1. Menurut Matius 24:9, engkai maka la kita sengget sanga segat ate doni enda kita?

ICIPTAKEN Jahwe kita guna engkelengi ras ikelengi. Emaka adi lit si rate segat man banta banci kitik ukurta janah banci saja mbiar kita. Contohna, sekalak turang seninata si tading bas Eropa si gelarna Georgina, ngataken, “Sanga umurku 14 tahun segat ate mamakku aku perban kulayani Jahwe. Kitik kel ukurku, sisada kuakap bangku, janah mulai kuakap aku kalak si la mehuli.” * Sekalak turang seninata si gelarna Danylo ngataken, “Sanga ipekpeki tentera aku, ihinana, janah iancamna perban aku Saksi Jahwe, mbiar kel aku janah irendahken kuakap aku.” Emaka, sanga segat ate kalak kita, latih kel ukurta. Tapi labo kita sengget sanga siadapi situasi si bage, perban enggo ikataken Jesus maka segat pagi ate doni enda kita.​—Baca Matius 24:9.

2-3. Engkai maka segat ate kalak pengikut Jesus?

² Segat ate doni enda pengikut Jesus. Engkai? Perban kita “lanai jadi bagin doni enda” bali bagi Jesus. (Joh. 15:17-19) Emaka, amin pe siergai pemerentah, la sidukung partai politik si apai pe, la kita angkat tangan sanga hormat bendera, ras la siendeken lagu kebangsan. Jahwe ngenca sisembah janah sidukung hakNa guna merentah umat manusia. Tapi Setan ras ‘keturunenna’ nentang hak Dibata e. (Kej. 3:1-5, 15) Siberitaken maka Kerajan Dibata ngenca si banci ndungi kerina masalah manusia janah kentisik nari ikernepken Kerajan e kerina kalak si nentang. (Dan. 2:44; Ket. 19:19-21) Enda berita si meriah  man kalak si meteruk ukur, tapi kalak jahat la kapna meriah megisa.​—Ms. 37:10, 11.

³ Segat ka ate doni enda kita perban siikutken patoken-patoken Dibata. Patoken Dibata kerna kai si benar ras kai si salah beda kel ras doni enda. Contohna, enterem kalak erpengakap maka labo salah ngelakoken perbahanen seks si salah bagi si ilakoken kalak bas Sodom ras Gomora si dungna ikernepken Dibata. (Jud. 7) Perban siikutken patoken Dibata kerna perbahanen si bage, enterem kalak nokoh-nokohi kita janah ikatakenna la siergai kalak si deban.​—1 Pet. 4:3, 4.

4. Kai saja si banci erban kita ngasup ngadapi kalak si rate segat man banta?

⁴ Kai si banci nampati kita gelah ngasup kita ngadapi kalak si rate segat ras si nokoh-nokohi kita? Perlu kita tuhu-tuhu tek maka pasti isampati Jahwe kita. Bali bagi perisai, kinitekenta banci ‘erban mate kerina anak panah si gara arah si jahat nari.’ (Ep. 6:16) Tapi erkiniteken saja labo bias. Perlu ka kita kekelengen. Engkai? Perban kekelengen “la nukah merawa.” E banci erban kita ngasup nggengken kai pe. (1 Kor. 13:4-7, 13) Gundari mari sibahas uga kekelengen man Jahwe, man turang senina, ras man musuh-musuhta banci erban kita ngasup ngadapi kalak si rate segat man banta.

5. Kai si ilakoken Jesus perban keleng atena Bapakna?

⁵ Bas berngi sope Jesus ibunuh musuh-musuhna, bagenda nina man murid-muridna, ‘Kulakoken kai si perentahken Bapak perban keleng ateku Bapak.’ (Joh. 14:31) Perban keleng ate Jesus Jahwe, ngasup ia ngadapi tentangen si mberat. Kita pe banci bage adi keleng ateta Jahwe.

