1. Kai si iarapken orang tua arah anakna?

 ORANG TUA, iteh kami merhat kam nampati anakndu gelah nandai ras engkelengi Jahwe. Tapi Dibata la banci siidah. Emaka, uga carandu nampati anakndu tuhu-tuhu tek maka Dibata e lit janah banci rembak ras Ia?​—Jak. 4:8.

2. Uga cara orang tua ngajari anakna kerna sipat-sipat Jahwe?

² Cara si pentingna bas nampati anakndu gelah rembak ras Jahwe eme mpelajari Pustaka ras kalak e. (2 Tim. 3:14-17) Tapi, ikataken bas Pustaka maka lit cara si deban. Bas buku Kuan-kuanen, sekalak perbapan ngingetken anakna gelah ula lupa kerna sipat-sipat Jahwe si teridah arah ciptanNa. (Kua. 3:19-21) Sibahas kari piga-piga cara si banci ilakoken orang tua bas nggunaken ciptan guna nampati anakna erlajar kerna sipat-sipat Jahwe.

3. Orang tua perlu nampati anakna ngelakoken kai?

³ Bas Pustaka ikataken maka ‘mulai kin doni iciptaken, sipat-sipat Dibata si la teridah, jelas kap teridah arah ciptanNa.’ (Rom. 1:20) Orang tua, banci saja meriah kapndu ras anakndu ku ingan-ingan si lit i darat ruangen. Gunakenlah kesempaten e nampati anakndu mpelajari sipat-sipat Jahwe si luar biasa “arah ciptanNa.” Uga carana? Mari siperdiateken usihen arah Jesus.

4. Uga cara Jesus nggunaken ciptan sanga ngajari murid-muridna? (Lukas 12:24, 27-30)

⁴ Rusur gunaken Jesus ciptan sanga ia ngajar. Bas sada wari, isuruhna iperdiateken murid-muridna perik kak ras bunga lili. (Baca Lukas 12:24, 27-30, cataten i teruh.)  Situhuna, banci nge ituriken Jesus kerna binatang ntah pe sinuan-sinuan si deban. Tapi ipilihna perik kak ras bunga lili si enggo itandai murid-muridna. Banci saja, enggo pernah idah murid-muridna perik kak bage pe bunga lili e. Banci saja ituduh Jesus perik e ntah pe bunga e sanga turikenna kerna si e. Kenca si e, ajarkenna man murid-muridna pelajaren si penting kerna sipat Bapakna si i surga si nggit mere ras mehuli eme: Pasti bereken Jahwe pangan ras paken man umatNa si setia, bali bagi si ilakokenNa man perik kak ras bunga lili e.

5. Uga cara orang tua nggunaken ciptan ngajari anakna kerna Jahwe?

⁵ Orang tua, sanga ajarindu anakndu, uga carandu ngusih Jesus? Banci katakenndu man anakndu kerna ciptan si menarik akapndu. Contohna, binatang ntah pe sinuan-sinuan tertentu. Kenca si e, jelasken ka kai si banci ipelajarindu kerna Jahwe arah je nari. Dung e, sungkun ia kai binatang ntah pe sinuan-sinuan si menarik akapna. Adi cakapkenndu kerna kai si menarik akap anakndu, banci saja reh tutusna atena megiken kai si ajarkenndu kerna Jahwe.

6. Kai si banci sipelajari arah usihen orang tua Christopher?

⁶ Situhuna, labo perlu melala waktu si igunaken orang tua bas mpelajari kerna binatang-binatang ntah pe sinuan-sinuan guna ngajarken kerna Jahwe man anakna. Jesus pe labo mbue kel keterangen si berekenna kerna uga perik kak man ntah pe uga perturah bunga lili. Amin pe meriah akap anakndu mpelajari terbuen kerna ciptan Jahwe, mon-mon labo perlu melala si ijelaskenndu kerna ciptan guna nampati anakndu ngangkai kai si iajarkenndu. Perdiateken kai si ikataken turang senina si gelarna Christopher. Bagenda nina kerna pengalamenna sanga ia kitik denga, “Labo mbuesa mamakku ngerana kerna ciptan si lit i sekeliling kami guna nampati kami ngergai ciptan e. Contohna, sanga kami ku daerah pegunungen, nina mamak, ‘Nen min, galang kel gunung-gunung e janah mejile ka. Luar biasa kel Jahwe e me?’ Ntah sanga kami i pantai, nina mamak, ‘Nen min gegehna ombak ah, pasti megegeh kel Dibata e me?’” Nina Christopher, “Amin pe e ngenca si ikataken mamak, tapi mbelin kel pengaruhna man kami.”

7. Uga kam banci ngelatih anakndu ngukuri ciptan?

⁷ Sanga anakndu reh belinna, banci mulai latihndu kalak e guna ngukuri terbuen kerna ciptan ras erlajar kerna sipat-sipat Jahwe. Banci cakapkenndu sada ciptan Jahwe, kenca si e sungkun anakndu, “Kai si pelajarindu kerna Jahwe arah ciptan e?” Banci saja sengget kam megi kai si ikataken kalak e.​—Mat. 21:16.

