai si banci saja iadapi umat Jahwe?

SANGANA nge adapindu masalah si mberat? Banci saja lit turang senina bas runggun si erban kitik ukurndu. (Jak. 3:2) Ntah banci saja lit teman sada dahinndu ntah sada sekolahndu si nokoh-nokohi kam perban ngelayani Jahwe. (1 Pet. 4:3, 4) Ntah lit anggota keluargandu si erusaha erban kam lanai reh ku perpulungen ntah erberita. (Mat. 10:35, 36) Perban mberat kel akapndu masalah e, banci saja ngadi atendu ngelayani Jahwe. Tapi la soal kai pe masalah si adapindu, teklah maka pasti ibereken Jahwe kepentaren man bandu gelah beluh kam erban keputusen si mehuli janah ngasup ka kam ngadapi situasindu.

2. Menurut Roma 15:4, kai manpaatna mbaca Pustaka?

² Ipastiken Jahwe gelah bas Pustaka lit itulis kerna contoh kalak si la sempurna si ngasup ngadapi tentangen si mberat. Kai gunana? Gelah banci kita erlajar arah kalak e nari. E me sebapna maka iban Jahwe tersuruh ukur Rasul Paulus nulis kerna si e. (Baca Roma 15:4.) Sanga sibaca kerna contoh-contoh e, terpegegehi me kita janah lit me arapenta. Tapi, gelah banci sidat manpaat si bage la bias mbaca Pustaka saja. Arus silakoken terbuen. Arus sipediat Kata Dibata ngubah carata rukur ras perasanta. Kai si banci silakoken adi sangana sidarami petunjuk kerna uga ngadapi sada tentangen? Banci sigunaken empat cara enda: (1) Ertoto, (2) Bayangken, (3) Ukuri, ras (4) Dalanken. Mari sibahas kerina cara-cara enda. * Kenca si e, sigunaken kari cara-cara enda gelah banci sidat pelajaren arah kai si terjadi man Raja Daud ras Rasul Paulus.

3. Sope lenga ibacandu Pustaka kai si arus ilakokenndu janah engkai?

 ³ (1) Ertoto. Sope lenga bacandu Pustaka pindolah penampat Jahwe gelah banci erguna kai si ibacandu e. Contohna, adi sangana idaramindu nasehat kerna uga ngadapi sada masalah, pindolah penampat Jahwe gelah banci tehndu prinsip-prinsip Pustaka kai si banci nampati kam erban keputusen.​—Pil. 4:6, 7; Jak. 1:5.

4. Kai si banci nampati kam gelah reh jelasna kai si bacandu bas Pustaka?

⁴ (2) Bayangken. Ibereken Jahwe man banta kengasupen si luar biasa guna mbayangken. Gelah banci reh jelasna kai si sangana ibacandu, cuba bayangken kai si terjadi i je janah bayangken ka kam jadi kalak si iceritaken i je. Usahakenlah ngenen kai si sangana inenna janah gejapkenlah kai si banci saja igejapkenna.

5. Kai ertina ngukuri janah uga carana gelah banci ukurindu kai si sangana ibacandu?

⁵ (3) Ukuri. Enda ertina ngukuri alu manjar-anjar kai si sangana bacandu e bage pe ngukuri uga keterangen si ibacandu e banci erguna man bandu. Enda nampati kam nggunaken perukurenndu ras ndatken terbagesen pengangkan kerna kai si sangana ibacandu. Mbaca Pustaka alu la ngukurisa banci ipeseri ras ngenen bagin-bagin bongkar pasang si itama i datas meja tapi la ipersada kerina bongkar pasang e. Adi iukurindu kai si sangana ibacandu, enda banci ipeseri ras mpersada kerina bagin-bagin bongkar pasang e. Alu bage, itehndu me gambar kai si lit bas bongkar pasang e. Gelah tersampati kam rukur, banci ibanndu penungkunen-penungkunen si bagenda sanga kam mbaca janah jawap penungkunen e: ‘Kai si ilakoken kalak bas cerita enda si banci nampati ia ndungi masalahna? Uga Jahwe nampati ia? Uga pelajaren enda banci nampati aku gelah ngasup ngadapi masalahku?’

