1-2. Biasana kai nge siidah ras sibegi adi lit kalak si iperidiken, janah kai kari sibahas bas artikel enda?

 PERNAH nge idahndu sada kelompok kalak si nandangi iperidiken? Banci begindu jawap kalak e dua penungkunen sope kalak e iperidiken. Idahndu maka bangga kel keluargana ras teman-temanna ngidah kalak e. Sanga kalak e enggo iperidiken, begindu sora tepuk tan janah idahndu maka meriah kel ukur kalak si tepuk tan e. Tiap minggu, lit rata-rata ribun kalak si mbaktiken dirina man Jahwe janah iperidiken jadi sekalak Saksi Jahwe.

² Adi kam uga? Lit nge sura-surandu iperidiken? Adi lit, e ertina sangana kam ‘ndarami Jahwe.’ Pasti meriah ukurNa perban beda kel kam ras enterem jelma bas doni si jahat enda. (Ms. 14:1, 2) Artikel enda itulis man bandu, la soal kam enggo metua ntah pe nguda denga. Tapi, amin pe kita enggo iperidiken, artikel enda banci mpepaguh tekadta guna ngelayani Jahwe seh rasa lalap. Emaka, mari sibahas telu alasen engkai maka nggit kita ngelayani Jahwe.

3. Engkai maka umat Jahwe engkelengi kebenaren? (Masmur 119:128, 163)

³ Iperentahken Jahwe umatNa guna ‘engkelengi kebenaren.’ (Sak. 8:19) Iiahken Jesus murid-muridna guna ndarami kai si benar. (Mat. 5:6) E ertina arus mbelin kel sura-surata guna ngelakoken kai si benar, mehuli, ras badia i lebe-lebe Dibata. Keleng nge atendu kebenaren? Tek kami pasti keleng atendu. Segat atendu ranan si la tuhu ras kerina si salah bage pe si jahat. (Baca Masmur 119:128, 163.) Situhuna, kalak si mbelasken ranan si la tuhu ngusih Setan, penguasa doni enda. (Joh. 8:44; 12:31) Salah sada sura-sura Setan eme guna ncedai gelar Dibata  Jahwe si badia. Enggo isebarken Setan ranan si la tuhu kerna Dibata mulai pemberontaken bas Taman Eden. Usahakenna gelah iakap kalak maka Jahwe e Penguasa si mentingken bana ras la jujur, si la mereken kai si mehuli man manusia. (Kej. 3:1, 4, 5) Bual si ikataken Setan kerna Jahwe e terus erban kalak erpengakap maka Jahwe e jahat. Emaka, nukah akap Setan mpengaruhi kalak si la ‘engkelengi kebenaren’ guna ngelakoken kerina si la benar ras si jahat.​—Rom. 1:25-31.

4. Kai buktina maka Jahwe eme “Dibata kebenaren”? (Nen ka gambar.)

⁴ Jahwe eme “Dibata kebenaren,” janah mbue kel ajarkenNa kerna kebenaren man kalak si engkelengi Ia. (Ms. 31:5) Alu bage, sampati Jahwe kalak e gelah lanai itipu Setan. Ajari Jahwe ka umatNa gelah jujur ras ngelakoken kai si benar. Si e nampati kalak e gelah lit erga dirina ras igejapkenna kedamen bas pusuhna. (Kua. 13:5, 6) Enggo nge gejapkenndu si e kerina sanga kam erlajar Pustaka? Enggo ipelajarindu maka perentah Jahwe me si mehulina man kerina kalak ras man bandu. (Ms. 77:13) Emaka, nggit kam ngelakoken kai si benar menurut Dibata. (Mat. 6:33) Merhat kam mpeseh kebenaren e man kalak si deban, janah buktikenndu atendu maka kai si ikataken Setan kerna Dibatata Jahwe labo tuhu. Uga carandu ngelakokenca?

