1-2. Engkai maka la perlu kitik ukurndu amin pe lenga kam siap iperidiken? (Nen gambar sampul.)

 ADI lit sura-surandu guna iperidiken, enggo ibanndu cita-cita si luar biasa. Enggo nge kam siap iperidiken? Adi enggo, janah pertua-pertua pe enggo setuju, ula kam ragu guna iperidiken. Adi iperidiken kam, banci pagi datndu melala pasu-pasu bas ngelayani Jahwe.

² Tapi, uga adi lit si ngataken man bandu maka perlu denga kam erban kemajun gelah banci iperidiken? Ntah, kam sendiri nge si sadar kerna si e? Adi bage, ula kitik ukurndu. Banci nge terus banndu kemajun seh ngasa banci kam iperidiken, la soal kam nguda denga ntah pe enggo metua.

3. Kai si ikataken sekalak pejabat Etiopia man Pilipus, janah penungkunen kai si turah? (Perbahanen Rasul-Rasul 8:36, 38)

³ Baca Perbahanen Rasul-Rasul 8:36, 38. Sekalak pejabat Etiopia nungkun man Pilipus sekalak perberita si meriah. Nina, “Engkai maka la iperidiken saja aku?” Merhat pejabat e iperidiken, tapi enggo nge ia tuhu-tuhu siap iperidiken?

4. Kai buktina tutus ate pejabat Etiopia e terus erlajar?

⁴ Pejabat Etiopia e ‘lawes ku Jerusalem guna nembah Dibata.’ (Perb. 8:27) Pasti enggo ganti agama ia janah gundari agamana agama kalak Jahudi. Pasti enggo pelajarina kerna Jahwe arah Kitap-Kitap Heber. Tapi merhat denga ia mpelajari terbuen. Kai buktina? Sanga jumpa Pilipus ras pejabat e bas dalan, ia sangana mbaca sada gulungen si itulis Nabi Jesaya. (Perb. 8:28) Isi gulungen e eme kebenaren si mbages arah Kata Dibata. Lenga puas  akap pejabat e terjeng mpelajari ajaren dasar. Merhat denga ia mpelajari terbuen.

5. Kai nge si ilakoken pejabat Etiopia nandangi kai si ipelajarina?

⁵ Dilaki e pejabat si penting bas pemerentahen Kandake, ratu arah Etiopia, janah “ia si ngurus kerina erta ratu.” (Perb. 8:27) Emaka pasti sibuk kel ia. Tapi, ibanna waktuna guna nembah Jahwe. Labo ia puas terjeng mpelajari kebenaren, tapi lakokenna kai si pelajarina. Emaka berkat ia arah Etiopia nari ku rumah pertoton i Jerusalem guna nembah Jahwe. Pasti mbue waktu ras biaya guna perdalanen e, tapi nggit ia ngelakokenca perban merhat ia nembah Jahwe.

6-7. Kai si erban reh belinna kekelengen pejabat Etiopia e man Jahwe?

⁶ Isampati Pilipus pejabat e mpelajari piga-piga kebenaren si penting, termasuk kerna ise kin Mesias e. (Perb. 8:34, 35) Pasti kena kel ku pusuh pejabat e sanga tehna kai si enggo ilakoken Jesus man bana. Kai nge si lakokenna kenca tehna kerna si e? Situhuna, banci nge ia bagi si sedekah enda, ihamati, janah agamana agama kalak Jahudi. Tapi perban keleng atena Jahwe ras AnakNa, teriahken ia erban keputusen si penting, eme iperidiken jadi murid Jesus Kristus. Idah Pilipus maka enggo siap pejabat e iperidiken, emaka iperidiken me ia.

⁷ Adi usihndu pejabat Etiopia e, banci kam siap guna iperidiken. Banci ka kam pang ngataken, “Engkai maka la iperidiken saja aku?” Mari sibahas uga kam banci ngusih kai si ilakoken pejabat e. Terus ia erlajar, ilakokenna kai si pelajarina, janah terus pebelinna kekelengenna man Dibata.

