1. Kai berita si meriah si aloken kalak Jahudi si itaban?

 PAKSA si e, meriah kel ukur kalak Jahudi. Iban Dibata Jahwe “tersuruh ukur Kores raja Persia” guna mbebasken kalak Israel si enggo puluhen tahun itaban i Babilon. Umumken raja maka kalak Jahudi banci mulih ku kutana janah banci ‘bangun kalak e mulihi rumah Jahwe Dibata Israel.’ (Esa. 1:1, 3) Enda tuhu-tuhu berita si meriah! E ertina banci isembah kalak Jahudi mulihi Dibata si benar bas negri si enggo ibereken man kalak e.

2. Kenca kalak Jahudi si itaban mulih ku Jerusalem, kai si berhasil ilakoken kalak e?

² Bas tahun 537 SM, kelompok si pertama arah kalak Jahudi si itaban seh i Jerusalem, eme ibu kota kerajan Juda si lit i selatan. Kenca seh i je, mis kalak e erdahin guna mbangun rumah pertoton. Janah bas tahun 536 SM, enggo dung ban kalak e pondasina!

3. Kai nge tentangen si adapi kalak Jahudi?

³ Kenca ibenaken kalak Jahudi mbangun mulihi rumah pertoton, enterem kalak si mulai nentang kalak e. Bangsa-bangsa si lit i sekeliling kalak e ‘terus usahakenna gelah kitik ukur kalak Juda janah lanai semangat mbangunsa.’ (Esa. 4:4) Kenca si e, reh serana keadan kalak e. Bas tahun 522 SM, Artasasta me si jadi raja i Persia. * Imanpaatken penentang-penentang perubahen e guna mpengadi pembangunen rumah pertoton. Iban kalak e “masalah alu make undang-undang.” (Ms. 94:20) Ikirim kalak e surat man Raja Artasasta janah ikataken kalak e maka mberontak ate  kalak Jahudi ngelawan raja. (Esa. 4:11-16) Tek raja man bual kalak e. Ilarang raja me pembangunen rumah pertoton. (Esa. 4:17-23) Perban si e, ngadi me kalak Jahudi mbangun rumah pertoton.​—Esa. 4:24.

4. Kai si ilakoken Jahwe kenca pembangunen rumah pertoton ilarang? (Jesaya 55:11)

⁴ Kalak si tading bas negri e si la nembah Jahwe ras piga-piga pejabat Persia usahakenna kel mpengadi pembangunen rumah pertoton e. Tapi ate Jahwe, idungi kalak Jahudi min pembangunen e, janah lalap isehkenNa sura-suraNa. (Baca Jesaya 55:11.) IpilihNa Sakaria, dilaki si perpang jadi nabiNa. BerekenNa waluh pengenehenen si luar biasa man bana. Kenca si e, ikataken Sakaria man kalak Jahudi kerna pengenehenen e guna mpegegehi kalak e. Pengenehenen e nampati kalak Jahudi gelah ula nai mbiar man musuh-musuh kalak e ras ngiahken kalak e gelah terus ngelakoken dahin si isuruh Jahwe. Bas pengenehenen si pelimaken, idah Sakaria ingan lampu ras dua batang saitun.

5. Kai kari sibahas bas artikel enda?

⁵ Kerina kita pasti pernah la semangat. Emaka banci sidat gunana adi siukuri kata-kata Jahwe man kalak Israel erkelangken pengenehenen Sakaria si pelimaken. Adi siangkai pengenehenen e, banci nampati kita gelah tetap setia ngelayani Jahwe sanga lit tentangen, sanga lit perubahen, bage pe sanga sialoken petunjuk si la jelas kel siangkai.

6. Uga pengenehenen kerna ingan lampu ras dua batang saitun si iceritaken bas Sakaria 4:1-3, mpegegehi kalak Jahudi? (Nen gambar sampul.)

