1. Kai nge si iperdiateken enterem kalak sanga tangtangna reh ku perpulungenta? (Nen ka gambar.)

 BAYANGKEN lit sekalak dilaki ras diberuna si tangtangna reh ku perpulungen Saksi-Saksi Jahwe i Bale Kerajan. Kena kel ku pusuh kalak e perban kalak e ialo-alo janah idah kalak e maka kerina turang senina si lit i je sikeleng-kelengen. Sanga bas perdalanen mulih, bagenda nina diberuna man dilakina, ‘Beda kel kalak e ras kalak si deban. Meriah kel kuakap ras kalak e.’

2. Kai si erban piga-piga kalak tertuktuk?

² Kekelengen si lit bas umat Jahwe luar biasa kel. Tapi Saksi-Saksi Jahwe labo sempurna. (1 Joh. 1:8) Emaka adi reh bagesna sitandai kalak si lit bas runggun, banci saja reh jelasna siidah kelemahen kalak e. (Rom. 3:23) Tapi sayang kel, piga-piga kalak pediatna kelemahen kalak si deban erban ia tertuktuk janah dungna ngadi ngelayani Jahwe.

3. Ja nari teh kalak ise pengikut Jesus situhu-tuhu? (Johanes 13:34, 35)

³ Cuba perdiateken ka mulihi ayat tema bas artikel enda. (Baca Johanes 13:34, 35.) Banci teh kalak maka kita pengikut Kristus situhu-tuhu perban sicidahken kekelengen si la mentingken bana man sada ras si debanna, labo perban kita sempurna. Perdiateken ka maka labo ikataken Jesus bagenda, ‘Gelah teh kena maka kena kap murid-muridku.’ Tapi ikatakenna, “Kerina kalak meteh maka kena kap murid-muridku.” Emaka, iajarken Jesus maka kerina kalak banci ngidah alu jelas ise pengikutna situhu-tuhu, la soal ia bagin arah runggun ntah lang.

4. Penungkunen kai si banci saja isungkun kalak si labo Saksi Jahwe?

⁴ Banci saja piga-piga kalak si labo Saksi Jahwe tersungkun-sungkun  bagenda: ‘Engkai maka kekelengen e jadi tanda pengikut Jesus situhu-tuhu? Uga cara Jesus mbuktiken kekelengenna man rasul-rasulna? Uga carata ngusih Jesus gundari?’ Amin pe kita enggo Saksi Jahwe, perlu denga siukuri penungkunen-penungkunen e. E banci nampati kita gelah reh bagesna kekelengenta, khususna sanga ngadapi kelemahen kalak si deban.​—Ep. 5:2.

5. Kai maksud kata-kata Jesus si lit bas Johanes 15:12, 13?

⁵ Jelas kel ikataken Jesus maka tanda pengikutna eme kekelengen. (Baca Johanes 15:12, 13.) Perdiateken kai nina Jesus man murid-muridna, “Sikeleng-kelengenlah kena, bagi aku enggo engkelengi kena.” Kai maksud Jesus? Bagi si ijelaskenna selanjutna, arus icidahken kalak e kekelengen si nggit erkorban, si banci ngiahken kalak Kristen nggit mate guna turang seninana. b

6. Uga Pustaka nuriken maka penting kel kekelengen?

⁶ Ikataken bas Pustaka maka penting kel kekelengen. Misalna, bagi si ikataken bas ayat-ayat enda: “Dibata e kekelengen.” (1 Joh. 4:8) “Arus kelengindu kalak si deban bagi kam engkelengi dirindu.” (Mat. 22:39) “Kekelengen nutupi melala dosa.” (1 Pet. 4:8) “Kekelengen e la erkeri-kerin.” (1 Kor. 13:8) Enterem kalak meriah kapna mbaca ayat e. Arah ayat-ayat e ras ayat-ayat si debanna, sipelajari maka penting kel mpebelin ras ncidahken sipat si mejile enda.

7. Engkai maka labo ndigan pe banci iban Setan kerina jelma ersada ras sikeleng-kelengen?

⁷ Enterem kalak tersungkun-sungkun, ‘Uga nge carana nandai agama si benar?  Kerina agama ngaku-ngaku ngajarken kai si benar, tapi beda-beda ajarenna kerna Dibata.’ Enterem kalak si nungkun bage perban iban Setan melala kel agama palsu. Tapi labo ndigan pe banci iban Setan kerina jelma i sebelang doni ersada perban sikeleng-kelengen. Jahwe ngenca banci erbanca bage. Enda masuk akal perban kekelengen rehna arah Jahwe nari. Emaka kalak si isampati kesah si badiaNa ngenca si banci tuhu-tuhu sikeleng-kelengen. (1 Joh. 4:7) E me sebapna ikataken Jesus maka pengikutna ngenca si banci tuhu-tuhu ncidahken kekelengen si la mentingken bana.