6. Engkai maka arus sidalanken kai si enggo sipelajari?

⁶ (4) Dalanken. Ikataken Jesus adi la sidalanken kai si enggo sipelajari, kita bali bagi sekalak dilaki si mbangun rumahna i datas kersik. Sanga reh badai ras banjir ngentam rumah e, runtuh me rumah e. Sia-sia me kerja keras dilaki e bas mbangun rumahna. (Mat. 7:24-27) Si e pe banci terjadi sanga kita mbaca Pustaka. Amin gia enggo sitotoken, sibayangken, janah siukuri kai si sangana sipelajari, tapi adi la sidalanken sia-sia me kerina. Emaka, sanga reh masalah ntah pe tentangen si nguji kinitekenta la kita ngasup ngadapisa. Tapi adi sidalanken kai si enggo sipelajari, reh ulina me keputusenta, reh tenangna ukurta, janah reh paguhna kinitekenta. (Jes. 48:17, 18) Gundari, mari sibahas kai si banci sipelajari arah kai si terjadi man Raja Daud alu nggunaken empat cara si enggo sibahas ndai.

7. Ise nge si nandangi sibahas?

⁷ Lit nge temanndu ntah pe anggota keluargandu si erban kitik ukurndu? Adi lit, banci kam erlajar arah kai si ilakoken Raja Daud sanga anakna Absalom erban kitik ukurna janah usahakenna gelah ia si jadi raja.​—2 Sam. 15:5-14, 31; 18:6-14.

8. Kai si banci lakokenndu gelah datndu penampat Jahwe?

⁸ (1) Ertoto. Sope bacandu kejadin e, turikenlah man Jahwe uga perasanndu kerna perbahanen si la mehuli si iadapindu. (Ms. 6:6-9) Katakenlah man Jahwe uga kin situhuna perasanndu. Kenca si e, pindo man Jahwe gelah isampatiNa kam ngelakoken kai si arus ilakokenndu.

9. Kai si terjadi antara Daud ras Absalom?

⁹ (2) Bayangken. Ukuri kai si terjadi janah bayangken kai pengaruhna man Raja Daud.  Ertahun-tahun dekahna anak Daud eme Absalom erusaha gelah ngena ate rakyat ia. (2 Sam. 15:7) Sanga enggo pas iakap Absalom waktuna, isuruhna me mata-mata lawes ku belang-belang negri Israel guna nikapken rakyat gelah nggit ngalo-ngalo ia selaku raja. Selain si e, iusahaken Absalom ka mpengaruhi salah sada teman kompak Daud ras penasehatna si gelarna Ahitopel gelah ikut mberontak ras ia. Iumumken Absalom maka ia si jadi raja janah kenca si e iusahakenna nangkap Daud ras munuhsa. Banci jadi paksa si e sangana mekelek pinakit Daud. (Ms. 41:1-9) Kenca iteh Daud rencana Absalom e, kiam ia arah Jerusalem. Dungna terjadi me perang antara pasuken Absalom ras pasuken Daud si setia. Talu dungna pasuken si mberontak ndai janah Absalom pe mate.

10. Kai situhuna si banci saja ilakoken Raja Daud?

¹⁰ Kenca si e, bayangken uga perasan Raja Daud sanga ngadapi kai si terjadi man bana. Keleng atena Absalom janah tek ia man Ahitopel. Tapi ihianati kalak e ia. Getem kel pusuhna iban kalak e janah iusahaken kalak e ka munuh ia. Banci saja iakap Daud maka teman-temanna si deban pe enggo ikut mberontak ras Absalom janah lanai ia tek man kalak e. Banci saja sisada akapna ia janah kiam atena ku ingan si deban. Ntah banci saja kitik kel ukurna janah nyerah atena. Tapi labo bage perasan Daud. Sebalikna, iusahakenna ndungi masalah-masalah si mberat e. Engkai maka ia ngasup ngelakokenca?

