1-2. Ise saja si banci nampati kalak si erlajar Pustaka gelah banci iperidiken?

NINA Amy si tading i Fiji, “Meriah kuakap mpelajari Pustaka, kuteh maka e kebenaren. Tapi kenca mulai aku erteman ras turang senina, e nampati aku erban perubahen gelah banci iperidiken.” Lit pelajaren si penting si banci sidat arah pengalamen Amy e. Kai e? Kalak si erlajar Pustaka banci maju secara rohani ras iperidiken adi datna penampat arah kalak si deban bas runggun.

² Kerina perberita banci nampati kalak si mbaru denga erlajar Pustaka jadi bagin arah runggun. (Ep. 4:16) Sekalak perintis si gelarna Leilani si tading i Vanuatu ngataken, “Iperluken sada kuta guna mpebelin sekalak anak. Kuakap enda pe bali bagi erban murid. Iperluken ka sada runggun guna nampati kalak meteh kerna kebenaren.” Anggota keluarga, teman-teman, ras guru sekolah kerina ikut nampati sekalak anak jadi dewasa. Uga carana? Eme alu mereken semangat ras ngajari anak e pelajaren si penting. Kerina perberita pe banci mereken nasehat, semangat, ras usihen si mehuli man kalak si erlajar Pustaka gelah banci iperidiken.​—Kua. 15:22.

3. Kai si banci ipelajarindu arah kata-kata Ana, Dorin, ras Leilani?

³ Engkai maka kalak si mandu pelajaren Pustaka arus ngajak perberita si deban sanga ngajarken Pustaka? Perdiateken kai nina Ana sekalak perintis istimewa i Moldova, “Mbue kel si iperluken kalak si erlajar Pustaka janah pasti mesera kel adi si  ngajarken Pustaka ngenca si nikapken si e kerina.” Nina Dorin sekalak perintis istimewa si tading bas ingan si seri, “Rusur ikataken perberita si deban kai si lenga pernah kuukuri, janah kai si ikatakenna e kena kel ku pusuh kalak si erlajar.” Nina Leilani ka, “Sanga igejapken kalak si erlajar kekelengen turang senina, banci dungna tehna maka kita umat Jahwe.”​—Joh. 13:35.

4. Kai nge kari sibahas bas artikel enda?

⁴ Banci jadi tersungkun-sungkun kam, ‘Kai si banci kulakoken guna nampati kalak si erlajar Pustaka amin pe labo aku si ngajari ia?’ Mari sibahas kai si banci silakoken sanga iajak kalak kita ikut ngajarken Pustaka ras kai si banci silakoken sanga si erlajar Pustaka mulai reh ku perpulungen. Sibahas ka kari uga pertua-pertua nampati si erlajar Pustaka maju secara rohani gelah banci iperidiken.

5. Kai si arus ilakokenndu sanga ikut kam nemani kalak si ngajarken Pustaka?

⁵ Sanga lit kalak si erlajar Pustaka, si utamana ertanggung jawap nampati si erlajar e ngangkai Kata Dibata eme si ngajari ia Pustaka. Adi ikut kam nemani kalak si ngajarken Pustaka, arus iangkandu maka baginndu eme nampati si ngajarken Pustaka e. (Peng. 4:9, 10) Kai si banci lakokenndu guna nampatisa?

6. Sanga ikut kam nemani kalak si ngajarken Pustaka, uga nge carandu makeken prinsip si lit bas Kuan-kuanen 20:18?

⁶ Ban persiapen guna kalak si erlajar Pustaka. Si pertama, sungkunlah man si ngajarken Pustaka kerna kalak si erlajar e. (Baca Kuan-kuanen 20:18.) Banci sungkunndu ia: “Uga nge latar belakangna? Topik kai si nandangi ibahasndu ras ia? Pelajaren kai nge atendu iajarkenndu man bana arah topik e? Lit nge si arus ras si la banci kulakoken? Lit nge si arus kukataken ras si la banci kukataken? Kai nge si banci kulakoken guna ngiahken ia gelah maju secara rohani?” Biasana labo iceritaken si ngajarken Pustaka e informasi si rahasia tapi si erguna man bandu nge iceritakenna. Kenca ibahas sekalak utusen injil si gelarna Joy kerna si e ras kalak si nemani ia ngajarken Pustaka, nina, “Tersuruh me ukur kalak si nemani aku guna nampati kalak si erlajar janah tehna kai si arus ikatakenna sanga erlajar.”