8. Menurut Johanes 17:3, kai si arus ilakokenndu?

⁸ Baca Johanes 17:3 ras cataten i teruh. Payo nge kata-kata Jesus e ngiahken kam guna erlajar Pustaka? Enterem arah kita bage. Kata-kata e pe ngiahken kita guna terus erlajar. Labo pernah kita ngadi erusaha ‘nandai Dibata situhu-tuhu.’ (Peng. 3:11) Terus pagi kita erlajar seh rasa lalap. Reh buena sipelajari kerna Jahwe, reh rembakna kita ras Ia.​—Ms. 73:28.

9. Kai si perlu silakoken kenca sipelajari ajaren dasar bas Pustaka?

⁹ Sanga mulai sipelajari kerna Jahwe, e ertina ajaren dasar Pustaka ngenca si enggo siteh. Bas surat Rasul Paulus man kalak Heber, pernah ikatakenna kerna  “ajaren dasar.” Tapi, labo anggapna “ajaren dasar” e la penting. Ikatakenna maka e bali bagi susu si erban bayi reh galangna. (Heb. 5:12; 6:1) Emaka, iahkenna kerina kalak Kristen guna mpelajari terbagesen kebenaren bas Kata Dibata. Terus nge usahakenndu mpelajari terbagesen ajaren Pustaka? Nggit nge kam terus reh majuna alu mpelajari kerna Jahwe ras peratenNa?

10. Engkai maka lit kalak si mesera kapna erlajar?

¹⁰ Enterem kalak si mesera kapna erlajar. Adi kam uga? Enggo nge pelajarindu cara mbaca ras erlajar si mehuli bas sekolah? Meriah nge kapndu erlajar janah datndu nge gunana? Ntah, la kapndu kam beluh erlajar arah buku-buku? Adi bage si gejapkenndu, labo kam ngenca si bage. Teklah kam maka banci kam isampati Jahwe. Ia sempurna janah Ia me Guru si mehulina.

11. Kai buktina Jahwe ‘Guru Si Mulia’?

¹¹ Ikataken Jahwe diriNa ‘Guru Si Mulia.’ (Jes. 30:20, 21) Ia Guru si sabar, mehuli, ras erpengangka. DaramiNa kai si mehuli bas murid-muridNa. (Ms. 130:3) La pernah arapkenNa lebihen asa si ngasup silakoken. Ingetlah maka Jahwe si nciptaken otakta, pemere si luar biasa. (Ms. 139:14) Lit bas kita sura-sura guna erlajar perban bage kin kita iciptaken. Ate Penciptata terus min kita erlajar seh rasa lalap janah meriah siakap ngelakokenca. Emaka seh kel ulina ‘mpebelin sura-sura’ guna mpelajari kebenaren bas Pustaka mulai gundari nari. (1 Pet. 2:2) Banlah cita-cita si banci datkenndu janah raturlah kam mbaca ras mpelajari Pustaka. (Jos. 1:8) Alu penampat Jahwe, banci reh riahna kapndu mbaca ras mpelajari terbuen kerna Ia.

12. Engkai maka perlu sipelajari kegeluhen ras pelayanen Jesus?

¹² Perlu ratur siukuri kerna kegeluhen ras pelayanen Jesus. Adi ngelayani Jahwe ateta, perlu siusih Jesus, terlebih bas masa-masa si susah enda. (1 Pet. 2:21) Kataken Jesus man murid-muridna maka adapi kalak e pagi tentangen. (Luk. 14:27, 28) Tapi, tek ia maka murid-muridna banci setia man Dibata, bagi si enggo lakokenna. (Joh. 16:33) Emaka, pelajarilah kerna kegeluhen Jesus janah usahakenlah ngusih ia tiap wari.

13. Kai si perlu terus sipindo man Jahwe, ras engkai?

¹³ Sanga kita erlajar, tujunta labo ngenca ndatken pemeteh. Tujunta si pentingna eme nandai Jahwe ras mpebelin sipat-sipat bagi kekelengen ras tek man baNa. (1 Kor. 8:1-3) Emaka, sanga kam erlajar, teruslah pindo man Jahwe gelah reh paguhna kinitekenndu. (Luk. 17:5) Meriah ukur Jahwe njawap toto si bage. Adi paguh kinitekenndu perban pemeteh si benar kerna Dibatata, pasti banci kam reh majuna secara rohani.​—Jak. 2:26.