11. Uga tanggapen Daud sanga ngadapi masalah si mberat?

¹¹ (3) Ukuri. Prinsip kai si banci ipelajarindu arah kai si terjadi man Raja Daud? Jawaplah penungkunen enda, “Kai si ilakoken Daud guna ngadapi masalahna?” Labo ia panik janah labo mis banna keputusen. Labo ka ia mbiarsa. Alu bage, itehna denga kai si arus ilakokenna. Emaka ertoto ia mindo penampat man Jahwe. Pindona ka penampat teman-temanna si banci nampati ia. Selain si e, keputusen si enggo ibanna mis idalankenna. Amin pe getem kel pusuhna paksa si e, tetap denga ia tek man kalak si deban janah ise pe la atena segat. Terus ia tek man Jahwe bage pe man teman-temanna.

12. Kai si ilakoken Jahwe guna nampati Daud?

¹² Kai si ilakoken Jahwe guna nampati Daud? Adi riset kam banci tehndu uga Jahwe mpegegehi Daud gelah ngasup ngadapi masalahna. (Ms. 3:1-8; superskripsi) Ipasu-pasu Jahwe keputusen si iban Daud. IsampatiNa ka teman-teman Daud si setia si erperang guna ngelindungi Raja Daud.

13. Uga kam banci ngusih Daud adi lit kalak si erban kitik kel ukurndu? (Matius 18:15-17)

¹³ (4) Dalanken. Sungkunlah bandu, ‘Uga caraku ngusih Daud?’ Mislah kam ertindak guna ndungi masalahndu. Adi cocok ras situasindu banci dalankenndu nasehat Jesus si icatat bas Matius pasal 18 ntah pe prinsip si lit i je. (Baca Matius 18:15-17.) Tapi ula mis banndu keputusen sanga kam merawa denga ntah pe sanga kitik ukurndu. Arus kam ertoto man Jahwe mindo ketenangen bage pe kepentaren gelah tehndu kai si perlu ilakokenndu. Teruslah kam tek man teman-temanndu, aloken penampat si iberekenna. (Kua. 17:17) Tapi si pentingna dalankenlah nasehat Jahwe si iberekenNa arah Pustaka.​—Kua. 3:5, 6.

14. Bas situasi si uga nge 2 Timotius 1:12-16; 4:6-11, 17-22, banci mpegegehi kam?

¹⁴ Sangana nge iadapindu tentangen arah anggota keluargandu? Bas negri inganndu tading, sangana nge ibatasi ntah pe ilarang  pendahin Saksi-Saksi Jahwe? Adi ue, banci saja terpegegehi kam alu mbaca 2 Timotius 1:12-16 ras 4:6-11, 17-22. * Ayat-ayat enda itulis Paulus sanga ia bas penjara.

15. Kai si banci totokenndu man Jahwe?

¹⁵ (1) Ertoto. Sope lenga bacandu ayat-ayat e, turikenlah man Jahwe kai masalahndu ras uga perasanndu kerna si e, turikenlah kerinana. Kenca si e, pindolah penampat Jahwe gelah tehndu prinsip-prinsip kai si banci datndu arah kai si terjadi man Paulus. Alu bage, tehndu kai si perlu ilakokenndu.

16. Kai si terjadi man Paulus?

¹⁶ (2) Bayangken. Bayangken kam bas situasi Paulus. Ia sangana irante bas penjara i Roma. Sebelumna, enggo pernah ia ipenjaraken, tapi sekalenda ia nandangi iukum mate. Piga-piga temanna pe enggo nadingken ia, janah latih kel akapna dagingna.​—2 Tim. 1:15.

17. Situhuna kai si banci saja ilakoken Paulus?

¹⁷ Situhuna, banci saja Paulus erpengakap maka bicara la min ndai ia semangat jadi kalak Kristen labo min ndai ia ipenjaraken. Banci saja kitik ukurna ngidah turang senina si tading bas daerah Asia si enggo nadingken ia. Banci saja lanai ka ia tek man teman-temanna si deban. Tapi Paulus labo bage. Engkai maka Paulus tek adi teman-temanna setia denga man bana janah iergai Jahwe kai si enggo ilakokenna?