⁶ Baca Sakaria 4:1-3. Pengenehenen kerna ingan lampu ras dua batang saitun erban kalak Jahudi pang ngadapi tentangen. Engkai? Banci nge idahndu maka lalap maler minak ku ingan lampu e? Minak arah duana batang saitun maler ku sada mangkok si lit i datas ingan lampu e. Emaka, pituna lampu e banci tetap gara perban la keri-keri minakna. Dung e, nungkun Sakaria, “Kai nge ertina kerina e?” Ijawap malekat e ia alu mpeseh pesan Jahwe enda, “‘Labo alu gegeh pasuken perang ntah pe alu gegeh manusia, tapi alu kesah si badiaKu,’ nina Jahwe penguasa malekat.” (Sak. 4:4, 6) Minak arah batang saitun e nggambarken kesah si badia Jahwe si seh kel gegehna ras la banci keri. Kesah si badia ndauh gegehen asangken pasuken kalak Persia. Pasti banci idungi kalak e pembangunen e amin pe lit tentangen perban isampati Jahwe kalak si mbangun rumah pertoton e. Berita enda tuhu-tuhu mpegegehi! Si perlu ilakoken kalak e eme tek man Jahwe ras mulihi erdahin. Bage me si ilakoken kalak e amin pe pembangunen e tetap denga ilarang.

7. Perubahen kai si terjadi si nampati pembangunen rumah pertoton?

⁷ Lit perubahen si terjadi si nampati kalak si mbangun rumah pertoton. Perubahen kai e? Bas tahun 520 SM, merentah me raja Darius I i bas Persia. Bas tahun peduaken pemerentahenna, itehna maka pembangunen rumah pertoton e situhuna labo banci ilarang. Emaka, iperentahken Darius gelah pembangunen e idungi. (Esa. 6:1-3) Sengget kel kerina kalak megi keputusen raja e, tapi labo e ngenca si ilakoken raja. Iperentahkenna ka gelah kerina bangsa-bangsa i sekeliling Jerusalem ngadi ngganggu pembangunen rumah pertoton e. Janah suruhna gelah  ibereken kalak e sen ras kerina si iperluken kalak e guna ndungi pendahin e! (Esa. 6:7-12) Hasilna, rumah pertoton e dung ibangun kalak Jahudi bas tahun 515 SM.​—Esa. 6:15.

8. Engkai maka la perlu kita mbiar sanga ngadapi tentangen?

⁸ Gundari pe, enterem umat Jahwe si ngadapi tentangen. Contohna, lit umat Jahwe si tading bas ingan si pemerentahenna ngelarang pendahinta. Bas ingan si bage, banci saja lit turang seninata si itangkap ras ‘ibaba ku lebe-lebe gubernur-gubernur ras raja-raja’ janah e jadi kesaksin man pejabat-pejabat i je. (Mat. 10:17, 18) Mon-mon, lit perubahen bas pemerentahen. Ntah, lit hakim si mehuli erban keputusen si erban umat Jahwe reh bebasna nembah Dibata. Bas ingan si deban, lit turang senina si bebas nembah Jahwe, tapi arus denga iadapi kalak e tentangen arah keluargana si ngusahaken gelah ngadi kalak e nembah Dibata. (Mat. 10:32-36) Biasana, adi la banci ipengadi kalak e kita nembah Jahwe, lanai kita itentangna. Selain si e, lit kalak si tangtangna kejam kel nentang keluargana, dungna jadi umat Jahwe si semangat. Emaka, sanga siadapi tentangen, ula kita nyerah! Tetaplah kita perpang. Ula kita mbiar, sebap Jahwe ras kesah si badiaNa lalap nampati kita!

9. Engkai maka lit kalak Jahudi si sedih ngidah pondasi rumah pertoton si mbaru e?

⁹ Kenca dung pondasi rumah pertoton e ibangun, lit kalak Jahudi si enggo metua si nderkuh ngidahsa. (Esa. 3:12) Enggo pernah idah kalak e rumah pertoton si luar biasa si ibangun Salomo. Emaka “labo lit ertina” akap kalak e rumah pertoton si mbaru e adi ibandingken si mbarenda. (Hag. 2:2, 3) Sedih kel kap kalak e perban ibanding-bandingkenna duana rumah pertoton e. Tapi, pengenehenen Sakaria banci nampati kalak e gelah mulihi ermeriah ukur. Uga carana?