8-9. Uga perasan enterem kalak sanga idahna umat Jahwe sikeleng-kelengen?

⁸ Bali bagi si enggo ikataken Jesus, enterem kalak enggo nandai pengikutna perban kalak e sikeleng-kelengen. Contohna, sekalak turang senina si gelarna Ian, ingetna uga tangtangna ia reh ku pertemuan regional bas stadion i deher rumahna. Piga-piga bulan sope acara e, enggo pernah ia ku stadion e guna nonton acara olahraga. Nina, “Pertemuan regional Saksi-Saksi Jahwe beda kel ras acara olahraga e. Saksi-Saksi Jahwe sopan janah rapi peruisna ras anak-anak kalak e pe tertip.” Nina ka, “Si menarikna kuakap, kalak si lit i je teridah puas ras dame iakapna. Bage min ateku geluhku. Labo kuinget sada pe isi khotbah si ipeseh bas wari e, tapi ndekah kel kuinget perbahanen Saksi-Saksi Jahwe e.” c Enda banci terjadi perban Saksi Jahwe sikeleng-kelengen. Perban keleng ateta turang seninata, mehuli perbahanenta ras siergai kalak e.

⁹ Sekalak turang seninata si gelarna John pe bage kang perasanna sanga tangtangna ia reh ku perpulungen. Nina, “Luar biasa kel kuakap perban mekacar kalak e kerina, bagi malekat kuakap kalak e. Kekelengen e me si erban aku tek maka enggo kudat agama si benar.” d Pengalamen-pengalamen si bage mbuktiken maka Saksi-Saksi Jahwe me kalak Kristen situhu-tuhu.

10. Ndigan khususna perlu sicidahken kekelengen man turang seninata? (Nen ka cataten i teruh.)

¹⁰ Bali bagi si ikataken ndai, kerina kita labo lit si sempurna. Mon-mon, ranan ras perbahanen turang seninata erban kita kecewa. e (Jak. 3:2) Sanga bage si terjadi, i je me kesempatenta ncidahken kekelengen. I bas si e, kai si banci sipelajari arah usihen Jesus?​—Joh. 13:15.

11. Lit sipat si la mehuli bas Jakup ras Johanes, sipat kai e? (Nen ka gambar.)

¹¹ Labo arapken Jesus gelah murid-muridna sempurna. Tapi alu perkeleng sampatina kalak e mpehuli sipat-sipatna gelah banci erban meriah ukur Jahwe. Bas sada wari, dua rasul Jesus eme Jakup ras Johanes mindo man mamakna gelah ipindona man Jesus keduduken si penting bas Kerajan Dibata. (Mat. 20:20, 21) Pemindon kalak e ncidahken maka lit bas kalak e sipat si sombong ras mentingken bana.​—Kua. 16:18.

12. Jakup ras Johanes nge ngenca si pernah ncidahken sipat si la mehuli? Jelasken.

 ¹² Labo Jakup ras Johanes ngenca si ncidahken sipat si la mehuli paksa si e. Cuba perdiateken uga tanggapen rasul-rasul si deban. Bagenda nina bas Pustaka, “Sanga begi murid-murid si sepuluh nari kerna si e, merawa ia man dua kalak si ersenina e.” (Mat. 20:24) Banci saja, Jakup, Johanes, ras rasul-rasul si deban erjengil paksa si e. Banci saja lit si ngataken bagenda, ‘Ise kin kapndu kam maka pindondu keduduken si ganjangen asangken kami? Labo kam ngenca si kerja keras radu ras Jesus. Kami pe lit nge hak kami ndatken keduduken e.’ La siteh kai si iukuri ntah pe si ikataken rasul-rasul si deban. Tapi si pasti, paksa si e la cidahken kalak e kekelengen ras kiniulin man sada ras si debanna.

13. Uga tanggapen Jesus man kelemahen rasul-rasulna? (Matius 20:25-28)

¹³ Uga tanggapen Jesus man kelemahen rasul-rasulna? Labo Jesus merawa. Labo ka katakenna daramina atena rasul-rasul si terulin, si meteruk rukur, ras si banci lalap sikeleng-kelengen. Tapi, lalap sabar Jesus mereken nasehat man kalak e, perban tehna merhat nge kalak e ngelakoken kai si benar. (Baca Matius 20:25-28.) Lalap mehuli perbahanen Jesus man rasul-rasulna amin pe  rusur kalak e ersoal kerna ise si mbelinna.​—Mrk. 9:34; Luk. 22:24.

