1. Engkai maka ipindo Jesus gelah ilindungi Jahwe murid-muridna?

BAS berngi terakhir sope Jesus ibunuh, ukurina kerna tentangen si pasti pagi iadapi murid-muridna. Perban keleng atena teman-temanna e, ipindo Jesus man Jahwe gelah ‘ijagaNa kalak e arah si jahat nari.’ (Joh. 17:14, 15) Teh Jesus maka la ndekah kenca ia nangkih ku surga, terus pagi iserang Setan kalak si atena ngelayani Jahwe. Emaka umat Jahwe perlu ilindungi.

2. Kai si erban kita tek maka pasti ijawap Jahwe totota?

² Ijawab Jahwe toto Jesus perban keleng ateNa anakNa e. Emaka adi siusahaken asa ngasupta erban meriah ukur Jahwe, pasti ka keleng ateNa kita. IbegikenNa totota sanga sipindo gelah isampatiNa ras ilindungiNa kita. Perban Jahwe Kepala keluarga si perkeleng, lalap perdiatekenNa anak-anak si ikelengiNa. Adi la bage banNa, ceda me gelarNa.

3. Engkai maka perlu kita perlindungen arah Jahwe gundari?

³ Perlu kita perlindungen arah Jahwe lebihen asangken si enggo-enggona. Perban Setan enggo iambekken arah surga nari, “merawa kel ia.” (Ket. 12:12) Usahaken Setan gelah kalak si nentang kita erpengakap maka enggo lakokenna “pelayanen si badia.” (Joh. 16:2) Selain si e, kalak si la tek man Dibata nentang kita perban la kita nggit seri ras doni enda. La soal kai si erban kita itentang, la kita perlu mbiar. Engkai? Perban bagenda nina Kata Dibata, “Tuan setia kap, janah pegegehina ras lindungina kena arah si jahat nari.” (2 Tes. 3:3) Uga cara Jahwe ngelindungi kita? Mari sibahas dua carana.

4. Menurut Epesus 6:13-17, kai si enggo ibereken Jahwe guna ngelindungi kita?

⁴ Enggo ibereken Jahwe perlengkapen perang guna ngelindungi kita arah serangen Setan nari. (Baca Epesus 6:13-17.) Perlengkapen perang arah Dibata e megegeh janah erguna. Tapi gelah perlengkapen perang e banci ngelindungi kita arus sipake kerina. Kai saja nge perlengkapen perang e? Mari sibahas sada per sada.

5. Kai ertina ikat pinggang kebenaren ras engkai maka arus sipake?

⁵ Ikat pinggang kebenaren eme kebenaren si lit bas Pustaka. Engkai maka arus sipake ikat pinggang e? Perban Setan e “bapak kalak si perbual.” (Joh. 8:44) Enggo lit ribun tahun dekahna ia erbual janah enggo isesatkenna “kerina kalak si tading i doni.” (Ket. 12:9) Tapi kebenaren arah Pustaka banci ngelindungi kita arah bual e. Uga carata make ikat pinggang e? Carana eme alu mpelajari kebenaren kerna Jahwe, nembah Ia “alu penegu-negu kesah si badia ras kebenaren,” janah jujur i bas kai pe.​—Joh. 4:24; Ep. 4:25; Heb. 13:18.

6. Kai ertina pelindung dada ras engkai maka arus sipake?

⁶ Pelindung dada eme patoken-patoken Jahwe si benar. Engkai maka arus sipake pelindung dada e? Bali bagi pelindung dada banci ngelindungi jantung sekalak prajurit, pelindung dada arah Dibata pe banci ngelindungi pusuhta arah pengaruh doni si jahat enda. (Kua. 4:23) Iarapken Jahwe gelah sikelengi ras silayani Ia alu bulat ukur. (Mat. 22:36, 37) Emaka usahaken Setan gelah lanai bulat ukurta ngelayani Jahwe janah usahakenna gelah keleng ateta kai si itawarken doni enda, eme kai si segat ate Jahwe. (Jak. 4:4; 1 Joh. 2:15, 16) Adi cara e la berhasil, ianiayana kita gelah silakoken kai si segat ate Jahwe.

7. Uga carata make pelindung dada?

⁷ Sipake pelindung dada e alu matuhi patoken-patoken Jahwe kerna si benar ras si salah. (Ms. 97:10) Banci jadi lit kalak si erpengakap maka patoken-patoken arah Jahwe erban ia lanai bebas. Tapi adi lanai sidalanken prinsip-prinsip Pustaka bas geluhta, kita enggo bali bagi sekalak prajurit si lanai pakena pelindung dadana sanga erperang, perban mberatsa akapna pelindung dada e. Motu kel perbahanenna e! Tapi perban keleng ateta Jahwe “labo mberat” siakap ndalanken perentah-perentahNa, janah e banci nelamatken kegeluhen.​—1 Joh. 5:3.