10. Engkai maka kata-kata malekat si icatat bas Sakaria 4:8-10 banci nampati kalak Jahudi gelah mulihi ermeriah ukur?

¹⁰ Baca Sakaria 4:8-10. Kai maksud malekat sanga katakenna man kalak Jahudi maka “ermeriah ukur pagi kalak e, idah kalak e pagi [gubernur kalak Jahudi] Serubabel njemak alat pengukur tegak lurus”? Alat pengukur tegak lurus banci  nampati kita meteh sada benda ntah pe ingan tegak ntah pe lurus. Isampati malekat e umat Dibata gelah tek maka amin pe rumah pertoton e sederhana, tapi rumah pertoton e pasti dung ibangun janah sesuai ras sura-sura Jahwe. Meriah ukur Jahwe ngidah rumah pertoton e, emaka kalak Jahudi pe arusna meriah ukurna. Si penting akap Jahwe eme banci isembah kalak Jahudi Ia bas rumah pertoton e alu cara si benar. Adi fokus kalak Jahudi nembah Jahwe alu cara si benar ras ndarami ngena ate Jahwe, pasti kalak e banci ermeriah ukur mulihi.

11. Kai tentangen si adapi piga-piga umat Jahwe gundari?

¹¹ Enterem arah kita, mesera siakap ngadapi perubahen. Lit umat Jahwe si enggo ndekah ngelayani bas pelayanen sepenuh waktu khusus, tapi datna tugas si mbaru. Lit ka si meriah kapna ngelakoken tugasna gundari, tapi arus ia ngadi perban enggo metua. Wajar nge adi kecewa kita sanga ngadapi perubahen si bage. Tangtangna, banci saja la siangkai ntah pe la kita setuju nandangi perubahen e. Ntah pe banci saja tedeh ateta ngelakoken tugasta si mbarenda. Ntah, banci saja kitik ukurta janah lanai siakap banci melala silakoken man Jahwe. (Kua. 24:10) Uga pengenehenen Sakaria banci nampati kita gelah tetap mereken si mehulina man Dibata?

12. Uga pengenehenen Sakaria banci nampati kita gelah tetap ermeriah ukur amin pe terjadi perubahen?

¹² Reh nukahna siakap ngadapi perubahen adi siusahaken ngusih perukuren Jahwe. Gundari, mbue perbahanen si luar biasa ilakoken Jahwe janah luar biasa kel siakap banci jadi temanNa erdahin. (1 Kor. 3:9) Tugasta banci saja berubah, tapi kekelengen Jahwe man banta la pernah berubah. Emaka, adi perubahen bas organisasi langsung erpengaruh man banta, ula ndekahsa siukuri kai alasenna maka iban perubahen e. Asangken siukuri lalap “si mbarenda,” pangen sipindo gelah isampati Jahwe kita ngenen si mehuli arah perubahen e. (Peng. 7:10) Asangken ngukuri kai si la banci silakoken, ukurilah kai si banci silakoken. Arah pengenehenen Sakaria, sidat pelajaren maka penting kel lalap positip perukurenta. Alu bage, banci kita tetap ermeriah ukur, ras setia man Jahwe amin pe terjadi perubahen.

13. Engkai maka keputusen guna mbangun mulihi rumah pertoton la cocok akap piga-piga kalak Jahudi?

¹³ Bagi si enggo sibahas, tangtangna pembangunen rumah pertoton e ilarang. Amin pe bage, kalak si ipilih guna minpin pendahin e eme Imam si Mbelin Jesua (Josua) ras Gubernur Serubabel “mulai mbangun rumah Dibata.” (Esa. 5:1, 2) Keputusen e la cocok iakap piga-piga kalak Jahudi. Adi bangun kalak Jahudi rumah pertoton e, pasti banci idah musuh-musuh janah iteh kalak e maka musuh-musuh kalak e pasti ngelakoken kai pe guna mpengadi pendahin e. Emaka, Josua ras Serubabel perlu isampati gelah tek maka idukung Jahwe nge kalak e. Uga pengenehenen Sakaria banci nampati kalak e?

