Lit kalak Kristen si nggunaken aplikasi si bage guna ercakap-cakap ras keluargana bage pe ras turang seninana si sada kiniteken. Tapi kalak Kristen si paguh kinitekenna ingetna nasehat enda: “Kalak cerdik cebuni ia adi idahna bahaya, tapi kalak si la erpengalamen teruskenna erdalan, dungna datna akibatna.”​—Kua. 27:12.

Siteh maka nasehat e ibereken perban ilindungi Jahwe ateNa kita. Emaka la kita nggit erteman ras kalak si meriah akapna erban perpecahen, si ipedarat arah runggun, ntah pe si meriah akapna mpeseh ajaren palsu. (Rom. 16:17; 1 Kor. 5:11; 2 Joh. 10, 11) Selain si e, lit kalak bas runggun si perbahanenna banci saja la cocok ras ajaren Pustaka. (2 Tim. 2:20, 21) Emaka arus kita hati-hati sanga milih teman. Tapi banci saja mesera milih teman si mehuli arah aplikasi guna ngirim pesan singkat.

Arus kita hati-hati khususna sanga ngerana-ngerana bas grup chatting si enterem kel anggotana. Sayang kel, lit kalak Kristen si ngenanami akibat si la mehuli perban ikut bas grup si bage. Lit grup si anggotana seh ngasa ratusen ntah pe ribun kalak. Adi lit sekalak turang senina si ikut bas grup si bage galangna, pasti mesera iakapna ndarami teman si mehuli. Perban la mungkin tehna uga kin situhuna kalak si lit i je ras keadan rohanina. Masmur 26:4 ngataken, “La aku erteman ras penipu, la aku nggit ndeher ras kalak si bunikenna ise ia situhuna.” Jelas me, ulin adi kita ngerana-ngerana arah aplikasi guna ngirim pesan singkat ras kalak si enggo sitandai.

Aminna pe sitik ngenca anggota bas grup e, kalak Kristen arus tetap hati-hati bas nggunaken waktu bage pe milih topik si man cakapenken. Pasti la kita nggit mpekeri-keri waktuta ngerana-ngerana arah aplikasi guna ngirim pesan singkat. Selain si e, ula ka siakap maka arus sibalas kerina pesan si masuk la soal kai si sangana icakapken i je. Paulus mpersingeti Timotius gelah hati-hati nandangi ‘kalak si meriah kapna cikurak ras ncampuri urusen kalak.’ (1 Tim. 5:13) Kita pe perlu siikuti nasehat enda sanga nggunaken aplikasi guna ngirim pesan singkat.

Kalak Kristen si paguh kinitekenna pe la nggit mpebelang ntah pe megiken komentar si la mehuli ras keterangen si rahasia kerna turang seninana. (Ms. 15:3; Kua. 20:19) La ka kalak e tertarik man berita ntah pe cerita si enterem kalak ncakapkenca bage pe man laporen si lenga tentu benar, terlebih ka mpesehsa man kalak si deban. (Ep. 4:25) Situhuna melala pangan rohani ras berita si banci terteki bas situs web jw.org bage pe bas acara JW Broadcasting^®.

Piga-piga turang seninata make aplikasi si bage guna erbinaga, nukur barang, ras nawarken barang ntah pe pendahin. Kerinana e urusen bisnis si la lit hubungenna ras ibadahta man Jahwe. Perban la ateta jadi kalak Kristen si “mata duiten,” la si manpaatken turang seninata gelah banci kita runtung.​—Heb. 13:5.

Adi lit turang seninata si sangana susah iakapna ntah pe kena bencana, perlu nge sipepulung sumbangen man kalak e arah aplikasi guna ngirim pesan singkat? Keleng ateta turang seninata janah ermediate kita man kalak e. Emaka sisampati janah sipegegehi ateta kalak si sangana ngenanami masalah. (Jak. 2:15, 16) Tapi adi sigunaken grup chatting si enterem kel anggotana guna mpepulung penampat, banci saja sicampuri pengaturen si enggo iban kantor cabang ntah pe runggun setempat. (1 Tim. 5:3, 4, 9, 10, 16) Kita pe pasti la ateta erban kalak erpengakap maka lit tugasta si khusus guna nampati turang seninata.

Silakoken ateta kai pe guna kemulian Dibata. (1 Kor. 10:31) Emaka sanga sigunaken aplikasi si bage ntah pe teknologi si deban, ukuri kai saja bahayana janah tetaplah hati-hati.