8. Kai nge ertina sipake sepatu si jadi tanda maka kita enggo ersikap guna mberitaken berita si meriah?

⁸ Iahken Paulus kita gelah sipake sepatu si jadi tanda maka kita enggo ersikap guna mberitaken berita si meriah kerna kedamen. Sanga siberitaken berita si meriah man kalak si deban, kinitekenta pe reh paguhna. Tuhu-tuhu terpegegehi kel kita ngidah uga umat Jahwe i sebelang doni erusaha ndarami kesempaten guna erberita bas ingan erdahin, bas sekolah, bas daerah bisnis, arah rumah ku rumah, bas ingan belanja, sanga ndahi keluarga si la sada kiniteken, bage pe man kalak si tandaina. Adi ngadi kita erberita perban mbiar, kita bali bagi sekalak prajurit si ngelepasken sepatuna sanga erperang, si erban nahena nukah terluka. Akibatna, la banci ibelana dirina sanga iserang musuh janah la banci ikutkenna perentah komandanna.

9. Kai maksudna perisai si galang janah engkai maka perlu sipake?

⁹ Perisai si galang eme kiniteken man Jahwe. Tek kita maka pasti itepati Jahwe kerina janjiNa. Kiniteken si bage nampati kita gelah banci ‘simateken kerina anak panah si gara arah si jahat nari.’ Engkai maka arus sipake perisai si galang e? Perban e banci ngelindungi kita  arah ajaren kalak murtad nari ras erban kita la mbiar sanga lit si nokohi kinitekenta. Adi la kita erkiniteken, la kita ngasup ngadapi kalak si erusaha erban kita lanai patuh man Jahwe. Tapi, adi la kita nggit ngelakoken kai si la ngena ate Jahwe la soal bas sekolah ntah pe bas ingan dahin, kinitekenta enggo ngelindungi kita. (1 Pet. 3:15) Adi la sialoken dahin si galang gajina si banci erban kita lanai mere si mehulina bas ngelayani Jahwe, kinitekenta enggo ngelindungi kita. (Heb. 13:5, 6) Adi terus silayani Jahwe amin pe lit tentangen, kinitekenta enggo ngelindungi kita.​—1 Tes. 2:2.

10. Kai ertina pelindung takal ras engkai maka arus sipake?

¹⁰ Pelindung takal eme keselamaten. Enda maksudna arapen si bere Jahwe man banta. Arapen e bereNa man kerina kalak si ngelakoken peratenNa. Amin pe kita mate pasti nge kita ipekekeNa. (1 Tes. 5:8; 1 Tim. 4:10; Tit. 1:1, 2) Bali bagi pelindung takal sekalak prajurit, arapen keselamaten banci ngelindungi carata rukur. Uga carana? Arapen banci nampati kita gelah terus siukuri janji-janji Dibata janah la kita kuatirsa sanga lit masalah. Uga carata make pelindung takal e? Carana eme alu terus siusahaken gelah carata rukur  bali bagi cara rukur Dibata. Misalna, erpengarapen kita man Dibata labo man kebayaken si la pasti.​—Ms. 26:2; 104:34; 1 Tim. 6:17.

11. Kai pedang roh e janah engkai maka perlu sigunaken?

¹¹ Pedang si bereken kesah si badia eme Kata Dibata. Pedang e lit kuasana guna ncidahken bual kai pe ras banci mbebasken kalak arah ajaren si salah bage pe kebiasan si la mehuli. (2 Kor. 10:4, 5; 2 Tim. 3:16, 17; Heb. 4:12) Uga carana gelah beluh kita make pedang e alu cara si mehuli? Perlu siban pelajaren pribadi ras sialoken pelatihen arah organisasi Dibata. (2 Tim. 2:15) Selain perlengkapen perang, bere Jahwe ka penampat si deban guna ngelindungi kita. Kai e?

12. Penampat kai deba nari si bere Jahwe man banta, janah engkai maka kita perlu penampat e?

¹² Sekalak prajurit si enggo mbue pengalamenna, itehna maka labo ia banci menang ngadapi pasuken si mbelin adi sisada ia, perlu ia penampat arah prajurit si deban. Kita pe la banci menang ngelawan Setan ras pengikutna adi sisada kita ngelawanca. Perlu kita penampat arah turang seninata. Enggo bere Jahwe jutan prajurit si nampati kita. Kalak e eme ‘temanta sada kiniteken’ si lit i belang-belang doni.​—1 Pet. 2:17.