7. Engkai maka perlu banndu persiapen sanga ikut kam nemani kalak si ngajarken Pustaka?

⁷ Adi ikut kam nemani kalak si ngajarken Pustaka, pasti mehuli hasilna adi persiapkenndu lebe bahan si nandangi ibahas. (Esa. 7:10) Nina Dorin si iceritaken ndai, “Mehuli kel hasilna adi temanku erberita erban persiapen sope erlajar. Alu bage banci ipesehna komentar si erguna man si erlajar Pustaka.” Selain si e, banci idah si erlajar Pustaka maka kena  duana erban persiapen si mehuli, janah enda jadi usihen si mehuli man bana. Amin pe la banci persiapkenndu kerina bahan si nandangi ibahas, silang-langna usahakenlah meteh kai pelajaren utamana.

8. Uga carandu mastikenca maka toto si pesehndu sanga ngajarken Pustaka jelas tujunna?

⁸ Toto eme bagin si penting arah pelajaren Pustaka. Emaka ukurkenlah lebe kai atendu si ipesehndu adi ipindo kam si ertoto. Alu bage, toto si pesehndu banci jelas tujunna. (Ms. 141:2) Hanae si tading i Jepang, ingetna denga toto si ipeseh sekalak turang senina si nemani kalak si ngajari ia Pustaka. Nina Hanae, “Kugejapken maka rembak kel ia ras Jahwe. Aku pe merhat bagi ia. Selain si e, kugejapken maka keleng atena aku sanga ibelaskenna gelarku bas totona.”

9. Menurut Jakup 1:19, kai si banci ilakokenndu sanga ikut kam ngajarken Pustaka?

⁹ Sampatilah si ngajarken Pustaka. Sekalak perintis istimewa arah Nigeria nari si gelarna Omamuyovbi ngataken, “Adi tutus ate temanta mbegiken sanga siajarken Pustaka, banci berena komentar si erguna. Tapi labo mbuesa ia ngerana, perban tehna maka si ertanggung jawap bas pelajaren e eme si ngajarken Pustaka.” Uga carandu metehsa ndigan arus ngerana ras kai si arus ikatakenndu sanga ikut kam ngajarken Pustaka? (Kua. 25:11) Tutuslah atendu megiken sanga si ngajarken Pustaka ercakap-cakap ras si erlajar e. (Baca Jakup 1:19.) Alu bage banci tehndu ndigan waktu si tepat guna nampati. Tapi perlu ukurindu lebe sope kam ngerana. Contohna, pasti labo atendu mbuesa ngerana, ntah pe ngerana kam sanga si ngajarken Pustaka ngerana denga janah labo pesehndu topik si beda. Tapi banci perjelasndu pelajaren si sangana ibahas alu komentar si singkat, alu perumpaman, ras penungkunen. Selain si e, banci jadi la akapndu mbue si banci pesehndu man si erlajar e, tapi adi pujindu ia ras ergaindu usahana pasti tersampati kel ia gelah maju secara rohani.

10. Uga pengalamenndu banci nampati kalak si erlajar Pustaka?

¹⁰ Ceritakenlah pengalamenndu. Adi ceritakenndu pengalamenndu kerna uga kam mpelajari kebenaren, uga carandu ngadapi tentangen, ras uga cara Jahwe nampati kam, enda banci erguna man si erlajar Pustaka. (Ms. 78:4, 7) Banci jadi pengalamenndu e me si sangana iperlukenna. Pengalamenndu e pe banci ka mpegegehi kinitekenna ntah pe erban ia semangat terus maju secara rohani gelah banci iperidiken. Arah pengalamenndu e pe banci saja itehna uga carana ngadapi tentangen si sangana iadapina. (1 Pet. 5:9) Sekalak perintis si tading i Brasil, si gelarna Gabriel, ingetna kai si nampati ia sanga ia erlajar Pustaka denga. Nina, “Sanga kubegi pengalamen turang  senina, kuteh me maka idah Jahwe tentangen si sangana siadapi. Adi kalak e pe ngasup ngadapisa, aku pe pasti ngasup.”

11-12. Sanga reh si erlajar Pustaka ku perpulungen, engkai maka arus sialo-alo alu mehuli?

¹¹ Gelah si erlajar Pustaka banci maju secara rohani ras iperidiken, arus ia ratur reh ku perpulungen janah usahakenna gelah erguna perpulungen e man bana. (Heb. 10:24, 25) Biasana si ngajarken Pustaka me si tangtangna ngundang ia reh ku perpulungen. Sanga reh ia ku perpulungen kerina kita banci ngiahken ia gelah terus reh ku perpulungen.