14. Bagi si ikataken bas Sakaria 4:12, 14, kai si mpetetap ukur Imam si Mbelin Josua ras Gubernur Serubabel?

¹⁴ Baca Sakaria 4:12, 14. Bas pengenehenen Sakaria e, icidahken malekat Dibata lit dua batang saitun si nggambarken “dua kalak si ipilih” eme Josua ras Serubabel. Ikataken malekat e maka duana dilaki e tempa-tempa “tedis i deher Tuhan si erkuasa i belang-belang doni,” eme Jahwe. Luar biasa kel si e! E buktina tek Jahwe man kalak e. Emaka, kalak Israel pe arus tek man petunjuk si ikataken kalak e, perban igunaken Jahwe duana kalak e guna minpin umatNa.

15. Uga carata ngergai petunjuk Jahwe si lit bas Pustaka?

¹⁵ Salah sada cara Jahwe terus mereken petunjuk man umatNa gundari eme arah KataNa, Pustaka. Bas buku si badia e, iturikenNa uga cara si ngena ateNa bas nembah Ia. Uga carata mbuktiken maka siergai petunjuk si enggo sialoken arah Kata Dibata? Perlu siban waktuta guna mbacasa ras siusahaken ngangkaisa. Banci siukuri penungkunen enda, ‘Sanga kubaca Pustaka ntah pe publikasi, kuukuri nge kai si kubaca e? Kuusahaken nge ngangkai kebenaren Pustaka si “mesera ngangkaisa”? Ntah, gelah enggo kubaca saja ngenca?’ (2 Pet. 3:16) Adi siban waktuta guna ngukuri kai si iajarken Jahwe man banta, banci siikutken petunjukNa janah silakoken dahin erberita.​—1 Tim. 4:15, 16.

16. Sanga sialoken petunjuk si la jelas kel siangkai arah “budak si setia ras pentar,” kai si banci nampati kita ndalankenca?

 ¹⁶ Selain arah Pustaka, ibereken Jahwe ka petunjuk arah “budak si setia ras pentar.” (Mat. 24:45) Mon-mon, ibereken kalak e petunjuk si la jelas kel siangkai. Contohna, banci saja sialoken petunjuk guna ngadapi bencana alam, tapi banci saja bencana e la siakap mungkin terjadi bas daerahta. Ntah, banci saja lebihsa siakap petunjuk si bereken kalak e sanga ngadapi pandemi. Kai si arus silakoken adi kurang cocok siakap petunjuk si bereken kalak e? Banci siukuri manpaat si idatken kalak Israel sanga dalanken kalak e petunjuk si ibereken Josua ras Serubabel. Banci ka siukuri cataten si deban si lit bas Pustaka si enggo pernah sibaca. Mon-mon, banci saja ialoken umat Dibata petunjuk si la masuk akal akap kalak e, tapi e banci nelamatken geluh kalak e.​—Hak. 7:7; 8:10.

17. Kai gunana pengenehenen Sakaria si pelimaken man kalak Jahudi?

¹⁷ Pengenehenen si pelimaken si dat Sakaria memang gendek. Tapi pengenehenen e mereken semangat man kalak Jahudi gelah erdahin mulihi bage pe nembah Jahwe. Selain si e, sanga ipakeken kalak e pelajaren si datna arah pengenehenen Sakaria, igejapken kalak e maka itegu-tegu Jahwe ras isampatiNa kalak e alu cara si perkeleng. Alu penampat kesah si badia Jahwe, banci iterusken kalak e pendahinna ras mulihi ka ermeriah ukur.​—Esa. 6:16.

18. Kai saja gunana pengenehenen Sakaria man banta?

¹⁸ Melala kel sidat gunana adi siukuri pengenehenen Sakaria kerna ingan lampu ras dua batang saitun. Bagi si enggo sibahas ndai, pengenehenen e banci nampati kita gelah ngasup ngadapi tentangen, tetap ermeriah ukur sanga lit perubahen, ras tetap tek man budak si setia sanga lit petunjuk si la jelas kel siangkai. Emaka, adi sangana siadapi tentangen, kai si perlu silakoken? Si pertama, siusahakenlah ngenen kai si idah Sakaria, eme kerna bukti maka labo pernah itadingken Jahwe umatNa. Selain si e, siandalkenlah Jahwe janah terus sisembah Ia alu bulat ukur. (Mat. 22:37) Adi bage siban, pasti sampati Jahwe kita gelah terus ermeriah ukur ngelayani Ia.​—Kol. 1:10, 11.