5. Uga carandu mbuktiken maka keleng atendu kebenaren?

⁵ Banci buktikenndu arah pergeluhndu maka keleng atendu kebenaren janah la kam tek man kerina bual Setan. Banci ka buktikenndu maka Jahwe atendu si jadi Penguasandu janah lakokenndu atendu kai si benar menurut Ia. Uga carana? Arus baktikenndu dirindu man Jahwe arah toto, kenca si e iperidiken gelah banci idah kalak maka enggo baktikenndu dirindu. Payo, kekelengenndu man kebenaren banci ngiahken kam guna iperidiken.

6. Bagi si ikataken bas Masmur 45:4, engkai maka keleng atendu Jesus Kristus?

⁶ Engkai maka keleng atendu Jesus Kristus? Cuba ukuri piga-piga alasen si mehuli si lit bas Masmur 45:4. (Baca.) Keleng ate Jesus kebenaren, keadilen,  janah meteruk ukur ia. Adi keleng atendu kebenaren ras keadilen, pasti keleng ka atendu Jesus Kristus perban pang kel ia ersaksi kerna kebenaren. (Joh. 18:37) Selain si e, ajari Jesus kalak gelah meteruk ukur. Uga carana ngelakokenca?

7. Kai kapndu si menarik arah sipat Jesus si meteruk ukur?

⁷ Ibuktiken Jesus maka jadi atena sipat meteruk ukur arah perbahanenna. Misalna, lalap imuliakenna Bapakna, labo dirina. (Mrk. 10:17, 18; Joh. 5:19) Uga nge perasanndu kerna sipat Jesus si meteruk ukur? Si e pasti ngiahken kam guna engkelengi ras ngikutken ia. Engkai maka meteruk ukur Jesus? Perban keleng atena Bapakna si meteruk ukur janah usihna atena. (Ms. 18:35; Heb. 1:3) Pasti keleng kel ateta Jesus perban usihna sipat-sipat Jahwe alu sempurna.

8. Engkai meriah ukurta perban Jesus Rajata?

⁸ Pasti meriah siakap perban Jesus Rajata. Engkai? Perban ia me Peminpin si mehulina. Enggo ilatih Jahwe ia janah ilantikNa jadi Raja. (Jes. 50:4, 5) Keleng kel ate Jesus kita emaka nggit ia mate guna kita. (Joh. 13:1) Perban Jesus Rajata, enggo kin arusna keleng ateta Ia. Ijelasken Jesus maka kalak situhu-tuhu engkelengi ia, si igelarina teman-temanna, nggit ngelakoken perentahna. (Joh. 14:15; 15:14, 15) Luar biasa kel hak istimewa banci jadi teman Anak Dibata.

9. Kai si seri arah peridin Kristus ras peridin pengikutna?

⁹ Salah sada perentah Jesus eme pengikutna arus iperidiken. (Mat. 28:19, 20) Enggo ibanna usihen kerna si e, ia pe iperidiken. Memang, lit bedana peridin Jesus ras pengikutna, tapi lit ka si seri. (Nen kotak “ Kai Bedana Peridin Jesus ras Peridin Pengikutna?”) Sanga Jesus iperidiken, buktikenna maka enggo siap ia ngelakoken peraten Bapakna. (Heb. 10:7) Bage ka pe sanga pengikut Kristus mbaktiken diri man Jahwe ras iperidiken, ibuktiken kalak e maka si pentingna bas geluh kalak e eme ngelakoken sura-sura Dibata, labo sura-sura kalak e. Emaka, enggo ikutken kalak e usihen arah Jesus.

10. Kai saja alasenndu engkelengi Jesus, janah si e ngiahken kam ngelakoken kai?

¹⁰ Tek kam maka Jesus eme Anak Dibata si tonggal, janah ia me Raja si ilantik Dibata guna merentah kita. Tehndu maka Jesus e meteruk ukur janah usihna Bapakna alu sempurna. Enggo pelajarindu maka pernah berena man kalak si melihe, apulina kalak si kitik ukurna, janah pepalemna kalak si sakit. (Mat. 14:14-21) Enggo idahndu uga ia minpin runggun-runggun Kristen si gundari. (Mat. 23:10) Selain si e, enggo tehndu maka bas wari si pepagi, lakokenna terbuen selaku Raja bas Kerajan Dibata. Uga carandu mbuktiken maka keleng atendu ia? Alu ngusih ia. (Joh. 14:21) Salah sada carandu guna ngusih ia eme alu mbaktiken dirindu man Jahwe janah iperidiken.