14. Uga Rasul Petrus ngajarken maka penting kel ndalanken kai si enggo sipelajari? (Nen ka gambar.)

¹⁴ Ikataken Rasul Petrus maka pengikut Kristus arus ndalanken kai si ipelajarina. Iturikenna kerna Nuah si icatat bas Pustaka. Ikataken Jahwe man Nuah maka ikernepkenNa ateNa kalak jahat alu banjir si mbelin. Adi Nuah ras keluargana terjeng meteh kerna Banjir si Mbelin si nandangi reh e janah la lakokenna kai pe,  labo banci kalak e selamat. Tapi, cuba perdiateken maka Petrus sangana ncakapken kerna kai si terjadi sope reh Banjir e eme “sanga bahtra ibangun.” (1 Pet. 3:20) Payo, idalanken Nuah ras keluargana kai si ipelajarina alu mbangun sada bahtra si galang. (Heb. 11:7) Selain si e, ipeseri Petrus kai si ilakoken Nuah ras peridin. Bagenda itulisna, “Kejadin e nggambarken peridin si nelamatken kena gundari.” (1 Pet. 3:21) Emaka kai si ilakokenndu gelah banci iperidiken, banci ipeseri ras si ilakoken Nuah ras keluargana sanga mbangun bahtra ertahun-tahun dekahna. Kai si perlu ilakokenndu gelah siap kam iperidiken?

15. Kai buktina maka kita tuhu-tuhu ertobat?

¹⁵ Salah sada si arus silakoken eme tuhu-tuhu ertobat arah dosa-dosata. (Perb. 2:37, 38) Adi tuhu-tuhu kita ertobat, pasti siban perubahen bas geluhta. Enggo nge pengadindu kebiasan si segat ate Jahwe, bagi ngelakoken perbahanen seks si salah, nggunaken mbako, nggunaken cakap kotor ntah pe cakap kasar? (1 Kor. 6:9, 10; 2 Kor. 7:1; Ep. 4:29) Adi lenga, teruslah usahaken erban perubahen. Cakapkenlah ras kalak si ngajarken Pustaka man bandu, ntah pindolah penampat ras petunjuk man pertua-pertua bas runggun. Adi kam nguda denga janah tading denga ras orang tua, pindolah penampat arah kalak e guna mpengadi kebiasan si la mehuli. Alu bage, banci kam dungna iperidiken.

16. Kai saja si termasuk bas kebiasan rohani si mehuli?

¹⁶ Penting kel ngelakoken kebiasan rohani si mehuli. Enda termasuk reh ku perpulungen ras ikut mereken komentar. (Heb. 10:24, 25) Adi enggo ncukupi syarat kam jadi perberita, raturlah kam erberita. Reh rusurna kam erberita, reh riahna me kapndu ngelakokenca. (2 Tim. 4:5) Adi kam nguda denga janah tading ras orang tua, cuba ukuri penungkunen enda: ‘Perlu denga nge ingetken orang tuaku aku guna perpulungen ntah pe erberita? Ntah, enggo nge kulakoken si e amin pe la isuruh-suruh?’  Alu ngelakoken si e arah ukurndu nari, enggo buktikenndu kinitekenndu, kekelengenndu, ras pengerganndu man Jahwe. Kegiaten rohani si ibanndu eme persembahenndu man Jahwe si mbuktiken maka enggo berendu geluhndu man baNa. (2 Pet. 3:11; Heb. 13:15) Kerina persembahen si ibereken arah ukur nari erban meriah ukur Dibatata. (Bandingken 2 Korinti 9:7.) Nggit kita ngelakoken si e perban meriah ukurta mereken si mehulina man Jahwe.

17-18. Kai si arus lit bas kam gelah banci iperidiken, ras engkai? (Kuan-kuanen 3:3-6)

¹⁷ Sanga ibanndu kemajun secara rohani guna iperidiken, pasti adapindu erbage-bage tentangen. Banci saja lit kalak si nokohi kam perban kinitekenndu. Lit ka si nentang kam ntah pe isiksana kam. (2 Tim. 3:12) Banci saja enggo erjuang kel kam mpengadi kebiasan si salah, tapi mon-mon gagal kam. Ntah, banci saja la kam sabar ras stres kam perban tempa-tempa ndekah denga maka banci kam iperidiken. Kai si arus lit bas kam gelah banci megenggeng? Arus keleng atendu Jahwe.