6. Menurut Roma 5:3-5, uga perasan umat Jahwe sanga segat ate doni enda ia?

⁶ Ngasup lalap umat Dibata ngadapi penganiayan perban keleng atena Jahwe. Misalna, sanga iperentahken pengadilen agama Jahudi gelah rasul-rasul ngadi erberita, kekelengen man Dibata me si erban kalak e “patuhen man Dibata selaku penguasa asangken man manusia.” (Perb. 5:29; 1 Joh. 5:3) Kekelengen si bage ka me si erban turang seninata tetap setia amin pe ianiaya pemerentah alu kejam. Amin pe segat ate doni enda kita, labo kitik ukurta. Tapi tetap meriah ukurta.​—Perb. 5:41; baca Roma 5:3-5.

7. Uga arusna tanggapenta sanga itentang keluargata kita?

⁷ Salah sada tentangen si mberatna banci saja rehna arah anggota keluargata. Sanga sipelajari ateta kerna Jahwe, banci saja iakap piga-piga anggota keluargata kita enggo papak. Lit ka si erpengakap maka kita enggo adon. (Bandingken Markus 3:21.) Banci saja kasar kalak e man banta. Perbahanen si la mehuli e labo erban kita sengget perban pernah bagenda nina Jesus, “Musuh sekalak jelma eme kalak si lit bas rumahna.” (Mat. 10:36) Emaka amin pe la mehuli perbahanen keluargata man banta, labo segat ateta kalak e. Sebalikna, sanga reh kelengna ateta Jahwe, reh kelengna ka ateta kalak si deban. (Mat. 22:37-39) Tapi labo pernah kita nggit ngelanggar undang-undang Dibata ras prinsip-prinsipNa guna erban meriah ukur kalak.

8-9. Kai si nampati sekalak turang seninata gelah ngasup ngadapi tentangen si mberat?

⁸ Georgina si enggo ituriken ndai ngasup ngadapi tentangen si mberat arah mamakna. Nina Georgina, “Aku ras mamakku ras-ras erlajar Pustaka ras Saksi Jahwe. Tapi enem bulan kenca si e, sanga reh ateku ku perpulungen mulai me itentang mamakku aku. Enda  terjadi perban erteman ia ras kalak murtad janah rusur iceritakenna ajaren kalak e man bangku. Ihinana ka aku, irintakna bukku, icekakna aku, janah iambekkenna buku-bukuku. Kenca umurku 15 tahun, iperidiken me aku. Iusahaken mamakku gelah ngadi aku ngelayani Jahwe. Emaka tamana aku bas ingan man remaja-remaja diberu si gutul. Piga-piga diberu si lit i je nggunaken narkoba ras ngelakoken perbahanen si jahat. Mberat kel ngadapi tentangen si bage khususna adi e rehna arah kalak si arusna engkelengi ras ermediate man banta.”

⁹ Kai si nampati Georgina gelah ngasup ngadapi tentangen si bage? Nina, “Bas wari aku itentang mamakku, bas wari e ka dung kubaca kerina Pustaka. Gundari tek kel aku maka enggo kudat kebenaren janah rembak kel kuakap aku ras Jahwe. Rusur aku ertoto man baNa janah ibegikenNa aku. Sanga aku tading bas ingan man remaja-remaja diberu si gutul e, iundang sekalak turang senina aku ku rumahna janah ras-ras kami mpelajari Pustaka. Selain si e, rusur kel aku ipegegehi turang senina bas Bale Kerajan. Ibanna aku bagi keluargana. Jelas kuidah maka gegehen Jahwe asangken kalak si nentang kita la soal ise kalak e.”

10. Kai si banci lalap ilakoken Jahwe? Engkai kita tek kerna si e?

¹⁰ Itulis Rasul Paulus maka la lit si banci “nirangken kita arah kekelengen Dibata si buktikenNa arah Kristus Jesus Tuanta.” (Rom. 8:38, 39) Amin pe banci saja siadapi tentangen, pasti nge lalap ipegegehi Jahwe kita janah iapuliNa. Arah pengalamen Georgina ndai siteh maka Jahwe pe pasti nge nampati kita arah turang seninata bas runggun.