13. Menurut Heber 10:24, 25, kai manpaatna adi reh kita ku perpulungen?

¹³ Salah sada carana gelah sidat penampat Jahwe eme alu reh ku perpulungen. (Baca Heber 10:24, 25.) Kerina kita pasti pernah kitik ukurta. Tapi terpegegehi kita sanga reh ku perpulungen. Terpegegehi kita arah komentar si ipeseh turang seninata alu bulat ukur. Khotbah si erpalasken Pustaka ras pertunjuken-pertunjuken si iban bas perpulungen ngiahken kita gelah terus ngelayani Jahwe. Selain si e, terpegegehi ka kita sanga ercakap-cakap ras turang seninata sope ras kenca perpulungen. (1 Tes. 5:14) Bas perpulungen pe lit kesempatenta nampati si deban janah e erban meriah ukurta. (Perb. 20:35; Rom. 1:11, 12) Lit ka manpaat si deban si banci sidat arah perpulungen. Contohna, kerna uga cara nggunaken publikasita si lit bas Alat-Alat Pengajarenta. Emaka sope kam reh ku perpulungen banlah persiapen alu mehuli. Sanga bas perpulungen tutuslah atendu mbegikenca. Kenca dung perpulungen dalankenlah pelatihen si enggo alokenndu. Alu bage, banci kam jadi “prajurit Kristus si mehuli.”​—2 Tim. 2:3.

14. Penampat kai si ibereken man banta?

¹⁴ Sidat ka penampat si deban arah jutan malekat si megegeh. Cuba ukuri kai si banci ilakoken sada malekat saja! (Jes. 37:36) Gundari cuba ukuri kai si banci ilakoken sada pasuken malekat. La lit manusia ntah pe begu-begu si banci menang ngelawan pasuken Jahwe si megegeh e. Pasti lalap kita gegehen asangken musuhta la soal uga teremna kalak e adi Jahwe ras kita, perban Jahwe e seh kel gegehna. (Hak. 6:16) Tek kel kita kerna si e! Emaka teruslah ukuri kerina si banci nampati kam sanga kitik ukurndu iban teman sada dahinndu, teman sekolahndu, ntah pe anggota keluargandu si la sada kiniteken. Ingetlah maka labo kam sisada ngadapisa adi ikutkenndu petunjuk Jahwe.

15. Menurut Jesaya 54:15, 17, engkai maka la lit si banci mpengadi umat Dibata bas erberita si meriah?

¹⁵ Melala si erbanca maka segat ate doni Setan enda kita. Engkai? Perban tetap kita netral secara politik, la kita nggit ikut erperang, siberitaken kerna gelar Dibata, siumumken maka Kerajan Dibata ngenca si banci  erban dame doni enda, janah patuh kita man patoken-patoken Dibata si benar. Selain si e, sibuktiken maka penguasa doni enda eme si jahat, ia perbual ras pembunuh. (Joh. 8:44) Siumumken ka maka kentisik nari ikernepken me doni Setan enda. Amin pe Setan seh kel gegehna, berita kerna Kerajan Dibata pasti seh ku sebelang doni, labo banci ipengadina. Setan ras pengikutna asa ndigan pe la ngasup mpengadi dahin erberita e. Emaka, banci terus sipuji Jahwe alu cara kai pe si ngasup kita ngelakokenca. Enda banci terjadi perban ilindungi Jahwe kita.​—Baca Jesaya 54:15, 17.

16. Uga Jahwe nelamatken umatNa sanga terjadi pagi kiniseran si mbelin?

¹⁶ Kai si nandangi terjadi? Sanga terjadi kiniseran si mbelin, iselamatken Jahwe pagi kita alu dua cara si luar biasa. Si pertama, iselamatken Jahwe umatNa si setia sanga ibanNa tersuruh ukur raja-raja bas doni enda guna ngkernepken Babilon si Mbelin eme kerina agama palsu. (Ket. 17:16-18; 18:2, 4) Si peduaken, iselamatken Jahwe umatNa sanga kernepkenNa bagin si lit denga arah doni Setan enda bas Harmagedon.​—Ket. 7:9, 10; 16:14, 16.

17. Kai manpaatna adi rembak kita ras Jahwe?

¹⁷ Adi tetap kita rembak ras Jahwe la lit si banci ilakoken doni Setan enda guna ngkernepken kita seh rasa lalap. Situhuna, Setan nge pagi si ikernepken seh rasa lalap. (Rom. 16:20) Emaka pakelah kerina perlengkapen perang arah Dibata, ula pernah lepasken. Ula usahakenndu sisada ngelawan Setan ras doni enda. Dukunglah turang seninandu. Ikutkenlah petunjuk arah Jahwe. Adi bage banndu, banci kam tek maka Bapakndu si perkeleng si lit i surga pasti mpegegehi ras ngelindungi kam.​—Jes. 41:10.