11. Menurutndu kai alasen si pentingna guna iperidiken, janah engkai?

¹¹ Kai alasen si pentingna guna iperidiken? Jawapenna lit bas kata-kata Jesus sanga iturikenna perentah si mbelinna arah Dibata. Nina, “Arus kelengindu Jahwe Dibatandu alu kerina pusuhndu, kegeluhenndu, perukurenndu, ras gegehndu.” (Mrk. 12:30) Bage nge kekelengenndu man Jahwe?

12. Engkai maka keleng atendu Jahwe? (Nen ka gambar.)

 ¹² Mbue kel alasenta engkelengi Jahwe. Contohna, enggo tehndu maka Ia me “sumber kegeluhen” ras Ia me Si Mereken “kerina pemere si mehuli ras hadiah si sempurna.” (Ms. 36:9; Jak. 1:17) Kerina si mehuli si banci sinanami gundari, rehna arah Dibatata si perkeleng ras nggit mere.

13. Engkai maka tebusen e pemere si seh kel ergana?

¹³ Tebusen eme pemere si seh kel ergana arah Jahwe. Engkai? Cuba ukuri uga rembakna hubungen Jahwe ras AnakNa. Bagenda nina Jesus, “Keleng ate Bapak aku” janah “keleng ateku Bapak.” (Joh. 10:17; 14:31) Hubungen antara Jahwe ras Jesus terus reh rembakna perban Jahwe ras Jesus enggo ras-ras miliaren tahun dekahna. (Kua. 8:22, 23, 30) Cuba ukuri uga suina akap Dibata sanga pediatNa AnakNa ngenanami kesusahen janah mate guna kita. Keleng kel ate Jahwe kerina jelma, termasuk kam. Emaka, nggit Ia mereken Anak si ikelengiNa jadi tebusen gelah kam ras kalak si deban banci nggeluh rasa lalap. (Joh. 3:16; Gal. 2:20) Enda me alasen si mbelinna engkai maka keleng ateta Dibata.

14. Kai pilihen si mehulina si banci ibanndu?

¹⁴ Adi reh buena si ipelajarindu kerna Jahwe, reh kelengna atendu Ia. Pasti  merhat kam reh rembakna ras Ia seh rasa lalap, janah banci lakokenndu si e. Ikataken Jahwe man bandu kai si erban meriah ukurNa. (Kua. 23:15, 16) Banci banndu meriah ukur Jahwe labo saja arah rananndu, tapi arah perbahanenndu pe. Dalan geluhndu banci mbuktiken maka keleng kel atendu Jahwe. (1 Joh. 5:3) E me pilihen si mehulina si banci banndu bas geluhndu.

15. Uga carandu mbuktiken kekelengenndu man Jahwe?

¹⁵ Uga carandu mbuktiken kekelengenndu man Jahwe? Si pertama, ertotolah guna mbaktiken dirindu man Dibata si benar. (Ms. 40:8) Kenca si e, buktiken pembaktinndu e i lebe-lebe jelma si enterem alu iperidiken. Bagi si enggo sibahas bas artikel enda, iperidiken eme keputusen si seh kel pentingna janah erban meriah ukur. Kenca iperidiken, kam enggo nggeluh man Jahwe, lanai man dirindu. (Rom. 14:8; 1 Pet. 4:1, 2) Memang enda sada keputusen si mbelin si arus ibanndu. Tapi, keputusen e banci erban kam ndatken kegeluhen si mehulina. Engkai maka bage?