11. Kai asilna perban idalanken murid-murid kai si ikataken Jesus bas Johanes 15:12, 13? Bereken contohna.

¹¹ Bas berngi sope Jesus mate, iingetkenna murid-muridna gelah sikeleng-kelengen. (Baca Johanes 15:12, 13.) Itehna maka kekelengen si nggit erkorban banci nampati kalak e gelah tetap ersada janah ngasup ngadapi doni si rate segat man kalak e. Cuba ukuri kerna runggun si lit bas Tesalonika. Mulai kin tangtangna runggun e ibentuk, kalak e enggo ianiaya. Tapi turang senina si lit i je tetap setia janah sikeleng-kelengen. (1 Tes. 1:3, 6, 7) Iahken Paulus kalak e gelah terus sikeleng-kelengen janah “reh tutusna bas ndalankenca.”  (1 Tes. 4:9, 10) Kekelengen ngiahken kalak e ngapuli kalak si kitik ukurna janah nampati kalak si lemah. (1 Tes. 5:14) Ikutken kalak e nasehat Paulus e. Emaka, bas suratna si peduaken si itulisna setahun kenca si e, bagenda nina man kalak e, “Kekelengen kena man sada ras si debanna reh bagesna.” (2 Tes. 1:3-5) Kekelengen me si nampati kalak e gelah ngasup ngadapi tentangen si mberat ras penganiayan.

12. Sanga terjadi perang bas sada negri, uga turang seninata sikeleng-kelengen?

¹² Cuba ukuri pengalamen Danylo si ituriken ndai. Amin pe terjadi perang bas negrina, ia ras ndeharana terus reh ku perpulungen, erberita kalak e asa ngasupna, janah ibagikenna panganna man turang seninana. Bas sada wari, reh tentera si ersenjata ku rumahna. Nina Danylo, “Ipaksa kalak e aku gelah ngadi jadi Saksi Jahwe. Perban la aku nggit, ipekpekina aku janah tempa-tempa tembakna atena takalku. Sope kalak e lawes, iancamna aku maka reh ka pagi ia mulihi guna mperkosa ndeharaku. Kenca iteh turang senina kejadin e, mis ipenangkihna kami ku kereta api gelah pindah kami ku kota si deban. Labo pernah kulupaken kekelengen kalak e. Kenca seh kami bas kota si mbaru, turang senina si lit i je mere pangan man kami janah isampatina aku ndarami rumah ras dahin. Emaka sanga lit turang senina si kiam arah daerah perang ku kota kami, banci kubere ingan tading man kalak e.” Kekelengen si bage nampati kita ngasup ngadapi kalak si rate segat man banta.

13. Uga kesah si badia banci nampati kita tetap setia ngelayani Dibata sanga segat ate kalak kita?

¹³ Isuruh Jesus pengikutna guna engkelengi musuhna. (Mat. 5:44, 45) Menukah nge ngelakokenca? Pasti lang. Tapi banci keleng ateta musuhta adi isampati kesah si badia kita. Piga-piga sipat si ihasilken kesah si badia eme kekelengen, kesabaren, kiniulin, lembut, ras ngasup ngkuasai diri. (Gal. 5:22, 23) Sipat-sipat enda erban kita ngasup ngadapi kalak si rate segat man banta. Enterem kalak si nentang kita dungna berubah perban idahna perbulangenna, ndeharana, anak-anakna, ntah tetanggana ncidahken sipat-sipat si mehuli e ndai. Lit ka si enggo jadi turang seninata gundari. Emaka  adi mesera iakapndu engkelengi kalak si rate segat man bandu perban ilayanindu Jahwe, ertotolah mindo kesah si badia. (Luk. 11:13) Teklah kam maka cara si mehulina bas ngadapi si e ndai kerina eme terus patuh man Dibata.​—Kua. 3:5-7.

14-15. Uga Roma 12:17-21 nampati Yasmeen engkelengi perbulangenna si rate segat man bana?

¹⁴ Cuba ukuri kerna pengalamen Yasmeen si tading bas Timur Tengah. Sanga ia jadi Saksi Jahwe, iakap perbulangenna ia enggo itipu. Emaka usahaken perbulangenna gelah ngadi ia ngelayani Jahwe. Ihina perbulangenna ia janah ipengaruhina keluargana, pendeta, ras dukun guna ngancam ia janah nuduh ia enggo erban masalah bas keluargana. Pernah ka ihina perbulangenna e turang senina bas perpulungen. Rusur kel Yasmeen ngandung bas ngadapi situasi e kerina.