18. Kai si ilakoken Paulus sanga ngadapi masalah si mberat?

¹⁸ (3) Ukuri. Jawaplah penungkunen enda, “Uga cara Paulus ngadapi masalahna?” Amin pe itehna ia nandangi iukum mate, tetap ingetna kai si pentingna eme mereken kepujin man Jahwe. Terus ka iukurina uga ia banci mpegegehi kalak si deban. Andalkenna kel Jahwe alu terus ertoto. (2 Tim. 1:3) Labo terus iukurina turang senina si enggo nadingken ia. Tapi, ngata bujur kel ia man teman-temanna si enggo nampati ia. Selain si e, terus ipelajari Paulus Kata Dibata. (2 Tim. 3:16, 17; 4:13) Si pentingna, tek ia maka Jahwe ras Jesus engkelengi ia. Jahwe ras Jesus lalap nemani ia ras ngergai kesetianna.

19. Uga cara Jahwe nampati Paulus?

¹⁹ Ikataken Jahwe man Paulus maka pasti ia ianiaya perban ia kalak Kristen. (Perb. 21:11-13) Uga cara Jahwe nampati Paulus? Ijawap Jahwe totona janah rusur ipegegehiNa Paulus. (2 Tim. 4:17) Ikataken ka man bana maka pasti ialokenna upah perban enggo kerja keras ia. Iban Jahwe ka tersuruh ukur teman-teman Paulus si setia guna nampati ia.

20. Uga carata ngusih kiniteken Paulus si icatat bas Roma 8:38, 39?

²⁰ (4) Dalanken. Sungkuni bandu, ‘Uga caraku ngusih Paulus?’ Bagi Paulus, siteh maka pasti kita ianiaya perban kita ngelayani Jahwe. (Mrk. 10:29, 30) Gelah banci kita tetap setia sanga ngadapi tentangen, perlu siandalken Jahwe alu ertoto janah ratur mpelajari Pustaka. Arus lalap siinget maka salah sada si pentingna si arus silakoken eme mere kepujin man Jahwe. Tek kita maka labo pernah itadingken Jahwe kita janah ise pe la lit si banci erban Jahwe lanai engkelengi kita.​—Baca Roma 8:38, 39; Heb. 13:5, 6.

21. Kai si nampati Aya ras Hector ngadapi masalahna?

²¹ Usihen-usihen si lit bas Pustaka banci nampati kita gelah ngasup ngadapi masalah kai pe. Aya, sekalak perintis si tading i Jepang ngataken maka cerita Juna nampati ia lanai mbiar erberita bas ingan si enterem jelma. Sekalak  anak muda si gelarna Hector si tading i Indonesia si orang tuana la ngelayani Jahwe ngataken maka contoh Rut erban ia merhat mpelajari kerna Jahwe ras ngelayani Ia.

22. Uga carana gelah datndu manpaat arah drama Pustaka ntah pe arah seri “Tirulah Iman Mereka”?

²² I ja banci datndu contoh-contoh si lit bas Pustaka si banci mpegegehi kam? Banci reh jelasna tehndu kejadin-kejadin si lit bas Pustaka arah video-videota, audio dramata, bage pe bas seri “Tirulah Iman Mereka”. * Sope lenga itontonndu, ibegikenndu, ntah pe ibacandu si e ndai kerina, pindolah penampat Jahwe gelah idatndu pelajaren penting si banci idalankenndu. Bayangken kam jadi kalak si sangana iceritaken. Ukuri kai si ilakoken umat Jahwe si setia e janah kai si banci nampati ia guna ngadapi masalahna. Kenca si e, dalankenlah kai si ipelajarindu. Ngata bujurlah kam man Jahwe perban enggo iberekenNa kam penampat. Buktiken pengatan bujurndu e alu ndarami cara guna mpegegehi ras nampati kalak si deban.

23. Menurut Jesaya 41:10, 13, kai janji Jahwe man banta?

²³ Mesera kegeluhenta perban doni enda ikuasai Setan, janah mon-mon e erbanca la siteh kai si arus silakoken. (2 Tim. 3:1) Tapi ula kita kuatir ntah pe mbiar. Iteh Jahwe kai si terjadi man banta. Sanga perlu kita penampat, erjanji Ia ncikep tanta alu tan kananNa si megegeh. (Baca Jesaya 41:10, 13.) Tek kel kita pasti isampati Jahwe kita janah arah Pustaka sidat gegeh gelah ngasup kita ngadapi masalahta.