8. Kesempaten kai nge si lit man orang tua bas Israel sanga kalak e “bas perdalanen”?

⁸ Iperentahken Jahwe man orang tua si lit bas Israel guna ngajari anakna kerna undang-undangNa sanga kalak e “bas perdalanen.” (Ul. 11:19) Sanga kalak e erdalan ngelewati kuta-kuta si lit bas Israel, banci idah kalak e erbage-bage binatang, perik, ras bunga. Banci gunaken orang tua kesempaten e ncakapken kerna ciptan Jahwe man anakna. Kam orang tua, gundari pe lit kesempatenndu nggunaken ciptan bas ngajari anakndu. Mari sibahas  uga piga-piga orang tua enggo ngelakoken si e.

9. Kai si banci pelajarindu arah Punitha ras Katya?

⁹ Sekalak pernanden si gelarna Punitha, si tading i kota si galang bas India ngataken, “Sanga idahi kami keluarga kami si tading bas kuta, gunaken kami kesempaten e ngajari anak-anak kami kerna ciptan Jahwe si luar biasa. Kuakap, reh buena si banci ipelajari anak-anakku kerna ciptan sanga kalak e ndauh arah ingan si enterem jelma ras ingan si macat.” Orang tua, banci saja lalap pagi inget anakndu sanga ras-ras kena bas ingan si mejile. Katya, sekalak turang senina arah Moldova ngataken, “Si ndekahna kuinget eme pengalamenku sanga aku kitik denga, paksa aku ras orang tuaku lawes ku daerah kuta-kuta. Ngata bujur kel aku man kalak e perban ajarina aku mulai kitik-kitik nari guna mperdiateken kai si iciptaken Jahwe ras mpelajari kerna Ia arah ciptanNa.”

10. Kai si banci ilakoken orang tua adi mesera kapna lawes ku daerah kuta-kuta? (Nen kotak “ Penampat man Orang Tua.”)

¹⁰ Adi mesera kapndu lawes ku ingan si ndauh arah kota, kai si banci lakokenndu? Amol, si tading i India ngataken, “Bas inganku tading, orang tua ndekah maka mulih erdahin janah mbue biayana lawes ku ingan si ndauh arah kota. Tapi, banci idah kami ciptan Jahwe ras cakapken kami kerna sipat-sipat Jahwe sanga kami bas sada taman si kitik ntah pe bas balkon sada bangunen.” Adi megermet kam, bas deher rumahndu banci saja mbue ciptan si banci cidahkenndu man anakndu. (Ms. 104:24) Banci saja idahndu perik-perik, serangga, sinuan-sinuan, ras si debanna. Karina, si tading i Jerman ngataken, “Meriah akap  mamakku ngidah bunga. Emaka sanga kitik denga aku rusur cidahkenna bunga-bunga si mejile sanga kami ras-ras erdalan.” Orang tua, banci ka gunakenndu melala video ras publikasi kerna ciptan si enggo isikapken organisasita guna ngajari anakndu. La soal i ja pe kam tading, banci sampatindu anakndu mperdiateken ciptan Dibata. Gundari, mari sibahas piga-piga sipat Jahwe si banci cakapkenndu man anakndu.

11. Uga orang tua banci nampati anakna nggejapken kekelengen Jahwe?

¹¹ Guna nampati anakndu nggejapken kekelengen Jahwe, banci ceritakenndu kerna melala binatang-binatang si engkelengi anakna. (Mat. 23:37) Banci ka cakapkenndu kerna erbage-bage ciptan si luar biasa. Karina, si ituriken ndai ngataken, “Sanga kami erdalan, iahken mamak aku mperdiateken uga tiap bunga beda ras bunga si deban, ras uga bunga si mejile e mbuktiken kekelengen Jahwe. Ertahun-tahun kenca si e, terus denga kuperdiateken bunga-bunga, jenis-jenisna, bentukna, ras warnana. Bunga-bunga e lalap ngingetken aku uga kelengna ate Jahwe man banta.”

12. Uga orang tua banci nampati anakna ngangkai kepentaren Dibata? (Masmur 139:14) (Nen ka gambar.)

¹² Sampatilah anakndu ngangkai kepentaren Dibata. Jahwe ndauh pentaren asangken kita. (Rom. 11:33) Contohna, banci cakapkenndu uga lau si berubah jadi embun, janah uga embun e nukah pindah arah sada ingan ku ingan si deban. (Jop 38:36, 37) Banci ka cakapkenndu kerna bentuk daging jelma si luar biasa. (Baca Masmur 139:14.) Cuba perdiateken uga sekalak perbapan si gelarna Vladimir ngelakoken si e. Bagenda nina, “Bas sada wari, anakku ndabuh arah sepedana janah luka ia. Kenca piga-piga wari, malem lukana e. Aku ras diberuku njelasken maka iban Jahwe dagingta banci mpepalem bana. Icakapken kami ka maka la lit ciptan jelma si bage. Contohna, adi tabraken sada motor, labo banci motor e mpekena bana.  Pengalamen e nampati anak kami ngangkai kepentaren Jahwe.”