¹⁸ Kekelengenndu man Jahwe ndauh ergan asangken kai pe si lit bas kam. (Baca Kuan-kuanen 3:3-6.) Adi mbelin kel kekelengenndu man Jahwe, e banci nampati kam ngasup ngadapi mbue tentangen. Bas Pustaka, rusur ituriken kerna kekelengen Jahwe si setia man umatNa. Kekelengen si setia ertina labo pernah tadingkenNa umatNa ntah pe ngadi Ia engkelengi kalak e. (Ms. 100:5) Kam iban mirip ras Dibata. (Kej. 1:26) Uga carandu ngusih kekelengen si bage?

19. Uga carandu mpebages pengerganndu man kerina si ilakoken Jahwe man bandu? (Galati 2:20)

¹⁹ Ngata bujurlah kam man Jahwe. (1 Tes. 5:18) Ukurilah penungkunen enda tiap wari: ‘Uga cara Jahwe ncidahken kekelengenNa man bangku?’ Kenca si e ngata bujurlah man baNa arah toto, turiken alu jelas kai si enggo lakokenNa man bandu. Ingetlah maka bali bagi si ikataken Rasul Paulus, ilakoken Jahwe si mehuli man bandu perban keleng ateNa kam. (Baca Galati 2:20.) Ukurilah penungkunen enda: ‘Nggit nge  aku engkelengi Jahwe?’ Kekelengen man Jahwe banci nampati kam gelah terus erjuang bas ngadapi godan ras berhasil ngadapi tentangen. Kekelengen e pe banci ngiahken kam erban kegiaten rohani alu ratur. Alu bage, banci buktikenndu kekelengenndu man Jahwe tiap wari.

20. Kai si arus lakokenndu guna mbaktiken geluhndu man Jahwe, janah engkai maka penting kel keputusen e?

²⁰ Adi enggo reh bagesna kekelengenndu man Jahwe, teriahken me kam guna mbaktiken geluhndu man baNa arah toto. Ingetlah, sanga ibaktikenndu geluhndu man Jahwe, banci datndu arapen si luar biasa eme jadi umatNa seh rasa lalap. Sanga baktikenndu geluhndu, enggo erjanji kam guna ngelayani Ia bas paksa senang ras susah. Janji e lanai perlu ulihindu ngasa ndigan pe, sekali ngenca seh rasa lalap. Payo, sanga sibaktiken geluhta man Jahwe enggo siban keputusen si seh kel pentingna. Tapi cuba ukuri enda: Pasti melala keputusen si arus ibanndu, piga-piga keputusen e mehuli kel. Tapi, labo lit keputusen si terulin asangken mbaktiken dirindu man Jahwe. (Ms. 50:14) Pasti usahaken Setan gelah lanai atendu keleng Jahwe janah ngarap ia gelah lanai kam setia man baNa. Tapi ula ndigan pe pediat Setan si menang! (Jop 27:5) Kekelengenndu man Jahwe banci nampati kam guna nepati janjindu ngelayani Jahwe seh rasa lalap janah reh rembakna ras Bapakndu si i surga.

21. Engkai maka banci sikataken iperidiken labo pendungi, tapi bena-benana denga?

²¹ Kenca baktikenndu geluhndu man Jahwe, katakenlah man pertua-pertua bas runggunndu maka enggo siap kam guna iperidiken. Ingetlah, iperidiken labo pendungi tapi bena-benana denga guna ngelayani Jahwe rasa lalap. Emaka pegegehilah kekelengenndu man Jahwe. Banlah cita-cita guna mpebelin kekelengenndu tiap wari. Alu bage, kekelengenndu e banci ngiahken kam guna iperidiken. Pasti luar biasa kel pagi sanga kam iperidiken. Tapi si e bena-benana denga. Mbera-mbera kekelengenndu man Jahwe ras anakNa terus reh belinna seh rasa lalap!