¹² Alo-alolah kalak si erlajar Pustaka alu mehuli. (Rom. 15:7) Adi mehuli pengalo-ngalota man kalak si erlajar Pustaka si reh ku perpulungen, enda banci erban tersuruh ukurna guna terus reh ku perpulungen. Ula siban la entabeh kapna, sialo-alolah ia alu mehuli, petandaken ka ia man turang senina si deban. Ercakap-cakaplah kam ras ia, perban banci jadi si ngajari ia Pustaka lenga reh ntah pe sangana sibuk. Begiken ia alu tutus janah ermediatelah man bana. Kai nge pengaruhna adi sialo-alo ia alu mehuli? Perdiateken pengalamen Dmitrii si enggo iperidiken piga-piga tahun si lewat janah gundari enggo jadi sinampati runggun. Bagenda nina kerna uga perasanna sanga tangtangna ia reh ku perpulungen, “Sanga idah sekalak turang senina aku nimai i lebe-lebe Bale Kerajan, mis idahina aku ras temanina aku masuk ku Bale Kerajan. Melala si ngalo-ngalo aku. Sengget kel aku. Meriah kel ukurku janah merhat aku reh tiap minggu. La pernah kugejapken si bage bas ingan si deban.”

13. Kai nge pengaruh perbahanenndu man kalak si erlajar Pustaka?

¹³ Banlah usihen si mehuli. Perbahanenndu banci nampati si erlajar Pustaka tek maka enggo datna kebenaren. (Mat. 5:16) Sekalak perintis si ngelayani i Moldova si gelarna Vitalii ngataken, “Kuperdiateken uga perbahanen ras perukuren kalak si lit bas runggun. Enda erban aku reh tekna maka Saksi-Saksi Jahwe me agama si benar.”

14. Uga maka usihen si mehuli si ibanndu banci nampati si erlajar Pustaka maju secara rohani?

¹⁴ Gelah si erlajar Pustaka banci iperidiken arus dalankenna kai si ipelajarina. Enda labo lalap menukah! Tapi sanga idah si erlajar Pustaka manpaat si datndu perban ndalanken prinsip Pustaka, enda banci ngiahken ia ngusih kam. (1 Kor. 11:1) Perdiateken pengalamen Hanae si enggo ituriken ndai, nina, “Iban turang senina usihen si mehuli man bangku. Kuidah uga cara kalak e mpegegehi, ngampuni, ras engkelengi, janah kuusih ateku. Lalap icakapken kalak e si mehuli kerna kalak si deban. Merhat aku ngusih kalak e.”

15. Uga Kuan-kuanen 27:17 nampati kita guna meteh engkai maka kita arus erteman ras kalak si erlajar Pustaka si enggo ratur reh ku perpulungen?

 ¹⁵ Ertemanlah ras si erlajar Pustaka. Sanga si erlajar Pustaka terus reh ku perpulungen, teruslah ermediate man bana. (Pil. 2:4) Usahakenlah nandai ia terdeheren. Tapi ula campuri urusen pribadina. Pujiken ia perban perubahen si mehuli si ibanna. Sungkuni kerna pelajaren Pustakana, keluargana, ntah pe dahinna. Percakapen si bage banci erban kena reh deherna. Sanga kam enggo jadi temanna banci sampatindu ia gelah maju secara rohani ras iperidiken. (Baca Kuan-kuanen 27:17.) Hanae gundari enggo jadi perintis biasa. Bagenda perasanna sanga tangtangna ia reh ku perpulungen, nina, “Perban enggo erteman aku ras turang senina bas runggun reh riahna kuakap reh ku perpulungen. Amin pe latih kuakap kuusahaken reh ku perpulungen. Meriah kuakap erteman ras temanku si mbaru. Enda nampati aku gelah lanai erteman ras kalak si la nembah Jahwe. Reh rembakna ateku ras Jahwe bage pe turang senina. Dungna kuban keputusen gelah iperidiken.”

16. Kai deba nari si banci lakokenndu guna nampati kalak si erlajar Pustaka gelah igejapna maka ia enggo bagin arah runggun?