¹⁵ Bas Bale Kerajan, iapuli ras ipegegehi turang senina ia. Iahken pertua-pertua ia guna ndalanken nasehat si lit bas Roma 12:17-21. (Baca.) Nina Yasmeen, “Mesera kuakap ndalankenca. Tapi ertoto aku mindo penampat Jahwe janah kulakoken asa ngasupku ngelakoken kai si ikataken Pustaka. Emaka sanga sengaja iban perbulangenku melket dapur, mis kubersihken. Sanga ihinana aku, kualoi ia alu mehuli. Sanga sakit ia, ermediate aku man bana.”

16-17. Kai si banci ipelajarindu arah usihen si iban Yasmeen?

¹⁶ Dat Yasmeen ulihna perban keleng atena perbulangenna. Nina, “Enggo mulai reh tekna perbulangenku man bangku perban itehna maka labo aku nggit erbual. Sanga icakapken kami kerna agama, mulai atena tutus megiken aku janah setuju ia gelah usahaken kami erban dame bas rumah. Ikatakenna man bangku maka meriah akapna reh ku perpulungen. Gundari hubungenku ras perbulangenku enggo reh ulina janah rumah kami enggo dame. Ngarap aku gelah nggit ia ngaloken kebenaren janah ras-ras kami ngelayani Jahwe.”

¹⁷ Pengalamen Yasmeen mbuktiken maka kekelengen “ngasup nggengken kai pe, . . . tetap erpengarapen, janah sabar bas kai pe.” (1 Kor. 13:4, 7) Kekelengen ndauh gegehen asangken ate segat. Kekelengen banci ngubah pusuh ras perukuren janah kekelengen banci erban meriah ukur Jahwe. Tapi, amin pe segat ate musuhta kita, banci kita tetap ermeriah ukur. Engkai maka banci bage?

18. Engkai maka banci meriah ukurta amin pe segat ate kalak kita?

¹⁸ Nina Jesus, “Ermeriah ukurlah kena adi segat ate kalak kena.” (Luk. 6:22) Labo siarapken gelah segat ate kalak kita. Labo meriah ukurta adi ianiaya kita perban kinitekenta. Adi bage, engkai maka banci meriah ukurta sanga segat ate kalak kita? Cuba ukuri telu alasen enda. Si pertama, adi ngasup kita ngadapi kalak si rate segat man banta, enggo siban meriah ukur Dibata. (1 Pet. 4:13, 14) Si peduaken, kinitekenta jadi teruji janah reh paguhna. (1 Pet. 1:7) Si peteluken, sialoken pagi upah si seh kel ergana eme kegeluhen si rasa lalap.​—Rom. 2:6, 7.

19. Engkai maka meriah ukur rasul-rasul kenca iligasi?

¹⁹ La ndekah kenca Jesus ipekeke, igejapken rasul-rasul keriahen ukur bagi si ikataken Jesus. Kenca kalak e iligasi janah ilarang erberita, meriah ukur kalak e. Engkai? “Perban enggo metunggung ia akap Dibata ihina bas gelar Jesus.” (Perb. 5:40-42) Belinen kekelengen kalak e man Tuanna asangken kebiarenna man musuh-musuhna. Ibuktiken kalak e kekelengenna alu “terus” mberitaken berita si meriah. Gundari, enterem turang seninata terus setia ngelayani Jahwe amin pe ngadapi tentangen. Iteh kalak e maka labo ilupaken Jahwe kai si enggo ilakokenna bage pe kekelengen si enggo icidahkenna guna gelarNa.​—Heb. 6:10.

20. Kai kari sibahas bas artikel seterusna?

²⁰ Adi doni enda lenga ikernepken, terus denga nge kari segat atena kita. (Joh. 15:19) Tapi la kita perlu mbiar. Bagi si nandangi sibahas bas artikel seterusna, ‘pegegehi Jahwe ras lindungiNa’ kalak si setia man baNa. (2 Tes. 3:3) Emaka, mari terus sikelengi Jahwe, turang seninata, ras musuh-musuhta. Adi sidalanken nasehat e, tetap me kita ersada, kinitekenta reh paguhna, simuliaken Jahwe, janah sibuktiken maka ndauh gegehen kekelengen asangken ate segat.