13. Uga orang tua banci nampati anakna meteh kuasa Dibata? (Jesaya 40:26)

¹³ Iahken Jahwe kita ngenen langit janah ngukuri uga luar biasana kuasaNa erban kerina bintang tetap bas inganna. (Baca Jesaya 40:26.) Kam pe banci iahkenndu anakndu ngenen langit sanga berngi ras ngukurisa. Bagenda nina turang seninata arah Taiwan si gelarna Tingting, “Sanga aku kitik denga, pernah iajak mamak aku erkemah. Banci idah kami melala bintang i langit sanga berngi perban i je la lit cahaya bagi bas kota. Paksa si e, kuatir aku nandangi tekanen temanku janah mbiar aku lanai kari banci aku setia ngelayani Jahwe. Iahken mamak aku ngukuri kuasa Jahwe si ipakeNa bas nciptaken kerina bintang bage pe guna nginget maka banci ipakeNa kuasaNa e nampati aku ngadapi tekanen. Kenca kuperdiateken ciptan, teriahken aku guna nandai Jahwe terdeheren janah ertekad aku gelah tetap setia ngelayani Ia.”

14. Uga orang tua banci nggunaken ciptan nampati anakna nandai Jahwe selaku Dibata si ermeriah ukur?

¹⁴ Ciptan Jahwe ncidahken maka Ia Dibata si ermeriah ukur janah lit selera humorNa. Enggo iperdiateken ilmuwan maka buen binatang meriah kapna main-main, termasuk perik-perik ras nurung. (Jop 40:20) Pernah nge tawa anakndu sanga idahna binatang main-main? Banci saja tawa kalak e sanga idahna anak kucing main bola-bola plastik bas halamen, ntah idahna anak-anak biang main-main. Sanga tawa kalak e ngidah binatang-binatang e, ingetkenlah kalak e maka kita ngelayani Dibata si ermeriah ukur.​—1 Tim. 1:11.

15. Kai si banci nampati orang tua guna meteh perukuren anakna? (Kuan-kuanen 20:5) (Nen ka gambar.)

¹⁵ Mon-mon, mesera akap anak-anak nuriken masalahna man orang tuana. Adi bage si adapindu, perlu gargarindu  isi pusuh anakndu. (Baca Kuan-kuanen 20:5.) Piga-piga orang tua, reh nukahna kapna ngelakoken si e sanga kalak e erdalan-dalan ras anakna ngenen pemandangen alam si mejile. Engkai? Salah sada alasenna eme la melala si ngganggu percakapen kalak e. Sekalak perbapan arah Taiwan si gelarna Masahiko nuriken alasen si deban. Nina, “Sanga kami naik gunung ntah pe erdalan i pinggir pantai biasana reh santaina akap anak kami. Emaka, reh nukahna kap kami ndeher ras kalak e bage pe meteh kai si ukuri kalak e.” Katya, si enggo ituriken ndai ngataken, “Biasana, kenca mulih aku sekolah, iajak mamak aku ku taman si mejile. Perban suasanana santai, reh nukahna kuakap nuriken kai si terjadi bas sekolah man mamak ntah pe kai si erban aku mbiar.”

16. Uga keluarga-keluarga banci ermeriah ukur sanga ras-ras kalak e mperdiateken ciptan Jahwe?

¹⁶ Keluarga-keluarga pe banci ermeriah ukur sanga ras-ras kalak e mperdiateken ciptan Jahwe. Enda banci erban kalak e reh kompakna. Nina Pustaka, “Lit waktuna tawa” janah “lit waktuna lompat-lompat.” (Peng. 3:1, 4, cataten i teruh.) Enggo iban Jahwe melala ingan si mejile bas doni enda si banci erban meriah ukurta. Melala keluarga si meriah kapna ras-ras ngenen pemandangen si mejile. Misalna, ku daerah kuta-kuta, pegunungen, ntah pe ku pantai. Lit ka anak-anak si meriah kapna kiam-kiam ras main-main bas taman, mperdiateken binatang-binatang, ntah pe erlangi bas sungai, danau, ntah pe laut. Melala kel kesempatenta guna ngenen pemandangen alam si mejile ras erbage-bage ciptan Jahwe.

17. Engkai maka arus isampati orang tua anakna mperdiateken ciptan Dibata?

¹⁷ Bas doni si mbaru pagi, orang tua ras anak-anak banci mperdiateken ciptan Jahwe alu cara si terulin. La bagi gundari, lanai pagi kita mbiar man binatang-binatang janah binatang-binatang pe lanai mbiar man banta. (Jes. 11:6-9) Rasa lalap pagi lit waktuta mperdiateken ciptan Jahwe. (Ms. 22:26) Tapi kam orang tua, ula timaindu seh ngasa doni si mbaru maka sampatindu anakndu mperdiateken ciptan. Adi gunakenndu ciptan ngajari anakndu kerna Jahwe, banci kalak e sepenggejapen ras Raja Daud, sanga nina, “O Jahwe, . . . la lit si banci ngelakoken bagi si lakokenNdu.”​—Ms. 86:8.