16. Bagi si ikataken bas Masmur 41:12, pasu-pasu kai pagi si bereken Jahwe man kalak si mbaktiken geluhna man baNa?

¹⁶ Jahwe me Dibata si melumbarna. La soal kai si berekenndu man baNa, pasti lalap buen si berekenNa man bandu. (Mrk. 10:29, 30) Iban Jahwe pagi geluhndu ermeriah ukur, lit tujun geluhndu, janah puas akapndu. Gundari pe, banci gejapkenndu si e amin gia kam nggeluh bas doni si jahat enda denga. Peridin e bena-benana denga nge, labo pendungina. Kenca kam iperidiken, banci terus layanindu Jahwe, Bapak si ikelengindu seh rasa lalap. Kekelengen antara kam ras Jahwe banci terus reh belinna. Selain si e, banci kam nggeluh rasa lalap bali bagi Ia.​—Baca Masmur 41:12.

17. Kai si banci berekenndu man Jahwe, si lenga lit bas Ia?

¹⁷ Sedekah enda, enggo ibereken Jahwe  man bandu kerina si mehuli ras si erban meriah ukurndu. Sanga baktikenndu geluhndu man Dibata janah iperidiken, iberekenndu kai situhu-tuhu meherga man baNa eme kesetianndu bas ngelayani Ia. Si e me si lenga lit bas Si Mpuna langit ras doni. (Jop 1:8; 41:11; Kua. 27:11) Keputusen si mehulina si banci banndu bas geluhndu eme iperidiken. Payo, alasen si mbelinna kam iperidiken eme kekelengenndu man Jahwe.

18. Penungkunen kai saja si banci ukurindu?

¹⁸ Adi bage, enggo nge kam siap guna iperidiken? Kam ngenca si banci njawapsa. Tapi, lit gunana adi ukurindu penungkunen enda: ‘Engkai maka aku lenga iperidiken?’ (Perb. 8:36) Ingetlah telu alasen si enggo sibahas ndai. Si pertama, keleng atendu kebenaren. Si peduaken, keleng atendu Jesus Kristus. Si peteluken ras si pentingna, keleng atendu Jahwe. Ukurilah penungkunen enda: ‘Tertima-tima nge aku ngidah kerina kalak ncakapken ras ngelakoken kai si benar? Merhat nge aku Anak Dibata si jadi Rajaku, janah merhat nge aku ngusih ia? Merhat nge aku erban meriah ukur Jahwe alu ngelayani Ia?’ Adi jawapenndu ue, engkai maka kam lenga iperidiken? Kai nari si man timanndu?​—Perb. 16:33.

19. Engkai maka arusna la kam ragu guna iperidiken? Ban perumpamanna. (Johanes 4:34)

¹⁹ Adi ragu kam guna iperidiken, cuba ukuri perumpaman si iban Jesus. (Baca Johanes 4:34.) Bas perumpaman e, ipeseri Jesus ngelakoken peraten Bapakna bali ras pangan. Engkai? Perban pangan erguna man banta. Iteh Jesus maka kerina si isuruh Jahwe silakoken erguna ka banta. Labo ipindo Jahwe silakoken kai si mbahayaken kita. Ate Jahwe iperidiken min kita. (Perb. 2:38) Emaka, adi iperidiken kam, pasti datndu gunana. Adi itamaken pangan si entabehna bas doni enda i lebe-lebendu, pasti la kam ragu man pangan e. Adi bage, engkai maka ragu denga kam iperidiken?

20. Kai kari sibahas bas artikel seterusna?

²⁰ Banci saja enterem si lenga iperidiken perban lenga kapna ia siap iperidiken. Tapi situhuna, keputusen guna mbaktiken dirindu man Jahwe janah iperidiken eme keputusen si pentingna si banci ibanndu. Emaka perlu ukurindu alu manjar-anjar kerna keputusenndu e, janah perlu waktu ras usaha gelah banci kam siap iperidiken. Tapi adi merhat kam iperidiken, kai si banci lakokenndu gelah siap kam iperidiken? Sibahas kari jawapenna bas artikel seterusna.