14. Bas lingkungen si uga nge rasul-rasul Jesus ipebelin?

¹⁴ Banci Jesus sabar man rasul-rasulna perban itehna uga lingkungen kalak e ipebelin. (Joh. 2:24, 25) Bas ingan kalak e ipebelin, penting kel akap peminpin-peminpin agama keduduken. (Mat. 23:6; bandingken video Tempat Duduk Paling Depan di Sinagoga bas keterangen tambahen man Matius 23:6.) Peminpin agama Jahudi pe ia kapna si benarna. f (Luk. 18:9-12) Iangka Jesus maka lingkungen rasul-rasulna mpengaruhi cara rukur kalak e kerna dirina ras kalak si deban. (Kua. 19:11) Labo arapken Jesus gelah murid-muridna sempurna, janah labo ia merawa sanga iban kalak e kesalahen. Itehna maka mehuli nge ukur murid-muridna e. Emaka sabar ia nampati kalak e gelah terus ncidahken kekelengen alu ngambekken sipat sombong ras mentingken bana.

15. Kai si banci sipelajari arah pengalamen Jakup, Johanes, ras rasul-rasul si deban?

¹⁵ Melala si banci sipelajari arah kai si terjadi antara Jakup, Johanes, ras rasul-rasul si deban. Memang, Jakup ras Johanes enggo salah perban pindona keduduken si penting bas Kerajan Dibata. Tapi rasul-rasul si deban pe salah nge perban tanggapen kalak e banci ncedai persadan kalak e. Amin pe bage, tetap denga mehuli Jesus man 12 rasulna janah keleng atena kalak e. Kai pelajarenna man banta? Amin pe lit alasenta merawa nandangi perbahanen kalak, arus siukuri uga tanggapenta nandangi kesalahen ras kelemahenna e. Tetaplah keleng ateta ia ras mehuli man bana. Kai si banci nampati kita? Sanga nembeh kel ateta man turang seninata, banci siukuri penungkunen enda: ‘Engkai maka nembeh kel ateku ia? La kin lah perasanku e ncidahken maka lit sipat si la mehuli si perlu kuperobahi? Lit nge sangana masalah turang senina e? Amin pe benar kuakap aku, banci nge kucidahken kekelengen alu la mpermasalahken kesalahenna?’ Adi terus sicidahken kekelengen man sada ras si debanna, sibuktiken maka kita pengikut Jesus situhu-tuhu.

16. Kai deba nari si banci sipelajari arah Jesus?

¹⁶ Arah usihen Jesus, erlajar kita maka kita pe perlu nandai turang seninata terdeheren. (Kua. 20:5) Memang Jesus banci tehna isi pusuh manusia, tapi kita lang. Amin pe bage, banci kita sabar man turang seninata sanga siidah kelemahen kalak e. (Ep. 4:1, 2; 1 Pet. 3:8) Reh nukahna siakap ngelakoken si e adi siteh latar belakang kalak e. Mari sibahas contohna.

17. Kai manpaatna man sekalak pertua keliling perban nggit ia nandai turang seninana terdeheren?

¹⁷ Sekalak pertua keliling si ngelayani i Afrika Timur nceritaken kerna sekalak turang senina si pernah ijumpaina. Tangtangna, kasar akapna sipat turang senina e. Kai si ilakoken pertua keliling e? Usahakenna nandai turang senina e terdeheren. Alu bage, banci teh pertua  keliling e latar belakang turang senina ndai janah uga e mpengaruhi sipat-sipatna. Emaka, tehna uga belinna usaha turang senina e mperobahi sipat-sipatna ras uga buena perubahen si ibanna. Luar biasa kel kapna. Dungna kompak kalak e duana. Payo, adi reh deherna sitandai turang seninata, reh nukahna siakap engkelengi kalak e.

18. Penungkunen kai saja si perlu siukuri adi lit turang senina si erban kita tersinggung? (Kuan-kuanen 26:20)

¹⁸ Mon-mon, perlu kita ngerana man turang senina si erban kita tersinggung. Tapi sope silakoken si e, perlu siukuri lebe penungkunen-penungkunen enda: ‘Enggo nge kuteh kerina faktana?’ (Kua. 18:13) ‘Sengaja nge ia erban aku tersinggung?’ (Peng. 7:20) ‘Pernah nge bage perbahanenku man kalak si deban?’ (Peng. 7:21, 22) ‘Adi ngerana aku ras turang senina e, banci nge dung masalah e ntah reh belinna?’ (Baca Kuan-kuanen 26:20.) Adi siukuri penungkunen-penungkunen si bage, banci saja sadar kita maka situhuna banci nge silupaken kesalahenna e perban keleng ateta ia.

19. Kai tekadndu?

¹⁹ Selaku sada kelompok, Saksi-Saksi Jahwe enggo terbukti jadi pengikut Jesus situhu-tuhu. Kita pe sekalak-sekalak banci sibuktiken maka kita tuhu-tuhu pengikut Kristus, adi sicidahken kekelengen si la mentingken bana man turang seninata amin pe kalak e la sempurna. Alu bage, banci sisampati kalak si deban meteh maka Saksi Jahwe me agama si benar ras nggit kalak e ersada ras kita guna nembah Jahwe, Dibatata si perkeleng. Emaka, ertekadlah kita guna terus ncidahken kekelengen man sada ras si debanna.