¹⁶ Sanga kalak si erlajar Pustaka erban perubahen, sampatilah ia gelah igejapna maka ia enggo jadi bagin arah runggun. Uga carana? Rusurlah ban waktundu ras ia. (Heb. 13:2) Sekalak turang senina si gelarna Denis, si ngelayani i Moldova, ngataken, “Sanga aku erlajar Pustaka denga mbarenda, lit piga-piga kali kami iundang turang senina ku acara ramah tamah. Paksa si e, ceritaken kalak e uga Jahwe enggo nampati ia janah e mpegegehi kami. Kesempaten si bage erban kami reh merhatna ngelayani Jahwe. Tek kami maka pasti reh riahna kegeluhen kami adi ngelayani Jahwe.” Sanga kalak si erlajar Pustaka enggo ncukupi syarat guna erberita banci ka ajakndu ia erberita. Sekalak perberita si gelarna Diego arah Brasil nari ngataken, “Enterem turang senina si ngajak aku erberita. Enda cara si mehuli kel kuakap guna nandai kalak e terdeheren. Melala si banci kupelajari arah kalak e janah reh rembakna kuakap aku ras Jahwe bage pe Jesus.”

17. Uga pertua-pertua banci nampati kalak si erlajar Pustaka?

¹⁷ Banlah waktundu ras kalak si erlajar Pustaka. Pertua-pertua, adi keleng atendu kalak si erlajar ras ermediate kam man bana, banci sampatindu kalak e maju secara rohani ras iperidiken. Banci nge ratur banndu waktundu guna ngerana ras kalak e bas perpulungen? Teh kalak e kam ermediate adi ingetndu gelarna, khususna sanga mulai ia mere komentar. Banci nge aturndu waktundu gelah rusur kam  ikut nampati ia erlajar Pustaka? Banci jadi mbelin kel pengaruhna man kalak si erlajar e, lebihen asangken si banci ibayangkenndu. Sekalak perintis si gelarna Jackie si tading i Nigeria ngataken, “Enterem kalak si erlajar Pustaka sengget sanga itehna maka turang senina si nemani aku eme sekalak pertua. Salah sada kalak si erlajar Pustaka ngataken, ‘Pastorku la pernah nggit reh nampati aku erlajar Pustaka. Si dahina kalak si bayak ngenca ras si nggit nggalari ia.’” Kalak si erlajar e gundari enggo reh ku perpulungen.

18. Uga pertua-pertua ndalanken tanggung jawapna bagi si icatat bas Perbahanen Rasul-Rasul 20:28?

¹⁸ Latihlah ras pegegehilah kalak si ngajarken Pustaka. Pertua-pertua, mbelin kel tanggung jawapndu bas nampati perberita gelah reh beluhna bas erberita ras ngajar. (Baca Perbahanen Rasul-Rasul 20:28.) Adi lit perberita si mela mandu pelajaren Pustaka perban lit kam i je, tawarkenlah gelah kam si mandu pelajaren e. Jackie si ituriken ndai ngataken, “Ratur kel pertua-pertua nungkuni aku kerna kalak si kusampati erlajar Pustaka. Sanga kudat tentangen bas nampati kalak si erlajar Pustaka, ibere kalak e nasehat si erguna man bangku.” Melala kel si banci ilakoken pertua-pertua guna mpegegehi perberita si nampati kalak mpelajari Pustaka. (1 Tes. 5:11) Nina Jackie ka, “Meriah kel kuakap sanga ipegegehi pertua aku janah kataken kalak e maka ergaina kerja kerasku. Kata-kata si bage mpebelin pusuhku kel, e bali bagi lau mbergeh bas wari si melas. Sanga ipuji kalak e aku, reh tetapna ukurku ras reh tambahna keriahen ukurku bas nampati kalak erlajar Pustaka.”​—Kua. 25:25.

19. Engkai maka kita kerina banci ermeriah ukur?

¹⁹ Amin pe la kita banci ikut bas nampati kalak si erlajar Pustaka, lit denga si banci silakoken guna nampati kalak e gelah iperidiken. Sanga ikut kam nampati bas ngajarken Pustaka, ula mbuesa ngerana. Pesehlah komentar si enggo persiapkenndu alu mehuli guna nampati perberita e. Ertemanlah ras kalak si erlajar sanga reh kalak e ku perpulungen. Berekenlah usihen si mehuli man bana. Pertua-pertua banci mpegegehi kalak si erlajar alu erban waktu ras kalak e janah banci ka pegegehi kalak e si ngajarken Pustaka alu ngelatih ras mereken pujin man kalak e. Meriah kel ukurta banci nampati kalak engkelengi ras ngelayani Jahwe amin pe sitik ngenca si banci silakoken.